Lajmi i fundit

Punonjësit e Policisë së Shtetit, Gardës së Republikës dhe Shërbimit për Çështjet e Brendshme dhe Ankesat të cilët kanë mbushur moshën 55 vjeç dhe kanë 30 vite pune do të përfitojë trajtim financiar, pas ndërprerjes së marrëdhënieve të punës deri në plotësimin e moshës për pension të plotë pleqërie.

Në Kuvend është dorëzuar projektligji i cili përcakton kriteret e përfitimit.

Qëllimi i këtij ligji është t’u garantojë trajtim financiar punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, në Ministrinë e Brendshme, në rast të ndërprerjes së marrëdhënieve të punës, përpara daljes në pension të plotë pleqërie.

Për efekt të përfitimit të trajtimit financiar, sipas p/ligjit të propozuar, pas ndërprerjes së marrëdhënieve të punës, njihet si vjetërsi shërbimi, vjetërsia e shërbimit e përcaktuar në legjislacionin e posaçëm që rregullon veprimtarinë e Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, në Ministrinë e Brendshme.

Trajtimi financiar i punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, në Ministrinë e Brendshme, është në masën 50% të pagës mujore neto, në momentin e ndërprerjes së marrëdhënieve të punës me shërbimin përkatës.

Gjatë periudhës së trajtimit me pagesë kalimtare, sipas legjislacionit përkatës në fuqi, masa e trajtimit financiar, sipas këtij ligji, nuk duhet të kalojë masën e pagës mujore neto, në momentin e ndërprerjes së marrëdhënieve të punës me shërbimin përkatës.

Trajtimi financiar përfitohet me kërkesë të punonjësit ose të titullarit të institucionit përkatës dhe miratohet nga Komisioni i Posaçëm. Përzgjedhja e përfituesve do të bëhet nga Komisioni i Posaçëm, sipas kritereve të moshës, të vjetërsisë në shërbim, aftësisë fizike të punonjësve dhe duhet të garantojë respektimin e parimeve të mosdiskriminimit, të objektivitetit, të transparencës dhe të paanshmërisë./atsh

Në të gjitha pikat e postës shqiptare ka nisur sot shpërndarja e shpërblimit prej 3 mijë lekësh për 663 227 pensionistë.

Instituti i Sigurimeve Shoqërore njoftoi se deri në orën 12:00 të ditës së sotme e kanë tërhequr këtë shpërblim 46 401 persona.

ISSH thotë se sportelet e Postës Shqiptare do të jenë të hapura deri në datën 31 dhjetor, në mënyrë që të gjithë pensionistët të tërheqin shpërblimin për festat e Fundvitit.

Përmes një akti normativ qeveria miratoi dje dhënien e shpërblimit prej 3 mijë lekësh për pensionistët në vend.

Nga ky vendim përfitojnë 663 227 pensionistë, nga të cilët 530 364 qytetarë që trajtohen me pension pleqërie, 67 754 që trajtohen me pension invaliditeti, 49 849 janë në pension familjar dhe 13 260 që trajtohen me pension social të veçantë./atsh

Instituti i Sigurimeve Shoqërore nisi sot shpërndarjen e shpërblimit të pensionistëve për festat e fundvitit 2019, i cili është në masën 3, 000 (tre mijë) lekë për çdo pensionist.

Zyrat Postare të shpërndarjes së pensioneve, duke filluar nga sot, pavarësisht se kjo datë është festë zyrtare, deri më 31.12.2019 do të kryejnë pagesat e pensioneve dhe shpërndarjen e shpërblimit të fundvitit 2019.

Sipas Institutit të Sigurimeve Shoqërore, ky shpërblim nuk humbet dhe nëse nuk tërhiqet brenda vitit 2019.

Pagesat do të kryhen sipas grafikut të mëposhtëm:

në datën 25 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 1-5 dhjetor;
në datën 26 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 6-9 dhjetor;
në datën 27 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 10-13 dhjetor;
në datën 28 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 14-16 dhjetor;
në datën 30 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 17-20 dhjetor;
në datën 31 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 21-24 dhjetor, si dhe raste që nuk janë paguar sipas grafikut në ditët më përpara./atsh

Llogoraja prej mbrëmjes së djeshme është mbuluar nga dëbora, ndërkohë që reshjet nuk kanë krijuar asnjë shqetësim në qarkullimin e automjeteve në segmentin rrugor që përshkon këtë rrugë, pjesë e aksit kombëtar Vlorë-Sarandë.

Prefekti i qarkut të Vlorës, Flamur Mamaj, tha sot për ATSH-në se “gjatë natës së mbrëmshme në Llogora ka rënë fillimisht breshër dhe më pas dëborë. Mjetet borëpastruese të subjektit koncensionar, që mirëmban këtë rrugë, kanë pastruar dëborën”.

“Ky proces është shoqëruar edhe me hedhjen e kripës në shtratin e rrugës gjatë mbrëmjes, por edhe mëngjesin e sotëm, gjë që krijon parametrat e duhur për lëvizjen e mjeteve dhe shmangien e rrezikut të rrëshqitjes”, theksoi Mamaj.

Prania e borës në mjediset e Parkut Kombëtar të Llogorasë, e bën më tërheqës këtë mjedis pyjor malor edhe për të apasionuarit pas turizmit të bardhë.

Qafa e Llogorasë ka rëndësi të madhe si një destinacion turistik dhe shërben si një urë tranziti për të dy llojet e turizmit, atë bregdetar dhe atë malor./atsh

Presidenti Ilir Meta shpalli sot listën e kandidatëve për vendin e Besnik Muçit, në Gjykatën Kushtetuese.

Presidenti Meta publikoi sot listën e personave që kanë aplikuar, pas përfundimit të afatit të aplikimit për vendin vakant gjyqtar në Gjykatën Kushtetuese, “Vakancë e parakohshme”, e krijuar për shkak të përfundimit përpara kohe të mandatit të ish-gjyqtarit, Besnik Muçi, procedurë kjo e rishpallur me Dekretin nr. 11364, datë 22.11.2019.

Meta tha se për këtë vend kanë aplikuar shtetasit e mëposhtëm:

1. Altin Binaj
2. Artan Spahiu
3. Dedë Kasneci
4. Eugen Papandile
5. Gentian Mete
6. Sergjio Mazreku
7. Sinan Tafaj
8. Sonila Bejtja
9. Shaqir Hasanaj
10. Zhaklina Peto

Meta tha se lista me aplikantët e mësipërm, së bashku me dokumentacionin e dorëzuar do të përcillen menjëherë pranë Këshillit të Emërimeve në Drejtësi për verifikim dhe vlerësim sipas ligjit./atsh

Qeveria miratoi sot draftin për amnistinë e fundvitit për gratë e burgosura, fëmijët e mitur dhe burrat e dënuar deri në 3 vite dhe në moshën mbi 60 vjeç.

Në një deklaratë për mediat, ministrja e Drejtësisë, Etilda Gjonaj tha se “ndryshe nga herët e tjera, qëllimi dhe angazhimi kryesor i qeverisë por edhe i imi personalisht si ministre e Drejtësisë ka qenë që kjo amnisti t’i dedikohej disa kategorive të veçanta, si grave, të miturve dhe të moshuarve, që vuajnë dënimin në një nga institucionet e ekzekutimit të vendimeve penale”.

Ajo tha se nga kjo amnisti përftojnë një kategori të dënuarish që vlerësohet se për shkak të dënimit të mbetur, ose veprës së lehtë për të cilën janë dënuar të lirohen përpara kohës së kryerjes së këtij dënimi.

“Nga amnistia e miratuar nga Këshilli i Ministrave, në bazë të të gjitha kritereve të vendosura më të lehtësuara për gratë dhe të miturit, nga 56 gra që vuajnë aktualisht dënimin, përfitojnë lirim të menjëhershëm gjysma e tyre. Thënë më qartë, fitojnë lirinë 28 gra dhe ndërkohë përfitojnë uljen me 1/3 e dënimit të mbetur 28 gra të tjera”, tha Gjonaj.

Gjonaj tha se “nga amnistia përfitojnë gjithashtu edhe 4 të dënuar të mitur që vuajnë sot dënimin dhe 2 të tjerë përfitojnë uljen me 1/3 e dënimit”.

“Nga ana tjetër, nga kjo amnisti përfitojnë edhe një numër i konsiderueshëm burrash, të cilët janë dënuar me dënim të formës së prerë deri në 2 vjet, vendim i formës së prerë deri në datë 30/9/2019, ose u kanë mbetur për të vuajtur nga ky dënim deri në 2 vjet burgim”, tha Gjonaj.

Gjithashtu, Gjonaj tha se “një kategori tjetër përfituese janë edhe burrat mbi 60 vjeç, të cilët nuk janë dënuar për vepra penale që janë të ndaluara për të përfituar nga amnistia”.

“Sigurisht, duhet vënë në dukje se pavarësisht se një pjesë e të dënuarve mund të përmbushin kushtin e dënimit apo të moshës, në rats se këta persona janë dënuar për një kategori të caktuara veprash penale, që kryesisht janë vepra penale të rënda, ose shumë të rënda, nuk mund të përfitojnë nga kjo amnisti. Tashmë besojmë se edhe Kuvendi do të jetë dakord me propozimin e qeverisë për miratimin e këtij projektligji për t’i bërë më të afërta ditët kur kjo kategori e të dënuarve do të jetë pranë familjarëve të tyre”, tha Gjonaj. /atsh

https://www.facebook.com/edirama.al/videos/853586915100955/?t=0