Lajmi i fundit

Këshilli i Lartë Gjyqësor njofton opinionin publik në lidhje me përfundimin e procesit të vlerësimit dhe pikëzimit paraprak të kandidatëve, në kuadër të procesit të përzgjedhjes së tyre për emërim në Gjykatën e Lartë, nga radhët e juristëve të spikatur, në tre pozicionet e lira në fushat e së drejtës administrative, civile dhe penale.

KLGJ sqaron se nga lista fillestare prej 21 kandidatësh, janë kualifikuar për të vijuar procedurën e përzgjedhjes për emërim tre kandidatë, për të cilët Këshilli ka vendosur zhvillimin e intervistave në seanca dëgjimore në datën 27.2.2020, duke filluar në orën 10.00.

Në përfundim të këtij procesi, Këshilli do të kryejë vlerësimin dhe pikëzimin përfundimtar të tre kandidatëve jogjyqtarë, nga katër pozicione që janë gjithësej dhe do t’i propozojë Presidentit të Republikës emërimin e tyre gjyqtarë në Gjykatën e Lartë.

“Po ashtu, Këshilli i Lartë Gjyqësor po vijon procedurën e verifikimit të kushteve dhe kritereve ligjore të kandidimit për kandidatin për pozicionin e katërt nga radhët e juristëve të spikatur, si edhe vendosi në mbledhjen e datës 26.2.2020 hapjen e procedurës së ngritjes në detyrë në Gjykatën e Lartë, nga radhët e gjyqtarëve.

Gjithashtu, Këshilli i Lartë Gjyqësor vlerëson në mënyrë të veçantë interesin e publikut dhe do të informojë në vijimësi mediet për të gjithë hapat e matur që do të ndjekë për plotësimin me gjyqtarë të Gjykatës së Lartë, në mënyrë që ajo të përmbushë rolin e saj të rëndësishëm për njësimin dhe zhvillimin e praktikës gjyqësore dhe për forcimin e besimit të publikut te sistemi gjyqësor./atsh

Mënyra më e mirë për t’u mbrojtur nga koronavirusi është duke u kujdesur për higjienën personale. Instituti i Shëndeti Publik shpjegon se koronavirusi nuk është në gjendje të mbijetojë në sipërfaqe për një kohë të gjatë.

Për rregullat e dezinfektimit/ larjen e duarve, dhe sa kohë mbijeton koronavirusi i ri në sipërfaqe dhe a është e sigurt marrja e pakove nga Kina ose vendet e tjera ku është identifikuar virusi, Instituti i Shëndetit Publik jep këto këshilla:

Cilat janë rregullat për dezinfektimin/larjen e duarve?

Larja e duarve dhe dezinfektimi janë çelësi për parandalimin e infeksionit. Duhet të lani duart shpesh dhe tërësisht me spun dhe ujë për të paktën 20 sekonda. Nëse sapuni dhe uji nuk janë të disponueshme, mund të përdoret gjithashtu një solucion me bazë alkoli(përqendrimi i alkolit të paktën 60%).

Sa kohë mbijeton Koronavirusi i ri në sipërfaqe?

Informacionet paraprake tregojnë se koronavirusi mund të mbijetojë disa orë, edhe pse është ende në studim. Përdorimi i dezinfektuesve të thjeshtë është në gjendje të vrasë virusin duke frenuar aftësinë e tij për të infektuar njerëzit, për shembull dezinfektuesit që përmbajnë 75% alkol (metanol) ose 1% me bazë klori (zbardhues).

A është e sigurt marrja e pakove nga Kina ose vendet e tjera ku është identifikuar virusi?

PO, është e sigurt. OBSH deklaron se njerëzit që marrin pako nuk rrezikojnë të bien në kontakt me Koronavirusin e ri, sepse ai nuk është në gjendje të mbijetojë në sipërfaqe për një kohë të gjatë./atsh