Turizem

Në Shqipëri gjenden shumë qytete të bukura, për të cilat shumica e njerëzve nuk kanë dëgjuar, shkruan blogerja e njohur neozelandeze, Anita Hendrieka në faqen e saj të internetit anitahendrieka.com.

”Është vend relativisht i pazbuluar. Ka shumë për të ofruar duke nisur nga plazhet me rërë deri në një të kaluar komuniste interesante dhe të errët si dhe një lulëzim të gastronomisë. Në këtë shkrim do të gjeni 10 qytetet më të mira të Shqipërisë, të cilat duhet t’i vizitoni”, shkruan Hendrieka.

TIRANA

Kryeqyteti i pozicionuar në zemër të Shqipërisë, ka evoluar bukur gjatë viteve të fundit. I mbushur plot me kafene të bukura, ngjyra, vepra arti, afreske gjithashtu dhe restorante të mira.

Tirana është qytet shumë aktiv dhe tepër i veçantë krahasuar me qytete të tjera të Europës. Nëse doni të mësoni më shumë mbi të kaluarën e errët komuniste të Shqipërisë duhet të vizitoni muzetë Bunk Art 1 dhe Bunk Art 2. Të dy këto muze janë të vendosur në bunkerë nëntokësorë që t’iu lejojnë të kuptoni sesi ka qenë komunizmi në Shqipëri. Një tjetër muze që duhet vizituar është ”Shtëpia me gjethe”, ku mund të kuptoni edhe më thellë periudhën komuniste.

Nëse muzetë nuk janë në shijet tuaja, si thoni për klasa gatimi ku të mësoni mbi ushqimin shqiptar? Duke mësuar më tepër mbi ushqimin, mësoni më tepër dhe për mënyrën shqiptare të jetesës.

SARANDA

Qyteti i Sarandës, i pozicionuar në anë të detit, është një ndër të preferuarit e mi (kam jetuar këtu për më shumë se dy vite). Gjatë periudhës së verës, është qyteti më i populluar nga turistët për shkak të plazheve të bukura që ndodhen përreth. Saranda është porta për në Rivierën Shqiptare, ku ndodhen disa nga plazhet më të bukura të Shqipërisë.

Për të parë perëndimin fantastik, duhet të vizitoni Kalanë e Lëkurësit. Gjithashtu mos harroni të vizitoni “Maldivet e Shqipërisë”, ishullin e Ksamilit si dhe Butrintin, i shpallur zonë e mbrojtur nga UNESCO. Në dalje të qytetit gjenden disa plazhe të bukura të quajtura plazhi i Pasqyrave dhe plazhi i Manastirit.

DURRËSI

I pozicionuar vetëm 30 kilometra nga kryeqyteti, gjendet qyteti bregdetar i Durrësit, i cili njihet për historinë që daton para 3 000 vitesh. Aty ndodhet dhe amfiteatri i dytë më i madh në Ballkan, me kapacitet prej rreth 15 000 personash.

Durrësi është një qytet-port, gjë që tregon se nuk është qyteti më i bukur në Shqipëri, por historia, plazhet dhe arkitektura e qetë e bëjnë atë një qytet të famshëm ku turistët të ndalojnë.

BERATI

Qyteti i një mbi një dritareve, i gjendur jo larg nga Tirana, është qytet i mbrojtur nga UNESCO. Ky destinacion është ndër më të dallueshmit në Shqipëri për sa i përket arkitekturës dhe sharmit të Perandorisë Osmane.

Kur vizitoni Beratin sigurohuni të ecni më këmbë ose të ngjiteni me makinë lart në kala për të parë peizazhe fantastike. Gjeni kohën për t’u endur në rrugët me kalldrëm të qytetit të vjetër dhe të shkoni për degustim në ndonjë nga punishtet e verërave. ”Çobo” është e preferuara ime.

VLORA

Vlora është një tjetër qytet bregdetar si Saranda dhe është porta tjetër për në rivierën shqiptare. Ky qytet është shumë më i madh se Saranda dhe ka plazhe të bukura për të vizituar. Plazhi i Radhimës është zgjedhje e mirë!

Vlora është qytet i rëndësishëm për Shqipërinë pasi aty u shpall pavarësia nga Perandoria Osmane.

Vizita në ishullin e Sazanit do të ishte një tjetër aktivitet i këndshëm. Ky ishull ka shërbyer si bazë ushtarake dhe shtëpi për ushtarët si dhe familjet e tyre, por pas rënies së komunizmit, ishulli u braktis. Kohët e fundit, është lejuar që një pjesë e tij të vizitohet nga turistët.

KORÇA

Korça është një qytet i veçantë dhe i famshëm për prodhimin e birrës. Birra “Korça” është ndër birrat më të mira në treg. Për më tepër, në Korçë, pak para pashkëve ortodokse, mbahet festivali më i madh i birrës.

Qyteti është tepër tradicional dhe shumë turistë sapo kanë filluar ta zbulojnë.

SHKODRA

Shkodra nuk ngjason me asnjë qytet tjetër në Shqipëri. Arkitektura është shumë e ndryshme nga të tjerat. E pozicionuar në veri, Shkodra është një vend i famshëm për të eksploruar Alpet e Shqipërisë.

Nëse qëndroni në Shkodër, sigurohuni të vizitoni kalanë e Rozafës dhe të mësoni legjendën e gruas së murosur. Nëse ju pëlqejnë aktivitetet në natyrë, bëni një udhëtim në Theth dhe një shëtitje deri në Valbonë. Është udhëtimi më i bukur për të vizituar natyrën e pafundme të Shqipërisë.

KRUJA

Qyteti historik i Krujës, ose i njohur si qyteti i Skënderbeut, është ndër ndalesat e mia të preferuara në Shqipëri. Skënderbeu është heroi i Shqipërisë, i cili ndihmoi vendin të luftojë ndaj Perandorisë Osmane dhe të rimerrte kontrollin. Brenda kështjellës së Krujës gjendet një muze dedikuar Skënderbeut ku mund të mësoni më shumë mbi historinë e këtij qyteti malor.

Në Krujë ndodhet pazari më i madh që kam parë në Shqipëri. Është më i vjetri që daton në shekullin XIV. Aty mund të gjeni objekte të çmuara, qofshin këto të reja ose të vjetra.

GJIROKASTRA

Gjirokastra është një ndër qytetet e vogla të Shqipërisë, por pjesa e vjetër e qytetit duhet vizituar patjetër. Për shkak të historisë dhe bukurisë, ky qytet mbrohet nga UNESCO. Ju rekomandoj të paguani pak më shumë e të vizitoni Muzeun e Armëve dhe burgun e vjetër. Kjo vizitë do j’u sigurojë informacion më të thellë për sa i përket historisë.

Gjirokastra është vetëm një orë larg qytetit të Sarandës duke mundësuar kështu një udhëtim të bukur ditor ose qëndrim për një natë.

LEZHA

Lezha nuk është zgjedhja e parë për turistët, por duhet të jetë sepse po fillon të bëhet destinacion turistik dhe një ndër qytetet më të mira të Shqipërisë.

Kështjella e Lezhës, e pozicionuar mbi kodër, ofron disa nga pamjet më të bukura të qytetit. Brenda në qytet mund të vizitoni varrin e Skënderbeut. Nëse dëshironi të qetësoheni nën diell, plazhi me rërë i Shëngjinit gjendet vetëm 8 kilometra nga qendra. Për persona aventurierë, aty pranë ndodhen edhe duna rëre.

Adhuruesit e ushqimit mund të mësojnë më shumë mbi zhvillimin e ushqimit në Shqipëri. Ushqimi shqiptar po bëhet shumë i njohur sepse përbërësit janë biologjikë, të freskët e të thjeshtë, por të shijshëm. ”Mrizi i Zanave” është një restorant që duhet vizituar. Është dukshëm një ndër më të mirët në vend dhe është reklamuar në shumë programe televizive, përshirë atë të shefit të famshëm britanik, Rick Stein”, përfundon blogerja e njohur neozelandeze, Anita Hendrieka në faqen e saj të internetit anitahendrieka.com.=atsh

Ditët me diell gjatë muajit shtator po shfrytëzohen nga turistët gjermanë dhe polakë të cilët po vizitojnë Parkun Kombëtar të Tomorit dhe malin e Dajtit.

Në këtë fillim vjeshte plot diell turistët të shumtë gjermanë dhe polakë shijuan një itinerar turistik për njohjen e natyrës dhe kulturës së këtyre zonave.

Ata gjithashtu përjetuan dhe aventurën duke bërë ecje në këmbë në shtigjet dhe bukuritë natyrore që këto zona ofrojnë.

“Turistë gjermanë dhe polakë që po eksplorojnë bukuritë natyrore në malin e Tomorit dhe malin e Dajtit janë vetëm një pjesë e vizitorëve të shumtë që frekuentojnë zonat e mbrojtura këto ditë shtatori”, shprehet ministri i Turizmit dhe Mjedisit, Blendi Klosi.

Klosi shprehet se, “rritja e numrit të turistëve vijon të jetë e lartë dhe në 8 muajt e parë të vitit. Shqipëria shënoi 10,8 % më shumë turistë të huaj, krahasuar me të njëjtën periudhë të vitit 2018”.

Eksplorimi dhe turizmi i aventurës në vitet e fundit në Shqipëri po kthehet në një atraksion mjaft interesant për vizitorët e huaj, kjo dhe për shkak të terrenit mahnitës dhe të shumëllojshëm që ofron vendi ynë. /atsh

1.55 milionë turistë të huaj vizituan Shqipërinë gjatë muajit gusht 2019, duke shënuar fluksin rekord të vizitorëve të huaja që hynë në vendin tonë, përgjatë gjithë vitit.

INSTAT bën të ditur se, të dhënat zyrtare faktojnë se hyrjet e shtetasve shqiptarë dhe të huaj në territorin shqiptar, në muajin Gusht 2019, janë 2.256.761. Krahasuar me Gusht 2018, ky tregues rezulton me rritje 6,4 %. Në Gusht 2019, hyrjet e shtetasve të huaj në vend janë 1.556.826, krahasuar me Gusht 2018, ky numër është rritur me 7,4 %.

“Ndërkohë numri i shtetasve të huaj që kanë hyrë në vendin tonë përgjatë tetë muajve të 2019 është 4.870.588, duke u rritur me 10,8 %, në krahasim me të njëjtën periudhë të vitit 2018” thuhet në publikimin e INSTAT.

Shifrat tregojnë për një ecuri të mirë të turizmit dhe një inertes në rritje të të hujave për vendin tonë si destinacion i preferuar i turizmit, ku gjeografia e turistëve nga vende të ndryshmetë botës është zgjeruar nga të katër kontinentet.

Sipas INSTAT përgjatë tetë muajve të 2019, ndër vendet që kanë hyrjet më të larta të shtetasve në Shqipëri, Zvicra ka pasur rritjen më të madhe me 16,9 %, Maqedonia e Veriut ka pasur rritjen të ndjeshme me 19,2 %, ndërsa shifra në rritje shënojnë turistët nga Gjermani, Italia, Polonia, Norvegjia, etj. Duke mos harruar fluksin në rritje intensive të turistëvenga Kosova.

Ndër trendet më të pëlqyera nga vizitorët huaj janë çmimet e arsyeshme, shërbimet me standarde në hotele, ushqimet tradicionale, dhe infrastruktura e përmirësuar.

Shtetasit nga Kosova kanë pasur rritje edhe këtë vit duke qenë turistët kryesorë që kanë vizituar vendin tonë. Në gusht hyrjet ishin 781 mijë me një rritje 16.5 për qind në raport me gusht 2018 ndërkohë që si 8 mujor rritja ishte 14.9 për qind më shumë se një vit më parë, citon INSTAT./atsh

Sazani dhe Karaburuni ishte destinacioni i 37 mijë turistëve vendas e të huaj nga muaji maj deri në fund të gushtit, të cilët kanë kanë udhëtuar nga porti i Vlorës me anijet turistike.

Porti i Vlorës bën të ditur për ATSH-në se “gjatë kësaj periudhe ka pasur një rritje të fluksit të turistëve si nga qytete të ndryshme të Shqipërisë, por edhe të turistëve të huaj, të cilët kanë udhëtuar me 13 anije turistike drejt ishullit të Sazanit dhe Karaburunit”.

Sipas portit, turistët e huaj vinin nga vende të ndryshme të botës si Holanda, Finlanda, Suedia, Gjermania, Kanadaja, Polonia, Italia, Amerika, Hungaria, etj.

Edhe gjatë ditës së sotme pavarësisht motit jo të qëndrueshëm turistët kanë frekuentuar anijet turistike me destinacion Karaburun Sazan.

Sazani dhe Karaburuni janë kthyer në një nga destinacionet më të preferuara për vizitorët vendas dhe të huaj. Tani zona mund të vizitohet nëpërmjet udhëtimeve ditore që zhvillojnë operatorët turistikë që nisen nga porti i Vlorës. Kjo ofron mundësi reale për të vizituar parkun dhe ofruar një ditë ndryshe në gjirin e Vlorës.

I shpallur në vitin 2010 Park Kombëtar Detar, Karaburun-Sazani është i vetmi park detar kombëtar i Shqipërisë. Parku ofron atraksione të shumta natyrore, kulturore, historike dhe turistike. Mjafton këtu të kujtojmë monumentin e natyrës, Shpellën e Haxhi Aliut (atraksioni më i vizituar nga turistët), gjiri natyror dhe kulturor i Gramës (skaji më i largët jugor i parkut detar), ishullin e Sazanit, atraksioni më i madh që prej hapjes së tij për publikun. Për të gjithë ata që dëshirojnë të kalojnë momente relaksi në natyrën dhe qetësinë, parku detar ofron me brigjet e tij të Shën Vasilit, Shën Janit, Gjirit të Djallit, eksperiencë natyrore unike.

Në hapësirat e gadishullit të Karaburunit, në fund, aty ku bashkohet me luginën e Dukatit gjendet kisha e Marmiroit, ndërsa në faqen jugore, në lartësinë 400 m, në vendin e quajtur Petrunë, gjendet një shpellë shumë e bukur, që quhet Shpella e Dukë Gjonit.
Për të gjithë të apasionuarit e zhytjes ofrohen shtigje nënujore për të parë botën unike dhe pasuritë nënujore./atsh

100 turistë vendas dhe të huaj vizituan monumentin e natyrës “Ishulli i Zvërnecit”, pjesë e peizazhit të mbrojtur “Vjosë-Nartë”.

Drejtori i Administratës Rajonale të Zonave të Mbrojtura, Vlorë, Nexhip Hysolakoj, tha për ATSH-në se “të shoqëruar nga punonjës të ADZM Vlorë turistët realizuan një shteg mjedisor brenda ishullit ku u njohën me vlerat natyrore dhe kulturore të tij”.

“Aktiviteti vijoi më pas në lagunën e Nartës, e cila renditet e dyta në Shqipëri për nga rëndësia dhe shpendët e ujit”, – tha Hysolakoj.

Sipas tij, turistët ushtruan birdwatching dhe u njohën me llojet e shpendëve të rrallë, flamingo dhe pelikani kaçurrel.

Laguna e Nartës ndodhet në veriperëndim të qytetit të Vlorës, rreth 14 km larg saj dhe ka një sipërfaqe prej rreth 42 km2. Ndahet nga deti Adriatik nga një rrip i ngushtë toke ranore, që përbëhet nga duna rëre dhe plazhe të vegjël pa bimësi të dendur.

Në këtë lagunë bën pjesë dhe Zvërneci, me ishullin e vogël të tij, ku veç të tjerave dallon nga Manastiri i Shën Mërisë, i cili ndodhet në ishullin e vogël dhe ku mund të shkohet përmes një ure të ngushtë druri për këmbësorë.

Laguna e Nartës shpeshherë vizitohet nga flamingot, zogjtë me qafën e hollë dhe të harkuar dhe me këmbët e hijshme./atsh

Kryeministri Edi Rama deklaroi sot në Bari, Itali se “Shqipëria po përjeton një rritje të fortë turistike, po rritemi çdo vit. Në katër vitet e fundit praktikisht kemi dyfishuar numrin e turistëve, u nisëm nga 2,9-3,1 milionë në vit dhe tani jemi mbi 6 milionë në vit”.

Në fjalën e tij në forumin “Ekonomia blu e Mesdheut” në kuadër të panairit “Fiera del Levante”, në Bari, Itali, Kryeministri Rama theksoi se janë “shifra mjaft të rëndësishme, por edhe një sfidë për Shqipërinë, sepse duhet t’i përgjigjemi këtij fluksi me aftësi, mikpritje, infrastrukturë etj.”.

Kryeministri Rama u shpreh se “siç është e qartë që ka vetëm përfitim nëse bëhemi bashkë për të zgjeruar këtë hapësirë turistike, sigurisht duke përfituar nga ky ridimensionim i saj, i rajonit të Pulias, që është kthyer sot në një destinacion gjithmonë e më tërheqës, në të gjitha nivelet e konsumatorit turistik, por duke shtuar edhe Shqipërinë që po përjeton një rritje të fortë turistike”.

“Dua të them në fund që ka shumë dëshirë nga ana jonë për të ushqyer këtë lidhje me Puglian, një dëshirë që na vjen natyrshëm, jo vetëm se ne e shohim Puglian sot si një rajon të njohur. Është e qartë se suksesi i Puglias është një sukses edhe i bazuar në ndryshueshmërinë e instrumenteve të përdorura nga ato të 10-20 viteve më parë”, – nënvizoi Rama.

Sigurisht, vijoi ai, për këtë ne kemi një respekt të madh dhe një interes për të lidhur edhe botët universitare, botët akademike, shërbimet shëndetësore.

Kreu i Qeverisë u shpreh se “në fund të fundit jemi shumë afër. Për të ardhur dje në Bari na u desh gjysma e kohës për të shkuar në Verona. Sigurisht e bëmë me avion dhe koha e harxhuar ishte sa gjysma e asaj që duhet për të shkuar nga Tirana në Vlorë. Pra shumë afër”./atsh

Parku i Viroit, 3 km larg Gjirokastrës, një nga zonat më të bukura të qytetit të gurtë, po tërheq vizitorë të shumtë vendas e të huaj edhe në shtator.

Gjatë ditëve të fundit dhjetëra kampera, nga vende të ndryshme të Europës kanë zgjedhur ta kalojnë natën në mjediset e Parkut të Viroit.

Në territorin e parkut turistët kanë mundësi të kalojnë kohën në baret e restorantet që funksionojnë pranë tij, si dhe të argëtohen familjarisht në natyrë.

Turistët kanë zgjedhur ajrin e pastër, mjedisin e këndshëm, që ky park ofron për të kaluar momente relaksi.

Për të gjithë këtë infrastrukturë çdo ditë janë të angazhuar punonjësit e Agjencisë së Pastrimit dhe Mjedisit të bashkisë së Gjirokastrës.

Peizazhet mbresëlënëse të këtij parku janë një mundësi e mirë për qytetarët dhe turistët. Mundësia e ecjes në këmbë apo me biçikletë anës së liqenit, por edhe shijimi i peizazhit shumëngjyrësh po tërheq gjithnjë e më tepër qytetarët, por edhe turistët gjatë sezonit sezonit turistik në këtë zonë, e cila është bërë pjesë e guidave turistike.

Të apasionuarit pas zhytjes kanë mundësi të eksplorojnë një burim, që mendohet se ka lidhje me 4 burime të tjera, Syri i Kaltër, Skotini, liqenin e Kallpaqit dhe Janinës.

Ndryshimet e kryera në parkun e ndodhur në veriperëndim të qytetit të gurtë, kodrat rreth tij dhe pamja piktoreske me liqenin dhe burimin e Mëmës së Viroit e bëjnë mjaft joshës këtë Monument Natyre, status të cilin e ka përfituar në vitin 1982 dhe vazhdon ta mbajë me krenari./atsh