Shoqata e Ruajtjes dhe e Mbrojtjes së Mjedisit Natyror në Shqipëri bën thirrje autoriteteve ligjzbatuese të ngrenë vigjilencën dhe të përballin raste të gjuetisë së paligjshme.
Muaji shtator shënon pikun e shtegtimit për shkurtën (Coturnix coturnix), një rrugëtim i cili i ngjan më tepër një fluturimi për mbijetesë.
Gjatë përshkimit të mijëra kilometrave nga Europa Juglindore drejt Afrikës Subsahariane, ky shpend i mrekullueshëm gjendet nën presionin e vazhdueshëm të brakonazhit.
Pavarësisht se shkurta është gjuajtur prej shekujsh, popullata e saj nuk ka qenë e rrezikuar, por përdorimi i mjeteve si imituesit elektronikë, apo vendosja e rrjetave me gjatësi kilometrike përgjatë rrugës së shtegtimit, kanë filluar të ndikojnë negativisht në qëndrueshmërinë e popullatës së këtij lloji.
Shqipëria është një zonë e rëndësishme për shkurtën në korridorin e shtegtimit përgjatë Adriatikut, po ashtu, konsiderohet si një zonë e nxehtë për sa i përket vrasjes së paligjshme të saj me anë të imituesve elektronikë, duke ndikuar në uljen e popullatës botërore të këtij lloji.
Imituesit e zërit bëjnë të mundur grumbullimin e shumë individëve të shkurtës në një vendndodhje të caktuar, duke e bërë më të lehtë vrasjen e tyre dhe furnizimin e restoranteve ku serviret mish i egër.
PPNEA i bën thirrje autoriteteve ligjzbatuese të ngrenë vigjilencën ndaj imituesve që dëgjohen në mënyrë të vazhdueshme, përgjatë netëve, në zonat rurale. Gjithashtu, i lutemi kujtdo që përballet me raste të gjuetisë së paligjshme që t’i raportojë pranë organizatës sonë./atsh
Presidenti i Republikës, Ilir Meta dekretoi sot dhënien e gradës “Gjeneral Brigade” për kolonelët Ilir Xhebexhia dhe Arben Kingji.
Kolonel Xhebexhia është me detyrë zv.përfaqësues Ushtarak në NATO, Atashe Ushtarak i Republikës së Shqipërisë në Belgjikë dhe jorezident në Francë”, në Përfaqësitë Ushtarake Jashtë Vendit.
Ndërsa kolonel Kingji është me detyrë “Komandant” i Batalionit të Mbështetjes, në Shtabin e Përgjithshëm të Forcave të Armatosura.
Dekreti i Presidentit është në mbështetje të Kushtetutës dhe ligjit “Për pushtetet dhe autoritetet e drejtimit e të komandimit të Forcave të Armatosura”.
Dekreti i Presidentit Meta për dhënie grade “Gjeneral Brigade” për Ilir Xhebexhia dhe Arben Kingji hyn në fuqi menjëherë./atsh
Mulliri i Bajram Currit, monument kulture i kategorisë I i është nënshtruar ditët e fundit restaurimit, për t’u kthyer në identitet.
Drejtoria Rajonale e Trashëgimisë Kulturore Shkodër bën të ditur se ky objekt i është nënshtruar restaurimit me projekt të miratuar në Këshillin Kombëtar të Trashëgimisë Kulturore Materiale (KKTKM) dhe me fondet e buxhetit të shtetit. Kjo ndërtesë gjendet në fshatin Shoshan, Tropojë, daton në fundin e viteve 1800 dhe është një ndërtim që e gjejmë shpesh në zonën e Tropojës.
Sipas DRTK, Shkodër kemi të bëjmë me një ndërtim tip kullë guri, dykatëshe, mbuluar me furde pishe.
Mulliri i Bajram Currit ose siç thuhet nga vendasit Mulliri i Currit është ndërtuar me financimet e kësaj figure popullore në ndihmë të Malësisë së Gjakovës rreth 120 vite më parë.
Pas shumë kohësh ky mulli me vlera kulturore e historike po restaurohet, pasi për shkak të mosmirëmbajtjes rrezikonte të shembej.
Vizitorë kuriozë shkojnë shpesh drejt këtij monumenti tradicional, për natyrën e bukur, por edhe për të parë nga afër një dëshmi historike./atsh
Duke ndarë një opinion, Presidenti Ilir Meta ndan bindjen se ku nuk ka garë, ka korrupsion.
“Po është konkluzion i drejtë se ku s’ka garë, ka korrupsion. Vetëm zgjedhjet e lira, të drejta dhe të ndershme, garantojnë edhe konkurrencën në treg dhe ekonomi!”, shkruan Presidenti, duke ndarë shkrimin që gjeni më poshtë.
Ku s’ka garë, ka korrupsion- Nga Ervis Iljazaj
Korrupsioni, mungesa e transparencës dhe garës në prokurime, praktikat e partneritetit publik-privat (PPP) dhe ato të bizneseve informale mbeten problemet kryesore që sipas Departamentit Amerikan të Shtetit (DASH) dëmtojnë klimën e biznesit dhe pengojnë investimet e huaja në Shqipëri.
Në thelb, ajo çfarë ka theksuar raporti i DASH, është ajo çfarë dihet botërisht. Ku s’ka garë, konkurrence dhe ku nuk zbatohen liritë ekonomike, ka korrupsion.
Qeveria Rama, në vitet e fundit, ka kryer disa investime strategjike, kryesisht rrugë, të cilat disa kanë filluar disa jo, por që kontratat janë të firmosura. Është i famshmi projekti një miliard euro, që do të shpenzohej nëpërmjet partneritetit publik-privat.
Një projekt i cili u kritikua shumë, jo vetëm nga një pjesë e ekspertëve të ekonomisë shqiptarë, por edhe nga institucione financiare ndërkombëtare si Banka Botërore. Arsyeja kryesore e kritikave ishte rritja e borxhit publik në vitet e ardhshme, që do të jetë një peshë e madhe për buxhetin e brishtë shqiptar.
E megjithatë, problemi më i madh i të gjithë projektit një miliard euro nuk është rritja e borxhit , por mënyra se si po shpenzohen ato para. Qeveria shqiptare, me një guxim të çuditshëm, është duke shpenzuar paratë e shqiptarëve pa garë dhe në mënyrë arbitrare. Pa hyrë në debatin e kostove të tyre, që për shumë projekte janë kosto absurde, shqetësues është fakti se këto para nuk tenderohen me një garë të hapur për të gjithë, por me disa metoda të dëmshme, që më së paku hedhin dyshime të mëdha për abuzimin me buxhetin e shtetit dhe janë premisë për korrupsion, ashtu sikurse e thekson dhe raporti i DASH.
Instrumente të tilla si oferta të pakërkuara, apo tenderime të drejtpërdrejta, janë duke u kthyer në normë dhe një zakon i rrezikshëm për politikat ekonomike të qeverisë. Në këtë mënyrë është duke u shkelur haptazi liria ekonomike, e cila është një parim kushtetues, që nënkupton që paratë e shqiptarëve duhet të jenë të aksesueshme me garë nga të gjithë, për të mirën e ekonomisë dhe zhvillimit në Shqipëri.
Kështu që, për t’u dhënë fund mundësive të abuzimit me paratë e buxhetit të shtetit, duhet me patjetër që në Kushtetutën e Shqipërisë të shkruhet që asnjë lek i shqiptarëve nuk do të shpenzohet pa garë të hapur dhe transparente. Të gjitha instrumentet e tjera si oferta të pakërkuara, që janë burim për korrupsion, duhen të ndalohen nga Kushtetuta e Shqipërisë. Në fakt, ky duhet jetë një propozim racional i opozitës shqiptare për t’i dhënë fund këtij fenomeni që është kthyer në një sëmundje të qeverisjes dhe ekonomisë shqiptare.
Opozita në retorikën e saj dhe denoncimet ndaj qeverisë, i ka dhënë një hapësirë të rëndësishme luftës kundër oligarkisë, ashtu sikurse e quan ajo. Madje ka premtuar se do tja u marrë atyre dhe do ja u kthejë shqiptarëve.
Kuptohet fare qartë se, me gjithë dëshirën e mirë që mund të ketë opozita, kjo është gjë e parealizueshme për shumë arsye. Nuk ka ndodhur asnjëherë që në Shqipëri që opozita kur ka ardhur në pushtet të ketë ndërmarrë një aksion të tillë. Jo për faktin se s’ka pas vullnet në disa raste, por për faktin se mungojnë instrumente ligjore për ta bërë një gjë të tillë.
Prandaj, opozita nëse vërtet do t’u bëjë një të mirë shqiptarëve dhe ekonomisë së tyre, duhet të japë një zgjidhje afatgjatë për të luftuar një fenomen të tillë. Le të propozojë një nen kushtetues ku të ndalohen të gjitha ofertat e pakërkuara, tenderimet e drejtpërdrejta, apo çdo instrument tjetër që është burim korrupsioni, dhe ku të shkruhet se paratë e shqiptarëve do të shpenzohen të gjitha me konkurrencë dhe në mënyrë transparente. Vetëm kjo mënyrë është një premtim i besueshëm, është racional dhe i arsyeshëm. Të gjitha të tjerat janë thjesht retorikë politike.
Ajo cka e shkatërron një demokraci është pikërisht mungesa e garës në çdo fushë. Aq më tepër në fushën ekonomike. Kështu që, për të ndaluar arbitraritetin e qeverisë me paratë e shqiptarëve, u duhet hequr qeverive çdo instrument që është burim korrupsioni. Dhe duke njohur natyrën e politikës shqiptare, potenciali për të abuzuar me buxhetin është i madh dhe prezent në çdo kohë.
Ngjarja e rëndë e ndodhur në aksin rrugor Jorgucat-Kakavijë, në vendin e quajtur Bularat, ku një ambulancë duke ecur me shpejtësi aksidentoi një fëmijën 10-vjeçar, i cili për pasojë ndërroi jetë, shokoi mbarë opinionin publik më 15 gusht.
Pas shumë orësh pritje për të kaluar kufirin familja Ndoji u përball dhe me humbjen e fëmijës. Me lot e dhimbje të thellë babai i 10-vjeçarit Nik Ndoji rrëfen momentin kur pa gjithë skenën me sy, kur fëmija u aksidentua nga ambulanca dhe u nis për në spital me një ambulancë tjetër.
Ai tregoi në emisionin “Me zemër të hapur” në News24 se djali, i plagosur shoqërohej vetëm nga e ëma, pasi infermierja qëndroi me shoferin dhe ambulanca nuk kishte as oksigjen. I vështirë ishte po ashtu momenti kur mjeku iu njoftoi vdekjen dhe Nik duhet të ishte i fortë dhe për djalin tjetër dhe gruan që përfundoi në oksigjen.
A ju ka telefonuar kush nga ana e shoferit të ambulancës apo dikush tjetër?
Asnjëri në botë nuk më ka marrë mua për këtë rast në telefon.
Çfarë ndodhi me vogëlushin pas aksidentit?
Shkuam në spital. Na treguan që çuni nuk ishte më në jetë. Në momentin kur shkuam në spital, më çoi policia. Një infermiere dhe një ambulancë që e ka çuar çunin, nuk kishte as oksigjen, infermierja ndenji me shoferin. Nusja ndenji me fëmijën.
Çfarë thoshte nusja juaj?
Ajo thoshte ishte në jetë sikur të…Por dhe ajo nuk ka qenë në gjendje, ka qenë e shokuar.
Skeda e vdekjes e thotë besoj kur ka ndërruar jetë?
Nuk e kam parë por doktori më ka thënë që fëmija ka shkuar pa jetë në spital.
Ju thoni që ka pasur shenja jete?
Nusja që më ka thënë që e ka pasur në dorë, ka qenë vetëm me djalin. Nusja më thotë se ai ishte mirë.
Ju shkuat në spital me djalin tjetër?
Në momentin që hyra tek spitali, pashë infermieren që ishte në ambulancën që kishte transportuar djalin, i them çuni jeton?
Më thotë po. I them përsëri, më thotë po. Kisha dhe djalin tjetër e mundohesha të forcohesha për çunin që të mos kishte probleme. Por ai i kishte parë gjithçka.
Sa vjeç është djali tjetër?
Djali bën 12 vjeç për 4-5 muaj. Gruaja ka qenë me oksigjen. Pas 10 minutash që kam hyrë në spital, përafërsisht se mua minutat më dukeshin orë atje, ka dalë doktori dhe më ka thënë që çuni ka mbaruar dhe për mua ishte një gjë tepër e vështirë, si ta përballoja një gjë kaq të vështira. (qan…) Në njërën anë çuni i vdekur, në anën tjetër si ta gjeja mënyrën si t’ia thosha çunit tjetër apo nga ana tjetër që nusja ishte e shokuar dhe ajo. Ishte një moment tepër i vështirë, i papërballueshëm. Jashtëzakonisht i vështirë. (qan pa pushim me ngashërima)
Olsi Rama, drejtori sportive i ekipit të Partizanit, gjatë intervistës në studion e “Ilva Now” foli dhe për akuzat që janë ngritur ndaj tij gjatë viteve të fundit. Ai tha se, ka vendosur të mos u përgjigjet pasi synojnë dëmtimin e imazhit të vëllait të tij, që drejton qeverinë e vendit.
“Unë mendoj se sulmohet thjesht për faktin e lidhjes sime familjare me vëllain. Mendoj se çdo gjë përdoret për të dëmtuar imazhin e tij. Kam vendosur të mos përligjem pasi nuk dua të bëhem pis në llumin që të tjerët ngrenë. Unë e di se çfarë bëj dhe çdo gjë që bëj është e djretë, e ligjshëm dhe e rregullt.
Nuk bëj asgjë nga ato që më akuzojnë, kështu që për këtë pjesë jam i qetë. Nëse do të më akuzojnë për ndonjë gjë tjetër dhe nëse do të prekem atëherë do të përgjigjem. Deri tani më kanë lënë thjesht indiferent. E di që janë pjesa e pisët e luftës politike që bëhet në Shqipëri është një gjë që nuk nderon ata që e bëjnë në radhë të parë. Akuzat janë të vazhdueshme deri në pikën kur nuk shoh më lajme dhe lexoj vetëm gazetat sportive”, tha Olsi Rama.
I pyetur nëse ka përfituar nga fakti se është vëllai i Kryeministrit, Olsi Rama u përgjigj: Absolutisht jo sepse Partizani nuk ka pasur asnjë tender dhe një terren sportive që ka pasur që përpara shumë e shumë vitesh, dihet se u ndërtuan pallate dhe atë terren sportive për të zhvilluar akademinë i është dhënë që përpara se të shkoja drejtor.
Kryeministri Edi Rama i ftuar këtë mbrëmje në “Opinion”, foli në lidhje me politikën e jashtme të Shqipërisë dhe afrimitetin me presidentin turk, Rexhep Tajip Erdogan, ku tha se ishte nder i madh të qëndroje në sedijen e pasme të tij.
“Është nder i madh të jesh në sedijen e pasme dhe të kesh shofer presidentin e Turqisë, nuk isha në karrocieri po isha në sedijen e pasme dhe presidenti më nderoi mua si mik dhe si kryeministri Shqipërisë”, deklaroi kryeministri.
Në një lidhje direkte në emisionin “Opinion” kryeministri Rama tha se me ardhjen e tij në qeveri, Shqipëria ka sipas tij politikë të jashtme.
“Politika e jashtme e Shqipërisë me atë metodën mbuloi bëj sikur si shikon dhe uli pantallonat se ke benevrekë poshtë s’ka problem për vite të tëra ka mbaruar me ardhjen time në krye dhe sot falë kësaj qeverie prej 7 vjetësh Shqipëria ka politikë të jashtme. Shqipëria sot, fal nesh drejton OSBE, diçka e pamendueshme më parë dhe jo vetëm drejton OSBE por ka një reputacion të madh Dhe këtë anadollakërinë që ju e sillni këtu, në fakt unë po ju them që ata që dinë ta shohin e vlerësojnë shuam dhe ata nuk janë peshkatarët por aleatët janë Politikë të jashtë dinjitoze ku shqiptarët ulen në çdo tavolinë pa komplekse nuk ka pasur përpara.”, tha kryeministri Rama.
