Shendetesi

Ministrja e Shëndetësisë dhe Mbrojtjes, Sociale Ogerta Manastirliu, në kuadër të fuqizimit të njësive të terapisë intensive në spitalet rajonale dhe universitare, ka inspektuar spitalin rajonal të Vlorës.

“Në fokus të punës tonë është fuqizimi i shërbimeve në spitalet rajonale, me synimin për të ofruar shërbime cilësore afër vendbanimit, por veçanërisht në këtë situatë të epidemisë COVID-19 jemi duke forcuar kapacitetet në të gjithë spitalet universitare dhe rajonale, sa i përket rrjetit të terapisë intensive”, – tha Manastirliu.

Pas spitaleve rajonale në Durrës, Elbasan, Shkodër, edhe në Vlorë janë instaluar pajisjet moderne të reanimacionit, duke filluar nga shtretërit, respiratorët, aspiratorë, shiringa elektrike, pompat e infuzionit dhe një set i plotë i pajisjeve të nevojshme jetëshpëtuese.

Përveç fuqizimit me aparatura, spitali rajonal i Vlorës do të ketë këtë vit një investim tërësor për reanimacionin.

“Spitali Rajonal i Vlorës do të jetë një ndër spitalet që do të mbështetet nga qeveria shqiptare nëpërmjet fondeve të alokuara në kuadër të luftës kundër COVID-19 për fuqizimin e terapisë intensive. Brenda vitit do të kemi një reanimacion të ri sipas standarteve bashkëkohore, për të ofruar shërbime më cilësore dhe me dyfishin e kapaciteteve, që do të mbulojnë zonën e jugut, që i shërben gjithashtu edhe turistëve e pushuesve gjatë sezonit turistik” tha Manastirliu.

Ministrja Manastirliu u shpreh nga spitali i Vlorës se po merren masat për t’u përgatitur për çdo situatë.

“Kemi rritur kapacitetet në rast të shtimit të rasteve me COVID-19, por duhet të përgatisim spitalet rajonale për çdo situatë, pasi, ndërsa trajtimi i pacientëve me COVID është përqendruar në Tiranë, spitalet rajonale duhet t’ju përgjigjen edhe patologjive të tjera”, – tha Manastirliu.

Qeveria shqiptare, në bashkëpunim me partnerët ndërkombëtarë po investon në rritjen e kapaciteteve në terapitë intensive për të përballuar situatën e shkaktuar si pasojë e COVID-19, duke fuqizuar spitalet rajonale dhe universitare me aparatura mjekësore të teknologjisë së lartë. /atsh

Mjeku infeksionist Tritan Kalo ju bënë apel qytetarëve të kujdesen për masat ndaj virusit, pasi Sars-Cov2/Covid-19 është një realitet jetësor.

“Dhoma e parë në të djathtën e fotos së korridorit të pavijonit të parë është zyra ime në Shërbimin e Sëmundjeve Infektive në QSUT, ose sikundër edhe njihet Spitali Covid-1. Përkujdesi ndaj të sëmurëve realizohet vetëm aty dhe shumë më pak në studiot televizive, si dhe njohuritë për këtë sëmundje ende me shumë e shumë të panjohura përftohen po aty, krahas njohjes me eksperiencën e kolegëve tanë në Shqipëri dhe në mbarë botën”, shprehet ai.

Po ashtu, Kalo shton se “gjendem aty që herët në mëngjes jo i frikësuar, por i ndërgjegjësuar për të qenë sa më pranë jush në çdo rast nevoje. Miq e dashamirës, përkujdesuni në vijimësi për shëndetin e jetën tuaj dhe të afërmve tuaj. Sars-Cov2/Covid-19 është një realitet jetësor. imagjinatën e sëmurë për konspiracionin e mosekzistencës së kësaj “flame mbarëbotërore”, lërjani të dashuruarve pas teorive konspirative apo atyre gjithollogëve, që janë në kërkim të protagonizmit të munguar”.

“Kurrë mos harroni se janë aty që prej 9 Marsit 2020, në 24 orët e ditës me dhjetëra e dhjetëra motra e vëllezër tuaj mantelbardhë, infermierë, sanitarë, imazheristë, administratorë, farmacistë, barrelistë, shoferë e punonjës të rendit, për të vigjiluar mbi shëndetin tuaj. Mendoni edhe për sakrificat e privimet e tyre të pafundme. Jo rrallë ne edhe nuk ja kemi dal mbanë dhe kemi humbur jetë njerëzish, shpirtrat e të cilëve pushofshin në Parajsë. Fëmijët kanë humbur nënën apo babanë, të afërmit motrën apo vëllanë, ne kemi humbur kolegët tanë të çmuar. Ju lutem si mjek e vëlla, që kurrë të mos e braktisni për asnjë çast përkujdesin ndaj vetes, si dhe vigjilencën për të mos rënë PRE e këtij infeksioni sa tinëzar edhe jetë-marrës”, apelon Kalo.

“Me mirëbesim reciprok si dhe me përpjekje të palodhshme do mundet t’a fitojmë sfidën me Sars-Cov2/Covid-19”, shprehet Kalo. /atsh

“Kemi ushtruar mbi 100 mijë kontrolle në të gjithë vendin në lidhje me respektimin e protokolleve të hapjes”, tha sot zëvendësministrja e Shëndetësisë dhe Mbrojtjes Sociale, Mira Rakacolli, e ftuar në një emision televiziv, ndërsa thekson se rritja e numrit të infektuarve nuk ka të bëjë me rikthim virusi, por është një normalitet pas hapjes.

Në lidhje me rritjen e numrit të të infektuarve pas hapjes dhe a është rikthim i virusit, Rakacolli tha se “nuk është një rikthim i virusit, është një vazhdimësi që ka ndjekur protokollin e hapjes. Pra, nuk është një gjë e papritur, është një gjë që ka ndodhur në të gjithë botën, dhe pas mbylljes në protokollin e hapjes ka rritje të numrit të të infektuarve”.

“Në Shqipëri kjo rritje numrash ishte parashikuar, por nuk ishte parashikuar që të ndodhte më këtë ritëm që kemi sot. Kjo është një tendencë normale dhe ka ndodhur në të gjithë botën, që pas mbylljes së fortë dihet se në rihapje do të këtë rritje numrash, por sa shkon kjo rritje mbetet për t’u vlerësua”, tha ajo.

Rakacolli tha se kur bëhet fjalë për një sëmundje infektive ka të bëjë shumë shkaktarë që e jep sëmundjen infektive dhe shkaktari siç dihet është virusi, dhe fatkeqësisht deri më tani nuk ka asnjë vaksinë dhe nuk ka një mjekim specifik dhe e vetmja mënyrë është mos kontaktimi, është parandalimi, marrja e masave për të mos e kontaktuar këtë virus. Në rastin kur virusi është respirator është akoma më e vështirë që të mbrohesh nga ky. Pra që të mos marrës virusin ka vetëm një mundësi që të mos e kontaktosh. Në momentin që hapemi, nëse ne nuk i marrim ato masa që të mos e kontaktojmë virusin, patjetër që do të infektohemi.

Në lidhje me përhapjen e virusit nga ajri, Rakacolli tha se “OBSH i përmendi 200 studime por përsëri e la për t’u konfirmuar, por që të shpjegohet mirë se shpërndahet nga ajri do më tepër kohë. Përhapja kryesore është nga spërklat dhe mendohet që spërklat nuk mund të qëndrojnë në ajër për një kohë të gjatë. Tashmë OBSH i ka vlerësuar dhe mundet që këto copëza mund të copëzohen dhe mund të qëndrojnë në ajër për një kohë më të gjatë, prandaj në ambientet e mbyllura është më e madhe mundësia për ta marrë këtë virus dhe prandaj në këto ambiente duhet të përdoret barrierë mbrojtëse”.

Në lidhje me masat dhe kontrollet, Rakacolli tha se, “kur janë bërë protokollet e hapjes të gjitha protokollet janë të shoqëruara me masat që duhet të marrë çdo aktivitet me hapjen. Pra, të gjithë ne duhet ta dimë se ka ndryshuar jeta jonë në drejtim të qasjes dhe normalitetit. Pavarësisht se u hapëm nuk do të thotë se sëmundja mbaroj, duhet të ruajmë distancimin social”.

“Ne kemi marrë masa, kemi bërë inspektime në të gjithë vendin dhe që nga fillimi i epidemisë janë bërë mbi 100 mijë inspektime dhe janë vendosur gjoba, ku rreth 70 kanë qenë me pezullim të aktivitetit. Forcimit të këtyre masave i ka shërbyer edhe Akti Normativ që u kalua në parlament në lidhje me masat që merren për zonat turistike, që në qoftë se nuk respektohet protokollet mund të kaloj në një gjobë 700 mijë lekë dhe nëse përsëriten mund të shkojnë deri në pezullim të aktivitetit”, përfundoi Rakacolli. /atsh