Lajmi i fundit

Ambasada italiane në Shqipëri njofton se kanë mbërritur ndihmat e Italisë për të dëmtuarit e tërmetit që ra në Shqipëri në 21 shtator.

“Sapo mbërritën në Durrës edhe ndihmat italiane në kuadër të mekanizmit evropian të ngritur si pasojë e tërmetit në Shqipëri”, – tha ambasada italiane.

Tërmeti me magnitudë 5.8 ballë i rënë në Shqipëri la pasoja të mëdha në shumë familje të cilëve ju dëmtuan banesat. Italia i është bashkuar vendeve të Bashkimit Evropian që i kanë ofruar ndihma Shqipërisë, si pjesë e mekanizmit të Mbrojtjes Civile të Bashkimit Europian. /atsh

Blendi Klosi, ministër i Turizmit dhe Mjedisit u shpreh në një emision televiziv për turizmin në vend ku nënvizoi se Lungomarja ka rritur shifrat e turistëve në Vlorë.

“Lungomare e ka rritur turizmin në Vlorë dhe e ka shndërruar atë në një perlë të turizmit mesdhetar dhe realizimi i plotë i Lungomares do e shndërrojë Vlorën në një pol shumë të fortë të turizmit shqiptar”, – tha ai.

Duke folur për zonën e jugut, Klosi tha se ajo zonë është projektuar si zonë elitare ku do ndërtohen hotele me 4 dhe 5 yje.

“Zona e jugut edhe në strategjinë tonë të zhvillimit të turizmit është projektuar e gjitha si zonë elitare ku edhe lejet për të ndërtuar hotele dhe strukturat akomoduese do të jenë të gjitha të standardeve 4 dhe 5 yje, sidomos 5 yje për ta afruar zonën elitare”.

“Zona e rërës do kërkojë që të ketë masë dhe do ketë hotele masive”, – vazhdoi Klosi duke thënë se, – “Sot Golemi është destinacioni kryesore sepse ka hapësira për të pritur shumë turistë sepse ajo që do të ndodhë është kjo hotelomania që shumë biznese po kërkojnë të bëjnë vila dhe hotele dhe ky besoj është hapi i 2-të, për të shkuar te hapi i 3-të, turizmi elitar.”

Duke prekur edhe zonën e veriut, ministri tha se Lezha ka një potencial shumë të madh dhe të pashfrytëzuar zhvillimi turistik. “Në Lezhë bëmë një mbyllje të sezonit para dy ditësh dhe mendimi im, nëse ka një destination në Shqipëri që do zhvillohet HST destinacioni i Shëngjin-Velipojës që ka përmasa të mëdha të pashfrytëzuara akoma. Shëngjini dhe Velipoja janë potencialet më të pazbuluara të turizmit shqiptar që është shumë e mundur të zhvillohet shpejt. Është destinacion sepse rruga e Kombit e ka bërë shumë të afërt dhe me Kosovën”, – u shpreh ministri.

E gjithë zona e Shëngjinit dhe Velipojës do të kontribuojnë që Shqipëria më në fund të shihet si një destinacion i bukur për turizëm.

“Kam qenë në Lezhë në dy aktivitete shumë interesante. I pari ishte një organizim i një festivali për të rinj që Ministria e Turizmit bëri së bashku me një kompani të huaj për të organizuar një festival ku në zonën e Shëngjinit erdhën rreth 5000 të rinj dhe ishte një spektakël. Kam bindjen që vazhdimi i këtyre lloj aktivitetesh dhe nëse shkojnë në 10 festivale për vitin tjetër, shpresoj se do jemi tamam në startin e paraqitjes së Shqipërisë si një zonë shumë të bukur për turizmin”, – tha ministri Klosi.atsh

Hapet thirrja për aplikime në programin IPARD II mbështetje për bujqësinë, nga data 30 Tetor-16 Dhjetor 2019.

Agjencia për Zhvillim Bujqësor dhe Rural dhe Autoriteti Menaxhues në Ministrinë e Bujqësisë dhe Zhvillimit Rural njofton (30 tetor-16 dhjetor) datën për çeljen e thirrjes së dytë për dorëzimin e aplikimeve në kuadër të Programit IPARD II, nga Instrumenti i Ndihmës së Para-Anëtarësimit (IPA) për Zhvillimin Rural (IPARD) me qëllim zhvillimin e Sektorit Agro-Ushqimor.

Thirrja është e hapur për të gjithë personat (persona fizikë dhe juridikë), puna dhe veprimtaria e të cilëve zhvillohet brenda territorit të Republikës së Shqipërisë, në fushat e prodhimit bujqësor, ose të agro-përpunimit dhe rural me fokus në masat e mbështetjes : : “Investimet në asetet fizike të fermave bujqësore” me fokus të veçantë në sektorët: Qumësht, mish, fruta, perime, vresht.

Masa 3: “Investimet në përpunimin dhe tregtimin e produkteve bujqësore” me fokus të veçantë në sektorët e mëposhtëm: Qumështi dhe përpunimi i qumështit, përpunimi i mishit, përpunimi i frutave dhe perimeve, vera.

Masa 7: “Diversifikimi i fermave dhe zhvillimi i biznesit” me fokus të veçantë në sektorët e
mëposhtëm: Sigurimi dhe Prodhimi i bimëve medicinale dhe aromatike, kërpudhave, mjaltit, bimëve dekorative, kërmijve, Përpunimi dhe tregëtimi në nivel ferme i produkteve bujqësore (qumështi, mishi, frutat perimet dhe verës); Përpunimi dhe tregtimi i bimëve medicinale dhe aromatike të egra apo të kultivuara, kërpudhave, vaji i ullirit, mjalti, peshku dhe produktet e peshkut, prodhimi dhe tregtimi i vajrave esenciale; Akuakultura (në ujëra të ëmbla dhe të kripur): Turizmi rural dhe i Natyrës; Shërbime për popullsinë dhe bizneset rurale; Punimet e artizanatit dhe industria e manifaktures; Prodhimi i energjisë së rinovueshme.

Programi IPARD II bashkëfinancohet nga qeveria shqiptare dhe Bashkimi Evropian dhe mbështet me grande investimet në sektorin rural shqiptar. /atsh

Kryeministri Edi Rama ka deklaruar se masa e qeverisë për të detyruar ndërtuesit të marrin policën e sigurimit do të mirëpritet nga të gjithë pasi vetëm kështu mund të përballohen fatkeqësi që sipas tij nuk mund të përkufizohen vetëm me tërmetet, pasi edhe përmbytjet po bëhen mjaft të shpeshta dhe shteti nuk mund të marrë gjithmonë përsipër koston e dëmshpërblimeve. I pyetur gjatë konferencës për shtyp të zhvilluar ditën e mërkurë menjëherë pas mbledhjes së qeverisë, ku u morën edhe një sërë vendimesh të rëndësishme në drejtim të përballimit të fatkeqësive të tilla natyrore, lidhur me faktin se një masë e tillë mund të rrisë çmimet e apartamenteve nga ana e ndërtuesve, Kryeministri tha jeta është gjithmonë e para dhe së për të nuk ka çmim.

“Së pari, çmimi i jetës është i pakrahasueshëm me asnjë çmim tjetër. Së dyti shpresoj që ata që ndjenë dhe e panë atë që të gjithë ndjenë dhe panë të mos harrojnë, sepse dhëntë Zoti mos e kemi një të dytë në kohën që na ka mbetur në tokë, ama është shumë e rëndësishme që të garantohet plotësisht që ajo që blen është ajo që paguan dhe është ajo që të takon. Kështu që, kjo ka një efekt të dyfishtë në raport me blerësin dhe të shumëfishtë në raport me komunitetin, shoqërinë dhe patjetër me pronën, sepse një ndërtues që shkel lejen, thashë, të paktën me këtë test, që nuk ishte një test i lehtë, edhe godinat me shkelje nuk kanë shfaqur shenja pasojash, sepse me sa duket janë ndërtuar me themele shumë të forta me idenë që të shtojmë ujë e të shtojmë miell gjatë kohës. Pra të fokusohemi te nevoja që kemi dhe të mos harrojmë që godinat me shkelje cenojnë edhe pronën e të tjerëve rreth e rrotull, cënojnë komunitetin, ambientin, etj.. Kështu që, nuk besoj se kjo masë nuk do përshëndetet nga kushdo që ka pasoja tërmetesh artificiale në sferën ku strehohet dhe nuk është se e shpikëm ne. Është një masë që përdoret në të gjithë botën,” u shpreh Kryeministri Rama.

Sipas tij, futja e kompanive të sigurimit besoj është e domosdoshme. “Është një marrëdhënie e mbyllur, jo e hapur që shkojnë njerëzit blejnë apartamente dhe pastaj ngelen me gisht në gojë, sepse nuk e kanë pronën e tyre, edhe pse jetojnë aty, pra kanë një strehë dhe s’kanë një pronë, as nuk e shesin dot, as nuk e vendosin dot kolateral, sepse kur shkojnë në hipotekë është diçka që nuk mund të regjistrohet. Ky është një mashtrim që duhet të marrë fund. Pastaj ankohen te shteti ndërkohë që është marrëdhënie palësh dhe ajo duhet garantuar dhe atë marrëdhënie palësh nuk mund ta garantojë dot askush por e garanton vetëm ligji dhe sistemi i mbrojtjes që krijohet me ligj. Kështu që, futja e kompanive të sigurimit besoj është e domosdoshme, aq më tepër që është dhënë edhe informacioni mbi dëmshpërblimin e menjëhershëm nga kompani sigurimi të një numri jo të vogël familjesh. Këto familje, që nuk më rezulton se ishin familje të pasurish, kanë pasur urtësinë që të sigurojnë banesat, apo apartamentet e tyre dhe sot që flasim nuk janë në pritje të planeve tona por kanë marrë menjëherë ndihmë nga kompani sigurimi. Për më tepër, s’është çështje thjesht tërmeti, por kemi përmbytjet që janë për 1001 arsye të shpeshtuara së fundmi. E patë dhe e shikoni vazhdimisht çfarë ndodhi vetëm para pak ditësh jo shumë larg Shqipërisë. Këto duhet të përfshihen të gjitha në një sistem sigurimesh sic e ka e gjithë bota normale. Kush dëmtohet, së paku është i siguruar që do marrë mbrapsht atë që ka humbur,” deklaroi kreu i qeverisë. /atsh

Këshilli i Ministrave miratoi sot vendimin organizmin dhe funksionimin e policimit vullnetar.

Sipas vendimit të publikuar nga Këshilli i Ministrave, Shërbimi i policimit vullnetar funksionon në mbështetje të strukturave vendore të Policisë së Shtetit dhe bashkëpunon me këto të fundit për sigurimin dhe garantimin e rendit publik në aktivitetet me karakter masiv, si tubime, koncerte, festivale, aktivitete sportive dhe organizime fetare. Për dhënien e ndihmës për menaxhimin e trafikut rrugor në qendrat urbane dhe rurale.

Po ashtu për dhënien e ndihmës për rritjen e sigurisë publike pranë institucioneve arsimore. Për kontrollin e territorit, mbështetjen e patrullimit policor për parandalimin e krimit dhe ndërhyrjen ndaj shkeljeve të ligjit, si edhe për përballimin dhe menaxhimin e situatave të emergjencave civile, fatkeqësive natyrore, si dhe operacioneve të kërkim-shpëtimit me karakter masiv.

Polici vullnetar e kryen veprimtarinë e tij nën mbikëqyrjen e punonjësit të Policisë së Shtetit, i cili caktohet nga drejtuesi i strukturës vendore. Kryerja e shërbimit të policimit vullnetar është i papajtueshëm me funksionet e gjyqtarit, prokurorit, përmbaruesit gjyqësor, drejtuesit në strukturat politike, punonjësit në institucionet e sigurisë kombëtare apo publike, të shërbimit të provës, të policisë së burgjeve dhe të Gardës së Republikës.

Sipas vendimit të qeverisë, kriteret e përgjithshme të pranimit të shtetasit në shërbimin e policimit vullnetar janë 6. Të jetë shtetas shqiptar;Të ketë zotësi të plotë juridike për të vepruar; Të mos jetë i përjashtuar nga Policia e Shtetit apo i larguar nga administrata publike; Të ketë përfunduar arsimin e mesëm; Të mos jetë i dënuar me vendim gjykate të formës së prerë për kryerjen e një krimi apo kryerjen e një kundërvajtjeje penale me dashje; Të jetë i moshës nga 18 deri në 65 vjeç, në gjendje të mirë shëndetësore dhe i aftë fizikisht për të kryer detyrën.

Po ashtu janë dhe tre kriteret e veçanta të pranimit të shtetasit në shërbimin e policimit vullnetar janë. Kështu shtetasit vullnetar duhet të ketë përfunduar trajnimin e detyrueshëm me vlerësim pozitiv, si dhe të jetë i certifikuar nga Akademia e Sigurisë dhe të jetë i pajisur me vërtetimin e besueshmërisë.

Polici vullnetar sipas vendimit të marrë sot na Këshilli i Ministrave, ka të drejtë: Të njihet paraprakisht me të drejtat, detyrimet, përgjegjësitë e shërbimit të policimit vullnetar, si dhe me sanksionet në rast të mospërmbushjes së detyrimeve që rrjedhin nga ky vendim dhe nga kontrata individuale e vullnetarizmit. Të rimbursohet për shpenzimet e kryera gjatë orarit të shërbimit apo jashtë qendrës së banimit, në ndihmë të strukturave policore;
Të pajiset me veshje, shenja dalluese dhe pajisje të tjera ndihmëse, të përcaktuara me urdhër të Drejtorit të Përgjithshëm të Policisë së Shtetit, në përputhje me natyrën e aktiviteteve të vullnetarizmit dhe shërbimeve që do të kryejë; Të kërkojë në mënyrë individuale vlerësim ose vërtetim pjesëmarrjeje për kontributin e punës vullnetare të dhënë prej tij nga struktura vendore e policisë; Të kryejë trajnime falas në Akademinë e Sigurisë, sipas programeve të miratuara nga Drejtori i Përgjithshëm i Policisë së Shtetit.

Polici vullnetar gjatë shërbimit dheose jashtë tij ka përgjegjësi: Të ndjekë programin e trajnimit të detyrueshëm; Të marrë pjesë në trajnime që organizon Policia e Shtetit, për të përmirësuar cilësinë e punës e të shërbimit; Të kryejë aktivitetin e vullnetarizmit i paarmatosur, në përputhje me rregullat, udhëzimet dhe kërkesat e etikës së punonjësve të Policisë së Shtetit; Të ruajë sekretin profesional, si dhe konfidencialitetin e të dhënave personale, me të cilat njihet gjatë angazhimit, si polic vullnetar; Të zbatojë detyrat dhe udhëzimet e dhëna nga mbikëqyrësi në nivel vendor i Policisë së Shtetit. Gjatë shërbimit, polici vullnetar mban përgjegjësi për dëmin e shkaktuar nga veprimet e tij të kryera në kundërshtim me ligjin.

Drejtoria e Përgjithshme e Policisë së Shtetit është përgjegjëse për përzgjedhjen, trajnimin, organizimin, drejtimin dhe trajtimin e policit vullnetar. Kontrata e vullnetarizmit lidhet në formë të shkruar ndërmjet policit vullnetar dhe drejtorit të Drejtorisë Vendore të Policisë. Kontrata e vullnetarizmit përcakton të drejtat, detyrat, kushtet dhe kriteret e nevojshme për kryerjen e shërbimit të policimit vullnetar.

Forma dhe përmbajtja e kontratës tip, efektet, kohëzgjatja, përfundimi apo zgjidhja e saj, si dhe procedurat e ankimit, të pranimit dhe të ushtrimit të së drejtës së ankimit përcaktohen me urdhër të Drejtorit të Përgjithshëm të Policisë së Shtetit, në përputhje me përcaktimet e këtij vendimi. Drejtori i Përgjithshëm i Policisë së Shtetit, brenda 6 (gjashtë) muajve nga hyrja në fuqi e këtij vendimi, nxjerr aktet nënligjore në zbatim të tij. Ngarkohet Ministria e Brendshme për zbatimin e këtij vendimi./atsh

57.68 milionë euro është buxheti i përgjithshëm i Programit IPARD II, në dispozicion të thirrjes së dytë që hapet nga data 30 tetor deri më 16 dhjetor 2019, për mbështetjen e investimeve në sektorin e bujqësisë dhe agrobiznesit.

Agjencia e Zhvillimit Bujqësor dhe Rural, e akreditur nga Bashkimi Europian për zbatimin e këtij programi, bën të ditur se nga buxheti total për për thirrjen e dytë të IPARD II, 75% ose 43.26 milionë euro janë kontribut i BE dhe 25% ose 14.42 milionë euro kontribut i buxhetit qeverisë shqiptare.

Programi mbështet me grante që prekin shifrat nga 10 mijë euro në 2 milionë euro për investimet në tre masa kryesore.

Konkretisht për “Investimet në asetet fizike të fermave bujqësore” Masa 1: me buxhet total 24.05 milionë euro, me një minimum prej 10,000 euro dhe maksimum 500,000 euro. Përqindja e mbështetjes është 60% të totalit të shpenzimeve të pranueshme të investimit, 65% nëse investimi bëhet nga një fermer i ri (nën 40 vjeç), 70% për investimet në zonat malore.

“Investimet në përpunimin dhe tregtimin e produkteve bujqësore” Masa 3: me buxhet total 22.75 milion euro, me një minimum 25,000 euro dhe maksimum 2,000,000 euro. Përqindja e mbështetjes me fonde publike është 50% e totalit të shpenzimeve të pranueshme të investimit.

“Diversifikimi i fermave dhe zhvillimi i biznesit” Masa 7: me buxhet total 10.87 milionë euro me një minimum 10,000 euro, maksimumi 400,000 euro. Përqindja e mbështetjes me fonde publike është 65% e totalit të shpenzimeve të pranueshme të investimit. atsh

Njësia e Trafikut Rajonal të Policisë në Mitrovicë, në vazhdën e angazhimeve dhe qasjen aktive në ofrimin e sigurisë në shkolla, ashtu edhe në fushën e vetëdijesimit dhe parandalimit, që nga fillimi i vitit të ri shkollor 2019-2020, ka vazhduar me implementimin e planit të veprimit ‘siguria në shkolla’.

Sipas Policisë, gjatë muajit shtator zyrtarët policorë kanë mbajtur ligjërata me nxënës të shkollave me temën ‘Njohuri elementare për sigurinë në trafikun rrugor’, ku kryesisht janë përfshirë nxënës të ciklit të ulët.

“Gjatë kësaj kohe ligjëratat i kanë dëgjuar rreth 600 nxënës të 13 shkollave të ndryshme në rajonin e Mitrovicës. Këto ligjërata janë mbajtur nëpër hapësirat shkollore, ku në këtë fazë janë përfshirë shkollat fillore të cilat kanë qasje në rrugë rajonale dhe magjistrale në komunat Mitrovicë, Skenderaj e Vushtrri. Ligjëratat kanë për synim të plotësojnë nxënësit me njohuri shtesë dhe të domosdoshme në fushën e rregullave primare të sigurisë në trafik. Përveç ligjëratave teorike në fushën e sigurisë në trafik, nxënësve u janë ofruar edhe fletëpalosje me ilustrime të rregullave primare e elementare për sigurinë në trafik. Angazhimet policore për ofrimin e sigurisë, si dhe lëmin e këshillimit, edukimit dhe aktiviteteve tjera parandaluese do të jenë të vazhdueshme përgjatë gjith vitit shkollor”, thuhet në njoftimin e Policisë./KosovaPress/

Komandanti i Forcës së Sigurisë të Kosovës, gjenerallejtnant Rrahman Rama, me ftesë të Departamentit të Mbrojtjes të Shteteve të Bashkuara të Amerikës, për herë të parë mori pjesë në ceremoninë e ndërrimit të komandës së shefit të Shtabit të Forcave të Përbashkëta, që është mbajtur në bazën e përbashkët të ushtrisë amerikane “Myer-Henderson Hall” në Uashington.

Gjatë kësaj ceremonie gjeneral Rama e uroi personalisht gjeneralin Milley, të cilit i dëshiroi suksese në mandatin e tij 4-vjeçar dhe i shprehu mirënjohje të thellë për mbështetjen e vazhdueshme të SHBA-ve në zhvillimin dhe profesionalizimin e FSK-së.

Pozita e shefit të Shtabit të Forcave të Përbashkëta konsiderohet pozita me e lartë në strukturën e ushtrisë amerikane, ku gjeneral Mark Milley do të jetë këshilltari më i lartë i Presidentit të SHBA-ve, Sekretarit të Mbrojtjes dhe i Këshillit të Sigurisë Kombëtare, për çështje që ndërlidhen me sigurinë kombëtare të SHBA-ve. Gjenerali Mark A. Milley është emëruar shefi i 20-të i Shtabit të Forcave të Përbashkëta, duke e zëvendësuar gjeneralin Joseph Dunford, i cili për 4 vjet ka qëndruar në këtë pozicion mjaft të rëndësishëm. /KosovaPress/