Lajmi i fundit

Agjencia për Zhvillimin Bujqësor dhe Rural (AZHBR) publikoi sot një videon informuese për mënyrën si aplikohet në Programin IPARD II.

“Procedura e aplikimit, masat, formularët, si dhe dokumentacioni mbështetës. Aplikimet mbyllen në datën 30 janar 2019. Nxitoni të përfitoni nga ky Program!”, citon njoftimi i AZHBR-së, ku ndër të tjera publikon edhe udhëzuesin për aplikantët, në lidhje me objektivat, masat dhe shpenzimet e pranueshme.

AZHBR publikon formularin e aplikimit dhe procedurën e plotësimit të tij, duke krijuar lehtësi dhe informim për të gjithë të interesuarit që duan të përfitojnë nga programi IPARD II që mbështet me grante investimet në bujqësi, agropërpunim dhe agroturizëm. /atsh

Media ndërkombëtare i ka kushtuar vëmendje arrestimit të Klement Balilit duke e konsideruar si ”një hap të madh përpara të Shqipërisë drejt Bashkimit Europian”.

“Trafikanti shqiptar i drogës në arrati dorëzohet pas tre vitesh”, shkruan prestigjiozja britanike “Daily Mail”, në një artikull ku thekson se ”lufta kundër krimit të organizuar është prioriteti i Shqipërisë në rrugën drejt BE-së”.

“Një prej personave më të kërkuar në Shqipëri u dorëzua tek Prokuroria e Krimeve të Rënda”, shkruan IBNA (Independent Balkan News Agency).

“Për Balilin kishte edhe një urdhërarresti ndërkombëtar. Ai kërkohej në shumë vende për trafikim të lëndëve narkotike dhe njihej me pseudonimin Eskobari i Ballkanit”, thekson IBNA-ja.

Edhe portalet e njohura kanadez “The Province”, “Toronto CityNews” dhe “CityNews Vancouver” njoftojnë për dorëzimin e Balilit duke cituar ministrin e Brendshëm shqiptar, Sander Lleshi, sipas të cilit “Kelmend Balili u dorëzua pas një operacioni të gjatë dhe të komplikuar”.

“Balili, një ish-zyrtar i administratës vendore të qytetit jugor të Sarandës, ka qenë në arrati pas një urdhërarresti nga Greqia fqinje, që e konsideron atë si kreun e trafikimit të lëndëve narkotike”, shkruan “Associated Press” (AP).

“Lufta kundër krimit të organizuar, trafikimit të drogës dhe korrupsionit janë prioritetet kryesore të Shqipërisë, që synon të hapë negociatat për anëtarësim me Bashkimin Europian këtë vit”, thekson AP-ja./atsh

Prokurori i Gjirokastrës Spartak Çoçoli, është ndaluar ditën e sotme në sallën e gjyqit, pasi dyshohet se ka kryer korrupsion.

Ndalimi i tij është bërë sot në sallën e gjyqit pas urdhrit të lëshuar nga prokuroria e Krimeve të Rënda.

Ky arrestim u bë pasi dyshohet se prokurori Çoçoli ka kryer korrupsion pasiv.

Policia Kufitare vijon zbatimin e masave shtesë në kontrollin e mjeteve dhe dokumentacionin e udhëtarëve. Gjatë 24 orëve të fundit është kapur një kamion në brendësi të të cilit kishte 5 kg e 300 gr lëndë narkotike. Është arrestuar në flagrancë drejtuesi i kamionit dhe është shpallur në kërkim një shtetas tjetër.
Gjithashtu janë arrestuar në flagrancë tre shtetas të huaj, të cilët janë kapur duke kaluar kufirin me dokumente të falsifikuara.
Shërbimet e Policisë Kufitare të Portit Durrës, në zbatim të masave shtesë për intensifikimin e kontrolleve, me qëllim parandalimin dhe ndëshkimin e paligjshmërisë, gjatë kontrollit të ushtruar mbrëmjen e djeshme në vijën e dytë, në kabinën e një kamioni kanë gjetur të fshehur lëndë narkotike.
Gjatë peshimit të kryer nga ana e Specialistëve për Hetimin e Narkotikëve lënda narkotike e llojit Marijuanë ka rezultuar në peshën 5 kg e 300 gr, e cila është sekuestruar në cilësinë e provës materiale. Është arrestuar në flagrancë shtetasi T.H, 31 vjeç, banues në Durrës (drejtuesi i kamionit) dhe është shpallur në kërkim shtetasi E.H.
Në ngarkim të shtetasve të mësipërm materialet i kaluan Prokurorisë pranë Gjykatës së Shkallës së Parë Durrës për veprën penale “Trafikimi i narkotikëve”.
Gjithashtu , si rezultat i kontrolleve të dokumentacionit të udhëtarëve janë arrestuar në flagrancë tre shtetas të huaj me dokumente të dyshuara të falsifikuara, në tentativë për të kaluar kufirin drejt Italisë në mënyrë të paligjshme, konkretisht : V.E, 30 vjeç, banues në Turqi; S.A, 43 vjeç, banues në Turqi; R.A, 32 vjeçe, banuese në Filipine.
Në ngarkim të shtetasve të mësipërm materialet i kaluan Prokurorisë pranë Gjykatës së Shkallës së Parë Durrës për veprën penale “Falsifikimi i letërnjoftimeve, i pasaportave ose i vizave” parashikuar në nenin 189 të Kodit Penal.
Policia Kufitare vijon punën për të goditur paligjshmërinë në kufi duke forcuar kontrollet për verifikimet kufitare. /atsh

Temperaturat e ulëta dhe reshjet e dëborës këto ditë të para të janarit, kanë vështirësuar jo pak qarkullimin në disa akse rrugore, sidomos drejt zonave rurale në disa qarqe apo në zonat e thella malore

Shërbimet e Policisë Rrugore, por edhe shërbime të tjera policore, si FNSH apo shërbime të Rendit janë angazhuar ditët e fundit në shumë operacione ndihme e shpëtimi, duke shmangur pasoja fatale për qytetarët.

Policia e Shtetit këshillon çdo përdorues rruge të bëjë kujdes të shtuar, duke përdorur zinxhirë në rast se nevojiten dhe të rregullojnë shpejtësinë e mjetit ndërsa apelon qytetarët që “në çdo rast emergjencë telefono 112”. /atsh

Muaji janar erdhi i ftohtë e i acartë dhe e shtuna që lamë pas ishte dita më e ftohtë duke shënuar -14 gradë celsius në zonat malore. Gjatë 15-ditëshit të dytë të muajit do të kemi më shumë reshje shiu dhe dëbore por temperaturat do të shkojnë drejt normalizimit.

Por kjo do të ndodhë vetëm pas ditës së nesërme, pasi pritet të jetë ndër ditët më të ftohta.

Ndonëse fillimi i javës solli reshjet e shiut në gjithë vendin, e marta risjell kryesisht mot të kthjellët por të ftohtë në gjithë Shqipërinë. Nga e marta deri të premten, nuk pritet të ketë reshje në territorin shqiptar, por temperaturat do të ulen ndjeshëm duke arritur deri në -4 gradë në kryeqytet.

Dita e premte ul sërish me 3°C temperaturat e mëngjesit duke ulur MIN në -5°C ndersa e premtja në mesditë sjell rënie të lehtë të temperaturave.

Një apliniste 31-vjecare është plagosur në malin e Cikës në Vlorë pasi është rrëzuar nga një lartësi.

Gazetari Enrik Mehmeti raporton për “BalkanWeb” se vajza ka rënë nga një lartësi duke pësuar plagë në trup, ndërsa ishte pjesë e një grupi prej 5 personash që kryenin ecje në mal.

Transportimi i saj me makinë për në spital ka qënë thuajse i pamundur, pasi ndodhej rreth 4 orë larg nga rruga kryesore.
E ndodhur në këto kushte, në ndihmë i ka ardhur helikopteri i Qendrës Kombëtare të Urgjencës Mjekësore (QKUB), i cili ka rrezikuar shumë, pasi helikopterë të tillë e kanë të vështirë manovrimin në terren të ulët dhe thepisur.

Pas disa peripecish, fatmirësisht vajza është arritur të futet në helikopter dhe të transportohet për në spital. Mësohet se gjendja e saj mjekësore është e qëndrueshme dhe ndodhet jashtë rrezikut për jetën.

I pranishëm në 106-vjetorin e krijimit të Policisë së Shtetit, ministri i Punëve të Brendshme, Sandër Lleshaj tha se kryefjalë e policisë është modernizimi i saj për t’ju përgjigjur me devotshmëri sfidave të reja. Lleshaj gjithashtu u shpreh mirënjohës për të gjithë punonjësit e policisë ndër vite, teksa nënvizoi mirënjohjen për efektivët e rënë në krye të detyrës.

Ministri i Punëve të Brendshme në fjalën e tij, theksoi se Policia e Shtetit është e përgatitur që t’i përgjigjet krimit, por jo politikës, e cila duhet të jetë aleate e saj.

“Përgjatë një shekulli, forcat e rendit dhe të sigurisë publike, të organizuara kryesisht si xhandarmëri në dekadat e para, apo si Polici më pas, kanë përballuar një ndër detyrat më të ndërlikuara dhe të vështira në shërbim të Shqipërisë dhe shqiptarëve dhe kanë krijuar kushtet për zhvillimin e përgjithshëm të vendit, në një mjedis të brendshëm dhe të jashtëm jashtëzakonisht të vështirë. Ky përvjetor është rasti më i mirë për të shprehur mirënjohjen më të thellë, për të gjithë ata mijëra burra dhe gra që përgjatë 106 viteve kanë shërbyer me nder në radhët e Policisë së Shtetit. Por nderimi më i madh u përket natyrisht atyre që, gjatë këtyre viteve, kanë dhënë jetën e tyre në përmbushje të misionit fisnik”, – tha Lleshaj.

Ministri tha se, zhvillimi i gjithanshëm i vendit vjen edhe nga siguria që ofron Policia e atij vendi.

“Policia e Shtetit ka për detyrë të garantojë kushtet bazë të sigurisë, për të mundësuar zhvillimin e gjithanshëm të vendit dhe të shoqërisë tonë, të cilat janë në një fazë të rëndësishme të historisë, e cila, po të duhej të sintetizohej me një fjalë të vetme, do të mund të quhej integrim. Integrim rajonal, integrim europian. Dhe integrimi është një proces që lidhet ngushtë me lirinë, lirinë e lëvizjes, lirinë e organizimit, lirinë e tregtisë dhe shumë e shumë liri të tjera, për të cilat Policia e Shtetit ka misionin e madh të ofrimit të garancisë bazë, që është Siguria. Sa më shumë zgjerohen hapësirat e lirisë, aq më e madhe dhe më e ndërlikuar bëhet edhe përgjegjësia e Policisë për të garantuar që liria të funksionojë, përherë e më mirë”, – tha ministri Lleshaj.

Sipas tij, shtimi eksponencial i flukseve të lëvizjes së udhëtarëve që hyjnë apo dalin nga Shqipëria, shtimi po aq i shpejtë i shkëmbimeve tregtare, revolucioni teknologjik, si dhe lindja dhe shpërthimi i një realiteti të ri, siç është realitetit virtual, dhe shumë tendenca e fenomene të reja, kanë krijuar hapësira të pashmangshme që edhe e keqja, krimi, ekstremizmi apo terrorizmi të mund të shfrytëzojnë për qëllime të mbrapshta liritë e krijuara.

“Dhe pikërisht, në mes të kësaj fushe tensioni antagonist, mes lirisë dhe të keqes kriminale, qëndron Policia e Shtetit me misionin për të garantuar të parën dhe për të shtypur të dytën”, – theksoi Lleshaj.

Kreu i ministrisë së Brendshme tha se përgjigje për misionin e vështirë që ka policia është modernizimi i Policisë.

“Plotësimi i këtij misioni, që sa vjen e vështirësohet, kërkon që Policia e Shtetit të bëhet përherë e më e fortë, që për mua do të thotë përherë e më moderne. Ajo duhet të ketë njerëz përherë e më moderne, procedura dhe standarde moderne, arsimim dhe kualifikim modern, pajisje, mjete dhe teknologji moderne”, – tha Lleshaj.

Ministri foli dhe për lëvizjen e lirë me Kosovën.

“Përpjekjet për integrim do të ndjekin një qasje të dyfishtë: Integrim rajonal dhe integrim europian. Në funksion të integrimit rajonal, do të përshpejtojmë projektin për krijimin e një zone të lëvizjes së lirë, sipas standardeve ‘Schengen’ mes Shqipërisë dhe Kosovës, e cila shpresojmë të zgjerohet shpejt edhe me vende të tjera të rajonit”, tha Lleshaj, i cili shtoi se politika duhet të jetë aleate e Policisë.

“Për shkak të natyrës së ndërlikuar të misionit që kryen, jo rrallë herë, Policia e Shtetit është bërë shënjestër e sulmeve të ndryshme. Sigurisht, ajo do të jetë në shënjestër të sulmeve të krimit, për të cilat është e përgatitur dhe e gatshme të përballet dhe të fitojë. Por ka edhe një kategori tjetër sulmesh, kryesisht politike, për të cilat Policia e Shtetit nuk është dhe as nuk ka ndërmend të përgatitet për mbrojtje. Policia duhet të jetë e rreshtuar në front përballë me krimin, ndërsa krahët dhe shpinën e saj duhet dhe do ta mbrojë politika e përgjegjshme, Qeveria, institucionet dhe mbi të gjitha qytetarët, aleatët e saj të përhershëm”, – përfundoi Lleshaj./atsh