Aktualitet

Aeroporti i Prishtinës “Adem Jashari”, realizohen sot 34 fluturime

Aktualitet, Lajmi i fundit / /

Ditën e sotme ka rifilluar operimi i plotë i fluturimeve të rregullta nga aeroporti Ndërkombëtar i Prishtinës “Adem Jashari”. Vetëm sot do të realizohen 34 fluturime, ku 17 janë në arritje dhe 17 fluturime në shkuarje.

Zëdhënësi i ANP “Adem Jashari” Bujar Gashi, tha se i kanë ndërmarrë të gjitha masat për të rifilluar fluturimet.

Të gjithë udhëtarët që do të udhëtojnë nga ky aeroport në hyrje duhet të tregojnë biletën, e që pastaj do të kalojnë përmes tunelit dezinfektues dhe më pas do t’u matet temperatura. Pasi të kalojnë këtë mund të futen në hapësirat e aeroportit.

Në brendësi të aeroportit janë vendosur shenjat për mbajtje të distancës, si dhe dezinfektues për duart.

Gashi tha se nga qytetarët presin që t’i respektojnë të gjitha masat.

“Aeroporti Ndërkombëtar i Prishtinës nga sot ka hapur dyert e saj, në fakt kemi qenë gjithmonë të hapur por shkaku i pandemisë kemi funksionuar me staf të reduktuar. Janë disa masa që i kemi ndërmarrë të rekomanduara nga ministria e Shëndetësisë dhe Instituti Kombëtar i Shëndetësisë Publike, e që ne si aeroport dhe të gjithë udhëtarët duhet t’i aplikojnë ato. Që nga hyrja siç po shihet mbrapa udhëtari duhet të tregojë një biletë e cila është e vlefshme për ditën e sotme, duhet t’i matet temperatura dhe më pastaj të kalojë në kabinën dezinfektuese”, tha ai.

Ai tha se qytetarët gjatë gjithë qëndrimit në hapësirat e aeroportit duhet të bartin maska.

“Sot gjatë gjithë ditës kemi rreth 34 fluturime, do të thotë është 17 janë në arritje dhe 17 do të shkojnë. Kjo është e domosdoshme, secili që nuk i përmbahet këtyre masave nuk do të lejohet të hyjë edhe në terminal, gjë që është e pranueshme për secilin dhe deri më tani gjithçka ka vajtur mirë”, tha ai.

Masat që janë ndërmarrë nga ANP “Adem Jashari”, qytetarët që udhëtonin sot i shihnin si të domosdoshme.

Dionis Canziba, sot po udhëtonte nga Prishtina për në Basel, e që masat e ndërmarra i sheh si të mira për mbrojtje të jetës së qytetarëve.

“Unë udhëtoj për Basel dhe masat janë të mira, mendoj që kanë bërë mirë me këtë dezinfektimin që është duke u bërë para se me hy. Është duke u respektuar distanca dhe mendoj që është në nivel. Kam qëndruar tri javë, kam ardhur me veturë, po kthehem me aeroplan për shkak se pas tri jave do të kthehem prapë”, tha ai.

Edhe qytetarja Shyhrete Morina, sot udhëtonte nga Prishtina për në Zvicër, e që për të janë në rregull masat që janë ndërmarrë nga ANP “Adem Jashari”.

“Për në Zvicër udhëtoj, shumë në rregull janë masat”, tha ajo.

Aeroporti Ndërkombëtar i Prishtinës “Adem Jashari”, për më shumë se tre muaj nuk ka pasur fluturime për shkak të masave të ndërmarra nga qeveria e vendit për mbrojtje nga COVID-19. /KosovaPress/

Aeroporti i Prishtinës “Adem Jashari”, realizohen sot 34 fluturime Read More »

NEX24: Shqipëria e sigurt nga COVID-19 edhe për turizmin shëndetësor

Aktualitet, Shendetesi, Turizem / /

Pandemia COVID-19 po mban pezull tërë botën. Ndërsa vende të tilla si Italia, Spanja dhe Franca kanë pasur një numër të lartë vdekjesh, kriza për Shqipërinë deri më tani ka qenë relativisht e butë. Kufijtë tashmë janë hapur dhe po mbërrijnë turistët e parë për qëllime shëndetësorë, shkruan faqja e njohur NEX24, që ka biseduar me Dritan Gremin, i cili drejton një klinikë dentare në Tiranë.

Zoti Gremi, ju jeni një sipërmarrës i njohur në vendin tuaj. “Klinika Gremi – Udhëtimi dhe Buzëqeshja” ka vite që është aktive në turizmin shëndetësor, veçanërisht në fushat e trajtimit dentar dhe kirurgjisë kozmetike. Sa e vështirë ishte për ju të rifilloni operacionet pas mbylljes nga COVID-19?

Po, si çdo sektor tjetër ekonomik, klinika jonë u detyrua të bënte pushim. Për fat të mirë, klinika rifilloi operimet pas gati dy muaj e gjysmë mbyllje dhe ishte në gjendje të mirëpriste pacientët e parë të huaj. Meqenëse shërbimet që ne ofrojmë janë pjesë e turizmit shëndetësor, turistët e parë në Shqipëri mund të kenë qenë edhe pacientët tanë. Kufijtë fillimisht u hapën për turizmin shëndetësor. Aktualisht ne ofrojmë shërbimet tona për 40 pacientë të huaj, kryesisht nga Italia, Gjermania, Britania e Madhe, Zvicra dhe Austria. Duke pasur parasysh situatën në të cilën ndodhet bota dhe kufizimet e udhëtimit midis vendeve, kjo mund të shihet si një fillim i mirë për këtë sezon.

Sa i sigurt nga pandemia mund të ndjehet një pacient i huaj i cili vjen në klinikën tuaj?

Në klinikën tonë nuk ka pasur mungesë higjiene apo të masave mbrojtëse as përpara pandemisë. Sidoqoftë, që nga shpërthimi, ne kemi intensifikuar përsëri masat tona dhe kemi futur protokolle të larta sigurie kundër Covid-19. Këto masa në tërësi dhe zbatimi i tyre i rreptë garantojnë gjithashtu shëndetin e pacientëve dhe mbi 100 punonjësve. Të gjitha shërbimet që ne ofrojmë, të tilla si laboratorët, ambientet e akomodimit, baret, restorantet dhe shumë më tepër, përdorin udhëzimet më të rrepta të rekomanduara nga autoritetet më të larta shëndetësore.

Pse mendoni se udhëtarët duhet të zgjedhin Shqipërinë këtë vit?

Shqipëria ka qenë gjithmonë një destinacion i njohur udhëtimi. Por, tani që e gjithë bota po përballet me një pandemi dhe kufizimet që ajo sjell, numrat favorizojnë vendin tonë. Ballafaqimi siç duhet me situatën që nga fillimi i pandemisë ka bërë që Shqipëria të jetë një nga vendet më të sigurta në rajon.Kjo është rezultat i masave të shpejta kufizuese të qeverisë, por edhe i solidaritetit që shqiptarët kanë treguar se respektojnë distancën shoqërore. Në krahasim me vendet e Bashkimit Europian, situata tregoi se virusi qarkulloi në vendin tonë një muaj më vonë dhe nuk krijoi ndonjë burim të vërtetë infeksioni. Përveç kësaj, nuk ka raste të qytetarëve të huaj të infektuar në vendin tonë, që do të thotë se shërbimet e ofruara në strukturat e hotelit janë shumë të sigurta. Sa i përket klinikës sonë, duhet të theksohet se asnjë prej punonjësve tanë nuk është prekur nga Covid-19 në 30 ditët e kaluara.

Por, a janë të huajt të vetëdijshëm për këtë situatë pozitive dhe çfarë dëshirash kanë turistët për sezonin e ardhshëm?

Po, sigurisht. Unë besoj se kushdo që dëshiron të udhëtojë në Shqipëri, veçanërisht për të marrë kujdes mjekësor, është i interesuar të marrë një përmbledhje të përgjithshme. Në rastin tonë, kriza ekonomike që po e mban botën të pezulluar ka rezultuar në rritjen e kërkesës nga pacientët e huaj. Sidomos nga europianët që janë veçanërisht të interesuar për trajtimet e dhëmbëve. Përveç klimës dhe bukurisë natyrore, Shqipëria përfiton gjithashtu nga çmimet konkurruese dhe aspekti ekonomik është shumë i rëndësishëm për të gjithë pas pandemisë. Tashmë kemi prenotime për korrik, gusht dhe shtator. Për shkak të rritjes së numrit të pyetjeve, supozojmë se numri i prenotimeve do të rritet. Ne jemi akoma të përkushtuar në respektimin maksimal të të gjitha kërkesave të sigurisë, nga koha e pritjes në aeroport tek shërbimi i klinikës deri tek akomodimi në hotele apo restorante, të cilat, siç ju thashë, të gjitha menaxhohen nga ne. Sigurisht, ne jemi të vetëdijshëm për situatën aktuale në të cilën virusi është ende mes nesh. Përveç mikpritjes, Shqipëria është një vend i mrekullueshëm në të cilin ka shumë bukuri natyrore për t’u shijuar, përtej sektorit të shëndetësisë./atsh

NEX24: Shqipëria e sigurt nga COVID-19 edhe për turizmin shëndetësor Read More »

Ambasadorja Kim vlerëson Ministrinë e Brendshme dhe Policinë e Shtetit

Aktualitet / /

Ambasadorja e Shteteve të Bashkuara të Amerikës në Tiranë, Yuri Kim gjatë ceremonisë së dhënies së medaljeve për Shefen e Zyrës Rajonale të Sigurisë së Ambasadës Janet Meyer dhe ARSO-I Antonio Zamudio, vlerësoi punë e Ministrisë së Brendshme dhe Policisë së Shtetit.

“Shtetet e Bashkuara vijojnë të gëzojnë një marrëdhënie të ngushtë me qeverinë e Shqipërisë, veçanërisht me Ministrinë e Brendshme dhe Policinë e Shtetit. Dua të vlerësoj Policinë e Shtetit shqiptar për mbështetjen e tyre të vazhdueshme ndaj prioriteteve të përbashkëta të sigurisë amerikano-shqiptare dhe veçanërisht, për punën e tyre me Zyrën Rajonale të Sigurisë në mbajtjen të mbrojtur dhe të sigurt të Ambasadës sonë”, tha Kim.

Ambasadorja theksoi ndër të tjera se mirëpritet një bashkëpunim akoma më të ngushtë mes këtyre dy strukturave të rendit.

“Ne mirëpresim vazhdimin e bashkëpunimit tonë të ngushtë me Policinë e Shtetit Shqiptar dhe unë ju nxis që të vazhdoni luftën kundër krimit të organizuar në Shqipëri”, tha Kim./atsh

Ambasadorja Kim vlerëson Ministrinë e Brendshme dhe Policinë e Shtetit Read More »

Raporti i DASH për luftën ndaj trafikimit të personave/ Shqipëria në grupin e shteteve si Gjermania dhe Italia

Aktualitet / /

Departamenti Amerikan i Shtetit për të gjashtin vit radhazi vlerëson Shqipërinë në luftën kundër trafikimit të personave.

Zv.ministrja e Brendshme, Rovena Voda, e cila mban edhe detyrën e Koordinatorit Kombëtar në Luftën ndaj Trafikimit të Qenieve Njerëzore, ka publikuar raportin e DASH, ku Shqipëria vlersësohet në grupin e dytë të vendeve të ngjyrosura me të verdhë, ku është edhe Italia e Gjermania.

“Shqipëria renditet në grupin e dytë të vendeve, të ngjyrosura me të verdhë në hartën më poshtë, në çështjet që lidhen me Luftën kundër Trafikimit të Personave”,- sqaroi Voda.

“Në Raportin e Departamentit Amerikan te Shtetit vlerësohen përpjekjet e Shqipërisë si më poshtë:”… Qeveria demonstroi përpjekje në rritje në krahasim me periudhën e mëparshme raportuese; prandaj Shqipëria mbetet në nivelin 2. Këto përpjekje përfshinin dënimin e trafikantëve të dënuar me kushte të konsiderueshme burgu, identifikimin e më shumë viktimave dhe sigurimin e trajnimeve të forta për zyrtarët përkatës. Qeveria, në bashkëpunim me shoqërinë civile, ngriti edhe Bordin Këshillëdhënës të Viktimave të Trafikimit, i përbërë nga tre të mbijetuar, dhe rritja e ndihmës së viktimave në procedurat penale duke krijuar Qendrën e Zhvillimit për Drejtësi Penale për të Mitur dhe punësimin e koordinatorëve shtesë të ndihmës së viktimave … “,- citoi Voda raportin e DASH. /atsh

Raporti i DASH për luftën ndaj trafikimit të personave/ Shqipëria në grupin e shteteve si Gjermania dhe Italia Read More »

Parashikimi i motit, 28 qershor 2020

Aktualitet / /

Sipas Shërbimit Meteorologjik Ushtarak, moti për sot parashikohet i kthjellët dhe i nxehtë, me vranësira mesatare kalimtare në relievet malore nga orët e mesditës deri ato të pasdites.

Nga orët e mesditës deri në orët e drekës përgjatë zonave kodrinore – malore, parashikohen reshje shiu të përkohshme të cilat do të jenë me intensitet deri mesatar në formën e stuhive dhe shtrëngatave. Era do të fryjë me drejtim Verilindje – Veriperëndim 1-8 m/sek. Përgjatë vijës bregdetare era do të fryjë deri në 12-15 m/s kryesisht në brigjet e detit Jon, duke u shoqëruar me valëzim të forcës 3- ballë.

Temperaturat parashikohen:

QYTETET Temperaturat në °C Sigla
Shkodër 21/35 diell re
Kukës 19/34 diell re shi
Lezhë 20/35 diell re
Dibër 17/31 diell re shi
Durrës 21/33 diell re
Tiranë 23/35 diell re
Elbasan 21/35 diell re shi
Berat 21/35 diell re shi
Vlorë 21/33 diell re
Korçë 17/30 diell re shi
Gjirokastër 18/34 diell re shi
Sarandë 17/32 diell re/atsh

Parashikimi i motit, 28 qershor 2020 Read More »

Liqeni i Komanit, pjesë e vyer e mozaikut të turizmit natyror shqiptar

Aktualitet, Turizem / /

Liqeni i Komanit është kthyer tashmë në një destinacion turistik për vizitorë vendas dhe të huaj.

Kryeministri Edi Rama ka uruar sot mirëmëngjesi me pamjen e këtij liqeni i cili është njëri ndër vendet më të bukura dhe që më së shumti i’a vlen të vizitohen në Shqipëri, për ujërat dhe natyrën e veçantë.

“Mirëmëngjes me këtë lundrim të freskët në liqenin e Komanit, një pjesë e vyer e mozaikut të turizmit natyror shqiptar, ju uroj një të dielë të paqtë”, shprehet Rama.

I ndërtuar fillimisht si liqen artificial për furnizimin me ujë të hidrocentralit të Komanit, ai në vitin 2000 filloi të përdorej edhe për udhëtime ujore nga njëri vend në tjetrin, për të lidhur qytetin e Bajram Currit, Gjakovën me pjesën tjetër të vendit. Më vonë, liqeni i Komanit ka filluar të nxisë edhe kureshtjen e vizitorëve turistik vendas e të huaj, pikërisht për faktin e bukurive natyrore dhe monumenteve të natyrës e historisë që gjenden në shtrirjen e brigjeve të tij. Përgjatë tërë liqenit, nga Fierza e deri në Koman, në një udhëtim që zgjatë më pak se tre orë, vizitorët mund të mahniten me pamjet që ofrohen. Udhëtimi me traget apo me ndonjë barkë më të vogël ofron kënaqësi të pa përshkruar, ndërsa atraksion në vete janë fshatrat e kësaj zone dhe grykat e disa lumenjve që derdhen në liqen.

Lëvizjet turistike nëpër ujërat e Liqenit të Komanit vazhdojnë përgjatë gjithë vitit, por sezoni i vërtetë turistik fillon nga maji deri në shtator, periudhë kur edhe klima është e përshtatshme. Për eksploratorët e natyrës dhe të historisë së zonës, të kulturës dhe të zakoneve, shfrytëzohen për fjetje e strehim bujtinat e rralla të fshatrave buzë liqenit./atsh

Liqeni i Komanit, pjesë e vyer e mozaikut të turizmit natyror shqiptar Read More »

Mjek dhe prind në kohën e COVID-19/ Rrëfimi i çiftit Altin Kola dhe Zhuljeta Ceni për betejën në spitalet italiane

Aktualitet / /

-“Tashmë është ora pesë, duhet të nxitoj për në punë, puth fëmijët dhe vendos maskën”.

Kështu nis dita për Zhuljeta Ceni, një mjeke shqiptare në Itali, e cila së bashku me bashkëshortin e saj Altin Kola kanë qenë në vijën e parë të luftës kundër koronavirusit COVID-19 në vendin fqinj.

Prej 20 vitesh ata kanë emigruar në Itali, menjëherë pas përfundimit të studimeve në Fakultetin e Mjekësisë në Universitetin e Tiranës.

Ata u vendosën në Nettuno, një qytet në provincën e Romës, ku më pas me kalimin e viteve krijuan familje me dy fëmijët e tyre Martina (15) dhe Andrea (10).

Në Itali patën mundësi të zhvillonin karrierën e tyre profesionale, Altini si mjek pranë spitalit I.C.O.T në Latina, qendër hyperbarike, dhe Zhuljeta si mjeke laboratori pranë spitalit S. Maria di Loreto Nuovo në Napoli.

Ata rrëfejnë në një intervistë për Agjencinë Telegrafike Shqiptare se në spitalet ku punojnë u përballën drejtpërdrejt me situatën e krijuar nga pandemia e koronavirusit.

“Sa mbaruam Universitetin në 1998 nisëm një sfidë të re, emigracionin, me ide të qarta për të krijuar një të ardhme ndryshe nga ajo që kishim jetuar deri në 1998. Kështu në fund të 1999 erdhëm në Itali, ku brenda pak kohe, me vullnetin e dëshirën që karakterizonte çdo shqiptar në atë kohë arritëm të ushtrojmë profesionin tonë si mjek”, tregon Zhuljeta.

“Me entuziazmin e një mjeku të ri dhe oportunitetet që ofroheshin u futëm në një ritëm jete me shpejtësi të jashtëzakonshme. Për shumë persona të jesh mjek është privilegj edhe ne për shumë kohë jemi munduar ta bindim veten që është privilegj e duke shtuar mbrapa që është detyrë, pasion, përkushtim, rrezik, stres, por është dhe kënaqësi pa fund që të kuptosh e të veprosh për të shpëtuar jetë”, vijoi ajo.

Zhuljeta, si mjeke laboratori në spitalin S. Maria di Loreto Nuovo në Napoli ishte personi ku bëheshin analizat e pacientëve të shtruar në spital me COVID-19.

Ajo shprehet se ditët e para ishin mjaft të vështira pasi pak njihej nga virusi COVID-19 dhe ende nuk dihej shkalla e madhe e përhapjes. Por rrefën ajo me kalimin e ditëve përveç të panjohurës u shtua shumë edhe numri i pacienteve me koronavirus të shtruar në spitalin ku punonte.

“COVID-19 na hoqi kënaqësinë e të qenurit mjek që me vdekjet e para, hoqi besimin në vetvete, hoqi sigurinë, shtoi stresin, rrezikun, shtoi fajin për pafuqinë për të mundur virusin, kur të gjithë shihnin mjekët si heronj, ne shihnim veten si të paaftë për të luftuar me një armik të panjohur, por të vendosur për të qenë në front të luftës”, shprehet Zhuljeta.

“Fillimi i marsit ishte periudha më e vështirë për ne. Me mbylljen e shkollave për prindër që punojnë si mjekë, stresi nuk vinte nga frika ndaj virusit, por si do të arrinim të ishim prind e mjek në të njëjtën kohë, larg nga familjet e të afërmit si do të organizohemi për turnet e natës që të mos mbeteshin vetëm fëmijët”, theksoi ajo.

“Si mund t’i mbronim ata nga rreziku që ne ekspozoheshim çdo ditë, duke qenë që spitali ku punoja në mars u kthye vetëm COVID. 24 orë në ditë nuk mjaftonin, mësues matematike dhe gramatike paradite, mama dhe baba në drekë, shok e shoqe loje pasdite e natën në punë. Po të arrinim të ishim të gjithë bashkë një ditë të tërë në javë ishte luks. Mbase ritmi i shpejtë e pa pushim që u detyruam të aplikojmë nuk na linte kohë që të mendonim e reflektonim për situatën që po jetonim”, rrëfen ajo për ATSH-në.

Nga ana tjetër në spitalin ku punon doktor Altini si mjek hyperbarik, edhe pse nuk ishte spital COVID, puna vazhdoi njëlloj si më parë duke marrë gjithë masat e sigurisë ndaj COVID në mënyrë që të mos ndërprisnin vazhdueshmërinë terapeutike të pacientëve në trajtim duke qenë e vetmja qendër funksionante në të gjithë prefekturën e Lacios.

Ai shprehet se ka qenë e vështirë fillimisht të përballej me këtë sëmundje e cila ishte e panjohur dhe ende ka disa aspekte që akoma nuk njihen tamam.

Ai thekson se në spitalin ku punon u morën të gjitha masat mbrojtëse. “Në spital vinin pacientë të cilët kërkonin përkujdesje”, tregon ai.

Aktualisht, situata duket më e qetë, por të gjithë i druhen një rikthimi apo një vale të dytë, e cila sigurisht do të sillte sërish vështirësi në sistemin shëndetësor.

I pyetur sesi e vlerëson situatën që kaloi edhe vendi ynë në këtë pandemi, doktor Altini u shpreh se Shqipëria arriti ta përballojë shumë mirë valën e parë të pandemisë, duke pasur një numër të vogël të prekurish.

“Ndryshimi i Shqipërisë me Italinë është sepse popullsia në Shqipëri është ndryshe, vendbanimet janë ndryshe. Në fakt përhapja në Shqipëri ishte më e madhe aty ku kishte njerëz që vinin nga jashtë sidomos me Italinë dhe ku dendësia e popullsisë është e lartë për shembull Durrësi, Tirana, Shkodra, Kruja, kurse pjesa lindore e Shqipërisë ku dendësia e popullsisë është e ulët ka një përhapje më të paktë të virusit”, thotë ai.

Ai thekson se është shumë e rëndësishme që qytetarët të ndërgjegjësohen që virusi ende nuk është larguar dhe se duhen zbatuar dhe ndjekur me përpikmëri të gjithë këshillat e mjekëve si dhe duhet patur kujdes me higjienën personale./atsh

Mjek dhe prind në kohën e COVID-19/ Rrëfimi i çiftit Altin Kola dhe Zhuljeta Ceni për betejën në spitalet italiane Read More »

“Presidenti t’i rrijë tonit institucional”, Spiropali: Nëse të gjithë bëjnë detyrën, Gjykata Kushtetuese funksionale në korrik

Aktualitet, Politike / /

Ministrja e Shtetit për Marrëdhëniet me Parlamentin dhe zëdhënëse e Qeverisë, Elisa Spiropali tha sot se mandati i tretë i kësaj mazhorance është tejet i rëndësishëm për finalizimin e të gjitha reformave të marra, për të mos pasur një kthim pas.

Ministrja Spiropali, gjatë një interviste televizive, u shpreh se Partia Socialiste është një parti shumë e organizuar në terren dhe organizimi elektoral ka nisur.

“Ne motorët e organizimit tonë partiak i kemi gjithnjë ndezur. Ne jemi një parti shumë e organizuar në territor dhe ka një frymëzim politik që buron nga mazhoranca në Kuvend, nga qeveria, nga reformat e marra dhe nga besimi që kemi për të marrë një mandat të tretë për të përfunduar reformat e nisura dhe çdo kthim pas do ishte fatal. Deklaratat e ish-kryeministrit Berisha apo elementëve të tjerë të opozitës që flasin për rishikim të Reformës në Drejtësi dhe reformave të tjera, që janë reforma të rëndësishme për shtetformimin, janë të rrezikshme. Këto reforma ne do t’i vazhdojmë edhe në mandatin e tretë”,- tha Spiropali.

“Organizimi ynë elektoral në territor ka nisur dhe si bashkëkryetare e PS në Qarkun e Tiranës, duam të vazhdojmë në këtë rugë në Kamëz, Kavajë, Rrogozhinë, Vorë dhe sigurisht në Tiranë ku transformimet janë të dukshme”,- tha Spiropali.

Duke folur për Reformën Zgjedhore ajo tha se nuk pati depolitizim të procesit, por vetëm ndarjen e KQZ në tre komisione. “Me forcimin e ligjit për zgjedhjet dhe me depolizitimin do kishim bërë një hap më tej për modernizimin e procesit zgjedhor. Kjo nuk u pranua, por u bë një hap përpara me KQZ, që do të ndahet në tre komisione dhe ku u gjet një rrugë e mesme”, tha Spiropali.

“Lidhur me listat e hapura, ne nuk i kemi hyrë kësaj analize, pasi jemi në fazën ku Këshilli Politik duhet të na sjellë një produkt tërësor. Ne jemi të fjalës e i qëndrojmë marrëveshjes. Jemi të përgjegjshëm që duhet të gjejmë rrugë komunikimi me opozitën parlamentare. Në këtë pikë jemi shumë të qartë, politika është tripolare sot në vendin tonë dhe nuk e kemi realizuar ne këtë trepolarizim, por largimi i PD e LSI nga Kuvendi. Ne do të bëjmë çfarë kemi mundësi për të bërë një Reformë Zgjedhore për t’i shkuar për shtat integrimit në BE”,- tha ministrja Spiropali.

E pyetur për opozitën, Spiropali tha se e sheh opozitën si gjellë e vjetër e ringrohur.

“E shoh në pozitat e atij që do të rikuperojë në një betejë shumë të gjatë humbjesh. I uroj të mira opozitës së vendit tim. S’jam nga ata njerëz që duan ta shohin opozitën të shkatërruar, edhe pse vihet re një tendencë e tillë, nga vendimmarrja e drejtuesve. Bëhet fjalë për kthim të figurave, u bëhet ftesë. Por në dijeninë time ato figura nuk janë larguar nga partia, por janë përzënë. Janë thjesht mëkëmbës. Një pjesë e madhe e PD është ende tek Berisha. PD se ka ‘vrarë babain’ për të ndryshuar qasjen ndaj politikës. Dominohet nga gjuha e urrejtjes, se ka bërë këtë kapërcim kulturor. Besoj se tani pas betejës së tyre të dështuar me miell e bojë në Kuvend, me protesta e sabotime, nuk do ta kenë të lehtë pasi besimi tek ata si forcë politike është rrënuar. S’më takon mua që të bëj një analizë për situatën brenda tyre. Çdo nismë është e mirëpritur në arenën politike. Por më duket si një nismë e re me histori të vjetër. Më duket pak si gjellë e vjetër e ringrohur.”,- u shpreh Spiropali.

E pyetur për pandeminë, Spiropali bëri thirrje për zbatimin e masave antiCovid. “Është një situatë që përsëritet këtu dhe kudo. Rrezikshmëria nuk ka kaluar dhe ende nuk dihen të gjitha karakteristikat apo virulenca e virusit, ndaj është e rëndësishme që të respektohen deri në detaj masat. Dëgjoj teori konspirative mbi mosekzistencën e virusit apo një plan të Ramës për të kontrolluar pushtetet apo dhe të Sorosit për të kontrolluar botën. Nuk mund të dalin qytetarët në protesta tufa-tufa dhe të përfundojnë në spitale, apo akoma më keq, të infektojnë dhjetëra të tjerë. Ne duhet të jemi si ditën e parë, ku qyetarët u treguan shembullorë në zbatimin e masave. Duhet të kemi durim dhe duhet të rrimë vigjilent. Është e papranueshme që të dalim në grupe dhe të bëjmë takime masive pa asnjë maskë. Sistemi shëndetësor ka qenë shembullor. Në këtë luftë ka dhe bluza të bardha, viktima të virusit. I ftoj ata qytetarë që ndoshta nuk besojnë, se në sa kushte të vështira punojnë sistemi shëndetësor. Nuk mund t’i kthehemi një mbyllje të dytë, pasi do të ishte shumë serioze për financat tona”,- tha Spiropali.

“Komiteti i Ekspertëve, Ministria e Shëndetësisë, është në diskutime të vazhdueshme. Nuk e kemi diskutuar çështjen e mbylljes së dytë, pasi do të shkaktonte dëme në ekonominë e vendit. Deri tani nuk ka rrezik për një mbyllje të dytë, ama ministrja e Shëndetësisë merr vendimet e duhura sa i përket situatës. Gjithçka është e mundur”,- shtoi ajo.

Duke folur për Reformën në Drejtësi, Spiropali tha se nëse Presidenti realizon siç duhet emërimet, në fund të korrikut, Gjykata Kushtetuese do jetë funksionale me shtatë anëtarë.

“Ne gjithmonë i kemi vlerësuar opinionet e Komisionit të Venecias. Ato janë të specializuara. Jemi të qartë se në raporte të tilla, nuk ka asnjëherë një fjalë të fundit, por një mënyrë për t’i lexuar. Ne besoj i kemi lexuar drejt dhe kemi marrë vendimet e duhura, për ne Reforma në Drejtësi është shtylla e reformave të ndërmarra nga kjo mazhorancë. Nuk kemi bërë kurrë kompromis e pazare për të. Gjykata Kushtetuese është një nga kushtet që kemi për të ecur përpara. Sa i përket Kuvendit të Shqipërisë, e ka bërë detyrën për përzgjedhjen e dy anëtarëve. Presidenti duhet të zgjedhë anëtarët e tij dhe në fund të korrikut do kemi një Gjykatë Kushtetuese, me 7 anëtarë, nëse të gjithë bëjnë detyrën e tyre”,- tha Spiropali.

“Ne jemi mësuar në fakt me uljet dhe ngritjet e tonit të ardhura nga zyra e presidentit të Republikës. Por vlerësojmë dhe respektojmë tonet institucionale. Pasi ka pasur fatkeqësisht nga zyra e presidentit, deklarata të rënda, aspak profesionale dhe aspak përfaqësuese të popullit. Këtë e kemi deklaruar dhe kemi një komision hetimor. Do të donim që presidenti t’i rrijë tonit institucional, na bën nder të gjithëve”,- nënvizoi Spiropali. /atsh

“Presidenti t’i rrijë tonit institucional”, Spiropali: Nëse të gjithë bëjnë detyrën, Gjykata Kushtetuese funksionale në korrik Read More »