Lajmi i fundit

Ministrja e Mbrojtjes, Olta Xhaçka bën të ditur se një togë e Policisë Ushtarake është nisur në misionin Resolute Support në Heart.

Xhaxka thekson se ku do të shërbejnë nën komandën e Forca të Armatosura italiane.

“Fundi i vitit është periudhë ndërrimi kontingjentesh në Forcat e Armatosura. Pas nisjes së trupave në Kabul dhe Letoni, përcollëm edhe togën e Policisë Ushtarake në misionin Resolute Support në Herat ku do të shërbejnë nën komandën e FA italiane”, shprehet Xhaçka./atsh

“Për komunitete të sigurta” ishte aktiviteti i zhvilluar sot në bashkinë e Fierit, një takim sensibilizues në vijimësi të ndërhyrjeve, planifikuar të realizohen në kuadër të kundërshtimit të ekstremizmit të dhunshëm, nga Qendra e Koordinimit kundër Ekstremizmit të Dhunshëm (CVE) në të gjitha bashkitë e vendit.

Bazuar në rolin që ka në këtë mision dhe bashkia Fier, nënkryetarja Enkelejda Peshkëpia foli për angazhimin, ndërveprimin institucional, mbështetur edhe në koordinimin me institucionet dhe aktorët e tjerë lokalë.

Ky takim synonte fuqizimin dhe ngritjen e kapaciteteve mbi çështjen e radikalizmit dhe ekstremizmit të dhunshëm, për aktorët e vijës së parë që operojnë në këtë komunitet (mësues, oficerë të policimit në komunitet, punonjës socialë, psikologë, mjekë, administratorë socialë, koordinatorë të njësive të mbrojtjes së fëmijëve, etj).

Në fokus të këtyre takimeve janë këshillat vendorë të sigurisë publike, konsolidimi i tyre, me qëllim një qasje gjithëpërfshirëse të shoqërisë në kundërshtim të fenomenit në fjalë.

Mirëfunksionimi i KVSP-ve dhe fuqizimi i bashkëpunimit me të gjithë aktorët institucionalë të vijës së parë që ulen në këto Këshilla, do të mundësonte në kohë reale identifikimin, trajtimin, menaxhimin dhe zgjidhjen e problematikave mbi tematikën në fjalë që rrezikon të cenojë sigurinë e komunitetit dhe jo vetëm. /atsh

Mbi 22 mijë persona u punësuan në qarkun e Vlorës deri në fund të muajit tetor.

Ministrja e Financave dhe Ekonomisë bëri të ditur sot gjatë një aktiviteti për hapjen e garës ndërkombëtare të tenderit për Aeroportin e Vlorës, se ka një hendek mes nevojës për punëtorë dhe personave të kualifikuar për tu qasur në këto vende pune.

“Në muajin tetor të këtij viti në qarkun e Vlorës rezultojnë të punësuar 22 557 persona, ndërsa janë 23 267 mijë vende pune. Kjo situatë vihet re në të gjitha zonat, madje Berati e ka më të theksuar hendekun. Ne duhet të fillojmë punën për arsimin profesional dhe punësimin pasi do të jemi në një situatë pak të vështirë nëse të gjitha këto investime nuk do të gjejnë ato fuqinë punëtore që duhet të jetë e kualifikuar, përveçse e siguruar në numër”, u shpreh Denaj./atsh

Vështirësitë e riintegrimit të të kthyerve shqiptarë nga emigracioni po sfidohen përmes mbështetjes së tyre në trajtime të ndryshme në 13 bashki të vendit, me qëllim nxitjen dhe punësimin e tyre.

“Unë sapo jam kthyer nga emigracioni. Nuk më eci atje, por tani që u ktheva dua ta provoj edhe një herë në Shqipëri. Kam menduar të hap një dyqan me lule natyrale afër shtëpisë, që të punësohet edhe xhaxhai me gruan. Kështu edhe ata, edhe familja ime do kenë një mundësi për të punuar,” – shprehet Gentjan Marku, një ndër 20 pjesëmarrësit e trajnimit CEFE që po zhvillohet këto 3 ditë me banorët e Kamzës.

Me anë të kësaj metodologjie, të rikthyerit nga emigracioni, në 13 bashki të vendit ku po zbatohet projekti “RE-IN-VEST”, do të kenë mundësi të marrin njohuri rreth të gjitha hapave që duhet të ndjekin për të zhvilluar idetë e tyre të biznesit.

Organizata ndërkombëtare e cila operon në drejtim të të drejtave të fëmijëve “World Vision” përmes këtij projekti të financuar nga Qeveria Gjermane dhe implementuar nga GIZ Albania, synon që deri të punësojë 100 të rikthyer dhe 100 të tjerë të vetë-punësohen duke zhvilluar bizneset e tyre. z.tosku/

Shtetet e Bashkuara do vazhdojnë të qëndrojnë në krah të atyre që janë angazhuar për t’i sjellë shqiptarëve sistemin etik dhe transparent të drejtësisë që ata të gjithë meritojnë.

Kështu deklaron në një njoftim për shtyp Ambasada e Shteteve të Bashkuara të Amerikës, e cila përshëndeti betimin para Presidentit Iliri Meta të tetë prokurorëve të rinj të Strukturës së Posaçme Anti-Korrupsion dhe Krim i Organizuar (SPAK).

“Shtetet e Bashkuara qëndruan krah Shqipërisë kur reforma në drejtësi u miratua në 2016-ën. Ne ishim aty kur filloi procesi i vetingut dhe ndërsa themeloheshin Këshilli i Lartë Gjyqësor dhe Këshilli i Lartë i Prokurorisë. Edhe sot, i Ngarkuari me Punë, Daniel Koski, ishte aty ndërsa tetë prokurorët e rinj të Strukturës së Posaçme Anti-Korrupsion dhe Krim i Organizuar (SPAK) bënë betimin e tyre përpara Presidentit Ilir Meta. Shtetet e Bashkuara do vazhdojnë të qëndrojnë në krah të atyre që janë angazhuar për t’i sjellë shqiptarëve sistemin etik dhe transparent të drejtësisë që ata të gjithë meritojnë”, theksohen në njoftimin e ambasadës së SHBA-së./atsh

Është ndarë nga jeta aktorja e dashur për publikun, Mira Minga Jupi. Lajmin e trishtë e konfirmoi edhe mikesha e saj, Shegushe Bebeti, e cila njoftoi se aktores nuk do t’i jepet lamtumira e fundit në atdhe.

Aktorja jetonte prej 19 vitesh në SHBA, ku ndërroi dhe jetë.

Mira Minga është e njohur për publikun për rolin e ‘Kotes’, në filmin “Përrallë nga e kaluara”. Ajo ka luajtur për herë të parë edhe “Pinokun”, ndërsa numëron edhe një numër rolesh të tjera në kinematografinë shqiptare. /atsh

Kancelarja gjermane Angela Merkel, mbrojti edhe një herë vendimin e saj për të mos mbyllur kufijtë e Gjermanisë gjatë krizës së refugjatëve të vitit 2015.

“Unë besoj se Gjermania ka ndihmuar shumë njerëz në nevojë dhe se është bërë një përpjekje nga e gjithë shoqëria për ta arritur këtë”, deklaroi sot Merkel për parlamentin gjerman.

Merkel theksoi se qeveria federale ka punuar për organizimin dhe kontrollin e migrimit dhe do vazhdojë ta bëjë këtë gjë.

Ajo shtoi se shifrat kanë treguar se puna nuk ka qenë e kotë, por frytdhënëse.

Merkel theksoi edhe se, si kancelare, është bashkëpërgjegjëse për ngjarjet politike në vend.

“Gjithashtu jam shumë e lumtur që mbaj këtë post të rëndësishëm”, shtoi ajo. /atsh

Inspektoriati Shtetëror Shëndetësor ka vendosur sot 10 masa administrative në zbatim të ligjit antiduhan.

Kështu, ISHSH njofton se në zbatim të ligjit, janë vendosur q0 masa administrative nga taskforca Antikorrupsion. 7 masa u vendosën në qytetin e Fierit dhe 3 në Lushnjë.

Inspektorët e shëndetësisë janë çdo ditë në terren për të monitoruar zbatimin e ligjit për mbrojtjen e shëndetit nga duhani, përfshirë edhe cigaret elektronike, shisha/nargjile dhe çdo lloj produkti duhani.

Ligji antiduhan nisi të zbatohej në vitin 2014 ku restorante bare dhe lokale ndaluan konsumimin në ambiente të brendshme.

Sipas statistikave 25 % e vdekjeve të parakohshme tek meshkujt kanë shkak duhanpirjen dhe 9.1% e vdekjeve para kohe tek femrat kanë shkak duhanin. /atsh