Politike

Kryeministri Edi Rama deklaroi sot se “Partia Socialiste mbështet një hapje të listave për t’i dhënë mundësi çdo zgjedhësi të zgjedhë subjektin politik dhe të shprehë preferencën e tij për deputetin apo deputeten e përfshirë në listën e subjektit”.

Në një komunikim me mediet, Rama foli mbi qëndrimin e PS-së për përmbylljen e procesit të Reformës Zgjedhore në parlament brenda këtij sesioni të Kuvendit të Shqipërisë.

“Ky është një qëndrim i formësuar tanimë pas një procesi të gjatë dhe të vonuar për hir të së vërtetës për Reformën Zgjedhore. Arsyet e vonesave i dini dhe ndërkohë në Kuvendin e Shqipërisë ka hyrë në proces sipas gjithë rregullave të procedurës, si pasqyrimi pikë për pikë i marrëveshjes së bërë me opozitën jashtëparlamentare edhe nisma e opozitës parlamentare”, tha Rama.

Rama tha se “ne kemi vendosur që të mbështesim hapjen e listave, dhe ky është një vendim që reflekton bindjen tanimë se hapja e listave përkon me dëshirën e një mase shumë të madhe qytetarësh shqiptarë që shkon shumë përtej një shumice apo pakice qeverisëse”.

“Shkon përtej asaj që do të ishte zgjidhja më e thjeshtë dhe në pamje të parë më komode për një parti të madhe, por edhe për mua personalisht si kryetar i partisë, që në këtë rast duhet t’u jap të gjithëve jo me fjalë, por me faktin e hapjes së listave mesazhin që asnjëherë nuk ka qenë për mua prioritet komoditeti im, por gjithmonë prioritet është që PS të reflektojë shoqërinë dhe të reflektojë interesat dhe ambiciet e shoqërisë”, tha Rama.

Gjithashtu, Rama deklaroi se “të cilësosh si problem hapjen e listave dhe ta konsiderosh këtë si cenim të integrimit, kjo është marrëzi”.

“E di shumë mirë që ka një sëkëlldi dhe po ashtu ka edhe një përpjekje që kjo gjë të tregohet sikur është një shkelje e marrëveshjes së 5 qershorit, por fakti është se marrëveshjen e 5 qershorit ne e kemi realizuar me vullnetin më të mirë duke shkelur dhe mbi veten, për hir të së vërtetës”.

Rama tha se “lidhja e këtij procesi dhe vënia e kujës se duke prishur marrëveshjen e 5 qershorit po bëhet diçka kriminale në raport me interesat e integrimit të vendit është krejtësisht e pabazë”.

“Marrëveshja e 5 qershorit nuk preket nga PS dhe këtu është ngërçi i vetëm që ne kemi me opozitën parlamentare. Ne do të kërkojmë deri në fund nga ata që janë iniciatorët e ndryshimeve që të mos insistojnë në ndërhyrje për administrimin e zgjedhjeve. Ata janë kundër marrëveshjes që administrimi i zgjedhjeve dhe procesi i numërimit të kryhet nga partitë politike. Kundër kam qenë edhe unë sepse as mua nuk më pëlqen kjo zgjidhje, por ky është lëshimi i madh që kemi bërë dhe kështu opozita jashtëparlamentare nuk ka asnjë alibi për të kërkuar dhe pretenduar në funksion të garancive. Është pjesëmarrëse në proces, të gjitha rregullat e lojës janë shkruar e do zbatohen bashkërisht”, tha Rama.

Ideja që hapja e listave prish marrëveshjen, sipas tij, “është një çmenduri”.

“Kërcënimet dhe aludime se po u bë kjo ne do të bëjmë kështu e ashtu nuk e ndihmojnë procesin në raport me Europën. Por nga ana tjetër, peng Partinë Socialiste dhe Kuvendin e Shqipërisë ku hyn edhe opozita parlamentare nuk e merr dot askush nga jashtë këtij Kuvendi, as me forcë, shantazhe, kërcënime në raport me Europën, miqtë dhe partnerët tanë që ishin të përfshirë dhe ndikuar pozitivisht në realizimin e asaj marrëveshjeje”, tha Rama.

Kryeministri tha se “ne jemi absolutisht të qartë dhe produkti është ai që flet”. “Do të ishte shqetësuese patjetër nëse PS do të shfrytëzonte këtë situatë apo do të përdorte rrugë të padenja për të garantuar mazhoranca që do ta çonin sistemin drejt ndonjë ndryshimi që do të cënonte cilësinë e demokracisë”, tha Rama. /atsh

Kryetari i PD-së, Lulzim Basha deklaroi sot se Edi Rama e prishi në esencë marrëveshjen e 5 qershorit për Reformën Zgjedhore pas deklaratës se mbështet kërkesën e opozitës parlamentare për hapjen e listave.

“Në esencë Rama ka prishur sot marrëveshjen e 5 qershorit, në të cilën u investuan forcat politike me ndërmjetësimin e BE-së dhe SHBA-së. Në këtë marrëveshje ishte miratimi me konsensus i Reformës Zgjedhore që do të plotësonte një kusht për hapjen e negociatave. Ne si opozitë në këto 7 muaj kemi bërë gjithçka për të arritur një marrëveshje konsensuale”, – theksoi Basha në një konferencë për shtyp.

“Diskutimi i sotëm nuk është për listat e hapura është për koalicionet parazgjedhore që prej fillimit të demokracisë kanë qenë një realitet politik e sanksionuar në Kushtetutë. Rama ka vetëm një tmerr dhe frikë, zgjedhjet me koalicionin opozitar përballë. Maskat ranë se kishte vënë si alibi një grup njerëzish që nuk përfaqësojnë asnjë nga partitë politike të opozitës, njerëz që në këtë sallë nënshkruan heqjen e mandateve dhe më pas u blenë si gjë e gjallë me para të thata në dorë, leje ndërtimi dhe premtime për t’u nxjerrë njerëz nga burgu. Ishin mall i blerë nga Edi Rama”, – tha Basha.

Basha tha se “PD kurrë nuk e ka përjashtuar diskutimin për sistemin. Ne jemi për mazhoritar të pastër me dy dhoma që asnjë kryeministër nesër të mos i ngjajë as hijes së Ramës që kontrollon të gjitha pushtetet. Ndaj jemi të vendosur që një diskutim ta bëjmë por jo me Balla-opozitën, por me gjithë shqiptarët. Jemi gati dhe për referendum në këtë drejtim”, – tha Basha.

“Nëse Rama do kishte interes për lista të hapura nuk do e linte për një pazar fundkorriku, kur OSBE e ka hedhur poshtë 2 ditë më parë si shkelje flagrante ndaj zgjedhjeve të lira e të ndershme. Shqipëria s’mund të jetë peng i Ramës. Marrëveshja e 5 qershorit është e qartë. Nuk ka konsensus për ndryshimin e sistemit. Jo sepse nuk deshëm ne, por sepse Rama donte depolitizim. Por ai do të heqë koalicionet parazgjedhore”, – tha Basha. /atsh

Ambasadorja e Shteteve të Bashkuara të Amerikës, Yuri Kim deklaroi sot gjatë një interviste televizive se, “marrëveshja e 5 qershorit duhet të kalojë siç është, pasi nuk mund të hapet përsëri”.

E pyetur se çfarë mendon se do të ndodhë me Reformën Zgjedhore, ambasadorja Kim tha se, “është e ndërlikuar, sepse mendoj, opozita që është jashtë parlamentit bëri një gabim. Nuk duhet të kishin ikur. Thënë kjo, ata fituan shumë vota në zgjedhjet e fundit, pra qartësisht përfaqësojnë një pjesë domethënëse të popullsisë. Pra duhet të jenë pjesë e diskutimit, ndaj mendoj se ishte diçka shumë e mirë që u kthyen në tryezë për të negociuar çështjen e Reformës Zgjedhore. Në të njëjtën kohë, opozita që qëndroi në parlament bëri saktësisht gjënë e duhur. Në një kuptim, ata shpëtuan demokracinë shqiptare. Dhe sigurisht, shumica është shumica. Ajo që di është se më 5 qershor, palët ranë dakord dhe, me sa di, kanë hartuar ligjet që kodifikojnë marrëveshjen që arritën dhe kjo është diçka e mirë. Pritshmëria ime është që do ta ruajnë atë. Është e patjetërsueshme”.

“5 qershori duhet të kalojë siç është. Nuk mund të hapet përsëri. Nuk mund ta bësh, sepse do të ishte shkelje e shumë besimi të vënë. Dhe mendoj që nëse jep fjalën, si politikan, si diplomat, nëse nuk e mban fjalën, nuk ke asgjë. Ndaj pritshmëria ime është që udhëheqësit këtu do të bëjnë pikërisht atë që më thanë se do të bënin, që është miratimi i 5 qershorit. Tani, e di po ashtu që për shumë njerëz, 5 qershori nuk mjafton”, u shpreh Kim.

“Kur njerëzit flasin për ndryshim dhe Reformën Zgjedhore, duan sistemin e hapur. Dhe unë e kuptoj këtë, por siç e kam thënë më parë, e dini, synimi ynë i menjëhershëm është shumë specifik. Është që të sigurohet që Shqipëria të hyjë në BE. Pjesa tjetër, nëse mund të arrihet një marrëveshje, mrekulli. Të bëhet. Por ajo që nuk duam është një situatë pengmarrjeje kur diçka që është ekstra mban peng diçka që është e nevojshme. Nuk mund të jetë dhe nuk mund ta mbështes këtë”, tha Kim.

Mbi procesin e integrimit europian, Kim tha se, “mendoj se është një projekt historik dhe përgëzoj popullin shqiptar dhe qeverinë shqiptare që kanë arritur në këtë pikë në histori. Do të ndryshojë të ardhmen e Shqipërisë dhe po i thoja Luigi Soreca-s, ambasadorit të BE-së, se ne jemi miqtë e Shqipërisë për 100 vitet e fundit dhe duhet të shtoni BE-në si një tjetër mik për 100 vitet e ardhshme. E di që flasim për atë që mund të fitohet nga procesi. Nuk është vetëm çfarë fitohet, por në fakt, ajo që duhet bërë. Dhe kjo do të kërkojë që qeveria shqiptare dhe populli shqiptar dhe udhëheqësit politikë shqiptarë, avokatë, gjyqtarë, prokurorë të bashkojnë forcat për ta bërë Reformën në Drejtësi realitet. Është e vështirë. E di që jo të gjithë e duan. Jo të gjithë duan të gjitha pjesët e saj, por është vërtet e nevojshme dhe shumica dërrmuese e popullit shqiptar e do dëshpërimisht. Tjetra që di është që biznesi amerikan, me të cilët flas, e do dëshpërimisht. Askush nuk do të investojë në Shqipëri nëse nuk kanë ndjesinë se kontratat do të zbatohen, që nëse ka një mosmarrëveshje dhe nëse shkojnë në gjykatë, do të marrin një gjykim transparent dhe të ndershëm”.

E pyetur sesi situata mund të ndryshojë, Kim theksoi se, “reforma në Drejtësi. Reforma në Drejtësi. Vetingu. Gjyqtarët që janë qartësisht të korruptuar duhet të dalin që aty. Nuk duhet të ulen në ato salla gjyqi. Nuk duhet të marrin vendime për asgjë. Duhet të jenë jashtë që aty”.

E pyetur nëse do të kemi një Gjykatë Kushtetuese të pavarur Kim tha se, “mendoj që nëse e doni dhe luftoni për të, dhe i kushtoni pak kohë dhe përpjekje, po, e besoj. Mendoj që ajo që nuk ka për të ndodhur është një proces i menjëhershëm. Nuk ndodh. Nuk është që papritur, do keni një sistem gjykatash 100% të përsosur. Nëse prisni këtë, do të zhgënjeheni. Ajo që do të ndodhë është që do të shihni përparim, pastaj do të shihni diçka të tmerrshme, pastaj përparim përsëri. Siç e thashë, është si të shohësh baticën dhe zbaticën. Nuk është një proces i thjeshtë, i qartë linear”.

Sa i përket mosrealizimit të takimit Kosovë-Serbi në SHBA, ambasadorja Kim shprehet se gjërat ndodhin ndaj le të shohim ç’do të ndodhë në javët dhe muajt e ardhshëm.

E pyetur nëse Shtetet e Bashkuara e kanë humbur disi fokusin tek rajoni, ambasadorja Kim tha se, “ka një fokusim të ripërtëritur tek Ballkani Perëndimor dhe se çfarë do të thotë të kemi një prani të SHBA këtu. Dhe mendoj se do shihni që kjo do të vazhdojë. Nuk është rastësi që kemi disa persona të fuqishëm të përqendruar tek Ballkani Perëndimor, përfshi Matt Palmer dhe Rick Grenell. Dhe do të vini re që ambasadori Grenell u largua nga pothuajse gjithçka, përveç çështjes së Ballkanit, dhe mendoj se kjo flet për rëndësinë që ne i japim”.

E pyetur se sa e rëndësishme është Shqipëria kur vjen fjala tek pikëpamja ushtarake, për Shtetet e Bashkuara, ambasadorja Kim tha se, “mendoj që për ne, është shumë e rëndësishme. Secili aleat me të cilin jemi krah për krah në NATO është i rëndësishëm. Për Shqipërinë, Shtetet e Bashkuara kanë investuar shumë e shumë miliona dollarë, tek marrëdhënia dhe tek përpjekja për të përmirësuar kapacitetet e Shqipërisë si aleate. Mendojmë se janë para të shpenzuara mirë. Kur shohim kontributet e ushtrisë shqiptare, të forcave Shqiptare, madje duke përfshirë edhe sakrificën e jetës hera-herës, jemi krenarë të jemi aleatët tuaj. Mendoj se deri tani, kemi ofruar mbi 180 milionë dollarë në asistencë për mbrojtjen, vetëm në pak vitet e fundit”./atsh

Opozita parlamentare është larguar nga seanca e Kuvendit pas fjalës së kreut të grupit parlamentar demokrat, Myslim Murrizi, i cili deklaroi se opozita parlamentare nuk do ta votojë marrëveshjen për Reformën Zgjedhore pa lista të hapura. Sipas tij, opozita në Kuvend kërkon zbatimin e çdo pike të kërkesave të OSBE/ODIHR-it.

Kreu i grupit parlamentar demokrat, Myslim Murrizi duke marrë fjalën pas kryetarit t♪7 grupit parlamentar socialist, Taulant Balla reagoi duke thënë se nëse mazhoranca ka hapur ankandin për të joshur, intimiduar deputetët, atëherë duhet t’i harrojë 84 votat për marrëveshjen e Reformës Zgjedhore të Këshillit Politik.

Sipas Murrizit, Partia Socialiste po kërkon të jetë e mirë me të dyja palët, dhe me opozitën jashtë Kuvendit dhe me atë brenda në kuvend, por marrëveshja mes një deputeti dhe dy qytetarëve nuk mund t’i imponohet marrëveshjes brenda Kuvendit, ndërsa nënvizoi se opozita parlamentare nuk do e votojë marrëveshjen për Zgjedhoren pa lista të hapura.

”Ne si opozitë kemi bërë një kërkesë të ligjshme në mënyrë institucionale. Në 2008 me hile u hoqët të drejtën e votës shqiptarëve. Këtej bëni marrëveshje me kë t’iu dojë qejfi. Hajde të shkojmë në referendum. Një marrëveshje e ndërtuar mes një deputeti të mazhorancës, dhe dy qytetarëve s’mund të detyrojë opozitën parlamentare”, – tha Murrizi.

“Ne kemi kërkuar lista të hapura, kombëtare, dhe votim 100% pa asnjë ndryshim të rekomandimeve të OSBE. Kemi kërkuar të ketë prag zgjedhor, që askush mos hipë në kurriz të kurrkujt. Të numërohen votat jo nga militantë, jo nga tre parti, pasi 74 të tjerat pse duhet të kenë besim tek ju”, tha Murrizi.

Fatjona Dhimitri nga grupi Demokrat dhe Kostaq Papa ishin dy deputetët që nuk u larguan me pjesën tjetër të kolegëve të opozitës parlamentare duke mbajtur fjalën e tyre pas largimit të pjesës tjetër të opozitarëve.

Kreu i grupit parlamentar të Partisë Socialiste, Taulant Balla, reagoi menjëherë, duke theksuar se mazhoranca nuk do bjerë pre e presioneve por do vijojë me negociata. Ai sqaroi po ashtu se PS i do listat e hapura, por nga ana tjetër sqaroi se nuk mund të preket marrëveshja e 5 qershorit. Ai tha se opozita parlamentare po bën presion për të mos u votuar marrëveshja e 5 qershorit, ndërsa ajo jashtë (PD) që të votohet.

“Në emër të shumicës më lejoni të shpreh disa konsiderata, jemi kthyer si para 18 muajsh ku Saliu i pari, Luli e Monika largoheshin në mënyrë të shpeshtë nga Kuvendi për të kushtëzuar votën e tyre sa i përket reformës në drejtësi. Unë gjithmonë e kam mbështetur dhe falenderuar opozitën parlamentare se e ka mbështetur reformën”, u shpreh Balla.

“Realisht nuk i kuptoj çfarë kërkojnë me këtë largim për aq kohë sa këta bëjnë presion duke ikur, Luli nga jashtë bën presion për të votuar marrëveshjen. Luli do takim jashtë, këta brenda. Mirë mo, po kjo partia që përfaqësoj unë, ka ndonjë të drejtë? Ju kërkoni lista të hapura, ne ua kemi thënë që për ne s’janë tabu, mund të hapen, por ka disa rregulla, norma, kushte bashkëshoqëruese, nëse ky sistem është siç është, prandaj nëse hapen listat, fleta e votimit bëhet një libër me 100 faqe. Këto janë të ndërlidhura, ju vini kushte duke ikur, ata kushte duke bërtitur, ju kushte për të mos votuar një marrëveshje që bie dakord, që nuk është më e mira, por kush mendon që na bën presion apo ju që ikët për marrëveshjen, apo për marrëveshje me ju, ta harroni, ne nga bojkoti nuk surprizohemi”, – tha Balla.

Ne do të vijojmë komunikimin te ‘Ligjet’ për një hapje të listave, jo të plotë, si një hap të parë. Për mua kur bëhet fjalë për lista të hapura më e rëndësishme është barazia gjinore. Temat që s’prekin marrëveshjen e 5 qershorit jemi të gatshme t’i negociojmë. Thirrja ime është që opozita parlamentare të rikthehet, e mirëkuptoj arsyen si një presion që shumica nuk i ka mundësitë ta kalojë e vetme marrëveshjen. Për ne listat e hapura nuk janë tabu, por të gjejmë të gjitha modalitetet, të shkojë në dobi të procesit transparent”, – tha Balla. /atsh

Presidenti i Kosovës, Hashim Thaçi, bëri të ditur se të hënën do të udhëtojë drejt Hagës për t’u intervistuar si i ftuar nga Prokuroria Speciale.

Ai shprehet se bashkëluftëtarët e tij dhe ai do të përballen me dinjitet dhe integritet me drejtësinë ndërkombëtare.

“Uniteti qytetar, bashkëjetesa ndëretnike, stabiliteti institucional dhe besimi në institucione janë të domosdoshme që Kosova ta jetësojë vizionin që të jetë pjesë e NATO-s, Bashkimit Evropian dhe të ruajë miqësinë e përjetshme me Shtetet e Bashkuara të Amerikës”, u shpreh Thaçi.

Ai theksoi se “në këto dy dekadat e fundit shumë pjesëtarë të UÇK-së u ballafaquan me drejtësinë ndërkombëtare të UNMIK-ut, Tribunalit të Hagës për Ish-Jugosllavi, EULEX-it dhe me drejtësinë vendore”.

“Kosova, edhe pse viktimë, bashkëpunoi me organet e drejtësisë për trajtimin e pretendimeve për krime lufte. Në këto dy vitet e fundit shumë ish-bashkëluftëtarë janë intervistuar nga Dhomat e Specializuara, brenda dhe jashtë vendit”, tha ai./atsh