Lajmi i fundit

Kryeministri Edi Rama deklaroi sot në mbledhjen e dytë të Komitetit Kombëtar të Rindërtimit se, është momenti që mund të fillohet me riparime, me banesa individuale, ndërkohë që po bëjmë plane për rindërtimet e mëdha.

“Për banesat individuale kam folur dhe me Elvisin, dhe me Arbrin. Kemi bërë një diskutim në Turqi dje. Ata kanë një superindustri të banesave individuale, antisizmike, ekologjike, që janë super të sigurta, superstabël. Nuk kanë asnjë lloj rreziku dhe mbi të gjitha janë shumë komode, me materiale të qëndrueshme që përdoren masivisht sot, jo thjesht në rastet ku ka pastërmet, por masivisht sot në zonat rurale apo periferi të qyteteve për banesat individuale”, – theksoi Rama.

“Kemi kontaktuar me kompanitë, do të garantojmë deri pasnesër një sërë takimesh aty ku do të mund të kontaktojmë vetë, dhe të shohim të negociojmë për të marrë çmimet më të mira dhe për të marrë një masë kritike banesash, sa i përket kërkesës së banesave individuale në zonën e fshatit”, – u shpreh Kryeministri.

“Janë superbanesa që bëjnë ndryshim të madh cilësor të jetës së qytetarëve. Plus na bëjnë racionalizim forcash. Se qindra e mijëra banesa individuale me grupe, me llaç e mistri e historira është shumë më e komplikuar, shumë më pak e besueshme si praktikë dhe shumë më e avashtë faktikisht. Se duhen forca pune pafund, kompani pafund, inxhinierë pafund. Kështu që besoj se do ta zgjidhim shumë mirë këtë gjë”, – tha Rama./atsh

Qyteti i Durrësit ka ndezur dritat e festave dhe në mbrëmje ky qytet duket magjik.

Në qytetin bregdetar zymtësia e pak ditëve më parë duket se i ka lënë vendin festës dhe magjisë që kjo periudhë e vitit ofron.

Fëmijë të lumtur dhe prindërit e tyre që i shoqërojnë në sheshet e zbukuruara, foto pranë pemës së Krishtlindjeve dhe Vitit të Ri, janë tabloja që ofron mbrëmjen e këtij dhjetori qyteti bregdetar.

Nga bulevardi i qytetit, deri tek Veliera, janë vendosur zbukurime të shumta që nga pema, deri tek dritat shumëngjyrëshe që tashmë i kanë rikthyer Durrësit shkëlqimin që iu zbeh pak ditë më parë. /atsh

Presidenti i Turqisë, Recep Tayyip Erdoğan premtoi sot se, brenda harkut kohor të një viti 500 banesat e premtuara për familjet e prekura nga tërmeti i 26 nëntorit do të jenë gati.

Në një prononcim për mediet, nga Turqia, ku u mbajt konferenca ndërkombëtare e nivelit të lartë për investimet publike e private, presidenti turk siguroi për vijimin e mbështetjes për Shqipërinë.

“Për sa i përket ndërtimeve, ka filluar puna. Të gjitha ekipet janë andej dhe në kontakt me ministren e Kulturës në Shqipëri. Po presim që të vendoset për vendin ku do të ndërtohet, në mënyrë që të nisë sa më shpejt procesi”, – deklaroi Erdogan.

Erdogan theksoi po ashtu se po diskutohet që një pjesë të ndërtimeve t’i bëjmë çelik dhe një pjesë ndërtim normal.

“Diskutuam me Kryeministrin dhe ai tha se banesat mund të jenë gati brenda 6 muajsh, deri në një vit”, – tha Erdogan.

Po ashtu, presidenti turk bëri të ditur se janë dërguar drejt Shqipërisë edhe një numër i madh çadrash speciale dimërore, pasi koha është e ftohtë.

I pyetur nëse kishte besim se vendet e tjera do t’i përgjigjeshin kërkesës së kryeministrit Rama për ndihmë, presidenti turk theksoi se “edhe Kryeministri bëri thirrje, edhe unë e përsërita thirrjen për ndihmë edhe një herë pas kryeministrit Rama dhe shpresoj të marrim përgjigje pozitive”./atsh

Brandi është heroi me 4 putra i Policisë së Shtetit, dhe efikasiteti që ai tregoi në kërkimin e banorëve nën rrënojat që la pas tërmeti i 26 nëntorit, vjen nga një stërvitje e përditshme e mirorganizuar nga ana e trajnerëve të tij.

Policia e Shtetit publikoi sot pamje të stërvitjes së përditshme të Brandit, qenit që tashmë e njohin të gjithë nga transmetimet televizive të kërkimeve nën rrënojat e pallatit 6-katësh në Durrës, të rrëzuar nga tërmeti.

Ky nuk ishte misioni i parë i Brandit, pasi ai është përdorur për kërkimin e njerëzve të gjallë nën rrënoja edhe në shërbime të tjera më herët në Shkodër e Tiranë. /atsh

Forcat e Armatosura të Shqipërisë vijojnë punën për të lehtësuar sado pak vështirësitë e familjeve të prekura nga tërmeti, të cilat e kanë të pamundur të strehohen nëpër hotele.

Pas angazhimit të menjëhershëm të operacioneve të kërkim – shpëtimit, eliminimit të rrezikut nga objektet e klasifikuara si të pabanueshme nga ekspertët, Forcat e Armatosura janë angazhuar edhe në ngritjen e çadrave dhe transportin e ndihmave.

Ministrja e Mbrojtjes, Olta Xhaçka duke shprehur mirënjohjen për punën e tyre publikoi disa foto të “heronjve të heshtur”, në ndihmë të të prekurve nga tërmeti./atsh

Prokurori i Përgjithshëm, Olsian Çela, ishte sot në Durrës ku ka kërkuar rezultate pas hetimeve për tërmetin e 26 nëntorit.

Një ditë pas marrjes së detyrës, Çela e ka nisur nga Prokuroria e Durrësit, qytet që është dëmtuar më shumë nga tërmeti i 26 nëntorit.

Kryeprokurori Çela ka folur jashtë ambienteve të Prokurorisë së Durrësit për hetimet mbi ndërtesat e shembura në Durrës pas tërmetit të 26 Nëntorit.

Çela tha se përgjegjësia për këtë duhet të shkojë atje ku është, qofshin zyrtarë apo ndërtues, ndërsa shtoi se nga hetimi do të dalin edhe probleme me legjislacionin.

“Qëllimi i vizitës lidhet me situatën e krijuar pas tërmeteve. Prokuroria është duke kryer hetime në bazë të ngjarjeve të ndodhura. Është krijuar një grup hetimor për çështjen në fjalë. Ideja ishte ofrimi i mbështetjes maksimale që ne si Prokuroria e Përgjithshme mund t’i ofrojmë Prokurorisë së Durrësit për rastin në fjalë me qëllim rritjen e koordinimit për të siguruar një hetim të shpejt, efiçent dhe për t’i dhënë një përgjigje sa më të shpejtë rasteve për të cilat të gjithë jemi të njohur. Mendoj se situate është pak a shumë e qartë. Puna që është bërë ka qenë mjaft e mirë. jam shumë i kënaqur me atë që dëgjova. Prokurorët janë të motivuar dhe mendoj se shumë shpejt rezultatet do të jenë të prekshme”.

“Ajo që vlerësoj dhe besoj se është e rëndësishme, për të cilën të gjithë jemi koshientë se çfarë ka ndodhur është se individë të papërgjegjshme kanë kryer veprime të caktuara me koshiencë të plotë. Kanë shkelur ligjin dhe pasoja është vdekja e shumë personave. Në këtë kuadër besoj se dhe reagimi i Prokurorisë, zbatimi i ligjit do të jetë korrekt, do të jetë I prerë dhe në fund do të kemi rezultate të qarta për hetimin”, theksoi ai.

I pyetur për akuzat që po manipulohen vendet e hetimit, Çela tha se “Hetimi është përqendruar në objektin e hetimit. Ne nuk kemi të dhëna të tilla. Të paktën dhe nga drejtuesja e prokurorisë dhe nga prokurorët nuk kemi pasur shqetësime të tilla. Duhet të jemi të qetë dhe të besojmë të heqim dorë nga lajmet e pavërteta”.

Çela evidentoi se “nga hetimi po dalin probleme edhe me legjislacionin në fuqi. Hetimi do shërbejë edhe për të propozuar ndryshime të rëndësishme në ligj në mënyrë që ngjarje të tilla të mos përsëriten më duke rritur sigurinë e qytetarëve në mënyrë”.

I pyetur nëse do ketë arrestime, për këto ngjarje, Cela tha se, “këto janë vendime të cilat i marrin prokurorët, të cilët janë të pavarur në vendimmarrjen e tyre. Por ka njerëz të cilët kanë shkelur ligjin, ka njerëz që kanë humbur jetë, ka njerëz që janë plagosur dhe patjetër përgjegjësia që do mbahet do të jetë maksimale”.

“Përgjegjësia do shkojë atje ku është qoftë tek ndërtuesit, qoftë tek zyrtarët. Kudo ku prokurorët do verifikojnë, do mbledhin prova se ka elemente të përgjegjësisë penale nuk do të ketë hezitim për asnjë rast’, tha ai.

“Ajo që unë si prokuror i përgjithshëm mund t’ju them është se nga ana jonë i është garantuar prokurorëve, mbështetja e plotë. Ata duhet të jenë plotësisht të bindur se ata janë në harmoni me me atë që ne si Prokurori e Përgjithshme presim nga ata, pra në kuptim me zbatimin e ligjit. Ata janë të pavarur. Ne do të garantojmë pavarësinë e tyre dhe besojmë se në këtë klimë do të kemi rezultatet që të gjithë presim “, tha Çela.

Prokuroria ka nisur hetimet pas tërmetit, në Durrës, Tiranë dhe Thumanë. Sipas njoftimeve zyrtare, pjesë e hetimeve të cilat kanë nisur për veprat penale “Shpërdorim Detyre”, “Ndërtim pa leje” dhe “Dhënia e ndihmës për ndërtim pa leje”, janë lejet e ndërtimit të lëshuara nga autoritetet vendore, zbatimi i tyre nga ndërtuesit, si dhe rastet e ndërtimeve abuzive dhe mungesa e ndërhyrjes së autoriteteve përgjegjëse. /atsh