Shendetesi

Nënë Hike plot 77 vjeç nga Fushë-Kruja, ka fituar betejën me COVID-19, duke shtuar kështu numrin e të shëruarve në vendin tonë nga ky virus.

Ministrja e Shëndetësisë dhe Mbrojtjes Sociale, Ogerta Manastirliu, ka bërë të ditur lajmin e mirë duke njoftuar se, “Nënë Hike, sot ka lënë e shëruar spitalin Infektiv dhe është kthyer pranë familjes”.

“Që nga fillimi i epidemisë, më shumë se 60% e të prekurve nga COVID-19 janë shëruar, ndërsa Kruja ka sot numrin më të lartë të të prekurve aktivë”- shprehet Manastirliu.

Ndërsa Nënë Hike, teksa bëhet gati për dal nga spitali Infektiv shpreh mirënjohje dhe falenderim për të gjithë stafin e mjekëve dhe infermierëve që i shërbyen, në këtë luftë kundër COVID-19./atsh

Mjeku i njohur, Pëllumb Pipero ka folur nga qyteti i Vlorës për situatën epidemiologjike në vend, nga ku ka thënë se epidemia ka një ritëm në ulje megjithatë qytetarët duhet të vijojnë të respektojnë rregullat përsa kohë që virusi qarkullon.

Krahas faktit që situata paraqitet e qetë, një lajm i mirë sipas tij është fakti se numri i rasteve të shëruara ka kaluar më shumë se gjysmën e atyre që janë prekur në total nga COVID-19.

“Në terma të përgjithshëm, situata është shumë e qetë. Epidemia ka një ritëm rënës, pra në ulje të konsiderueshme çdo ditë edhe sa i takon numrit të rasteve të shtruara në spital që janë 2,3 në ditë dhe herë pa asnjë rast fare. Edhe sa i takon numrit të rasteve të reja pozitivë që ditët e fundit kanë qënë 9, 7 6. Por lajmi i mirë është që numri i rasteve të shëruara shtohet nga dita në ditë. Tashmë kemi më shumë se gjysmën e personave të prekur, i kemi të shëruar. Situata është mjaft e qetë por kjo qetësi nuk do të ulë as vigjilencës as kujdesin. Ende virusi qarkullon pavarësisht se me ritëm të ulët dhe virilencë të ulët dhe përsa kohë që virusi qarkullon, ne duhet të respektojmë ato masa që janë të rëndësishme për këtë fazë të dytë, që është faza e hapjes graduale. Ende duhet të kemi kujdes sidomos në mjedise publike, në lokalet që do të hapën nesër apo bankat që janë hapur më parë, apo në institucionet publike, qytetarët kur hyjnë të ruajnë distancën fizike, të vendosin një maskë, ata që shërbejnë të kenë maska e doreza. Higjiena për duart, larja sa më shpesh e duarve me ujë e sapun, dezinfektantë, pra janë ende disa masa që duhet t’i respektojmë në vijimësi sa kohë që virusi do të vijojë të qarkullojë jo vetëm tek ne por edhe në rajon”,- tha Pipero.

Më tej, ai shtoi se ”Vlora gradualisht po bëhet gati sepse masat po lehtësohen dita-ditës. Ka një ritëm gradual por ulës në vijimësi ndërkohë që nesër Vlora shpallet zonë e gjelbër dhe është lajm jashtëzakonisht i mirë. Ka 3, 4 javë pa asnjë rast të ri”. /atsh

Ministrja e Shëndetësisë dhe Mbrojtjes Sociale, Ogerta Manastirliu ka kujtuar edhe njëherë se nga dita e hënë, 4 Maj, “vijojmë me hapa të kujdesshëm lehtësimin e masave shtrënguese, me rregulla dhe protokolle sigurie, që duhen zbatuar nga të gjithë”.

Manastirliu ka vënë në dukje rezultatet e arritura falë masave të marra në kohën e duhur.

Duke publikuar grafikun e Coronavirus Worldmeter, Manasirliu thekson se këto janë disa fakte të rëndësishme mbi situatën e COVID-19 në Shqipëri.

“Falë masave të marra në kohën e duhur, falë rezistencës të qytetarëve, falë punës së palodhur të epidemiologëve, urgjencës mjekësore, mjekëve, infermierëve, u arrit përballimi me sukses i fazës së parë të epidemisë”,- thekson Manastirliu.

“Nga dita e hënë 4 Maj, vijojmë me hapa të kujdesshëm lehtësimin e masave shtrënguese, me rregulla dhe protokolle sigurie, që duhen zbatuar nga të gjithë. Bashkëpunimi i secilit prej jush është thelbësor, që të vijojmë përpara me Planin tonë të lehtësimit, pa rrezikuar të kthehemi mbrapsht! Të respektojmë rregullat e distancimit social, masat e higjienës personale duke ruajtur veten dhe familjen”, -nënvizon Manastirliu.

Sipas Coronavirus Worldometer, rezulton se vendi ynë ka numrin më të ulët të jetëve të humbura në Europë dhe rajon nga COVID-19 për 1 milionë banorë.

Tri të hënat e ardhshme do të shoqërohen me lehtësime javë pas jave, shprehet Kryeministri, ndërsa thekson se, “ky plan do të ndryshojë, nëse dinamika e epidemisë ndryshon negativisht”.

Plani i masave lehtësuese nga data 4 maj, parashikon shtimin e “zonave të gjelbra”: Tropojë, Peqin, Gramsh, Kuçovë, Skrapar, Maliq, Kolonjë, Selenicë, Rrogozhinë, Belsh, Cërrik, Ura Vajgurore, Berat, Poliçan, Devoll, Pustec, Mallakastër dhe Vlorë.

Në të gjithë vendin do të lejohet shërbimi taksi për udhëtimet ndërqytetase, me deri dy pasagjerë, anëtarë të një familjeje.

Të riatdhesuarit që janë me banim në “zonat e kuqe” do të vetëkarantinohen në banesë. /atsh