Shendetesi

“Ulje e thirrjeve drejt Urgjencës Kombëtare”/ Brataj: Pjesa më e madhe e të prekurve nga COVID-19 kërkojnë të mjekohen në shtëpi

Skënder Brataj, drejtor i Qendrës Kombëtare të Urgjencës Mjekësore u shpreh se, ekipet e mjekëve vijojnë kontrollin e situatës shëndetësore të të prekurve nga COVID-19, ndërsa është fakt rënia e ndjeshme e numrit të thirrjeve drejt 127 të Urgjencës Kombëtare.

Gjatë takimit online të Komitetit Teknik të Ekspertëve për situatën e COVID-19, ai tha se “janë kryer 222 mijë thirrje nga 9 mars deri më sot, me një mesatare mbi 4 800 thirrje telefonike në ditë, ndërsa në ditën e sotme kemi 2 035 thirrje telefonike. Po ashtu edhe numri i thirrjeve drejt numrit 08000 është ulur ndjeshëm”.

Fakt tjetër tha ai, “është ulja e numrit të vizitave në përgjithësi. Kemi arritur në 300 vizita nga 600 dhe pozitive është fakti që të sëmurët që janë konfirmuar COVID-19 por kanë simptoma të lehta kërkojnë që të trajtohen në banesë dhe jo në spital. Transportohen në spital vetëm kur ka përkeqësim të situatës, vështirësi në frymëmarrje dhe që kanë nevojë për oksigjen. Pra qytetarët janë sensibilizuar dhe pjesa më e madhe e qytetarëve që janë asimptomatikë mjekohen në shtëpi me medikamente”.

Brataj konfirmoi se situata është në kontroll.

Brataj informoi se, “janë dy autoambulanca në dispozicion të sëmurëve me COVID-19 për Tiranën dhe 5 të tjera me respiratorë që për fat janë përdorur shumë pak”./atsh

“Ulje e thirrjeve drejt Urgjencës Kombëtare”/ Brataj: Pjesa më e madhe e të prekurve nga COVID-19 kërkojnë të mjekohen në shtëpi Read More »

Situata epidemiologjike në Shqipëri paraqitet e qëndrueshme, vijueshmëria varet nga qytetarët

Situata epidemiologjike në Shqipëri paraqitet e qëndrueshme ndërsa rastet e reja varen nga kujdesi që tregojnë qytetarët në fazën graduale të hapjes.

Rovena Daja, eksperte pranë Institutit të Shëndetit Publik tha se “realisht, situata epidemiologjike në Shqipëri paraqitet e qëndrueshme. Numri i rasteve nuk është se është në rritje megjithëse masat janë lehtësuar megjithatë vigjilenca nga ana jonë është maksimale, si nga ana epidemiologëve nëpër rrethe, mjekëve të familjes, ISHP-së, forcave të rendit. Të gjithë momentalisht, janë duke rritur vigjilencën më shumë se më parë se kur njerëzit ishin të izoluar. Shpresojmë ndërkohë që duke lehtësuar këto masa, numri të mos na rritet i rasteve. Megjithatë do të shihet në vazhdimësi”.

Ajo u bëri thirrje qytetarëve të ruajnë distancimin fizik.

“Edhe një herë u bëjnë thirrje qytetarëve sepse çdo gjë në këto moment varet nga ata. Higjiena duhet të jetë maksimale dhe ju lutem distancimi fizik. Ju lutem, mos komunikoni shumë me njëri-tjetrin dhe mos lëvizni nga një qytet në tjetrin dhe kjo është arsyeja se pse ne nuk kemi pasur edhe raste të reja”, apeloi Daja.

Ajo sqaroi se gruaja shtatzënë e prekur nga infeksioni është në gjendje të stabilizuar. “Normalisht gruaja shtatzënë është në gjendje të stabilizuar megjithatë i takon klinikës për të vendosur nëse do të qëndrojë apo jo”, u shpreh Daja.

E pyetur nëse ka pavijone të posaçme për gratë shtatzëna të infektuara me COVID, ajo tha se “normalisht kemi dy spitale COVID ku shtrohen personat që janë me COVID pozitiv. Janë marrë të gjitha masat, në të dyja spitalet për të mjekuar të gjitha rastet”.

Për numrin e fëmijëve të prekur nga COVID ajo tha se “aktualisht kemi 35 fëmijë të prekur ku 22 prej tyre janë të shëruar. Numri i grave shtatzëna me COVID është 5, ku 4 prej tyre janë të shëruara. /atsh

Situata epidemiologjike në Shqipëri paraqitet e qëndrueshme, vijueshmëria varet nga qytetarët Read More »

8 qarqe mbyllin betejën me pandeminë/ Beteja përqendrohet në qarqet Tiranë, Shkodër dhe Durrës

Tetë qarqe të vendit e kanë mbyllur betejën me valën e pandemisë, ndërsa në tre qarqe të tjera, Tiranë, Shkodër dhe Durrës përqendrohet lufta për mbylljen e saj.

Akademia e Shkencave shprehet në buletinin e përditshëm se sfida me pandeminë në vendin tonë është konturuar qartë në tre qarqe: Tiranë, Durrës dhe Shkodër.

“Në këto tre qarqe rezultojnë sot 189 të sëmurë aktivë, nga 206 në tërë Shqipërinë. Tetë qarqe janë tashmë të çliruar, dhe i nënti, qarku i Lezhës, me 86 për qind të të sëmurëve gjithsej tashmë të shëruar, është fare pranë”, thuhet në buletin.

Edhe humbjet në jetët njerëzore, sipas këtij buletini, kanë qenë kryesisht në këto tre qarqe, ku numri i të ndarëve nga jeta për shkak të pandemisë është gjegjësisht 18 në Tiranë, 6 në Durrës dhe 2 në Shkodër.

Në Fier numri i jetëve të humbura është 3, ndërsa Vlora e Kukësi kanë regjistruar nga një humbje jetë. Në qarqet e tjera nuk ka pasur asnjë humbje.

“Ritmi i rritjes ditore të të sëmurëve në nivelin 1.2% në Tiranë e në shkallë vendi flet për një trend pozitiv. Ky tregues, tashmë nën 3% edhe në Krujë, tregon për frenimin e kësaj vatre dhe futjen e saj në fazën e uljes së sëmundshmërisë”, thuhet në buletinin e shpërndarë nga Akadamia e Shkencave./atsh

8 qarqe mbyllin betejën me pandeminë/ Beteja përqendrohet në qarqet Tiranë, Shkodër dhe Durrës Read More »

Ministria e Shëndetësisë: 10 raste të reja, shkon në 842 numri i të prekurve

Ministria e Shëndetësisë dhe Mbrojtjes Sociale ka informuar se në 24 orët e fundit janë identifikuar 10 raste te reja me COVID-19, duke e çuar në 842 numrin e të prekurve në vendin tonë.

Rovena Daja, eksperte pranë Institutit të Shëndetit Publik u shpreh se “gjatë 24 orëve të fundit janë kryer 275 testime për persona të dyshuar me COVID-19 dhe prej tyre kanë rezultuar pozitivë 10 qytetarë, kontakte të rasteve të mëparshme. Rastet pozitive të ditës së sotme janë të shpërndara si vijon: 2 të infektuar në Kamëz, 3 të infektuar në Krujë, 2 të infektuar në Shkodër dhe 3 të infektuar në Tiranë”.

Që nga fillimi i epidemisë deri më sot janë konfirmuar pozitivë me COVID-19 në të gjithë vendin 842 qytetarë, ndërsa 605 prej tyre tashmë janë shëruar. Në të gjithë vendin aktualisht janë 206 persona aktivë me COVID-19. Pjesa më e madhe e të prekurve po ndiqen nga mjeku i familjes ose janë asimptomatikë, ndërsa momentalisht në dy spitalet COVID, në spitalin Infektiv dhe spitalin “Shefqet Ndroqi”, aktualisht janë të shtruar 38 pacientë dhe vetëm 7 prej tyre janë në terapi intensive.

Të shëruar 605 qytetarë, 206 janë raste aktive ndërsa zonat më të prekura janë Tirana, Kruja, Shkodra dhe Kamza.

Ministria e Shëndetësisë dhe Mbrojtjes Sociale apelon për qytetarët që të vazhdojnë të respektojnë distancimin fizik dhe të mbajnë higjienën personale, po ashtu bizneset e hapura të respektojnë me rigorozitet protokollet e sigurisë.

Ftojmë qytetarët të mos neglizhojnë shenjat e COVID-19 dhe të telefonojnë menjëherë urgjencën kombëtare 127 në rast se kanë dyshime se janë të prekur nga ky virus.
Për të kontaktuar mjekun e familjes, për pyetje në lidhje me COVID-19, për këshillim psikologjik në rast të shfaqjes së shenjave të ankthit apo shqetësime të tjera, ju lutemi, telefononi në linjën e gjelbër 0800 40-40.

COVID-19 – Statistika (7 Maj 2020)

Teste të kryera 9806
Raste pozitive 842
Raste të shëruara 605
Raste Aktive 206
Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1)

Shpërndarja gjeografike e rasteve aktive është si vijon:
Tiranë 96
Krujë 69
Shkodër 16
Kamëz 8
Kurbin 4
Elbasan 3
Fier 3
Mirditë 2
Berat 2
Durrës 1
Korçë 1
Lezhë 1/atsh

Ministria e Shëndetësisë: 10 raste të reja, shkon në 842 numri i të prekurve Read More »

Prej 9 ditësh asnjë humbje jete, testimi i serologjisë te grupet me risk

Prej 9 ditësh në Shqipëri nuk ka asnjë humbje jete prej COVID-19.

Lajmin e ka dhënë ministrja e Shëndetësisë dhe Mbrotjes Sociale, Ogerta Manastirliu, gjatë mbledhjes së Komitetit Teknik të Ekspertëve me Kryeministrin Edi Rama.

“Ne kemi hyrë në ditën e 9-të të kur nuk kemi asnjë humbje jete. Pra prej 9 ditësh nuk kemi asnjë humbje jete dhe kjo është diçka që patjetër nga gëzon, sepse edhe një humbje jete për ne është e dhimbshme”, tha Manastirliu.

Manastilriu u shpreh se do të kemi pas dy jave e pak pune intensive në laboratorin e Mikrobiologjisë në QSUT rezultatet e para të testimit të serologjisë.

Manastirliu theksoi se, “ky është një testim për një kampion të parë. Pra do të vijojë testimi në grupet e riskut, siç tashmë e kemi vendosur përsa i përket personelit mjekësor, gjithashtu dhe sa i përket të infektuarve të identifikuar sipas skemës dhe metodologjisë që po vlerësohet nga Komiteti Teknik i Ekspertëve”.

Duke folur për atë që është duke u bërë sa i përket situatës së hapjes në të gjithë sektorët e ekonomisë, por dhe të rihapjes së sektorit të kujdesit shëndetësor, Manastirliu tha se, “tashmë është aprovuar strategjia e ekspertëve për planin e veprimit të funskionojë në raport me organzimin e sistemit shëndetësor në të gjithë hallkat e tij duke filluar nga shëndeti publik, duke vijuar nga kujdesi parësor tek ai spitalor tek urgjenca paraspitalore, e cila tregoi edhe njëherë që ka një organizim perfekt, me të gjithë strukturat e tjera. Për të mos lënë askënd pa shërbim dhe kujdes shëndetësor”.

Nga ana tjetër, Manastirliu informoi se, “rezultatet e deritanishme tregojnë për një organizim shumë të mirë të të gjithë sistemit, por edhe cilësisë së shërbimit të ofruar qytetarëve, pasi siç edhe të dhënat deri më sot tregojnë ne kemi hyrë në ditën e 9-të të kur nuk kemi asnjë humbje jete. Pra prej 9 ditësh nuk kemi asnjë humbje jete dhe kjo është diçka që patjetër nga gëzon, sepse edhe një humbje jete për ne është e dhimbshme”.

“Ne duam të vijojmë me këta tregues, por ka një rëndësi të madhe ndërgjegjësimi i popullatës, kujdesi dhe sjellja personale, në këto momente kur ne do të vijojmë me fazat e rihapjes, ashtu siç Komiteti i Ekspertëve vijon të na këshillojë”, tha ajo.

“Monitorimi do të jetë mbi baza periodike. Ne po përgatitemi të fuqizojmë kapacitetet tona edhe më tej përsa i përket testimit, gjurmimit dhe duke vijuar gjithashtu dhe me testimin e serologjisë që është gjithashtu një indikator shumë i mirë që do të na japë një panoramë më të gjerë sa i përket edhe hapjes së mëtejshme në raport me identifikimin e antikorpeve në grupe të caktuara të riskut por më tej edhe në popullatë, sipas testimit që ne po programojmë të kemi”, u shpreh Manastirliu./atsh

Prej 9 ditësh asnjë humbje jete, testimi i serologjisë te grupet me risk Read More »

Kalo: Shqipëria në parametra optimal, të vijojmë respektimin e rregullave me hapjen graduale

Mjeku infeksionist, Tritan Kalo në takimin virtual të Komitetit Teknik të Shëndetësisë së ngritur me qëllim në situatës së krijuar nga COVID, u shpreh se vendi ynë ndodhet në parametra optimalë të evolucionit të sëmundjes, situatë kjo që mund të ruhet nëse vijojnë të respektohen rregullat.

“Në opinionin tim si mjek infeksionist por edhe si pjesë përbërëse e Komitetit, fatmirësisht jemi në një stad kur falë përkujdesjes që është bërë dhe duke respektuar maksimalisht 7 elementë , si sjellja në mjedisin, familjar, sjellja në mjedisin publik, distancimin fizik, përdorimin e maskave në fashat orare të lejueshme, higjiena individuale, kolektive, ajrimi, ushqimi, aktiviteti fizik ka bërë që të jemi sot në parametra optimale të evolucionit të sëmundjes”, tha ai.

Me hapjen graduale, sipas Kalos, duhet vijuar me respektimin e masave përsa kohë që do të na duhet të bashkëjetojmë me virusin.

“Ç’ka është tejet e rëndësishme, me hapjen graduale që do të vijojë përsëri, ajo që mua më brengos mua si specialist është që të mos heqim dorë nga këto premisa të mirë të sjelljes ndaj vetes dhe mjedisit që punojmë dhe jetojmë por ti respektojmë ato në vijimësi duke bindur vetveten që tashmë do të jetojmë me një kohë ku rreth nesh do të ketë COVID sikundër ka edhe infeksione të tjera respiratore që janë me dhjetëra. Tashmë egzistojnë dhe do të shtohen më shumë me hapjen e stinës së vjeshtës dhe nëse do të bindemi dhe vijojmë në këtë rrugë, do të jemi në situatë optimale.

Sipas Kalos, “përmes kësaj rruge mund të mundësohet që Shqipëria të mbetet në nivelin e vendeve që menaxhojnë si duhet një epidemi të kësaj natyre. Shtimi i rasteve do të mundet të ndodhë vetëm nëse nuk respektojmë ato që përmenda më lart. Nuk do të ketë rikthim të COVID në vjeshtë pra të valës së Covidit në vjeshtë por do të ketë thjesht që COVIDI do të jetë i përzierë me infeksione të tjera respiratore të stinës, që në mjedisin tonë qarkullojnë mbi 75 deri në 150 infeksione. Me përzierjen e këtyre infeksioneve do të kemi edhe COVID. Por individët të cilët kanë mundur të respektojnë siç duhet masat e marra dhe duke jetuar tashmë në kushte pas shfaqjes së COVID, do të mbajmë situatën që kemi dhe të mos tejkalojmë kapacitetet që kemi, të mirëmenaxhojmë situatën dhe të mbetemi në situatë optimale deri më tani. Përsa kohë që nuk kemi preparate specifik dhe vaksinë, do të jetë vetë infeksioni gradual, ajo që duhet imunizimi masiv aktiv i popullatës që do të realizohet në një moment të caktuar, shkëputjen e zinxhirit të infektimit. Them se jemi në momente oportune të dobishme që duhen ruajtur dhe nuk duhen shkelur”. z.tosku

Mjeku Kalo hodhi poshtë idenë për qarkullimin më herët të virusit COVID- 19 në Shqipëri, duke shtuar se duhet të plotësohen disa faktorë.

“Për fillimin e epidemisë në vendin tonë duhet të plotësohen disa faktorë. Së pari është faktori epidemiologjik, pra kur ke izoluar rastet e para. Së dyti është faktori serologjik, nëse një përqindje e caktuar e popullatës e kapërcen pragun e 15-20% që janë infektuar më parë që prof. Andi na e shprehu që nuk është arritur në ato vlera. Së treti duhet kombinuar me klinikën e të sëmurëve të cilët janë paraqitur në shërbimin infektiv, ose shërbimin ambulator apo shërbimet e tjera spitalore që përkojnë për nga klinika me SarsCov 2. Tjetër element është shtimi i vdekjeve nga infeksionet respiratore në këto kohë dhe nuk më rezulton i tillë në raport me periudhën pas deklarimit të rastit të parë. Duhen kombinuar disa element së bashku dhe një analizë mes specialistëve për t’i shtrirë këto kufijtë kohorë para datës së përcaktuar si fillimi pandemisë Sars Cov 2 në Shqipëri”, tha Kalo./atsh

Kalo: Shqipëria në parametra optimal, të vijojmë respektimin e rregullave me hapjen graduale Read More »

Testi i shpejtë i pështymës zbulon koronavirusin në disa minuta

Testi i shpejtë i pështymës (Trs) është në gjendje të zbulojë koronavirusin në disa minuta dhe së shpejti do të tregtohet me një kit të vërtetë, njoftoi Autoriteti Shëndetësor Rajonal i Shtatë Liqeneve, në bashkëpunim me Universitetin e Insubria në Varese.

Mjeti i ri që mund të diagnostikojë pozitivitetin Covid-19 përmes pështymës, “duke marrë 3 deri në 6 minuta”, funksionon në mënyrë të ngjashme me një test shtatzënie.

Pështyma mblidhet në një tampon letre dhe trajtohet me një reagent të veçantë: nëse shfaqet një vijë është negative, nëse dy personi është pozitiv.

Sipas studiuesve testi do të jetë në gjendje të diagnostikojë pozitivitetin edhe tek subjektet asimptomatikë, një veçanti e rëndësishme në dritën e rihapjes progresive të shteteve./atsh

Testi i shpejtë i pështymës zbulon koronavirusin në disa minuta Read More »

Brataj: Jemi të përgatitur për përballimin me sukses të një vale të dytë, nëse ndodh

Kreu i Urgjencës Kombëtare, Skënder Brataj, deklaroi sot se “jemi të përgatitur për përballimin me sukses të një vale të dytë të infektimit nga COVID-19, nëse ndodh, në kushtet kur po vijohet me lehtësimin e masave izoluese”.

Në një intervistë në media, Brataj tha se janë marrë masat me shtimin e ventilatorëve si dhe janë bërë skenarët.

Për shkak të masave të forta dhe të shpejta që u morën, Brataj tha se “ne edhe në valën e parë nuk kemi shfrytëzuar as burimet tona pa ardhur ndihmat”.

“Vendet që morën masa të menjëhershme izolimi e disiplinuan disi, ndërsa vendet që nuk morën masa patën një “shok”, u shpreh ai.

Sipas Bratajt, është vënë re se te ato vende që u morën masat që në fillim edhe me lirimin e masave, ka patur raste të pakta të infektuarish, një rritje prej 0.2%.

Ndërsa tek vendet që nuk morën masa të forta izolimi, që në fillim vihet re një rritje më e madhe e numrit të të infektuarve, edhe me lirimin më të pakët të masave.

Ai shprehu besimin se situata do të shkojë drejt përmirësimit, pasi sipas tij, janë disa faktorë favorizues për lehtësimin e gjendjes.

“Viruset kanë një periudhë që shfaqet, arrin kulmin dhe më pas nis rënia derisa sa zhduket siç është gripi dhe viruset e tjera që shfaqen nga tetori deri në mars. Po ta marrim si sezon edhe ky virus po e bën ciklin e vet. Nga dhjetori që u shfaq në Kinë jemi në muajin e 6. Virusi pas kapjes së kulmit ka rënien e virulencës së tij, qoftë si mutacion, për shkak të ndryshimeve që pëson, qoftë për shkak të temperaturave që rriten në verë. Por edhe për shkak të karakteristikave të popullsisë, pasi popullsia shqiptare është më e re, nuk është si ajo spanjolle, italiane, apo angleze. Rol mund të ketë edhe imuniteti i Ballkanit, pasi shikojmë që në këto vende ka patur një ndikim më të vogël. Këtu mund të luajë rol gjenetika, apo mënyra e vaksinimit. Janë shumë faktorë për të mos shfaqur numër të lartë të të infektuarish”, tha Brataj.

Më tej, Brataj theksoi se temperaturat e larta janë jo favorizuese për çdo virus.

“Ka edhe një faktor. Në këtë periudhë dymujore izolimi pati një stopim të të gjitha sëmundjeve infektive, as raste gripi, tuberkulozi, fruthi, sëmundje të kohës që kanë patur gjithmonë një përqindje. Izolimi i zhduk”, u shpreh ai./atsh

Brataj: Jemi të përgatitur për përballimin me sukses të një vale të dytë, nëse ndodh Read More »