Lajmi i fundit

Drejtoresha e Përgjithshme e Agjencisë Telegrafike Shqiptare, Armela Krasniqi u zgjodh anëtare e bordit drejtues të Aleancës Europiane të Agjencive të Lajmeve, (EANA) ku ATSH është anëtare me të drejta të plota.

EANA zhvilloi në datat 18-20 shtator në Pragë Asamblenë e Përgjithshme për zgjedhjen e anëtarëve të rinj të bordit drejtues.

Në votimin e zhvilluar për anëtarët e rinj të bordit, kishin të drejtë vote vetëm drejtorët e përgjithshëm ose presidentët e agjencive të përfaqësuara në këtë asamble.

Në Aleancën Europiane të Agjencive të Lajmeve bëjnë pjesë agjenci prestigjioze lajmesh të vendeve të Bashkimit Europian si AFP Francë, ANSA Itali, Keystone Zvicër apo DPA Gjermani, EFE Spanjë, PAP Poloni etj.

Zgjedhja e drejtoreshës së Përgjithshme të ATSH-së në bordin drejtues të EANA-s është ndër rastet e pakta kur në këtë bord janë zgjedhur përfaqësues nga vende jo anëtare të Bashkimit Europian.

Anëtarët e Asamblesë së Përgjithshme të EANA-s kishin përpara për dy vendet vakante të bordit drejtues, drejtoreshën e përgjithshme të ATSH-së, Armela Krasniqi, shefin ekzekutiv të agjencisë britanike të lajmeve, Press Assotiation, Clive Marshall, si dhe Branka Gjukiç, drejtoreshë e agjencisë serbe të lajmeve TANJUG.

Asambleja zgjodhi me 20 vota pro Armela Krasniqin dhe 20 vota pro Clive Marshall si anëtarë të bordit për tre vitet në vazhdim, ndërkohë që Gjukiç mori vetëm 4 të tilla.
Së bashku me Jiri Majstr, drejtor i përgjithshëm agjencisë çeke të lajmeve CTK, Krasniqi dhe Marshall përbëjnë bordin drejtues të EANA-s, në të cilin President është Peter Kropsh i DPA-së gjermane.

Aleanca Europiane e Agjencive të Lajmeve ishte grupi që propozoi dhe shtroi të drejtën e autorësisë si një problem në Parlamentin Europian legjislaturën e kaluar. Këmbëngulja dhe argumentet e Aleancës bënë që ligji për të Drejtën e Autorit përballë Facebook apo Google të miratohej me shumicë votash. Bordi i Aleancës kryesoi dhe mbështeti këtë proces.Implementimi i ligjit ka nisur tashmë në vendet e BE-së.

EANA, e themeluar më 21 gusht të vitit 1956, është platformë profesionale që shërben për të rritur bashkëpunimin dhe shkëmbimin e informacioneve midis agjencive europiane të lajmeve duke organizuar çdo vit konferenca për të diskutuar problemet dhe perspektivat e ardhshme. /atsh

Anija shqiptare “Oriku” ka shpëtuar mbrëmjen e djeshme 111 emigrantë në detin “Egje”.

Ministrja e Mbrojtjes, Olta Xhaçka mëngjesin e të shtunës, bëri të ditur se mbrëmje e djeshme ka qenë tejet intensive për ekuipazhin e anijes shqiptare “Oriku”.

“Natë intensive për anijen shqiptare “Oriku” dhe ekuipazhin e saj me mision në detin Egje.
111 emigrantë sirianë, irakenë e palestinezë u shpëtuan në 3 operacione të ndryshme brenda pak orësh, gjatë mbrëmjes së djeshme në ujërat mes Turqisë dhe Greqisë.
Emigrantët të cilët lundronin në 2 gomone dhe 1 skaf, iu dorëzuan Rojës Bregdetare turke”, thekson Ministrja e Mbrojtjes Olta Xhaçka. /atsh

“Edhe pse gjetëm një skemë pensionesh tërësisht të falimentuar kjo qeveri arriti ta ndryshojë tërësisht situatën”, deklaroi sot kryetari i grupit parlamentar të Partisë Socialiste, Taulant Balla.

Balla zhvilloi sot një takim me banorët në Rrajcë, ku premtoi më tepër mbështetje për ta.

“Në Rrajcë, një kafe me banorët. Ka ende shumë për të bërë për të moshuarit, por mos harroni se gjashtë vite më parë e gjetëm Skemën e Pensioneve tërësisht të falimentuar”, tha Balla.

Ai theksoi se “qeveria arriti ta ndryshojë tërësisht situatën, duke garantuar mbështetje për kategori të veçanta”. /atsh

Agjencia Kombëtare e Burimeve Natyrore mori pjesë në punimet e Kongresit të Kërkimit dhe Prodhimit të naftës në det (EPOCH 2019), që u mbajt në Selanik të Greqisë.

Në kongres merrnin pjesë rreth 80 kompani, kryesisht nga rajoni i Mesdheut si dhe i Afrikës Perëndimore, të cilat shpalosën arritjet e tyre në fusha të ndryshme të kërkimit në det, si në gjeologji, gjeofizikë, mjedis, etj.

Përfaqësuesit e AKBN-së, informuan lidhur me gjendjen aktuale të aktivitetit të kërkimit dhe nxjerrjes së naftës në Shqipëri dhe mundësitë që ofron për kërkimin dhe nxjerrjen e naftës dhe gazit.

Po kështu, pjesëmarrësit e AKBN-së në këtë Kongres patën takime të ndryshme me përfaqësues të shumë kompanive pjesëmarrëse. Gjithashtu, ata zhvilluan takim me Shefin Ekzekutiv të kompanisë kombëtare greke, Helenic Petroleum, Yannis Grigoriou dhe Presidentin dhe Shefin Ekzekutiv të Agjensisë së Burimeve Hidrokarbure të Greqisë, Yannis Bassias.

Ky aktivitet është një oportunitet mjaft i mirë për AKBN për të kontaktuar me përfaqësues të kompanive të ndryshme që operojnë në rajonin tonë për të promovuar mundësitë që ofron Shqipëria për tërheqjen e investitorëve si dhe për t’u informuar me zhvillimet më të fundit në rajonin e Mesdheut.​atsh

Gjykata e Krimeve të Rënda ka rrëzuar mbrëmjen e së enjtes akuzat e prokurorisë ndaj ish-ministrit të Brendshëm Saimir Tahiri për tre vepra penale: “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.

Trupa gjykuese e përbërë nga Ardit Mustafa, Irena Gjoka dhe Flora Hajredinaj vendosi sot që Tahiri të dënohet me 5 vite heqje lirie për akuzën e “shpërdorimit të detyrës”. Gjykata vendosi ta konvertojë këtë dënim në 3 vite shërbim prove, periudhë në të cilën nuk duhet të kryejë asnjë vepër penale. Po ashtu, për 5 vite, ish-ministri nuk duhet të kryejë funksione publike.

Prokuroria e Krimeve të Rënda kërkoi 12 vite burg për Tahirin, por me gjykim të shkurtuar kërkesa përfundimtare shkoi në 8 vite.

Pas shpalljes së vendimit nga trupi gjykues, Tahiri tha për mediet se “më lanë edhe mua pa fjalë. Si gjykata më quajti përgjegjës për shpërdorim detyre se disa kushërinj të mi përdorën emrin. Të presim edhe unë jam kureshtar ta rilexoj atë që dëgjova. Gjykata tha se nuk je trafikant, kriminale apo pjesë e një grupi kriminal, por meqë disa kushërinj përdoren emrin tënd shpërdorove detyrën”.

Ai deklaroi se do ta apelojë vendimin e Gjykatës së Krimeve të Rënda./atsh

Gjykata për Krime të Rënda shpallë fajtor ish-ministrin e Brendshëm Saimir Tahiri të vënë në hetim nga prokuroria në nëntor të vitit 2017 dhe vendos ta dënojë me 5 vite burg vetëm për shpërdorim detyre.

Me gjykrim të shkurtuar 3.4, dhe do kthehet në shërbim 3 vite dhe 5 vite të mos kryejë funksione publike. Për të organi i akuzës kërkoi 12 vite burg,që duke marrë parasysh faktin që procesi u zhvillua me gjykim të shkurtuar, ulet me 1/3 në 8 vite burg.

Tahiri akuzohet për tre vepra të rënda penale ndërkohë që prej momentit të parë ka kërkuar pafajësi duke hedhur akuza për një proces gjyqësor të montuar dhe pa prova kundër tij. /shqiptarja