Aktualitet

Në 1 Qershor, pikërisht në ditën e festës së tyre, fëmijët do të rikthehen sot në çerdhe dhe kopshte.

Kryeministri Edi Rama ka uruar të vegjlit në këtë ditë të veçantë për ta.

“Mirëmëngjes! Sot festa e 1 qershorit është vetë rikthimi në kopsht dhe çerdhe. Gëzuar fëmijëve, prindërve, gjysheve e gjyshërve”, shprehet Rama ndërsa ka publikuar edhe një foto të disa fëmijëve teksa pikturojnë.

1 Qershori, Dita Ndërkombëtare e Fëmijëve, në Shqipëri dhe në mbarë botën, u kushtohet fëmijëve me aktivitete festive.

Dita e fëmijëve është vendosur më datën 1 Qershor, sepse në këtë datë është mbajtur konferenca botërore e mirëqenies së fëmijëve në Gjenevë në 1925./atsh

Sot në Ditën Botërore pa Duhan, COVID-19 është një arsye më shumë për të lënë këtë veprim të dëmshëm për shëndetin.

Ministria e Shëndetësisë dhe Mbrojtjes Sociale bën të ditur se në këtë ditë duhet të ngremë zërin dhe t’i themi Jo duhanit. “Të tregojmë mënyrat e manipulimit të përdorura nga kompanitë e duhanit si dhe të informojmë të rinjtë me njohuri në lidhje me dëmet dhe rreziqet e përdorimit të duhanit”, shprehet ministria.

“Po ashtu të fuqizojmë ndikimin e aktorëve me zë publik, influencuesve për të mbrojtur rininë dhe promovuar ndryshimin duke i angazhuar ata në luftën kundër duhanit”, thekson ministria.

MSHMS ka bërë hapa para në ndikimin e uljes së duhanpirjes, ku janë miratuar imazhet që do të përdoren në paketimet e duhanit në Shqipëri me qëllim vënien në dukje të rrezikut të madh dhe uljen e duhanpirrjes, si dhe janë intensifikuar inspektimet nga ISHSH për konsumimin e duhanit në ambiente të mbyllura./atsh

Sipas Shërbimit Meteorologjik Ushtarak, ditën e diel moti parashikohet me vranësira mesatare dhe të dendura në të gjithë territorin.

Që në orët e para të 24 orëshit, parashikohen reshje shiu të herëpashershme e lokalisht të vazhdueshme me intensitet të ulët dhe mesatar në formën e shtrëngatave dhe stuhive shoqëruar me shkarkesa elektrike.

Lokalisht dhe në kohë afatshkurtër parashikohet që reshjet në formën e rrebesheve shoqëruar edhe me breshër. Era do të fryjë nga jugperëndim – juglindje 1-6m/sek, në momentin e zhvillimit të vranësirave era fiton shpejtësi deri në 10m/s. Deti i forcës 1-2 ballë.

Temperaturat parashikohen:

QYTETET Temperaturat në °C Sigla
Shkodër 13/20 Re shi
Kukës 10/19 Re shi
Lezhë 12/21 Re shi
Dibër 8/17 Re shi
Durrës 15/21 Re shi
Tiranë 15/21 Re shi
Elbasan 12/21 Re shi
Berat 9/22 Re shi
Vlorë 13/22 Re shi
Korcë 7/18 Re shi
Gjirokastër 8/20 Re shi
Sarandë 14/21 Re shi/atsh

Dikur të pranishëm anekënd Shqipërisë dhe të adhuruar si sjellës të fatit, sot lejlekët dhe sidomos foletë e tyre numërohen me gishtat e dorës.

Sipas Albanian Ornithological Society (AOS) vetëm shtatë fole gjenden në të gjithë Shqipërinë, katër prej tyre në shtyllat e tensionit të lartë në jug të Shqipërisë. Prania në këto mjedise tregon se këta shpend të rrezikuar me zhdukje në Shqipëri, kanë nevojë të vazhdueshme për foleza të mbrojtura.

OST në bashkëpunim me disa organizata mjedisore të vendit, është angazhuar në ofrimin e platformave të folezimit të lejlekëve. Njëkohësisht këto platforma po reduktojnë rrezikun e elektroshokut të këtyre shpendëve kaq të veçantë. Si rezultat, numri i lejlekëve në shtyllat e tensionit të lartë është dyfishuar në krahasim me 2019.

Dy platforma të vendosura në Fier dhe Gjirokastër kanë qenë të suksesshme. Lejlekët po folezojnë në një shtyllë të tensionit të lartë në Fier dhe një tjetër çift po ndërton folenë në Mesopotam.

Këto lajme të mira, thotë OST na nxisin të ruajmë qëndrueshmërinë mjedisore të investimeve në infrastrukturën e energjisë si dhe frymëzojnë për bashkëpunime të tjera të suksesshme në të ardhmen./atsh