Shendetesi

Ministrja e Shëndetësisë dhe Mbrojtjes Sociale, Ogerta Manastirliu vizitoi sot pavionin e Neurologjisë në Qendrën Spitalore Universitare të Tiranës.

Ministrja vlerësoi punën e stafit të këtij shërbimi me në krye prof. Jera Krujën, ndërsa theksoi se kemi garantuar që nga dita e parë e epidemisë mjetet e mbrojtjes personale të cilat tha ajo, mbeten thelbësore për të kufizuar përhapjen e virusit të rrezikshëm COVID-19.

“Në QSUT çdo ditë, bashkë me stafet mjekësore për t’i falënderuar për punën dhe kujdesin për pacientët dhe për të theksuar rëndësinë e zbatimit të protokolleve të sigurisë, me mjetet e mbrojtjes personale, që i kemi garantuar që nga dita e parë e epidemisë dhe vijohen të sigurohen për çdo punonjës të shëndetësisë, e që mbeten thelbësor në çdo shërbim, për të kufizuar përhapjen e virusit të rrezikshëm Covid-19. Faleminderit prof. Jera Kruja dhe të gjithë stafit të Neurologjisë në QSUT, për punën e palodhur me pacientët, pavarësisht situatës së vështirë të përballjes me epideminë”, deklaroi ministrja./atsh

I gjithë stafi mjekësor i spitalit Infektiv është në vijën e parë në përballje me pacientët e prekur nga COVID-19, duke ju gjendur pranë jo vetëm si mjekë, por edhe si familjarë, të cilët nuk kanë mundësi t’i shohin.

Ministrja e Shëndetësisë dhe Mbrojtjes Sociale, Ogerta Manastirliu ndau sot apelin e dr. Esmeralda Metës, mjeke e përkushtuar ditë-natë në shërbim të të sëmurëve, e cila bën thirrje për më shumë kujdes nga të gjithë qytetarët.

“Natyrisht puna është mjaft e madhe brenda shërbimit. Ne luajmë rolin e stafit mjekësor, por nga njëra anë edhe të familjarit ndoshta, deri diku, jo 100% për pacientin, sepse i ofrojmë edhe suportin emocional, suportin shpirtëror apo edhe nevojat e tjera që mund t’u duhet pacientëve”, tha ajo.

Sipas dr Metës, “shtimi i numrit të rasteve ka rritur edhe nivelin e frikës apo panikut te pacientët apo te familjarët e tyre, ndaj rikujtojmë sërish kujdesin”.

Edhe ministrja Manastirliu bëri edhe një herë një kujtesë mbi masat mbrojtëse. “Të lajmë sa më shpesh duart. Të ruajmë distancën me njëri-tjetrin. Të mbajmë maskë në ambiente të mbyllura ku nuk është e mundur të respektohet distancimi fizik. Lidhuni me mjekun tuaj të familjes ose telefoni Urgjencën Kombëtare në numrin 127 nëse keni shenja të sëmundjes”, tha Manastirliu./atsh

Numri i rasteve të rritura në ditën e fundit e ka vendosur sistemin shëndetësor në gatishmëri të shtuar, por në të njejtën kohë është edhe një apel për të gjithë qytetarët për të qenë të kujdesshëm.

Ministria e Shëndetësisë dhe Mbrojtjes Sociale ka apeluar për të respektuar masat dhe protokollin e sigurisë.

Duke i cilësuar qytetarët bashkëpunëtorë në këtë betejë, ekspertët e shëndetësisë kanë kërkuar ruajtjen e distancës, ruajtjen e higjienës personele, mbrojtjen e vetes dhe të tjerët për të kufizuar sa më shumë që të jetë e mundur përhapjen e COVID19. Bluzat e bardha kanë kërkuar që të mos neglizohet asnjë shenjë e sëmundjes, për këtë qytetarët mund të telefonojnë në numrin e Urgjencës Kombëtare.

Dita e djeshme shënoi edhe numrin më të lartë të rasteve të reja të prekur nga COVID-19, ku nga 311 testime u konfirmuan 42 raste pozitive, përkatësisht, 21 raste në Tiranë, 9 në Shkodër, 4 në Durrës, 3 në Krujë, 2 në Lushnjë, dhe nga 1 rast në Pukë, Berat dhe Urën Vajgurore./atsh