Lajmi i fundit

Presidenti Ilir Meta deklaroi sot se, se është i gatshëm të shohë 13 tetorin si datë, por përpara datës 17-18 tetor kur merret vendimi për hapjen ose jo të negociatave nga Këshilli i BE.

Duke folur për mediet nga Xhafzotaj në Durrës, Meta theksoi se, “Kryeministri e percepton ndoshta si datë tersi 13 tetorin dhe doja ta siguroja atë dhe të gjithë se e vetmja datë ndaj së cilës nuk kam asnjë mundësi të ndikoj dhe që është shumë e rëndësishme për shqiptarët, është 17-18 tetori, që do të vendoset për çeljen ose jo të negociatave në Shqipëri dhe Maqedoninë e Veriut”.

Të gjithë ne”, theksoi Meta, “e kemi të qartë tani se me mik shumë të fortë vendimin për në qershor e shtymë për në tetor, për në vjeshtë, dhe është e domosdoshme të jemi të përgjegjshëm dhe të sinqertë para shqiptarëve, të paktën unë si president, por edhe zoti Rama si kryetar i qeverisë, natyrisht edhe zoti Basha si kryetar i opozitës. Se nëse përpara 17-18 tetorit, nuk do të arrijmë të organizojmë zgjedhje gjithëpërfshirëse vendore, dhe të gjejmë formulë për kapërcimin e kësaj krize, provimi i vjeshtës është i pakalueshëm”.

“Në vend ta kishim gjetur këtë zgjidhje që në momentin e parë kur shfuqizova 30 qershorin, të paktën të mos humbasin asnjë sekondë nga sot e në vazhdim sepse 17-18 do iki e do vi 19 tetori, dhe shqiptarët në 19 tetor nuk duan të dëgjojnë justifikimet askujt për të zhvilluar ping-pongun e radhës së fajit. Është e qartë se e vetmja datë ku nuk ndikoj dot është 17-18 tetori. Jam fleksibël, meqenëse zotit Rama mund t’i ketë dalë ters në filxhan 13 tetori, që ta shikoj 13 tetorin, por përpara 17-18 tetorit. Unë po e pres me shumë durim, por edhe me shpresë për të dhënë një zgjidhje të përgjegjshme se përndryshe kjo krizë do të vazhdojë të përshkallëzohet dhe askush nuk duhet të mendojë se do të dalë me kosto zero, veçanërisht ata që kanë punuar me përkushtim për të gatuar këtë rrëmujë në Shqipëri”, tha Meta.

“Para 20 vjetësh Shqipëria ishte para Kroacisë. Ku është Kroacia sot? Ku është Shqipëria? Shqiptarët po ikin sikur të ishte viti ’90. Kush do mbajë përgjegjësi?! Jam shumë fleksibël për të ndryshuar datën 13 tetor, me që është perceptuar si ditë tersi. Por nuk kam në dorë të ndryshoj dot 18 tetorin. Kemi fut mik të fortë për të shtyrë provimin në vjeshtë, por s’çelen negociatat me qoka ndërkombëtarë”, deklaroi Meta.

Në lidhje me vendimet e gjykatave Meta tha se “çdo proces gjyqësor që vazhdon të zhvillohet është demonstrim i rrëmujëhanës që zhvillohet. Mungesë e respektit për Kushtetutën, keq zbatimi i qëllimshëm dhe i njëanshëm i ndryshimeve kushtetuese që u realizuan tri vete më parë. Me një qarkore u shpall inekzistent dekreti i Presidenti dhe u mblodh organizata socialiste në KQZ dhe u bë presion ndaj Kolegjit Zgjedhor, dhe u bë rrëzimi i kërkesës së zotit Idajet si rrëzimi i dekretit të Presidentit. Por siguroj shqiptarët që nuk ka pasur zgjedhje të qytetareve, as zgjedhje kushtetuese në 30 qershor. Çdo ndërkombëtar që thotë që gomari fluturon, kjo mund të ndodhë në art dhe pikturë, por në Shqipëri e dimë që gomari nuk fluturon. Nuk është shqiponjë”, u shpreh Meta.

Meta komentoi edhe komisionin hetimor parlamentar të ngritur nga maxhoranca për shkarkimin e tij.

“S’kam asnjë shqetësim për asnjë komision hetimor, asnjë gjykatë, në Shqipëri apo në çdo institucion tjetër që ka juridiksion në Shqipëri. I vetmi shqetësim i imi është data 19 tetor. Çfarë do u themi shqiptarëve? Çfarë do u themi që e kishte fajin Edi apo fajin Luli dhe Mona. Çfarë do u themi që na gënjyen disa europian apo kështu na thënë disa amerikanë”, u shpreh Meta./atsh

Kryeministri Edi Rama shprehu sot keqardhjen për gjithë ata që vazhdojnë t’i shmangen detyrimeve ndaj shtetit, duke u përballur me pasojat, ndërsa ka nisur zbatimin plani operacional kundër informalitetit.

“Stop informalitetit. Keqardhje për këta njerëz që vazhdojnë avazin e vjetër të shmangies së detyrimeve ndaj shtetit dhe e paguajnë kaq shtrenjtë pasojën e shkeljes së ligjit”, theksoi Kryeministri Rama, duke sjellë në vëmendje bllokimin e atyre që i janë shmangur detyrimeve.

Në kuadër të operacionit kundër informalitetit janë bllokuar një hotel luksoz dhe një biznes tjetër, të cilët deklaronin një xhiro fiktive të të ardhurave dhe nuk lëshonin kupon tatimor. /atsh

Ministri i Brendshëm Sandër Lleshaj njoftoi sot se nga tetori kartat e identitetit që skadojnë këtë vit nuk do të mund të përdoren më. Lleshaj inkurajoi qytetarët që të nxitojnë për të rinovuar mjetet e identifikimit, në mënyrë që të mos befasohen nesër.

“Kartat e identitetit dhe pasaportat janë në prag të skadimit për shumë qytetarë. Nga fillimi i tetorit ato që skadojnë këtë vit nuk do të mund të përdoren më, nëse nuk shoqërohen me dokumentin e aplikimit”, theksoi ministri Lleshaj.

“Të gjithë duhet të nxitojnë sot, që të mos befasohen nesër, kur të ndalohen për të udhëtuar jashtë vendit, apo kur të mos mund të marrin një shërbim tjetër brenda tij”, theksoi Lleshaj./atsh

“Dëshmorët e atdheut, major Klodian Tanushi dhe nëntetar Zarife Hasanaj do të jenë përgjithmonë pjesë e grup-batalionit të NATO-s në Letoni”, deklaroi sot ministrja e Mbrojtjes Olta Xhaçka, pas zbulimit sot të memoralit në nderim të dëshmorëve nga kolegët në mision.

Ministrja Olta Xhaçka shprehet se Dëshmorët e atdheut major Klodian Tanushi dhe nëntetar Zarife Hasanaj do të jenë përgjithmonë pjesë e grup-batalionit të NATO-s në Letoni.

“Kolegët e tyre, aktualisht në mision, zbuluan memorialin kushtuar dy rënëve në Camp Adazi, ku ata shërbyen dhe dhanë jetën. Lavdi përjetë dëshmorëve!”, shprehet ajo./atsh

Imshta dhe Divjaka janë dy prodhueset më të mëdha të shalqirit në Shqipëri.

Zv/kryeministri Erion Braçe ndalet te investimet që janë kryer dhe masat fiskale që u kanë ardhur në ndihmë fermerëve të kësaj zone për të rritur eksportet.

“Këtu jemi në Imshtë. Turi është një bujk i mirë, i apasionuar pas punës me tokën. Çmimi mesatar që Imshta mori për shalqirin këtë vit është 23 lekë për kilogramë. Eksporti u zgjerua dhe nga Imshta këtë herë çuam shalqi edhe në Suedi. Infrastruktura, rruga për Imshtë tashmë e bërë dhe rrugët e tjera në ndërtim në fazën e fundit ndihmuan shumë”, tha Braçe.

Po ashtu heqja e TVSH-së për inputet bujqësore, farërat, fidanët e plehrat kimike dha efekt maksimalisht, uli kostot, rriti rendimentin, dhe solli më shumë të ardhura.

“Aq kundërshtarë pati heqja e TVSH-së, sa e mbani mend, ika nga komisioni. Vijojnë ta kundërshtojnë akoma të gjithë ata që kurrë nuk shkuan në fshat, kurrë nuk hynë një herë të vetme në ara me bujqit, tek produkti. Do të bëjmë edhe më shumë; do të çojmë ujin për vaditje përmes rrjetit të ri të degës së Çukasit në Imshtë. Do ulim edhe më kostot! Kush do të punojë, punën e ka pranë”, tha Braçe./atsh