Aktualitet

“Me ligjin e ri të pyjeve, Bashkitë janë pronarë legalë të tyre”, deklaroi sot ministri i Turizmit dhe i Mjedisit, Blendi Klosi.

Në një takim me krerët e bashkive të Prefekturës, Berat ku u diskutua mbi ligjin e ri të pyjeve, Klosi tha se, “ligji i ri i pyjeve, miratuar së fundmi i ndan pyjet në kombëtar, të cilët janë në Zonat e Mbrojtura dhe administrohen nga AKZM dhe Ministria e Turizmit dhe Mjedisit, ndërsa zonat e tjera pyjore jashtë Zonave të Mbrojtura do të administrohen nga Bashkitë dhe njësitë vendore të saj.

“Kjo do të thotë që nga pyjet, të cilat janë në proces regjistrimi kadastral, pasi t’i kalojnë si pasuri pushtetit vendor dhe komunitetit të vilen dhe të ardhura dytësore prej tyre”, tha ai.

“Tashmë me ligjin e ri Bashkitë jo vetëm janë pronarë legalë të pyjeve, por janë dhe përfitues të drejtëpërdrejtë të të ardhurave që mblidhen nga ky aktivitetet, por fatkeqësisht vazhdojmë ti pranojmë pyjet shqiptare si I vetmi burim dhe e vetmja e mirë që na vjen prej tyre janë drutë e zjarrit”, shtoi Klosi.

“Ndërkohë, që në shekullin që jetojmë në 10 vjeçarin 2020/2030, ne duam ta shpallim si një 10 vjeçar që shkon shumë më shumë drejt një ekonomie të gjelbër në vendin tonë. Pyjet nuk duhet të jenë një hambar i madh i druve të zjarrit, drutë duhet të jenë një pasuri kombëtare”, tha ministri Klosi.

“Ne po zhvillojmë një turizëm i cili bazën e ka tek turizmi i natyrës. Kjo do të thotë që kjo pasuri e madhe kombëtare duhet të shfrytëzohet nga komuniteti, apo bizneset në përputhje me ligjet e natyrës, duke e mbrojtur atë”, theksoi ai.

“Pylli është një pasuri e madhe për të prodhuar para, për të prodhuar punësim, për të prodhuar ekonomi”, theksoi Klosi duke rreshtuar disa arsye në favor të pushtetit vendor që do të marrë në administrim këto pyje, si fushata “Clean and Green 2020”, që arriti të mbjellë 20 milionë e 200 mijë pemë.

“Vënia para përgjegjësisë të bizneseve, për të zhdëmtuar dëmin mjedisor, duke bërë pyllëzime, moratoriumi i pyjeve ka dhënë efektet e veta pozitive, pasi nuk ka më prerje të pyjeve masive siç ka ndodhur vite më parë në pyje, duke i lënë kohë rigjenerimit të tij, si dhe krijimi i një tregu të mirë të bimëve medicinale, mbrojtja dhe studimi i bimëve endemike, të rralla në vendin tonë, etj”, tha Klosi./atsh

Punonjësit e transportit publik do të përfitojnë edhe për muajin qershor pagën e luftës.

Drejtori i përgjithshëm i Shërbimit të Transportit Rrugor, Blendi Gonxhja bëri të ditur se është rënë dakord që këta punonjës të përfitojnë edhe pagën e muajit qershor.

“Është bërë prezantimi para të gjithë institucioneve të nevojës për pagën e qershorit, për të gjithë llojet e transportit. Bëhet fjalë për një vlerë prej 2.4 milionë euro, pasi përfshihen një numër i madh punonjësish”, tha Gonxhja në një intervistë në media.

Kreu i DPSHTRR theksoi se është bërë një protokoll për funksionimin e transportit publik. Ai u shpreh se zbatimi rigoroz i tij lidhet me nevojën për t’u hapur lëvizja.

“Është bërë një protokoll. Protokollet nuk janë dëshirë, por janë një detyrim reciprok. Nëse duam që Shqipëria të hapet, apo vendet e tjera të hapen ndaj nesh, dhe të qarkullojmë duhet të kemi protokolle të këtyre standardeve. Do të zbatohet protokolli për ato gjëra që janë të nevojshme dhe të realizueshme”, shprehet Gonxhja.

Për sa i përket terminaleve, Gonxhja u shpreh se janë bashkitë ato që do të kryejnë dezinfektimin.

Më tej, kreu i DPSHTRR tha se Taskforca e Transportit Rrugor po kujdeset për kontrollin e zbatimit të masave.

Gonxhja u shpreh se institucionet shtetërore po bashkërendojnë punën për të mbështetur këtë sektor përmes një reforme të qëndrueshme, ku përfshihet edhe krijimi i një rrjeti eficient linjash.

Synimi, sipas tij, është një transport publik cilësor udhëtarësh, pa rritur çmimet për qytetarët dhe duke mbështetur fuqimisht sektorin./atsh

Përfaqësues të Administratës Doganore Shqiptare morën pjesë në Sesionin e 135-të /136-të të Këshillit të Organizatës Botërore të Doganave.

OBD është një qendër ndërkombëtare e njohur për ekspertizën doganore dhe ka një rol kryesor në zhvillimin, promovimin dhe zbatimin e sistemeve dhe procedurave moderne doganore.

Në kushtet e pandemisë COVID-19, takimi i kryetarëve të Delegacionit të Këshillit, i cili u mbajt virtualisht miratoi ndryshimet e propozuara në sistemin e harmonizuar të vitit 2022, të miratuar nga Komiteti i Sistemit të Harmonizuar, rekomandimet e sesionit të 103-të të Komitetit të Financave, konfirmimin për zgjatjen e jashtëzakonshme të përkohshme deri në dhjetor 2020 të mandatit të kryetarit dhe zv/kryetarëve të Komitetit të Auditimit dhe Komisionit të Financave, si dhe konfirmimin për nënkryetarët rajonalë të emëruar në Komisionet e Politikave, Komitetit të Auditimit dhe Komitetit të Financave.

Qëllimi kryesor i Organizatës Botërore të Doganave është rritja e efikasitetit të administratave doganore ku janë anëtare 183 shtete, duke ndihmuar në realizimin me sukses të objektivave të përcaktuara në nivelin kombëtar, në fushën e mbledhjes së taksave, siguria kombëtare, lehtësimi i tregtisë, mbrojtja e shoqërisë dhe mbledhja e të dhënave statistikore. /atsh

Ambasadorja e Greqisë në Tiranë, Sofia Philippidou vizitoi të premten qytetin e Korçës, ku u prit nga kryetari i bashkisë Sotiraq Filo.
Bashkëpunimi ndërkufitar, ekonomik, kulturor dhe turistik me shtetin fqinj, ishin në qendër të bashkëbisedimit.
Kryetari i Bashkisë së Korçës Filo, bëri një panoramë mbi investimet që janë rritur ndjeshëm vitet e fundit në këtë qytet, veçanërisht në sektorin e turizmit, bujqësisë, përpunimit të produkteve bujqësore etj.
Ai vlerësoi zhvillimin e vazhdueshëm të bashkëpunimit midis Shqipërisë dhe Greqisë duke shprehur përkrahjen e tij për zhvillimin e bashkëpunimit midis ndërmarrjeve vendëse e palës greke.
Ambasadorja nga ana e saj, vlerësoi Korçën si një qytet të pasur me trashëgimi kulturore dhe atraksione turistike, të cilat e bëjnë një nga qytetet më të dashura për tu vizituar në Shqipëri. /atsh