Aktualitet

Ministrja e Shëndetësisë dhe Mbrojtjes Sociale, Ogerta Manastirliu ka uruar mjekun e njohur infeksionist, Tritan kalo në ditën e lindjes së tij.

“Profesor Tritan Kalo ka sot ditëlindjen! Nuk kishte se si kjo ditë ta gjente larg pacientëve dhe kolegëve të tij në spitalin infektiv, duke shërbyer me profesionalizëm e devotshmëri siç ka bërë e bën çdo ditë. Krenare për çfarë përfaqësoni dhe e nderuar të punoj me profesionistë dhe njerëz të rrallë si ju!Edhe 100 prof. Tani! Gëzuar nga zemra”, shprehet Manastirliu.

Profesor Kalo është një prej mjekëve që po qëndron në shërbim të pacientëve prej më shumë se 130 ditësh. //atsh

Ministria e Shëndetësisë dhe Mbrojtjes Sociale ka ndarë disa rregulla që duhen zbatuar në kuadër të sezonit turistik, për të mos rrezikuar infektimin nga COVID-19.

Në strukturat akomoduese, rekomandohet ruajtja e distancimit fizik jo më pas se 1.5 metër ndërsa stafi i shërbimit në kontakt me pushuesit apo vizitorët duhet të mbajmë domosdoshmërisht maskë.

“Pastrimi dhe dezinfektimi duhet të zbatohen me rigorozitet në bare, restorante, shezlone dhe në çdo ambient.Në strukturat akomoduese duhet të ruhet distancimi fizik jo më pak se 1.5 meter. Stafi i shërbimit në kontakt me pushuesit apo vizitorët duhet të mbajmë domosdoshmërisht maskë. Kujdes me përdorimin e ashensorit, respektoni distancimin dhe higjienën. Hapësira midis ndenjëseve dhe çadrave të pushuesve duhet jo më pak se 3.5 metër distancë. Shmangni grumbullimet e çdo lloji. Shmangni ambientet e mbyllura, konsumoni ushqim në ambiente të hapura. Mos këmbeni aksesorët e plazhit me të tjerët. Ruani higjienën vetjake. Nëse keni temperaturë mos u nisni për udhëtim dhe mos frekuentoni plazhin”, apelon ministria.

Por, cilat janë hapat që duhet të ndiqni nëse udhëtoni?

Gjëja e parë që duhet të bëni është të lani duart para se të udhëtoni dhe përdorni dezinfektant. Distanca sipas ministrisë së Shëndetësisë, është me rëndësi për t’u respektuar për të mos rrezikuar infektimin nga COVID-19.

“Mbani distancë nga njerëzit e tjerë. Vendosni maska mbrojtëse. Mos udhëtoni nëse jeni sëmurë apo keni temperaturë, kollë dhe vështirësi në frymëmarrje”, këshillon ndër të tjera ministria./atsh

Ministri i Brendshëm, Sandër Lleshaj deklaroi sot se lufta frontale kundër kanabisit e ka shkatërruar në themel të gjithë ngrehinën kriminale të ngritur në vend, që nga kryeqendra në Lazarat, e deri në kthinat më të thepisura të maleve të Shqipërisë.

“Kur Partia Demokratike flet për kanabisin, përkufizimi i hipokrizisë bëhet vetë PD. Themeluesit krenarë dhe shfrytëzuesit e paskrupullt të kryeqytetit europian të kanabisit, Lazaratit, e kanë humbur të drejtën morale për të drejtuar gishtin ndaj kujtdo në këtë vend për këtë temë, por jo vetëm për këtë”, th Lleshaj.

Duke reaguar pas publikimit të dy fotove të parcelave me kanabis nga PD, Lleshaj tha se “janë jo vetëm një fiasko në aspektin informativ, po edhe një tjetër shembull i radhës së PD nuk i intereson e verteta, po dizinformimi i publikut”

Policia e Shtetit, bëri të ditur ministri, ka shkatërruar prej ditësh jo vetëm dy parcelat në fotot e lodhura të PD, që mesa duket i kanë dhembur ndonjë kultivuesi a lidhjeje biznesore të vetë PD, por edhe dhjetëra parcela të tilla në të gjithë vendin.

“Lufta frontale kundër kanabisit e ka shkatërruar në themel të gjithë ngrehinën kriminale të ngritur në vend, që nga kryeqendra në Lazarat, e deri në kthinat më të thepisura të maleve të Shqipërisë. Sigurisht që ende ka e do ketë kokëshkretë që përpiqen të vijojnë veprimtarinë kriminale. Por shanset e suksesit për ta tanimë janë shumë afër zeros”, tha më tej ministri.

Sipas tij, angazhimi frontal i Policisë dhe institucioneve të tjera shtetërore e kanë bërë kanabisin në Shqipëri një alternativë pa të ardhme.

“Në vitin 2019 në bregdetin italian u sekuestrua sasia më e ulët historike e kanabisit. Të gjithë treguesit e nivelit të sigurisë në vend dhe ata të rezultateve në luftën kundër krimit, përfshirë kanabisin, janë në nivelet më të mira historike. Asgjë nuk mund të krahasohet me kohën kur vendin e qeveriste lazaratopatia”, informoi ai.

Krahasimi i këtyre treguesve me kohën e qeverisjes së PD, vijoi Lleshaj, prodhon diferenca aq të mëdha, sa që vetë krahasimi i ngjan një abuzimi.

“Në fushën e sigurisë, mund të jesh më mirë nga koha edhe sikur të mos bësh asgjë. Ndaj ne as nuk krahasohemi me trashgiminë e PD dhe as nuk shpërqëndrohemi nga tymnajat e saj dezinformuese”, u shpreh ministri.

Sipas tij, lufta për çrrënjosjen përfundimtare të kanabisit vazhdon me intensitet maksimal dhe qytetarët ftohen të kontribuojnë me informacion, pasi kështu secili ndihmon për një Shqipëri më të sigurt.

Reagimi i ministrit të Brendshëm, Sandër Lleshaj vjen pas deklaratës së Sekretarit për Çështjet Ligjore në PD, Çlirim Gjata i cili ka paraqitur pamje të parcelave me kanabis, që sipas tij tregon se Shqipëria prej dy vitesh po mbillet fuqishëm me drogë.

“Kjo foto është bërë së fundmi në Kukës. Kjo tjetra i përket plantacioneve me kanabis në Labëri. Kështu është në Malësinë e Dukagjinit, në Malësinë e Krujës, të Tepelenës, të Gramshit, në fshatrat e Beratit, të Vlorës, madje edhe në periferi të Tiranës”, u shpreh Gjata.

Sipas tij, Shqipëria prej 2 vjetësh është rimbjellë fuqishëm me drogë, por policia është urdhëruar të mos shikojë, të mos dëgjojë, të mos shqetësojë bosët e drogës në partneritet me qeverinë.

Ndërkohë pas deklaratave të ministrit të Brendshëm, ka reaguar Partia Demokratike e cila përmes një deklarate shprehet se: “Akuzat e rreme të Ministrit të Brendshëm Sandër Lleshaj kundër Partisë Demokratike për çështjen e kanabisit janë identike me ato të paraardhësit të tij Saimir Tahirit para 4-5 vjetëve, kur droga transportohej me avion dhe qeveria bënte sikur vriste mushkonja”.

“Fotot e publikuara sot janë vetëm maja e ajzbergut e siperfaqeve të mbjella me drogë kudo në Shqipëri. Janë prova se kultivimi i kanabisit ka bekimin e kësaj qeverie, të deputeteve dhe kryebashkiakëve të Edi Ramës. Shqipëria është e mbushur plot me kanabis. Kudo është mbjellë drogë dhe fakt është se nuk ka asnjë bos droge të arrestuar, nuk ka asnjë Drejtor Policie të larguar”, shprehet PD./atsh

Universiteti i Mjekësisë në Tiranë përmes një mesazhi sensibilizues ka bërë apel për të mbajtur gjithmonë maskën, me qëllim që qytetarët të mos rrezikohen nga koronavirusi.

“Për sigurinë e të gjithëve, Universiteti i Mjekësisë në Tiranë ju rikujton të mbani maskën gjithmonë në mjedise të mbyllura”, thuhet në njoftimin zyrtar të Universitetit të Mjekësisë.

Mesazhi shoqërohet edhe nga të gjitha figurat e rëndësishme të këtij universiteti, nga pedagogët të Universitetit të Mjekësisë në kryeqytet.

Të mërkurën e kësaj jave, Këshilli i Ministrave miratoi vendimin që detyron qytetarët që të vendosin maskë në ambientet e mbyllura teksa për herë të parë ditën e sotme, janë ndëshkuar me gjobë 17 qytetarë të cilët nuk e kanë respektuar këtë vendim./atsh

Presidenti Ilir Meta ka dekretuar shpalljen e 4 ligjeve, që synojnë krijimin e lehtësirave për qytetarët e disa kategorive, në marrjen e shërbimeve.

Kështu, Meta ka dekretuar aktin normativ për ndryshimin e ligjit “Për letërnjoftimin elektronik të shtetasve shqiptarë”, të ndryshuar’”. Po ashtu, ai dekretoi ligjin “Për një shtesë në ligjin ‘Për letërnjoftimin elektronik të shtetasve shqiptarë’, të ndryshuar’”.

Presidenti argumenton se të dyja këto nisma, si shtyrja e afatit të vlefshmërisë së letërnjoftimit elektronik të shtetasve shqiptarë, që u përfundon ky afat brenda vitit 2020, ashtu dhe lehtësimi nga detyrimi për shtetas të moshës mbi 75 vjeç për të rinovuar këtë dokument, përbëjnë një lehtësim më shumë për qytetarët në aplikimin dhe pajisjen me letërnjoftimin elektronik, veçanërisht në këtë periudhë pandemie, si dhe reduktojnë kostot për të moshuarit.

“Institucionet përgjegjëse duhet të marrin masa për të informuar qytetarët mbi këto lehtësi”, u shpreh presidenti.

Meta dekretoi po ashtu ligjin “Për një ndryshim në ligjin “Për kontrollin shtetëror të transferimeve ndërkombëtare të mallrave ushtarake dhe të artikujve e teknologjive me përdorim të dyfishtë””.

Edhe kjo nismë, sipas tij, lehtëson aplikimet e operatorëve ekonomikë, duke mundësuar marrjen e licencave/autorizimeve dhe certifikatave që lëshohen nga Autoriteti i Kontrollit Shtetëror të Eksporteve edhe përmes aplikimeve on- line.

Së fundi, Meta dekretoi edhe ligjin “Për disa ndryshime në ligjin “Për rivlerësimin e pasurisë së paluajtshme””.

“Ky ligj ka shtyrë afatin për procesin e rivlerësimit të pasurive të paluajtshme deri në 31 dhjetor 2020.

Shtetasit apo subjektet juridike që për shkak të pandemisë, nuk kanë patur mundësinë të aplikojnë brenda afatit, tashmë u ofrohet edhe një hapësirë e re kohore për të kryer rivlerësimin e pasurive të paluajtshme me vlerën e tregut”, theksoi presidenti Meta. /atsh

Instituti i Sigurimeve Shoqërore ka publikuar një tjetër listë me emrat e rreth 271 përfituesve pensionistë që kanë gati pensionet dhe shtesat suplementare të llogaritura në vijim të zbatimit të ligjit “Për trajtimin financiar dhe suplementar të punonjësve që kanë punuar në miniera në nëntokë, industrinë e naftës e të gazit dhe metalurgji”.

ISSH ka vijuar edhe gjatë kësaj periudhe pandemie të shqyrtojë kërkesat e dorëzuara ndërsa përfituesit e rinj do të mund të tërheqin pagesat suplementare për punët e kryera në industrinë e naftës dhe të gazit, në miniera nëntokë, si dhe metalurgjisë.

Autoritetet e Institutit të Sigurimeve Shoqërore sqarojnë se procedurat e llogaritjes së pagesave suplementare për këto kategori profesionesh do të vijojnë edhe përgjatë ditëve në vijim pasi janë ende me mijëra kërkesa të tjera të depozituara nga aplikuesit që plotësojnë kushtet e përcaktuara.

LISTA EMËRORE E PËRFITUESVE

LISTA_10_17_KORRIK_2020

Kryeministri Edi Rama reagoi sot pas fjalimit të presidentit Hashim Thaçi drejtuar popullit të Kosovës, pas kthimit nga 4 ditë intervistimi në Gjykatën e Hagës.

Rama postoi një fotografi të presidentit Thaçi me citimin e tij “Askush nuk do ta rishkruajë dot historinë e lirisë sonë”.

Në adresimin e tij, Thaçi theksoi se për rreth 30 orë ballafaqim me trupën e organit të akuzës, ësht njohur me të gjitha pretendimet e tyre dhe u kam dhënë përgjigje pyetjeve.

“Sot ju them me bindje se ky proces jo vetëm që nuk do ta rishkruajë këtë histori të shkruar me gjakun dhe sakrificën e një populli të tërë në luftën për liri, por përkundrazi, nga ky proces, cilado qoftë rrjedha dhe kohëzgjatja e tij, historia e lavdishme e rezistencës, mbijetesës dhe triumfit mbi një pushtues, që kërkoi të shfaroste popullin shqiptar të Kosovës nga faqja e dheut me fshesën e fashizmit etnik, do të bëhet njëherë e përgjithmonë e paprekshme nga askush”, u shpreh Thaçi. /atsh

Një koloni e re e dallëndyshes së detit ‘Glareola pratincola’ është gjetur nga vullnetarët gjatë ditëve të fundit, në skaj të Parkut Kombëtar Divjakë-Karavasta.

Administrata e Zonave të Mbrojtura në Qarkun e Fierit informon se nga vlerësimet paraprake, u konfirmua një numër prej së paku 70 çiftesh folezuese, megjithatë numri i saktë mund të jetë dyfish më i madh.

“Kolonia është e shtrirë në një sipërfaqe të gjerë prej rreth 100 ha dhe për inventarizimin e saktë të çifteve folezuse nevojitet një skuadër me disa specialistë dhe ndihmë. Kësisoj, vullnetarët tanë kanë kërkuar ndihmën e Administratës Rajonale të Zonave të Mbrojtura Fier dhe Shoqatës për Ruajtjen dhe Mbrojtjen e Mjedisit Natyror në Shqipëri për të realizuar inventarizimin e plotë të kolonisë në bazë të protokolleve metodologjike përkatëse”, thekson ADZM në fier, ndërsa falenderojnë të dy institucionet për shprehjen me shumë entuziazëm dhe interes të gatishmërisë për të ndihmuar në këtë proces që do të realizohet së afërmi.

“Për fat të mirë, stadi i folezimit në të cilin gjendet kolonia mundëson ende inventarizimin e saj. Mosha e zogjve është e ndryshme, por në shumicën dërrmuese nuk e ka arritur stadin e zhvillimit të puplajës që u mundëson fluturimin. Të rinjtë gjithashtu, në përgjithësi, qëndronin në koloni nën kujdesin e prindërve.

Këto gjetje të fundit e klasifikojnë Shqipërinë si vendin e 7 në Europë për sa i përket madhësisë së popullatës së dallëndyshes së detit./atsh