Lajmi i fundit

Sistemi “41 bis” hyn në fuqi nesër dhe fillon të zbatohet me asistencën e Prokurorisë Antimafie dhe me partnerët italianë, që na kanë mbështetur në mënyrë të vazhdueshme për dizenjimin dhe aplikimin e këtij regjimi të posaçëm.

Kështu deklaroi sot ministrja e Drejtësisë, Etilda Gjonaj, pas përurimit të sallës së re operative të Drejtorisë së Përgjithshme të Burgjeve, së bashku me Prokurorin e Antimafias Italiane Federico Cafiero De Raho.

Në këtë sallë është instaluar sistemi i kamerave që do të monitorojë 24 orë në ditë burgjet në vend.

“Mbështetja jo vetëm e palës italiane, por edhe e partnerëve të tjerë si Ambasada britanike dhe Këshillit të Europës, për Ministrinë e Drejtësisë dhe qeverinë shqiptare për masat e sigurisë në sistemin penitenciar është një kundërpërgjigje dhe reagim për luftën kundër kriminalitetit dhe krimit të organizuar në veçanti. Me një përllogaritje të përafërt janë rreth 270 subjekte që pritet t’i nënshtrohen regjimit 41 BIS. Është menduar të ketë ambiente të posaçme në institucione që kanë seksione të sigurisë së lartë”, tha Gjonaj.

Ministrja Gjonaj u shpreh se “me ngritjen e kësaj salle operacionale për monitorimin 24 orë në të gjitha sistemet penitenciare do të rritet siguria në burgje, lufta kundër korrupsionit si dhe përgjegjësia e punonjësve të policive në burgje dhe stafit që i administron ato. Por, nga ana tjetër, edhe për të eliminuar rastet kur subjektet e krimit të organizuar kanë kontakte me botën jashtë dhe që mund të vazhdojnë aktivitetin kriminal”.

“Me dy sistemet, aplikimin e sistemit “41 bis” dhe me sallën operacionale 24-orëshe, e cila do të jetë e lidhur edhe me operacionin ‘Forca e Ligjit’ dhe me shërbimin e kontrollit të brendshëm të burgjeve, do të arrijmë të minimizojmë të gjitha rastet kur krimi i organizuar vazhdon aktivitetin e tij edhe në sistemin penitenciar”, nënvizoi Gjonaj.

Prokurori i Antimafias Italiane, Federico Cafiero De Raho theksoi se “kohët e fundit ka pasur shumëfishim të hetimeve nga ana shqiptare dhe italiane. Skuadrat hetimore të përbashkëta po punojnë për të luftuar sa më mirë organizatat kriminale shqiptare, që kryejnë veprimtarinë në Shqipëri dhe Itali”.

Sipas tij, rezultatet shihen, sepse edhe arrestimet kanë qenë të shumta gjatë vitit të fundit.
De Raho shtoi se të shumta janë edhe projektet e fundit mes autoriteteve gjyqësore italiane dhe shqiptare, gjë që më parë nuk ekzistonte.

“Ka zhvillim të madh nga ana shqiptare të mjeteve të ndryshme për të luftuar sa më mirë krimin e organizuar”, tha De Raho./atsh

Në vijim të punës për kapjen e personave në kërkim, gjatë 24 orëve të fundit kapen nga Policia e Vlorës 3 persona të shpallur në kërkim. Gjithashtu është arrestuar në flagrancë për vjedhje edhe një person tjetër.

Specialistët e Seksionit për Hetimin e Krimit Kundër Personit dhe Pronës kanë bërë ndalimin e shtetasit në kërkim L. B., 50 vjeç, banues në Vlorë. Ndalimi i tij u bë mbi bazën e Urdhrit të Ndalimit të Prokurorisë pranë Gjykatës së Shkallës së Parë Vlorë, si i dyshuar për veprat penale “Vrasje me paramendim, e mbetur në tentativë, kryer në bashkëpunim” dhe “Mbajtja pa leje dhe prodhimi i armëve, armëve shpërthyese dhe municionit”.

Ngjarja i referohet datës 6 Gusht 2018, ku në lagjen “Pavarësia” Vlorë, L.B, dyshohet se ka tentuar të vrasë me armë zjarri shtetasin A.M. Kristi Balli, 24 vjeç, banues në Vlorë. Gjykata e Shkallës së Parë Vlorë e ka dënuar me 1 vit burgim për veprën penale të “Vjedhjes”.

Po ashtu u ndalua, Ermal Arapaj, 28 vjeç, banues në fshatin Shushicë, Vlorë. Gjykata e Shkallës së Parë Vlorë e ka dënuar me 1 vit burgim për veprën penale “Moskallëzim krimi”.

Gjithashtu është arrestuar në flagrancë shtetasi A.G., 29 vjeç, pasi në lagjen “Isa Boletini” dyshohet se ky shtetas ka vjedhur disa sende shtëpiake në banesën e shtetasit K.Sh. Vazhdon puna hetimore për dokumentimin e ngjarjeve të ndryshme me qëllim kapjen dhe vendosjen para përgjegjësisë penale të autorëve përkatës. /atsh

Një tjetër person i shpallur në kërkim, bie në pranga nëpërmjet bashkëpunimit të suksesshëm të Interpol Tirana me homologët.

Policia e Shtetit bën të ditur se Kapet dhe arrestohet personi i shpallur në kërkim ndërkombëtar, shtetasi finlandez M. S., 34 vjeç.

Operacioni për arrestimin e tij u zhvillua nga Drejtoria Qendrore Hetimore në Departamentin e Policisë Kriminale në Policinë e Shtetit në bashkëpunim me Drejtorinë Vendore të Policisë Tiranë, pas një bashkëpunimi të suksesshëm në shkëmbimin e informacioneve në kohë reale mes ZQK Interpol Tirana dhe Sekretariatit të Përgjithshëm të INTERPOL.

Ky shtetas është shpallur në kërkim ndërkombëtar nga autoritetet e drejtësisë finlandeze, pasi Gjykata e Apelit në Helsinki, në prill 2018 e ka dënuar me 3 vjet e 11 muaj burgim, për vepra penale të rënda në fushën e narkotikëve, armëmbajte pa leje dhe shumë raste të përsëritura në disa qytete në Finlandë, në periudhën dhjetor 2016 – prill 2017, ku ka shkaktuar panik dhe rrezik për qytetarët duke drejtuar automjetin nën efektin e lëndëve narkotike dhe pa leje drejtimi.

Shtetasit finlandez M. S., kryeson listën e personave të kërkuar në Finlandë, kjo sipas konfirmimit të Interpol Helsinkit, për shkak të panikut dhe rrezikut që ka shkaktuar për qytetarët.

Kapja dhe arrestimi provizor i shtetasit M. S., u bë me qëllim ekstradimi drejt Finlandës. atsh

Reshjet e dendura të dëborës që ranë gjatë natës duke u gdhirë e enjtja, nuk krijuan asnjë shqetësim në qarkullimin e automjeteve në segmentin rrugor që përshkon Qafën e Llogorasë, pjesë e aksit kombëtar Vlorë-Sarandë.

Mjetet borëpastruse të subjektit koncensionar, që mirëmban këtë rrugë, punuan paralelisht me rënien e reshjeve, duke parandaluar bllokimin e kësaj rruge. Ky proces është shoqëruar edhe me hedhjen e kripës në shtratin e rrugës, çka krijon parametrat e duhur për lëvizjen e mjeteve dhe shmangien e rrezikut të rrëshqitjes.

Gjatë gjithë këtyre orëve, qarkullimi i automjeteve në të dy kahet ka vijuar normalisht, ndërkohë që mjete dhe punonjës të subjektit që mirëmban këtë aks, janë vazhdimisht në terren. Kjo, për të ndërhyrë në situata të mundshme të përkeqësimit të kushteve të motit.

Prej mëngjesit, në këtë zonë janë ndërprerë reshjet e dëborës, por nuk përjashtohet mundësia që ato të rishfaqen gjatë orëve në vazhdim, veçanërisht në mbrëmje dhe gjatë natës.

Reshjet e sotme të dëborës në këtë zonë, pasojnë ato të disa ditëve më parë. Ky sezon dimëror vlerësohet ndër më të ashprit në raport me intensitetin dhe sasinë e reshjeve të dëborës, në të paktën 20 vitet e fundit.

Por edhe pse në kushtet e reshjeve intensive të dëborës, janë optimalizuar dhe përmirësuar ndjeshëm parametrat e ndërhyrjes në kohë dhe me cilësi për të garantuar qarkullimin e automjeteve në këtë segment rrugor.

Ndërkohë, prania e shtresave të borës në mjediset e Parkut Kombëtar të Llogorasë, e ka bërë më tërheqës këtë mjedis pyjor malor dhe ka shtuar ndjeshëm numrin e qytetarëve dhe turistëve të huaj që po e frekuentojnë gjatë këtyre ditëve./atsh

Policia e Lezhës në kuadër të operacionit “Forca e Ligjit”, sekuestroi rreth 5.2 milionë euro llogari bankare dhe pasuri të paluajtshme të dy shtetasve, të dyshuara të përfituara nga veprimtari kriminale.

Sipas njoftimit për shtyp të Policisë së Shtetit, sekuestrimi është rezultat i punës hetimore të Policisë së Lezhës, e cila ka referuar materialet procedurale mbi bazën e dyshimit të arsyeshëm, për përfitimin e tyre nga veprimtaria kriminale, me Prokurorinë e Rrethit Gjyqësor Lezhë.

“Prokuroria ka filluar procedimin penal për veprën “Pastrim i produkteve të veprës penale ose të veprimtarisë kriminale” në ngarkim të dy shtetasve, duke e finalizuar me sekuestro të vendosur nga Gjykata e Shkallës Parë Lezhë me vendim te datës 23 janar 2019″, theksohet në njoftim.

Sipas Policisë së Shtetit sekuestrimi i llogarive bankare kap vlerën totale rreth 5.2 milionë euro dhe 7 apartamente. //atsh

626.956 vërtetime janë dhënë përmes portalit e-Albania nga Administrata Tatimore, për periudhën janar – dhjetor 2018 për individët, subjektet e interesuara, si edhe direkt nga punonjësit e institucioneve të përfshira në këtë portal.

Pjesa më e madhe janë vërtetime për pagesat e kontributeve të sigurimeve shoqërore dhe shëndetësore, të marra nga individë apo subjekte, por edhe për pagim detyrimesh etj..

Drejtoria e Përgjithshme e Tatimeve bën të ditur se, gjatë vitit 2018, ka ofruar një sërë shërbimesh për tatimpaguesit, individët dhe institucionet publike, si në rrugë elektronik, ashtu edhe në sportele, pa asnjë kosto dhe në çdo kohë.

Ofrimi i shumë shërbimeve në rrugë elektronike ka bërë që të reduktohen ndjeshëm kontaktet e drejtëpërdrejta me administratën, radhët e gjata dhe koha e pritjes. Për vitin 2018 janë dhënë 41,153 vërtetime në sportelet e Zyrave të Shërbimit të Tatimpaguesve, në një kohë që për vitin 2017 janë dhënë rreth 250,000 vërtetime në spotele.

Administrata Tatimore inkurajon marrjen e shërbimeve të saj përmes portalit e-Albania dhe mbetet e angazhuar maksimalisht për të ofruar për tatimpaguesit, në çdo kohë e me sa më pak kosto shërbime cilësore./atsh

Prefekti i Qarkut Vlorë, Flamur Mamaj vizitoi sot Sarandën për të monitoruar nga afër punën që po bëhet lidhur me adresarin në Gjendjen Civile.

Po ashtu, Prefekti inspektoi mbarëvajtjen e procesit të rinovimit të kartave të identitetit.

Ai ripërsëriti thirrjen ndaj të gjithë qytetarëve, të cilëve ju skadon karta e identitetit në vitin 2019, që të paraqiten pranë zyrave përkatëse për të bërë të mundur shmangien e radhëve në muajt e ardhshëm, ku fluksi parashikohet të jetë më i lartë.

Qytetarët në të gjithë vendin, të cilëve iu skadojnë kartat e identitetit këtë vit, janë lajmëruar nga të gjitha institucionet përkatëse që të aplikojnë për pajisen me kartat e reja të identitetit.

Nis me shtyrje seanca e parë për Emiljano Shullazin dhe anëtarët e grupit të tij, në apelin e k.rimeve të rënda.

Shkak për shtyrjen e seancës u bë kërkesa e avokatit te të pandehurit Blerim Shullazi, Bledar Meminaj.

Meminaj kërkoi kohë të njihet me dosjen për shkak se më herët, në shkallë të parë avokat ka qenë Aldo Tabaku.

Seanca e rradhës do të zhvillohet më datë 4 Shkurt ora 9 e 30.

Një muaj më parë gjykata e krimeve të rënda dënoi me 55 vite bu.rg Emiljano Shullazin, Gilmando Danin, Endrit Qyqja dhe Endit Zela si dhe Blerim Shullazi.

14 vite burg u dhanë për Emiljano Shullazin. Ata akuzohen për krijim të grupit të strukturuar k.riminal, gjobvënie dhe kanosje per shkak të detyrës.