Aktualitet

Kryeministri Edi Rama duke folur sot në foltoren e Kuvendit për aktakuzën ndaj Presidentit të Republikës së Kosovës, Hashim Thaçi dhe ish-kryeparlamentarit të Kosovës, Kadri Veseli, ngritur nga Tribunali special, deklaroi se teksti i aktakuzës është një njoftim ku nuk është se hidhet një baltë marramendëse thjesht mbi Hashim Thaçin apo mbi Kadri Veselin, as mbi UÇK vetëm, por mbi vetë Kosovën dhe krejt shqiptarinë.

“Besoj kam mirëkuptimin e të gjithëve ju, pa dallim, për të komunikuar përmes kësaj foltoreje me të gjithë shqiptarët lidhur me befasinë e mbrëmshme kur pothuajse të gjithë jemi prekur me të dëgjuar dhe me të lexuar se Zyra e Prokurorit të Specializuar të Kosovës njoftoi që i ka dorëzuar për shqyrtim tribunalit special një aktakuzë ku mes të tjerash Presidenti i Republikës së Kosovës, Hashim Thaçi dhe ish-kryetari i Parlamentit, Kadri Veseli, që të dy nismëtarë në krijimin e bërthamës së rezistencës së armatosur ndaj regjimit nacionalkomunist të Sllobodan Milosheviçit, themelues të Ushtrisë Çlirimtare të Kosovës, u dyshuakan për një varg krimesh, të cilat sfidojnë dhe kufijtë më të largët të imagjinatës, vrasje të orkestruara, zhdukje të mbikëqyrura personash, përndjekje dhe trotura njerëzish të pafajshëm e të pambrojtur”, – tha Rama.

Në fakt, vijoi Kryeministri, “fjala dyshim kur lexon tekstin ku të gjitha tmerret e shpërbërjes së ish-Jugosllavisë iu ngarkohen dy bashkëluftëtarëve që ende pa i mbushur të 30 i hynë detit me këmbë duke sfiduar një status quo të aprovuar konsensualisht nga vetë perëndimi demokratik dhe duke vendosur vetë jetën e tyre në pikëpyetje përballë të gjitha parashikimeve dhe këndvështrimeve të kohës, sipas të cilave Kosova e pavarur ishte një herezi ndërkombëtare, fjala dyshim kthehet në një eufemizëm juridik”.

“Të jemi të qartë, shumë të qartë. Drejtësia është drejtësi dhe nuk është drejtësia në vetvete dhe as kërkimi i saj nga një strukturë e miratuar me vullnetin e vetë Kuvendit të Kosovës, ngre pikëpyetje të mëdha të rënda, të papranueshme në heshtje, por është lexim i tekstit të shpërndarë në mbarë botën për të lajmëruar një proces gjyqësor ndaj dy prej figurave historike të luftës dhe paqes në Kosovë. Një tekst i shkruar, i cili edhe sikur të mos ketë asnjë zhvillim të mëtejshëm juridik, për ne që e kemi jetuar në rininë tonë atë kohë i ngjan një fletërrufeje të revolucionit kulturor kinez, ku fryma diskretituese e fjalëve asgjëson vetë prezumimin e pafajësisë”, – nënvizoi Rama.

Kreu i qeverisë u shpreh se “pikërisht kjo e kthen atë tekst në një rrufe që godet shumë më përtej dy emrave të përveçëm duke shpërndarë nëpër krejt botën, sot e zvogëluar prej shpejtësisë së vrapimit të lajmeve, një njoftim ku nuk është se hidhet një baltë marramendëse thjesht mbi Hashim Thaçin apo mbi Kadri Veselin, as mbi UÇK vetëm, por mbi vetë Kosovën dhe krejt shqiptarinë”.

Kryeministri Rama u shpreh se “përfytyroni dikë, kudo qoftë, në cilëndo pikë të globit, ku lajmet shpëndahen me shpejtësinë e dritës që jo nuk i di detajet, por as nuk ka ide të përgjithshme mbi padrejtësinë historike të nënshtrimit me forcë të Kosovës dhe mbi tragjedinë e popullt tonë në Kosovë, duke lexuar tekstin e mbrëmshëm, që pa diskutim krijon perceptimin e tmerrshëm, të një vendi në mes të Europës ku falë krimeve ndaj njerëzimit është instaluar një regjim kriminal, e thënë ndryshe në atë tekst duket sikur lexon për atdheun e agresorëve, jo për vendin e viktimave të agresionit. Në fund të ditës ai tekst që nuk është aktakuza në vetvete, por vetëm një prelud i pakuptueshëm në aspektin juridik, në aspektin e procedurës së një drejtësie të drejtë, një prelud mediatik i një procesi që më pas vijon, por që si i tillë ngre një varg pikëpyetjesh, pikëpyetje të rënda jo vetëm në lidhje me pastërtinë e udhëheqësve politikë, por mbi vetë kauzën e UÇK-së”.

“I kam lexuar edhe ata që e justifikojnë, e aprovojnë, e mbështesin në emër të nevojës për drejtësi atë njoftim. Dua shumë të besoj duke mos qenë as nga Kosova, as nga Shqipëria nuk kanë mundur ta ndiejnë sesa thellë dhe padrejtësisht ato fjalë të hedhura në perin e botës dixhitale prekin. Dhe prekin për faktin se tashmë udhëheqësit e UÇK-së janë thuajse të tërë, them thuajse, për të mos lënë padrejtësisht jashtë si udhëheqës ndonjërin të akuzuar në 21 vjet me radhë si individ me dy koka që nga një anë kanë udhëhequr luftën çlirimtare apo procesin e shtetndërtimit në Kosovë dhe nga tjetra kanë ngrënë njerëz, fëmijë, romë, si kanibalë”, – theksoi Rama.

Kreu i qeverisë u shpreh se “përballë historisë as Hashim Thaçi, as Kadri Veseli, as Ramush Haradinaj, asnjë prej krejt të akuzuarve në 21 vjet si dhe vetë UÇK në tërësi nuk kanë nevojë për asnjë mbrojtje publike, sepse përtej kësaj tërkuze të një gjyqësie eksperimentale ndërkombëtare ata janë vendosur në anën e drejtë të historisë dhe kanë bërë historinë vetë. Duke i dhënë asaj pandryshueshmërinë e mundshme në jetë të jetëve si histori e çlirimit të asaj pjese të pandashme të kombit shqiptar që quhet Kosovë”.

“Na duhet të bëjmë një hulumtim të shpejtë në kujtesë për ta sjellë tani në vëmendje se është falë tyre që u trondit ndërgjegjja tërësisht e fjetur e perëndimit demokratik dhe botës së qytetëruar në raport me Kosovën”, – tha Rama.

Kryeministri Rama theksoi se “është pikërisht falë tyre dhe falë një ndërmarrjeje çmendurake të atij grupi djemsh dhe pastaj të një armate djemsh e vajzash që i hynë detit në këmbë duke patur gjithë botën kundër. Duke mos pasur jo derë, po asnjë vesh të hapur asgjëkundi në kërkimin e asaj që duket se ka qenë aty gjithmonë, Kosova e pavarur shtet sovran. Është falë tyre që u imponua edhe reagimi me bomba i aleancës më të madhe ushtarake të planetit ndaj regjimit të mizorive të kryera në luftërat e Jugosllavisë. Mbase disa e kanë harruar, e kishin origjinën në Beograd dhe lanë pas numrin më të madh të viktimave pas Luftës së Dytë Botërore deri atëherë”. /atsh

Eksportet bujqësore kanë nisur mbarë edhe kulturën e fiqve.

Këtë vit, eksportet e fikut kanë nisur dy javë më herët se vitin e kaluar, ndërsa sezoni i prodhimit të bollshëm të fiqve të freskët, është nga vera, deri në vjeshtë, në varësi të varieteteve.

1,82 tonë fiq nga zona e Lushnjës, është sasia e parë që është eksportuar në tregjet e rajonit: Kosovë, Maqedoni e Veriut dhe Serbi gjatë pesë ditëve të fundit. Por eksportet e këtij produkti pritet të arrijnë në disa mijë tonë deri në fund të sezonit të prodhimit.

Në Shqipëri rriten disa lloje fiqsh, disa më të hershëm në prodhim e disa të tjerë më të vonshëm, kryesisht të bardhë dhe të zinj, si edhe varietete të fiqve më të vegjël, të quajtur rreka, të cilët dalin në treg në fund të verës.

Shqipëria renditet ndër vendet kryesore në botë për prodhimin e këtij fruti. Përmeti, Berati, Elbasani, por edhe Tirana dhe mjaft zona të tjera të Shqipërisë, sidomos asaj jugore, janë prodhuesit dhe kultivuesit kryesorë të fiqve shqiptarë, ndërkohë që një pjesë e mirë e fiqve vendas përpunohet për reçel, marmelatë, apo thahet për t’u përdorur gjatë muajve të tjerë të vitit./atsh

Gjatë fjalës në Kuvend, Kryeministri Edi Rama u ndal te rasti i ish-kryeministrit të Kosovës, Ramush Haradinaj i cili la detyrën asokohe për t’iu përgjigjur akuzave për krime lufte.

Rama tha se “Haradinaj la detyrën e kryeministrit të Kosovës në vitin 2005 pikërisht për t’iu përgjigjur thirrjes për akuza për krime të Tribunalit për krime lufte dhe dy herë doli i pafajshëm. Dy herë doli i pafajshëm dhe për herë të parë në historinë e Tribunalit të Hagës kjo nuk diskutohet, se këtë e kam fakt të certifikuar, ndodhi që një person i shpallur i pafajshëm të kthehet në rigjykim pas apelimit”.

“Përkundër faktit që vite e vite me radhë prokuroria nuk gjeti asnjë provë për të mbështetur akuzat e saj dhe kur Ramush Haradinaj merrej me këtë sagë, unë jam dëshmitar okular i një vizite në shtëpinë e të atit, i cili i ka dhënë luftës me shumë djem sesa ç’janë krijuar parti politike në Kosovë dhe më pas në shtëpinë e tij në Prishtinë ku e shoqja, një nënë e re rriste fëmijët dhe në mes të shtëpisë ishte një nga ato rrathët me dru për të mbajtur bebet që të mos lëvizin. Dhe nga ai imazh tek imazhi i pritjes finale që prapë nuk doli finale kur Ramushi zbret nga avioni, nga ato bebet, nga rrethi i drunjtë janë bërë marshallah, në pritje të kujt, të një krimineli që mbaroi dënimin? Jo! Të një të pafajshmi që dhjetë vjet njëherë i la rrugëve të drejtësisë ndërkombëtare, por jetoi dhe vazhdon sot të jetojë me hijen e një persekutimi në kuptimin më të drejtë të fjalës. Persekutim, sepse dal i pafajshëm më thërret prapë, dal i pafajshëm më thërret prapë, dal i pafajshëm dhe prapë më mban nën tiro. Nuk provon asgjë dhe prapë më paragjykon dhe më gjykon”, u shpreh Rama.

Dhe pa dyshim, tha ai, “komandant në një nga zonat më të ashpra të luftës, në zonën e Dukagjinit. Ish-kryeministër i zvarritur një dekadë për të dëshmuar që është pa lidhje me krimet kundër njerëzimit por thjeshtë ka udhëhequr një luftë, nuk ka lidhje lidhje me krimet kundër njerëzimit por thjeshtë ka udhëhequr një luftë, ka humbur njerëz atje. Ndërkohë që askush nuk merr asnjë përgjegjësi farë, për të gjithë këtë jetë të sakatuar, askush. Në rregull, doli i pafajshëm, po si kështu? Edhe kjo vazhdon. Sikur të më thonin që mund të ndodhë prapë, derisa lexova këtë të djeshmen do të thosha ‘edhe mund të ndodhë’, pas kësaj të djeshmes nuk çuditëm më dhe jo më larg sesa vitin e kaluar që t’i themi të gjitha, doli prapë i pafajshëm, por kësaj radhe u thirr në cilësinë e të dyshuarit, personi që ka dijeni për ngjarjen dhe që dyshohet se…”, theksoi Rama.

Më tej, Kryeministri tha se po njësoj edhe me Fatmir Limajn, e njëjta gjë.

“Shpallet i pafajshëm në Hagë dhe i fillojnë hetimet kur kthehet në shtëpi, nga e para. E dimë, sepse e njohim nga historia jonë dikë që u thoshte të tjerëve: thellohu, thellohu se ti je i fajshëm, unë nuk kam prova, por ti thellohu se do t’i gjesh vetë. Tani nuk ka mbetur veçse t’i gjejë vetë edhe të shkojnë e ta nxjerrin këtë botë që nuk ka halle edhe që tani ka një hall global për të zgjidhur krimet kundër njerëzimit që kanë bërë kosovarët”, tha Rama.

Më tej, Rama ndër të tjera u shpreh se “qindra luftëtarë të niveleve të larta të UÇK-së janë në fashikujt e drejtësisë ndërkombëtare, 21 vjet qindra dhe pyetja që vjen, vjen vetë pyetja nuk ke çfarë i bën tani për të bërë politikanin e madh dhe njeriun që rimendon që po e thashë si do ta përkthejnë dhe si do të lexohet përkthimi dhe mund të vija këtë foltoren pyetjes përballë, mund t’i thotë pyetjes mos m’u afro, por pyetja vjen vetë. Është kjo sagë tani në emër të drejtësisë përmes një vullneti ndërkombëtar, unikal në botë për të dhënë drejtësi të drejtë apo është një keqpërdorim i padrejtë me thënë të drejtën, i një gatishmërie të gjithëkohshme të palës kosovare për të bashkëpunuar me ndërkombëtar siç quhen në përgjithësi, por specifikisht me partnerët e Luftës Çlirimtare dhe për të zbardhur deri në fund çdo akuzë dhe çdo dyshim”.

“Kur mendon që në këtë botë pandemash me kaq shumë gjëra të thënë, të astërthëna, të rithëna e të prapëthëna për asnjëherë të provuara nga gjyqtarë, gjykata, njëra pas tjetrës, shkallë pas shkalle kundër të njëjtën njerëzve “same people” që këtë ta përkthej tamam, të cilët nga një anë dhanë të gjithë gatishmërinë si përfaqësues institucionalë të shtetit të ri sovran për këto gjykata qoftë duke i mbështetur në krijimin e tyre, qoftë duke iu dhënë punë atyre përmes paraqitjeve dhe riparaqitjeve dhe përmes qëndrimeve me vite, mbyllur në një kuti betoni, janë mbrapa të tjerë”, theksoi Kryeministri Rama. /atsh

Kryeministri Edi Rama në fjalën e mbajtur sot në Kuvend tha se akuzat ndaj Thaçit dhe Veselit për krime lufte janë shprehi të një historie lufte për çlirim të padëgjuar në planet, ku udhëheqësit e saj prej 21 vitesh gjykohen dhe rigjykohen nga institucionet ndërkombëtare pa asnjë provë.

Ndërsa e quan të vetmen histori në planet ku udhëheqësit e një vendi që kanë luftuar për liri u nënshtrohen akuzave të krimeve të luftës prej më shumë se dy dekadash, Rama u shpreh se ky është një rast unikal ku padrejtësia po merret si drejtësi.

“Qysh preh fillimit, 21 vjet drejtësia ndërkombëtarë ka hetuar thellësisht, largësisht çdo bëme të UÇK. Jam dëshmitarë për shkak të detyrës së ç’është bërë dhe se si është marrë pjesë me vullnet të plotë duke vënë në dispozicion të gjitha për të gjetur atë shtëpinë e verdhë të Edgar Allan Poe-s e cila nuk ekziston, të paktën deri më sot s’ka asnjë provë të ekzistencës së saj. Këtë nuk e them unë, por të gjitha institucionet shqiptare ose ndërkombëtarë që kanë marrë pjesë në atë kërkim të gjatë pas leximit të raportit të gjatë të Edgar Allan Poe-s”, tha Kryeministri.

“Unë kam dëgjuar gjithmonë që ka tri shkallë: shkalla e parë, shkalla e dytë, shkalla e tretë. Nuk di a ka një rast tjetër, unë nuk e kam gjetur një gjykatë me 6 shkallë ku të njëjtët njerëz hipin dhe zbresin shkallët. Dhe sikur të mos mjaftonin këto, në vitin 2015 Kosova bëri ndryshime unikale, unikale në historinë e Europës, kushtetuese dhe i hapi rrugë formimit të Tribunalit special për krime lufte. Pra, dy dekada. UNMI, EULEX, Tribunali i Hagës, gjykata të përziera, hibride, gjykata bio. Kanë administruar të gjitha me përgjegjësinë e drejtpërdrejtë të komunitetit ndërkombëtar procesin e hetimeve të krimeve të Luftës Çlirimtare të Kosovës, nuk e njoh. Prap kufizim që e pranoj, një histori lufte çlirimtare në planet që të ketë pasuar 21 vjet gjykata pas gjykatash për udhëheqësit e saj, unë nuk e njoh, mbase ka në planet. Dhe që ta themi deri në fund për 2 dekada, drejtësia e Kosovës ka qenë krejtësisht nën kontroll të drejtësisë ndërkombëtare”, tha Rama.

Sipas tij, “në nivel institucional, autoritetet kosovare kanë shtrirë dorën për bashkëpunim dhe janë rreshtuar gatitu ndaj çdo institucioni ndërkombëtar për të gjykuar krimet e supozuara të luftës”.

“Por ama në 20 vjet, unë nuk e di, por kush e di të ma thotë, të ketë dalë ndonjë nivel institucional apo ndonjë figurë me autoritet, institucion në Kosovë, që të mos e ketë pasur gati shtrirë dorën e bashkëpunimit dhe të mos jetë përgjigjur gatitu në rresht për një çdo thirrje të bashkësisë ndërkombëtare për të krijuar një tjetër gjykatë për krimet e supozuara të luftës. Nëse dikush e gjen dikë të më ndihmojë, dhe i kërkoj ndjesë atyre që mund të preken nga ky konstatim”.

Lidhur me njoftimin e djeshëm për akuzat ndaj udhëheqësve kosovarë, Rama u shpreh i indinjuar.

“Po ky teksti dje, çfarë ishte. Në cilin anal të drejtësisë ndërkombëtare hyn kjo kategori e një njoftimi kështu si papritur dhe ajo gjuhë që nuk bëhet fjalë farë as për të dyshuar, as për të prezumuar. Bëhet fjalë për dy monstra të cilëve ju ka ardhur fundi. Fund të cilit për fat të keq disa gati sa nuk janë gati ta festojnë mes shqiptarësh duke mos kuptuar që këtu nuk është fjala as për Kadri as për Hashim, këtu është fjala për diçka tjetër që po mundohem ta shpjegoj. Këtu është fjala për një fakt që ndërkohë që në anën e këtij shteti të krijuar nga vullneti çlirimtar dhe nga forca e bashkuar e botës demokratike kemi këtë panoramë, asgjë e ngjashme nuk ka ndodhur në atë shtetin tjetër ku u orkestrua pastrimi etnik. Si ka mundësi? Çfarë është kjo? Si mund të jetë një proces dinjitoz drejtësie ndërkombëtare, një proces kaq i njëanshëm dhe mbi të gjitha kaq i njëanshëm në anën ku shpresoj që një ditë të mos dalë dikush e të na thotë që ishte ana e atyre që ishin shkaku i vërtetë, siç ndodh për fat të keq me revizionimin e historisë, ku harrohet dhimbja e plagëve, ku harron edhe kufomat dhe ku fillon deformimi i botës mbi vetveten, i njerëzimit mbi vetveten. Kanë ndodhur këto gjëra e do të ndodhin. Sot ka më shumë seç kishte dje për fat të keq”, deklaroi Kryeministri Rama./atsh