Lajmi i fundit

Kryeministri Edi Rama, gjatë një emisioni televiziv bëri të ditur se janë 404 kompani që kanë aplikuar për kredinë sovrane.

Rama gjatë mbrëmjes së sotme bëri të ditur se parukeritë, lokalet, dentistët janë të fundit që do të hapen pasi konsiderohen si sipërmarrjet më të rrezikuara për përhapjen e COVID 19.

Kryeministri Edi Rama, duke iu përgjigjur dhe interesit të qytetarëve, tha se për personat që kanë sëmundje të ndryshme dhe ri-atdhesohen karantinimi bëhet në shtëpi, për të mos rrezikuar dhe të tjerët.

“Nuk jam unë personi që duhet pyetur për këtë, kjo është çështje kategorizimesh që i bënë institucioni përkatës. Është Ministria e Shëndetësisë që bënë këtë kategorizimi. Nuk e di si ndahen kategoritë specifikisht. Di këtë që, për ata që janë të sëmur s’ka një lehtësi që nuk mbahen në karantinë, por i jepet mundësia të vijojnë jetën e tyre në shtëpi. Nëse nuk është pranuar ky person, atëherë është kategori që nuk hynë në ato që duhet të ikin në shtëpi”,- tha Rama.

Kryeministri Rama garantoi se ndërhyrjet kirurgjikale nuk janë ndalur në asnjë moment. “Nuk ka ndërprerë për asnjë ditë ndërhyrjet kirurgjikale. Janë spostuar te trauma, për të lehtësuar zonën përkatëse në QSUT, por vijojnë rregullisht”,- tha Rama.

Sa i takon bizneseve si lokale, bare dhe parukeri, Rama nënvizoi se janë të fundit që do hapen. “Ajo që thashë për parukeritë, vlen edhe për dentistët pasi konsiderohen si vatra të rrezikshme, pasi një i vetëm i infektuar rrezikon ta shpërndajë infeksionin te shumë të tjerë. Lokalet do jenë të fundit që do hapen dhe deri tani s’di një vend ti ketë hapur lokalet. Nëse është miratuar do ta marrin shumë vende dhe kanë vendosur të mos i hapin shkollat. Sot kemi pasur një diskutim thuajse përfundimtar me Ministren e Arsimit, Ministren e Shtetit, Drejtorin e Agjencisë së teknologjisë dhe Inovacionit dhe besojë se nesër do të kemi një vendim përfundimtarë”,- tha Rama.

Kryeministri tha se “nuk të ekspozojnë rrugët e Shqipërisë, ku më mjafton të ruash distancat dhe je i mbrojtur dhe nuk nevojë ti trembesh infektimit, madje mendojë që kur je në rrugë dhe kur arrijnë të ruash distancat s’ke nevojë as për maska apo mjete të tjera mbrojtëse pasi të ruan distance”,- tha Rama.

“E kam thënë që ditën e parë, e kam bërë dhe vetë, që ne duhet të jetojmë sikur e kemi COVID-19. Mund të jemi të gjithë të infektuar asnitomatik dhe duhet të sillemi si të tillë duke ruajtur të tjerët dhe ruajmë edhe Shqipërinë dhe sistemin shëndetësor. Hapja do na ekspozojë përpara rritjes së numrit të infektuarve. Pyetja është sa do të rritet ? Kjo do të varet nga ne, inspektorët, ligjit dhe institucionet e zbatimit të ligjit janë të rëndësishme, por nuk zëvendësojnë atë që secili prej nesh duhet të bëj. Secili prej nesh duhet të bëjë rojen e vetes dhe të tjerëve”,- tha Rama.

“Nuk ka asnjë njeri për të shpëtuar jetë, përveç atyre që janë duke asistuar aty për të shpëtuar jetën, pra urgjenca kombëtare, mjafton një telefonatë dhe urgjenca kombëtare është aty. Di që në paketën e zgjeruar agjencitë turistike përfitojnë bonusin prej 400 mijë lekësh”,- tha Rama.

“Kam parë raste refuzimesh të regjistruar me disa lloj emrash, niptesh dhe çudirash shqiptare që i kam parë kohët e fundit dhe për këtë na ka dërguar të kemi një tryezë tjetër për të ndryshuar rregullat e regjistrimit. Janë 404 kompani që kanë aplikuar për garancinë sovrane dhe vijojnë aplikimet”,- nënvizoi Kryeministri./atsh

Ministrja e Shëndetësisë dhe Mbrojtjes Sociale, Ogerta Manastirliu deklaroi se në fazën aktuale që ndodhet Shqipëria, pra ajo e hapjes duhet të jemi të kujdesshëm pasi virusi nuk është larguar ende.

Në një lidhje direkte në një nga mediet e vendit, Manastirliu u shpreh se “është e vërtetë që ne kemi hyrë në fazën e parë të hapjes së kujdesshme dhe shumë graduale. Nga dita e sotme kemi hapur disa kategori biznesi dhe gjithashtu kemi zgjeruar fashën orare të lëvizjes së qytetarëve, nga 90 minuta në 2 orë. Duhet të themi që kemi filluar një hapje të kujdesshme të masave, pasi Komiteti i Ekspertëve i atashuar pranë Ministrisë së Shëndetësisë, gjithashtu i ISHP-së ka realizuar një strategji të hapjes me faza, sa i përket rihapjes jo vetëm në aspektin ekonomik, por edhe në aspektin social dhe ka vlerësuar 4 faza të rihapjes së aktiviteteve dhe në bazë të kritereve të vendosura nga Komiteti Teknik, bazuar në kurbën biologjike, në numrin e të shtruarve në spital dhe në rastet e rënda që trajtohen janë vlerësuar disa faza të hapjes. Ne kemi kriteret e secilës fazë, kemi vlerësuar riskun për secilën. Tre kriteret kyçe për të cilën ua përmenda lidhet me kurbën epidemiologjike. Kjo do të thotë se raste pozitive klasifikohen në disa aspekte, kjo do të thotë se nëse ne do të kemi në fazën e parë ku risku është edhe më i ulët, mbi 15 raste pozitive në ditë për mbi një mesatare të rasteve që është 15 raste të reja në ditë, atëherë ne do të themi që do të vijojmë më fazën e dytë të hapjes. Nëse numri do të rritet mbi një mesatare atëherë nuk do të kalojmë në fazën e dytë të hapjes por do të ngremë frenat e emergjencës, që do të thotë do të kthehemi në masat e mëparshme”.

Më tej, ajo theksoi se “do vijojmë testimet si kemi bërë deri më sot, duke gjurmuar të gjitha rastet kontaktet e tyre të para, të dyta e të treta. Është shumë i rëndësishëm në këtë fazë hetimi “agresiv”, pra hetimi për çdo rast të dyshuar dhe rastet e tjera janë asimpotimatikë por kanë lidhje me rastet që identifikohen në terren. Shumë e nevojshme strategjia e testimit që është duke u kryer e hartuar nga ekspertët të vijojë me të njëjtën intensitet në terren sidomos në këto faza, pra në fazën e hapjes që po ndodh”.

Secila hapje sipas saj, do të ketë një periudhë 14-ditore vlerësimi aq sa është faza e virusit.

“Bizneset që nuk respektojnë masat do kenë nga gjoba deri në mbyllje të veprimtarisë dhe edhe ndjekje penale nëse do ketë përsëritje, nuk është asnjëra nga këto qëllim në vetvete, por vendosja e masave për të mbrojtur shëndetin e qytetarëve. Të gjithë qytetarët dhe bizneset duhet të tregojnë përgjegjësi maksimale dhe çdo lehtësim tjetër do të vijë nga veprimet e tyre’. –tha ajo.

Më tej, ministrja shtoi se “situata është dinamike. Nuk ka vend për të mos qenë të shqetësuar se virusi iku dhe hajde tani të bëjmë plazh. Unë po e them sepse jo sepse nuk mendoj apo nuk jemi duke planifikuar por duke parë se çfarë po bën rajoni dhe çfarë do të kemi si alternativë këtë vit. Secili shtet ka specifikën e vet. Mal i Zi nuk ka qenë aq i prekur në numra në raport me Shqipërinë, që ka patur një efekt shumë të madh nga Italia, nga të gjitha rastet e importuara që na kanë ardhur. Por duhet të kuptojmë diçka, rreziku nuk ka kaluar prandaj duhet të jemi shumë të kujdesshëm qoftë përsa i përket hapjes, qoftë sa i përket plazhet dhe turizmit, nuk do të kemi turizmin klasik por do të vlerësojmë hap pas hapi në dinamikë se çfarë opsionesh do të krijohen. Nuk jemi dhe nuk po jetojmë në normalitet, po jetojmë në një situatë të jashtëzakonshme”./atsh

“Fakti që sot në spitale në nuk kemi mbingarkesë apo kemi një relaksim në situatën e spitaleve krahasuar me ngarkesën që do të kishim, i dedikohet masave që ndërmorri qeveria. Nëse ne nuk do të kishim marrë ato masa në ditën 1 dhe ky është faktori kyç, ne sot jo vetëm do të kishim spitale të përmbytura nga qytetarët që ishin në nevojë për trajtim mjekësor dhe kjo ishte eksperienca që kanë kaluar edhe vendet e zhvilluara me sisteme shëndetësor shumë të zhvilluar”, përfundoi ministrja

Organizata Botërore e Shëndetësisë përgëzoi sot Shqipërinë për pjesëmarrjen në Studimin klinik të Solidaritetit.

OBSH në Shqipëri thekson se, mbi 100 vende në botë janë duke punuar së bashku përmes këtij studimi, për të gjetur mjekimet e efektshme në kohën më të shpejtë të mundshme.

Studimi përfshin pacientët në moshë të rritur me COVID-19, të hospitalizuar. Pacientët adultë, të cilët marrin trajtimin spitalor standard, do të marrin gjithashtu medikamente që po studiohen për veprimin e tyre ndaj koronavirusit të ri dhe sëmundjes së shkaktuar prej tij.

Në Shqipëri do të zbatohet i njëjti protokoll standard, sikurse edhe në vendet tjera. Çdo pacient jep pëlqimin e tij nëse dëshiron të marrë edhe medikamentet në studim apo jo. Ekipi mjekësor i trajnuar vlerëson gjendjen e çdo pacienti për sëmundjet bashkëshoqëruese dhe kundërindikimet.

OBSH thekson se, përmes Studimit klinik të Solidaritetit, do të studiohen medikamentet: chloroquine ose hydroxychloroquine; lopinavir dhe ritonavir; lopinavir/ritonavir plus interferon beta,dhe remdesivir.

Medikamente të tjera mund të shtohen në studim sipas të dhënave kërkimore. Studimi monitorohet nga Komiteti për të dhënat globale dhe monitorimin e sigurisë, i përbërë nga një grup ekspertësh të pavarur./atsh

Bizneset që hapen nesër, lejohen të ushtrojnë veprimtarinë e tyre nga ora 05:00-17:30 vetëm duke zbatuar protokollet e sigurisë në punë, për mbrojtjen e qytetarëve dhe punonjësve, është shprehur sot Ministrja e Shëndetësisë dhe Mbrojtjes Sociale, Ogerta Manastirliu.

Manastirliu, ka publikuar sot listën e bizneseve që hapen nesër nga ora 05:00- 17:30.

“Dyqanet e veshjeve, tekstileve, këpucëve dhe artikujve prej lëkure. Dyqanet që tregotjnë mobilje, pajisje të ndriçimit dhe artikujve shtëpiakë. Dyqanet e luleve, bimëve, të kafshëve të shtëpisë dhe ushqimit të tyre. Dyqantet e pajisjeve elektronike, lodrave për fëmijë, pajisjet sportive, pajisjet e telekomunikacionit. Shërbimi taxi”, thuhet në listën e nxjerrë nga Manastirliu.

“Ndërkohë lista e plotë e bizneseve që hapen gjendet e plotë në portalin E-Albania”, ka theksuar Manastirliu./atsh

Mëngjesin e sotëm ka ndërruar jetë një pacient 60-vjeçar në spitalin universitar “Shefqet Ndroqi, i konfirmuar me COVID-19.

60-vjeçari R.K nga Tirana ishte i shtruar në reanimacion prej dy javës në spitalin “Shefqet Ndroqi” në gjendje shumë të rëndë shëndetësore.

Pacienti vuante nga disa sëmundje bashkëshoqëruese (Diabet Melitus, Kardiopatia Hipertensive, Nefropatia Diabetike, Obezitet).

Pavarësisht trajtimit të bërë nga stafi mjekësor, asistencës të ventilimit mekanik të respiracionit dhe mjekimit intensiv, 60-vjeçari nuk ka mundur të mbijetojë.

Ministria e Shëndetësisë dhe Mbrojtjes Sociale i shpreh ngushëllimet familjarëve dhe bën thirrje të gjithë qytetarëve të vazhdojnë të respektojnë rregullat e vendosura.

Deri tani 28 qytetarë nuk e kanë fituar dot betejën me COVID-19, pavarësisht punës së madhe të stafeve mjekësore të spitaleve COVID./atsh

Mbante një kalë të vogël të races ”Pony”në pjesën e pasme të makinës, një Fiat Doblò, dhe gjobitet nga policia për shkelje të dispozitave të mirëqenies së kafshëve.

Në fakt, automjeti i përdorur nuk përputhej me kërkesat ligjore. Agjentët e përfshirë në kontroll që synonin të parandalonin përhapjen e COVID-19, gjatë kontrollit të dokumenteve, dëgjuan zhurmë që vinin nga pjesa e pasme e automjetit dhe, për habinë e tyre, gjetën një kalë të vogël të lidhur.

Shoferi deklaroi se e kishte blerë kafshën, dhe se po e transportonte atë për në shtëpi. Ai u dërgua në rajonin e policisë për të vizituar kafshën nga një veteriner dhe më pas ajo iu besua një stalle që përmbushte kërkesat ligjore.

Në këtë periudhë të karakterizuar nga kufizimet e vendosura nga rregullat e kontrollit të COVID-19, transporti i kafshëve lejohet vetëm për ata të destinuar për veprimtari riprodhuese dhe zooteknike dhe për arsye që lidhen me shëndetin dhe mirëqenien e tyre. /atsh