Lajmi i fundit

Policia e Shtetit përmes një njoftimi për mediat të dielën, sqaroi opinionin publik sesi do funksionojë zbatimi i kufizimit të qarkullimit, në kuadër të masave të marra nga qeveria për parandalimin e përhapjes së koronavirusit COVID-19.

Sipas policisë, “do lejohet qarkullimi i mjeteve rrugore private të shtetasve me numër të kufizuar njerëzish 4+1 në të gjithë vendin për t’u kthyer në vendbanimet e tyre, nga ora 00:00 deri në orën 08:00 të datës 16.03.2020, duke respektuar kufizimet higjieno-sanitare të situatës së krijuar. Nuk do lejohet qarkullimi i mjeteve të shërbimit publik, përjashtuar shërbimin taksi 4+1, brenda këtij orari”.

Do të lejohet qarkullimi në oraret 06:00 deri në orën 08:.00 në mëngjes dhe 16:00 deri 17:00 mbasdite i mjeteve (furgonçina, furgonë, minibusë, autobusë) që do bëjnë transportin e personelit dhe punonjësve të bizneseve prodhuese/industriale/ bujqësore, duke marrë masa individuale mbrojtëse sipas kërkesave të dërguara dhe miratuara nga Policia e Shtetit, si dhe qarkullimi i automjeteve për punonjësit e Policisë së Burgjeve, SHPSF-ve, si dhe personeli shëndetësor me mjetet e tyre private për vajtje-ardhje në pune, në oraret e ndërrimit të turneve, kundrejt dokumentit të institucionit ku punojnë.

Do të lejohet lëvizja e mjeteve rrugore që kryejnë transporte të mallrave brenda dhe jashtë vendit për llogari të individëve, firmave dhe kompanive vendas dhe të huaja, furgonçina, furgonë, kamionë të cilët merren me furnizimin e me produkte ushqimore dhe blegtorale dhe që ofrojnë shërbime për qytetarët, mjetet që transportojnë bazë ushqimore për blegtorinë.

Jashtë këtij kufizimi, do të lejohet të qarkullojnë, mjetet rrugore që kryejnë shërbime të emergjencës, ambulanca, zjarrfikëse dhe mjetet e Policisë së Shtetit e ato ushtarake, punonjësit e medies me makina të loguara ose jo, por të pajisura me dokument identifikimi. Autorizimet e mëparshme të lëshuar nga Policia e Shtetit me afat deri në datën 15 mars, iu zgjatet afati.

“Me qëllim kthimin e përgjigjeve në kohë të kërkesave të qytetareve, të cilët kanë nevojë të komunikojnë për probleme të ndyshme në nr 112/129 si dhe në numrat e dedikuar 0694122223 dhe 0694122224, sqarojmë pronarët dhe administratorët e subjekteve që merren me shpërndaje të produkteve ushqimore, apo që ofrojnë shërbime të cilat përdorin furgonçina, forgonë dhe kamionë se nuk kanë nevojë për autorizim për lëvizje, pasi ato janë të përfshira në kategorinë e mjeteve që lejohen të qarkullojnë pa autorizim. Theksojmë se në këto automjete do qarkullojnë vetëm drejtuesit e këtyre automjeteve dhe jo familjarë apo pasagjerë të tjerë”, njoftoi Policia.

“Policia e Shtetit gjen rastin për të apeluar edhe njëherë për të gjithë drejtuesit e automjeteve që të respektojnë me korrektësi kufizimet e vendosura, pasi shkelja e tyre do ndëshkohet me masa të rrepta administrative të reja të vendosura nga qeveria për shkak të situatës, me qëllim parandalimin e përhapjes së COVID 19”, theksohet në njoftimin e Policisë së Shtetit./atsh

Posta Shqiptare uron qytetarët në Ditën e Verës, ndërsa shpreh krenarinë që në këtë situatë të pazakontë është në shërbim të komunitetit.

“Posta Shqiptare uron që ngjyrat dhe tingujt e mrekullueshëm pranverorë të përtërijnë optimizmin, shpresën dhe gëzimin në familjet dhe zemrën e secilit prej jush”, është mesazhi që përcjell Posta Shqiptare.

Aktualisht sportelet e Postës Shqiptare janë hapur në të gjithë territorin e Shqipërisë.
Gjithashtu, Posta Shqiptare ofron shërbimin e shpërndarjes së pensioneve në shtëpi për të gjithë pensionistët.

“Jemi krenarë që së bashku me qendrat spitalore, Forcat e Armatosura të Republikës së Shqipërisë, Policinë e Shtetit, jemi të vetmet institucione shteterore në shërbim të shqiptarëve në këto ditë të vështira”, thuhet në njoftimin e Postës. /atsh

Një mesazh sensibilizimi u ka mbërritur në numrat e tyre të telefonit dhe në adresat e banesës, personave që kanë udhëtuar gjatë 14 ditëve të fundit në zonat e prekura nga koronavirusi i ri, apo COVID-19.

Kryeministri Edi Rama ka publikuar mesazhin që u është dërguar shtetasve të cilët kanë udhëtuar nga Italia drejt Shqipërisë gjatë 14 ditëve të fundit.

“Policia e Shtetit ka identifikuar të gjithë qytetarët shqiptarë që kanë hyrë nga Italia në 14 ditët e fundit. Pasi ka disponuar numrat e telefonit dhe adresat e tyre po vazhdon operacionin e posaçëm të sensibilizimit dhe monitorimit të tyre. Bashkëngjitur është mesazhi që u është dërguar këtyre qytetarëve dhe do të vijojnë trokitjet në dyert e tyre për t’u siguruar se po zbatojnë detyrimin e vetëkarantinimit 14-ditor. Ndjesë 1000 herë, po kjo është luftë dhe ndryshe nuk fitohet! Frikë aspak, kujdes po!” – thekson Rama./atsh

Kryeministri Edi Rama deklaroi sot në mbrëmje se “2 javët e ardhshme do të na tregojnë shkallën e agresivitetit të koronavirusit në gjithë territorin e Shqipërisë”.

Rama tha se “rritja e numrave do të vijojë dhe sot nuk e kemi dot përgjigjen se sa lart do të ngjitet kurba, por çka po bëjmë bashkërisht është e vetmja rrugë për ta penguar rritjen, nuk ka ilaç tjetër dhe këtë do të vazhdojmë të bëjmë”.

“Duhet ta marrim me qetësi dhe kokëfortësi, të stërvitemi për një luftë që nuk do të jetë e shkurtër me zakonet tona të përditshme që na cimbisin në çdo moment. Nuk kemi parë gjë akoma dhe kjo pa asnjë shaka”, tha Rama.

Kryeministri Rama theksoi se testin e koronavirusit nuk mund ta bëjë kushdo, apo ata që kanë shenja të lehta gripi, por vetëm ata që kanë shenja të dukshme”.

“Ka nga ata që marrin madje 127 duke kërkuar me insistim të bëjnë testin se kanë ardhur nga Italia apo kanë takuar dikë që ka ardhur nga Italia. Ky nuk është një kriter për t’u shqetësuar dhe bërë testin. 80% nuk do ndiejnë asgjë dhe nuk kanë për ta marrë vesh kurrë nëse morën po jo koronën”, tha Rama.

Por sipas tij, “secili prej nesh do të sillet njësoj sikur ta ketë virusin dhe prandaj duhet të ruaj të tjerë pavarësisht se mund të ndihen shumë mirë”.

“Nuk mjaftojnë disa shenja gripi për t’u alarmuar dhe bërë testin. Shpallja e pandemisë nga OBSH përcakton edhe kriteret bazë të marrjes së testit që lidhen me një gjendje më të vështirë se sa ajo e simptomave të lehta gripale”, tha Rama.

Ndërkohë, ai theksoi se nuk e dimë se “deri kur do të vazhdojmë t’u nënshtrohemi masave shtrënguese për qarkullimin me makinë, por këtë nuk e dimë dhe askush, askund në botë nuk e di”.

“Sa më shumë të shtrëngohemi sot aq më shumë e kemi bërë tonën përballë këtij armiku që vjen bashkë me të panjohura tepër të mëdha. Prandaj durim dhe shumë kujdes. Mos harroni se 80% e atyre që kanë simptoma e kalojnë me sukses ditën, duke ndenjur në shtëpi”, tha Rama./atsh

Bashkia e Vlorës vijon punën për dezinfektimin e ambienteve publike, përfshirë rrugë, lulishte dhe institucione.

Bashkia thotë se ka hartuar një plan të detajuar për dezinfektimin e e ambienteve publike dhe se puna vijon pa ndërprerje përgjatë 24-orëve.

“Zgjerohet territori. Nga qendra drejt periferisë dhe anasjelltas, sipas një plani të detajuar.
Çdo metër katror hapësirë e përbashkët, në vëmendjen tonë”, thuhet në njoftimin e bashkisë.

Po ashtu, bashkia informon se edhe tregu i shumicës i është nënshtruar një dezinfektimit të plotë.

“Te tregu i shumicës, më pas në rrugë, në bulevardin Vlorë-Skelë, tek muzetë e qytetit, mjedise të gjellbëruara. Puna jonë vazhdon 24/24”, informon bashkia.//atsh