Lajmi i fundit

Akademia e Shkencave vendosi ngritjen e njësisë së kërkim-studimit në fushën e gjeofizikës e sizmologjisë, e cila do të jetë objekt të punës përcaktimin e masave dhe hartimin e akteve që duhen ndërmarrë e miratuar për futjen e eurokodeve për sigurimin e standardeve në projektimin e strukturave ndërtimore të qëndrueshme ndaj tërmeteve, sipas klasifikimit të objekteve në fushën e ndërtimit.

Kjo njësi u ngrit në mbledhjen e kryesisë së ASH-së mbështetur në ligjin “Për Akademinë e Shkencave në Republikën e Shqipërisë”, me propozim të prof. Shyqyri Aliaj dhe pëlqimit të Seksionit të Shkencave Natyrore e Teknike.

Njësia përbëhet nga prof. Shyqyri Aliajm drejtues shkencor i njësisë Markel Baballëku, specialiste në fushën e inxhinierisë së tërmeteve e Skënder Allkja, drejtor teknik i kompanisë “Altea Geostadis 2020”, kompani gjeoteknike.

“Veprimtaria e njësisë do të kryhet në dy faza . Së pari përgjithësimi dhe evidentimi i akteve për bërjen efektive e detyruese ligjërisht të rezultateve të studimit të kryer nga prof. Shyqyri Aliaj, Eduard Sulstarova, Siai Koçiu e Betim Muço brenda një periudhe 2-3 mujore. Më tej njësia do të vazhdojë me hartimin e propozimeve konkrete për masat që duhen marrë nga Këshilli i Ministrave e institucionet përkatëse për të kryer zbatimin e plotë të eurokodeve për ndërtim në Shqipëri”, – thekson Akademia e Shkencave.

Sipas ASH-së, koha e veprimtarisë së njësisë është 6 muaj me mundësi rizgjatjeje 6 muaj të tjerë.

“Pranë njësisë do të ftohen si konsulentë specialistë ndër më të njohurit në fushën e ndërtimit e të sizmologjisë sipas propozimit të njësisë. Konkluzionet dhe propozimet e njësisë do të paraqiten në Këshillin e Ministrave dhe Komitetin Shtetëror të Rindërtimit”-, shprehet Akademia e Shkencave.

ASH jep mbështetjen logjistike e mbulon shpenzimet financiare për veprimtarinë e njësisë përfshirë ato për ribotimin e studimit në 200 kopje, ndërsa ky vendim hyn në fuqi menjëherë./atsh

Nga 1 janari i vitit 2020 të gjitha automjetet e përdorura që nuk përmbushin standardin euro 4 nuk do të importohen më në Shqipëri. Në një intervistë televizive, drejtori i Përgjithshëm i Shërbimit të Transportit Rrugor Blendi Gonxhja saktësoi se pas datës 31 dhjetor 2019 importi do të lejohet për standardin Euro 4 por që vjetërsia e mjeteve duhet të jetë nga viti 2005 e në vijim çka përjashton automjetet e viteve 2004 e më poshtë.

“Të gjithë shitësit e automjeteve por edhe personat privatë që kanë eksportuar mjete të nivelit nën euro 4 para vitit 2019 pra deri në 31.12.2018 dhe këto janë një stok të paregjistruara në Shqipëri duhet patjetër që të nxitojnë të bëjnë regjistrimin dhe targimin e tyre brenda 31.12.2019 sepse pas kësaj date nuk do të lejohet më regjistrimi. Pra edhe në rast se i kanë futur makinat, në rast se e kanë importuar dhe makina ka paguar doganën dhe ka kryer detyrimet dhe është thjesht një objekt i paregjistruar do të humbi të drejtën për t’u regjistruar”, deklaroi ai.

“Ky vendim është marrë që në pranverën e vitit 2019 pra u dëgjua një shqetësim i komunitetit të tregtarëve të këtyre automjeteve të cilët me të drejtë thoshin që Ok politikat ndryshon për sa i përket kategorisë mjedisore por na lini që këto automjete t’i shesim normalisht në treg dhe të mos na detyroni ti regjistrojmë ato përpara se mos t’i kemi gjetur një blerës. Për këtë arsye ministria dhe DPSHTRR propozuan ndryshimin e VKM dhei lanë një afat 1-vjeçar që këto makina mund të regjistrohen brenda këtij viti deri në 31 dhjetor 2019”, u shpreh Gonxhja.

Sipas të dhënave zyrtare të Drejtorisë së Përgjithshme të Shërbimit të Transportit Rrugor në 11 muaj kanë hyrë në vendin tonë 5986 mjete euro 4 e lart ose 43% mjete më të reja çka sjell ulje të ndotjes së ambientit.

“Ndryshe nga viti 2018 brenda mjeteve që vijnë euro 4 në Shqipëri kemi 5986 mjete 43% më shumë mjete euro 4 e lart do të thotë kemi një flotë që rinovohet dhe si numër po pakësohet”, tha Blendi Gonxhja.

Ndërkohë, sa i takon makinave me kilometrazh zero ato duhet të përmbushin kategorinë mjedisore EURO 5 dhe EURO 6. Ndërsa për makinat euro 4 që janë në qarkullim nuk preken nga ky vendim. /atsh

Ministrja e Arsimit, Sportit dhe Rinisë, Besa Shahini, priti sot në një takim mbi 70 inxhinierë vullnetarë të Kosovës, të cilët dhanë një kontribut të pakursyer në konstatimin e dëmeve të shkaktuara nga tërmeti i 26 nëntorit në shkolla.

Gjatë takimit Shahini i falënderoi për profesionalizmin, shpejtësinë dhe organizimin në kohë rekord për ndihmën e dhënë në evidentimin e dëmeve në shkolla.

Ministrja Shahini u shpërndau 70 inxhinierëve certifikata mirënjohjeje për mbështetjen e tyre të jashtëzakonshme./atsh

Prokurori i Apelit të Tiranës, Edmond Hyka u shkarkua sot nga Komisioni i Pavarur i Kualifikimit, pas një seance dëgjimore ku u vunë në dukje probleme të pasurisë.

Hyka nuk ishte i pranishëm, por u përfaqësua në seancë nga avokati Jordan Daci. Ky i fundit pati kërkuar gjatë seancës dëgjimore shtyrjen e procesit për shkak të situatës së krijuar nga tërmeti, duke pretenduar se klienti i tij nuk mund të shkonte në shtëpi për të siguruar dokumentacionin.

Gjatë seancës dëgjimore të enjten më 19 dhjetor, KPK relatoi se kishte gjetur nga analiza financiare se Hykës i mungonin 18.2 milionë lekë për të justifikuar pasurinë. Nga relatimi rezultoi mungesë dokumentesh për 2.6 milionë lekë dhe 35 mijë euro të trashëguara nga babai.

Trupa gjykuese e KPK-së, e përbërë nga Xhensila Pine kryesuese, Olsi Komici relator dhe Brunilda Bekteshi anëtare dëgjoi më pas avokatin mbrojtës, Jordan Daci, i cili parashtroi se për shkak të situatës nga tërmeti Hyka nuk kishte mundur të shkonte në apartamentet në Durrës për të siguruar dokumentacion shtesë të kërkuar nga KPK. Ai po ashtu kërkoi shtyrje të seancës, kërkesë që u rrëzua nga Komisioni.

Edmond Hyka ka punuar si avokat nga viti 1998 deri në vitin 2005; kohë kur u emërua prokuror në Prokurorinë e Apelit të Durrësit. Në vitin 2006, Hyka u transferua në Prokurorinë e Apelit të Tiranës dhe vazhdon ta ushtrojë funksionin aty për 13 vjet./atsh