Lajmi i fundit

Policia e Shtetit në kuadër të urdhrit për parandalimin e lëndëve piroteknike dhe fishekzjarrëve ka sekuestruar 1130 kapsolla dhe 365 fishekzjarrë.

“Në zbatim të urdhrit të tre ministrave, “Për ndalimin e hedhjes në treg të lëndëve piroteknike dhe fishekzjarrëve dhe përdorimin civil, që rrezikojnë sigurinë publike”, strukturat e Policisë së Shtetit vijojnë kontrollin e pandërprerë në subjekte të ndryshme dhe tregje me shumicë e pakicë, me qëllim evidentimin dhe sekuestrimin e lëndëve piroteknike”-, njofton Policia.

“Si rezultat i kontrolleve, në Gjirokastër, në një magazinë, janë gjetur të magazinuara 1130 kapsolla dhe 365 fishekzjarrë, të cilët u sekuestruan në cilësinë e provës materiale. Në bashkëpunim me shërbimin zjarrfikës vijojnë veprime e mëtejshme”-, vijon më tej njoftimi.

“Kontrollet do vijojnë edhe në ditët në vazhdim dhe në këtë kuadër Policia e Shtetit fton qytetarët që të denoncojnë në numrin 112 e Komisariatin Dixhital çdo rast të tregtimit apo përdorimit të kapsollave, fishekzjarrëve dhe çdo rast të paligjshmërisë”-, përfundon njoftimi i policisë. /atsh

https://www.facebook.com/1502420603377639/videos/2652332351528939/?t=0

Për herë të parë Ministritë do të kenë plane integriteti, në kuadër të planit të Veprimit Antikorrupsion 2019-2023 dhe Ministria e Drejtësisë do të jetë Ministria e parë që do ketë një plan të tillë brenda qershorit 2020.

Zv.ministrja e Drejtësisë, Fjoralda Cakaj në një reagim bëri të ditur të premten se, “Ministria e Drejtësisë përmbylli trajnimin dy-ditor me fokus hartimin e Planeve të Integritetit”.

Sipas zv.ministres, brenda qershorit 2020, Ministria e Drejtësisë do të ketë plan integriteti.

“Trajnimi dy-ditor mbi njohuritë e fushës u dedikua për të gjithë stafin e institucionit, të orientuar në katër drejtoritë e përgjithshme, si dhe njësinë e auditit, falë mbështetjes financiare të United Nations Development Program dhe Institutit për Demokraci dhe Ndërmjetësim (IDM)”-, bëri të ditur Cakaj.

“Brenda muajit qershor 2020, Ministria e Drejtësisë do të jetë institucioni i parë i pushtetit qendror që do të ketë tashmë një plan të miratuar integriteti, i cili do të shërbejë si model hartimi për Planet e Integritetit edhe për institucionet e tjera të pushtetit qendror”-, tha Cakaj .

“Gjatë muajit janar 2020, procesi do të vijojë me takimet e ngushta/teknike në grup të stafeve të drejtorive të Ministrisë së Drejtësisë për të pasqyruar të gjithë procesin e tyre të punës, si dhe për të reflektuar e identifikuar të dhëna statistikore dhe riskun konkret të fushës së përgjegjësisë së çdo drejtorie dhe vetë Ministrisë”-, përfundon reagimin e saj, zv.ministrja Cakaj. /atsh

NDAHET NGA JETA NË MOSHËN 74 VJEÇARE NJERIU MODEL,SPORTISTI SHËMBËLLOR DHE MJESHTRI I MADH GANI MEZINI!I PAHARUAR KUJTIMI I TIJ….NGUSHËLLIME GRUAS DHE VAJZAVE!

Lindur dhe banues në qytetin e Vlorës, më 10 dhjetor 1945.
“Mjeshtër i Merituar Sporti”.
“Nder i Sportit Shqiptar”.
“Personalitet i shquar i Qarkut Vlorë”.
“Qytetar Nderi i Vlorës”.
“10 sportistët më të mirë të shekullit në Vlorë”
“100 sportistët më të mirë të shekullit në Shqipëri”
“Mjeshtër i madh në 2019”
E ka filluar karrierën sportive në Spartakiadën Kombëtare të Pionerëve, të zhvilluar në Durrës në vitin 1959, ku zë vendin e parë në kërcimet e kalit dhe në not 50 m stil i lirë. Në Spartakiadë shkoi për të garuar në sportin e notit, por duke qenë i aktivizuar si akrobat në shtëpinë e kulturës, garoi edhe në disa sporte të gjimnastikës, dhe u shpall kampion si në traun e ekuilibrit, kërcimin e kalit dhe ushtrime të lira. Trajneri i tij i parë, në Spartakiadën e Pionierëve ka qenë Faruk Mezini, ndërsa trajneri i tij, kur ka kaluar në ekipin e të rinjve ka qenë, Eqerem Kushta. Shpallet Kampion Kombëtar, në Kampionatin e kategorisë së parë për të rinj në vitin 1962. Në Korrik të vitit 1963, në Spartakiadën e shtatë kombëtare të shkollave të mesme, shpallet Kampion në gjashtëgarëshin gjimnastikor me 58,2 pikë nga 60 të mundshmet. Në Nëntor 1963, në Lojërat e Para Studentore, shpallet Kampion në Gjimnastikë. Në Nëntor 1965, shpallet Kampion Kombëtar, në Kampionatin Kombëtar të Gjimnastikës për Kategorinë e Parë. Në vitin 1965 fiton titullin “Mjeshtër Sporti”. E fiton titullin me normat e mjeshtrave të Bashkimit Sovjetik, që për kohën ishin nga më të lartat në botë. Më vonë do të kapte edhe normat e vendosura në Olimpiadën e Meksikës. Nga viti 1965-1978, ka qenë anëtar i ekipit Kombëtar të Gjimnastikës. Në vitin 1971, ishte anëtar i ekipit kombëtar, pjesëmarrës në turneun e R.P. të Kinës. Ka qenë i vetmi sportist pjesëmarrës në të gjitha aktivitetet e zhvilluara gjatë turneut. Në vitin 1972 në Kampionatin Kombëtar të Mjeshtrave të Sportit, shpallet Kampion në Unaza dhe Kërcim Kali. Në Tetor 1974, në Spartakiadën e Tretë Kombëtare, shpallet Kampion me Medaljen e Artë në Gjashtëgarëshin Gjimnastikor dhe fitues i pesë medaljeve (dy të Arta dhe tre Argjendi). Garat në Spartakiadën e Tretë Kombëtare, i kujton si më të bukurat sepse njëkohësisht edhe konkurronte në gara si gjimnast edhe ishte trajner i ekipit të gjimnastikës “Flamurtari”. Ekipi përbëhej nga Ilir Çela e Ilir Tafili, Fotaq Leka, Anastas Xhoxhi e Vasil Ruci. Në atë Spartakiadë, do të renditej në vendin e parë si individ e në vendin e dytë si ekip. Ka patur konkurrentë të fortë Bujar Bujarin e “17 Nëntorit”, Arqile Markon të “ILKF”, Xhavit Xhanin e “Partizanit”. Në vitin 1975-1976 ka qenë anëtar i ekipit kombëtar, pjesëmarrës në takimet miqësore të zhvilluara në Shqipëri dhe R.P. të Kinës. Nga viti 1969-1980 ka qenë trajner i ekipit të “Flamurtarit” për kategorinë e parë dhe Mjeshtrat e Sportit në Gjimnastikë. Në vitet 1969, 1970, 1972, 1975 ka zënë vende të dyta në Kampionatet Kombëtare. Në vitin 1977 me ekipin e Mjeshtrave të Sportit shpallet “Kampion i Republikës”.
Në datën 5 maj të vitit 1978, në ceremoninë e fillimit të Garave të Mjeshtrave dhe të kandidatmjeshtrave të Gjimnastikës në ushtrimet fakultative, Gani Mezini do të largohet nga sporti i bukur i gjimnastikës. Në vitin 1999 shpallet një nga “10 sportistët më të mirë të shekullit” për Vlorën. Në 14 maj 2015 i jepet titulli “Qytetar Nderi i Vlorës”,dhe në maj të të 2019 i jepet titulli “Mjeshtër i madh”.

Ministrja e Drejtësisë, Etilda Gjonaj deklaroi sot se në vitin 2020 do të ketë vetting për noterët dhe përmbaruesit.

Në një takim me gazetarët Gjonaj theksoi se, rezultatet e para të procesit të vetting-ut për noterët në Shqipëri do të dalin në tremujorin e parë të vitit 2020.

“Po kryejmë vetting-un e noterëve, janë pothuajse 700 noterë për të cilët rezultatet do dalin në tremujorin e parë të 2020. U shty pak si vetting për shkak të tërmetit”, theksoi ministrja.

“Po kryejmë vetingun e noterëve, pra verifikimin e titujve të tyre. Po verifikojmë çdo noter sesi e ka marrë licencën”, tha Gjonaj.

Por Gjonaj njoftoi se, procesi i rivlerësimit nuk do të ndalet vetëm te noterët, por do shtrihet edhe te një tjetër profesion i lirë, siç është ai i përmbaruesve.

“Nën veting do vendoset edhe një profesion tjetër i lirë. Vetingut do t’i nënshtrohen edhe përmbaruesit, reformimi do kryhet jo vetëm në aspektin profesional. Aktualisht kemi një regjistër në Ministrinë e Drejtësisë”, u shpreh Gjonaj.

Gjonaj bëri të ditur gjithashtu se, është krijuar një trupë e posaçme speciale e Policisë së Burgjeve që do të shërbejë në kuadër të regjimit 41-Bis për të dënuarit, e cila do të mbrojë edhe drejtuesit e burgjeve.

“Një pjesë prej jush kanë publikuar raste të kërcënimit të drejtuesve të burgjeve, dhe kjo strukturë speciale do t’i mbrojë. Padyshim edhe Policia e Shtetit duhet të ofrojë mbrojtje”, theksoi Gjonaj.

Presidenti i Republikës, Ilir Meta çmoi sot mjekun stomatolog dhe koordinatorin e Qendrës Vullnetare të Emergjencave Civile, Grej Malo, i cili kontribuoi në operacionit të shpëtimit të të riut Klajdi Qato nga rrënojat e ish-hotelit “Vila Palma” në Durrës pas tërmetit të 26 nëntorit.

Presidenti i Republikës i dorëzoi zotit Grei Malo titullin e lartë “Në vlerësim të kontributit humanitar si mjeku i parë, që zbriti në terren dhe hyri në rrënojat e shkaktuara nga tërmeti i 26 nëntorit 2019, duke shpëtuar jetë njerëzish në të gjitha zonat e dëmtuara, si anëtar i Qendrës Vullnetare të Emergjencave Civile”.

“Kush shpëton një jetë shpëton një botë të tërë!” ka thënë Shenjtorja shqiptare, Nënë Tereza”, tha Presidenti Meta në fjalën e tij.

“Unë sot jam i privilegjuar që t’i akordoj Titullin ‘Për Merita të Veçanta Civile’ zotit Grej Malo, mjekut hero, i cili jo vetëm zbriti menjëherë në terren pas goditjes së tërmetit të rëndë të 26 nëntorit, por dhe rrezikoi jetën e tij për orë të tëra nën rrënoja për të shpëtuar jetë njerëzish në zonat e dëmtuara, si anëtar i Qendrës Vullnetare të Emergjencave Civile”, u shpreh Meta.

Meta theksoi se, “Malo ishte ai i cili u dha ndihmën të izoluarve në rrënoja duke punuar në mënyrë të palodhur së bashku me ekipin e specializuar të zjarrfikësve të Kavajës, por dhe me ekipin që erdhi më pas nga Greqia ku në mënyrë të veçantë u evidentua roli dhe kontributi e tij në shpëtimin e të riut Klajdi Qato i mbetur nën rrënoja tek godina e Hotel “Palma” në Durrës”.

Për fat të mirë, nënvizoi Meta, “Klajdi gjendet sot me ne në këtë ceremoni falë këtij akti të lartë civil, i cili e bën zotin Grej Malo një njeri mjaft modest, një hero të vërtetë, pasi nuk ka heroizëm më të madhe se sa të rrezikosh jetën tënde për të shpëtuar jetën e tjetrit”.

“Ndaj, Grej na bën të gjithëve krenarë për një nivel të lartë profesionalizmi dhe përgatitjeje, për të mbrojtur jetën njerëzore nën rrënoja, të cilat dëshmojnë për një nivel të lartë profesionalizmi dhe përgatitjeje”, tha Meta.

“Për 23 orë pa ndalim, Grei, me një shembull të pashoq përkushtimi, sakrifice, profesionalizmi, ka asistuar në mbajtjen në jetë të personave në rrënoja deri në nxjerrjen nga ekipet e specializuara të kërkim shpëtimit shqiptare si edhe ata në ndihmë nga nga vendet e rajonit dhe Europës. Më pas ai ka vazhduar duke dhënë kontributin e tij edhe në godina të tjera në ndihmë të njerëzve të shumtë”, u shpreh presidenti Meta.

Meta tha se, “Grei është diplomuar si Mjek Stomatolog dhe është trajnuar edhe në fushën e Emergjencave Civile dhe Urgjencat Mjekësore, në vende si Mali i Zi, Maqedoni, Kosovë, Itali dhe Greqi, Japoni dhe Kore e Jugut. Si anëtar i Qendrës Vullnetare të Emergjencave Civile ai ka vënë në zbatim të gjithë dijet e marra dhe ka ushtruar me sukses të gjitha teknikat e shpëtimit për të shpëtuar jetën njerëzore nën rrënoja, të cilat dëshmojnë për një nivel të lartë profesionalizmi dhe përgatitje”.

Presidenti Meta falënderoi dhe shprehu mirënjohjen e tij të thellë edhe për gjithsecilin prej anëtarëve të Qendrës Vullnetare të Emergjencave Civile.

“Jemi krenarë për ju, për punën, shembullin dhe kontributin tuaj të jashtëzakonshëm human dhe profesional. Vendi ynë ka shumë nevojë për njerëz si ju. Ka nevojë për njerëz të specializuar në emergjencat civile dhe të përkushtuar ndaj detyrës dhe përgjegjësisë qytetare. Të gjithë ju jeni heronj dhe një shembull i lartë i përgjegjësisë civile dhe njerëzore, së bashku me të gjithë ata mjekë, ushtarakë, punonjës së policisë së shtetit, të emergjencave civile, të kërkim-shpëtim minierave, dhe gjithë ekipeve të tjera të kërkimi shpëtimit nga vendi, por dhe ata të ardhur nga rajoni dhe Europa të cilët iu gjendën në ndihmë njerëzve të shumtë në ato momente të vështira. Një falënderim të gjithëve nga zemra dhe shpresojmë që të kemi sa më shumë si Greji që do të thotë të investojmë më shumë në formimin profesional, në përgatitjen e tyre në mënyrë që t’i përballojmë në kohën e duhur dhe me profesionalizmin e duhur të gjitha vështirësitë që do të ndeshim”, tha Meta./atsh

Ministria e Mbrojtjes nderoi sot nënoficerët më të mirë të vitit në një ceremoni të veçantë që vjen si traditë e këtij dikasteri në festat e fundvitit.

Ministrja e Mbrojtjes, Olta Xhaçka u shpreh sot se se “viti 2019 ishte një vit i spikatur për të gjithë ushtarët, nënoficerët dhe oficerët e Forcave të Armatosura”.

“Për të respektuar traditën, përzgjodhëm nënoficerët më të mirë të vitit. Angazhimi dhe përkushtimi i çdo nënoficeri, sidomos gjatë emergjencave civile, na e bëri më të vështirë përzgjedhjen, por pas një procesi transparent, konkurrimi dhe vlerësimi, jam e bindur se kemi zgjedhur më të mirët”, tha Xhaçka.

Ministria e Mbrojtjes nderoi rreshter Egnat Kulli, Forca Tokësore; nëntetar Ardian Seitaj, Komanda Mbështetëse; rreshter Julian Shaban, Komanda e Doktrinës dhe Stërvitjes.

“Suksese gjithë vajzave, grave, djemve e burrave në uniformë”, tha Xhaçka./atsh

Dy prokurorët Dritan Prençi dhe Vladimir Mara, janë bërë pjesë e Prokurorisë Speciale (SPAK), që do të hetojë krimin dhe korrupsionin në nivele të larta politike.

Këshilli i lartë i Prokurorisë votoi sot me 9 vota pro dhe një kundër (Nurihan Seiti), kërkesën e drejtuesit të SPAK, Arben Kraja për transferimin e Përkohshëm të prokurorëve Mara dhe Prençi në SPAK.

Ndërsa është ndërprerë caktimi i përkohshëm i prokurorit Dritan Prençi me Prokurorinë e Shkallës së Parë Tiranë në momentin e transferimit të përkohshëm në SPAK.

Dritan Prençi dhe Vladimir Mara njihen si dy prokurorë që kanë drejtuar disa nga dosjet më të rëndësishme të zyrtarëve dhe të luftës kundër krimit të organizuar./atsh