Lajmi i fundit

“20 ekspertë nga Policia e Shtetit përfunduan një Trajnim Kombëtar të përqendruar njëjavor mbi Sigurinë Fizike dhe Menaxhimin e Stokut të Armëve të Vogla, Armëve të Lehta dhe municioneve të tyre”, shprehet Ambasada e SHBA-së në Tiranë.

Ambasada SHBA-së, thekson se “Trajnimi u financua nga qeveria e Shteteve të Bashkuara dhe u organizua nga SEESAC e UNDP dhe është pjesë e aktiviteteve për forcimin e masave të sigurisë së kontrollit për armët e vogla dhe armët e lehta në Shqipëri, të financuara nga Shtetet e Bashkuara”.

“Qëllimi kryesor i trajnimit ishte forcimi i kapaciteteve të personelit të ngarkuar me planifikimin, menaxhimin dhe ruajtjen e rezervave të armëve të vogla, armëve të lehta, dhe municioneve të tyre”, shprehet Ambasada./atsh

Të tjera god itje tërmeti në vend. Instituti i Gjeoshkencave, Energjisë, Ujit dhe Mjedisit ka regjistruar tre tërmete gjatë natës në vendin tonë.

Sipas të dhënave epiqendra vazhdon të jetë në Korçë, fillimisht në Arrëz dhe më pas në Sheqeras.

Lëkundja e fundit e regjistruar në orën 02:35 ka pasur një magnitudë 2.2 në thellësi 30 kilometra dhe me epiqendër 12 kilometra në Veri të Korçës.

Para saj një lëkundje më e fortë me magnitudë 2.9 është regjistruar me epiqendër në Sheqeras. Për fat nuk ka raportime për dëme.

Ministri i Punëve të Brendshme Sandër Lleshaj ndodhet në Bejrut ku mori pjesë në operacionin e shpëtimit të Alvinit nga kamp i Al Hol.

Ministri foli nga Bejruti nga ku u shpreh se, “Alvini është në një mjedis të sigurt në Bejrut për t’u nisur pak më vonë drejt Italisë tek babai i tij”.

I pyetur për takimin që pati me Alvinin, Lleshaj tha se, “pata një kënaqësi dhe emocion të veçantë ta pres Alvinin bashkë me ekipin special të policisë shqiptare dhe me forca të tjera të inteligjencës dhe të agjencive të sigurisë së Libanit në zonën e ndërmjetme midis kufirit të Libanit dhe Sirisë, ku pata mundësi ta takoj bashkë me këta djem të shkëlqyer që na kanë mbështetur. Sigurisht është një fëmijë që vjen nga ferri dhe në një gjendje mjaft të rënduar fizike dhe psikologjike, por gjithsesi është mirë. Arrita të komunikoj me të, flet shqip dhe një lajm i bukur është që flet shqip, ndonëse ka shumë vite që është luhatur mes arabishtes dhe gjuhëve të tjera, por thotë jam shqiptar, është një rast shumë fatlum dhe jemi të lumtur të gjithë që më në fund arritëm të mundësojmë këtë kthim të tij në siguri”.

Ministri i Brendshëm nënvizoi se operacioni për shpëtim e tij ishte mjaft i ndërlikuar dhe u kërkua ndërhyrja e shumë agjencive dhe autoriteteve të huaja.

“Ka qenë fillimisht iniciativa dhe dakordësia e Kryeministrit Conte dhe Kryeministrit Rama të cilët ranë dakord për një përpjekje të përbashkët. Pas kësaj, një ekip i posaçëm i policisë së shtetit është nisur drejt Bejrutit ku në bashkëpunim dhe me forcat e sigurisë libaneze, në bashkëpunim me policinë italiane, me Kryqin e Kuq ndërkombëtar, me Gjysmëhënën e Kuqe, pra ka qenë një kompleks aktorësh të përfshirë në këtë ndërmarrje të vështirë. Duhet të mos bëhej asnjë gabim dhe falë një koordinimi perfekt të gjithë këtyre aktorëve që përmenda, u bë e mundur që sot rreth orës 10 me të Shqipërisë, Alvini të kalonte në zonën e ndërmjetme midis Sirisë dhe Libanit ku u prit nga forcat tona dhe ato libaneze”, – tha ministri Lleshaj.

Ministri tha se ndodhet në Bejrut për të parë edhe mundësinë e realizimit të një operacioni tjetër të gjerë që do mundësojë rikthimin e fëmijëve të tjerë. “Kemi patur një bashkëpunim shumë të mirë këtu edhe falë mbështetjes së jashtëzakonshme të konsullit tonë të nderit, i cili ka luajtur një rol shumë të madh në këtë operacion. Kemi patur kontakte me autoritetet më të larta, me ministrin e Brendshëm të Libanit, me autoritete të tjera të sigurisë e po shohim mundësinë e ndërtimit të një korridori që të na hapë dritën jeshile edhe për evakuimin e fëmijëve të tjerë. Duhet të kuptohet nga të gjithë që bëhet fjalë për diçka jashtëzakonisht të vështirë. Fëmijët dhe gjithë shqiptarët që ndodhen sot në kamp nuk janë në një kamp pune, por janë në një kamp-burg, pra ka statusin e një burgu dhe ne do përpiqemi të bëjmë çmos për të lehtësuar kalimin, sidomos të fëmijëve që ndodhen në kamp”, – shtoi Lleshaj.

Ai vijon duke thënë se “ne kemi shpresë të gjithë që do të bëjmë më të mirën tonë. Këtu jemi një numër i madh aktorësh që bashkëpunojmë, por kemi një numër akoma më të madh aktorësh që janë përballë të cilët jo detyrimisht bashkëpunojnë, kanë interesa të kundërta nga ato të cilët kemi ne. Na mbetet të vazhdojmë punën për të bashkuar të gjithë elementët e këtij operacioni”. /atsh

Kryeprokurorja Arta Marku ka filluar verifikimin e fakteve të bëra publike në rastin e prokurorit Arjan Ndoja.

Ky i fundit u përfshi në një atentat të premten e kaluar në Shkozet, kur makina me të cilën udhëtonte prokurori i Durrësit, Arjan Ndoja dhe Landi Muharremi, i njohur si i forti “i forti i Sukthit” u qëlluan me armë.

Pas kërkesës së Këshillit të Lartë të Prokurorisë për hetimin e prokurorit Ndoja, Marku ka publikuar urdhrin.

“Prokurori i Përgjithshëm znj. Arta Marku prej ditës së djeshme dt 05.11.2019 ka filluar verifikimin e fakteve të bëra publike në rastin e prokurorit Arjan Ndoja. Verifikimet konsistojnë në mbledhjen e të dhënave për shkeljen e rregullave të papajtueshmërisë me funksionin e magjistratit, parashikuar në nenin 103 shkronja“a” të ligjit 96/2016 “Për statusin e gjyqtarëve dhe prokurorëve në Republikën e Shqipërisë””, thuhet në urdhrin e kryeprokurores Arta Marku. /atsh

Bashkia Vlorës, falë programit Infrastruktura Bashkiake V (MIPV) do të përfitojë mbështetje financiare, jo vetëm për furnizimin 24 orë me ujë të pijshëm për 142.453 qytetarë të Vlorës e të vijës bregdetare të saj.

Agjencia Kombëtare e Ujësjellës Kanalizime dhe Infrastrukturës së Mbetjeve ka bërë të ditur se investimi ka në fokus modernizimin e infrastrukturës së ujësjellës kanalizimeve, përmirësimin e cilësisë së shërbimit ndaj konsumatorit dhe rritja e performancës së UK Vlorë.

Investimi mbështetet me financimet e Qeverisë gjermane përmes KfW, Qeverisë zvicerane përmes SECO dhe EU.

Objektivi strategjik i qeverisë shqiptare është transformimi rrënjësor i sektorit të ujit për të përmirësuar cilësinë e jetës së qytetarëve, zhvillimin e qëndrueshëm të turizmit dhe nxitur rritjen e ekonomisë lokale. /atsh

Komisioni për Integrimin Europian miratoi projektligjin “Për prodhimin, transportimin dhe tregtimin e biokarburanteve dhe të lëndëve të tjera djegëse, të rinovueshme, për transport”.

Në drejtimin e kryetares Rudina Hajdari komisioni për Integrimin Europian mori në shqyrtim projektligjin “Për prodhimin, transportimin dhe tregtimin e biokarburanteve dhe të lëndëve të tjera djegëse, të rinovueshme, për transport”.

Të ftuar për të folur rreth projektligjit ishin Ilir Bejtja, zv.ministër i Infrastrukturës dhe Energjisë si dhe specialistë të kësaj ministrie.

Nga ana e tij, Bejtja referoi përpara komisionit se ligji në fjalë ka një histori prej 4 vitesh dhe tashmë është rënë dakord me të gjitha institucionet e përfshira në dhënien e mendimit.

Më tej në lidhje me faktin sesa i afrohet ky projektligj legjislacionit të BE, Dedë Kasneci drejtor i Shërbimit të përafrimit të Legjislacionit tha se është analizuar përputhshmëria e tij dhe ky projektligj është përafruar me legjislacionin përkatës të BE.

Pas pyetjeve dhe diskutimeve të ndryshme nga anëtarët, komisioni miratoi në parim nen për nen dhe në tërësi projektligjin në fjalë. /atsh