Lajmi i fundit

Rreth 664 mijë pensionistë do të përfitojnë një indeksim me rreth 2.4% të pensionit të tyre nga data 1 prill.

Vijimi i kësaj reforme është konfirmuar nga ministrja e Financave dhe Ekonomisë, Anila Denaj e cila deklaroi në një intervistë se indeksimi i pensioneve për gati 664 mijë pensionistë do të niste nga muaji prill.

“Indeksimi i pensioneve ka qenë i parashikuar në buxhetin e miratuar në fund të vitit të kaluar dhe buxheti i miratuar është në vlerën 2.5 miliardë lekë. Masa e indeksimit shkon në varësi të informacionit që marrim nga INSTAT dhe po shikojmë mundësinë të jetë në masën e rreth 2.4%. Do të jetë efektiv për pensionin e muajit prill”, deklaroi Denaj.

Në bazë të reformës së pensioneve të miratuar në vitin 2015, tashmë është detyrim i përvitshëm indeksimi i pensioneve me indeksin e çmimeve të shportës./atsh

Kryeministri Edi Rama deklaroi sot se “javën që vjen do të nisim misionet e fluturimit për riatdhesimin e njerëzve tanë të mbetur rrugëve të Europës”.

Në një komunikim me qytetarët, Rama tha se ka marrë mesazhe të shumta nga bashkëqytetarët tanë që kanë ngecur prej ditësh e javësh në pika të ndryshme të kontinentit pas mbylljes së kufijve nga lufta.

“Kam marrë jo pak mesazhe nga studentë, nga prindër, nga familjarë të ndarë nga kufiri i mbyllur dhe me Ministrinë për Europën dhe Punët e Jashtme dhe ambasadat tona kemi punuar realisht ditë natë, duke kontaktuar dhe duke listuar. Kemi zgjidhur disa raste sipas mundësive shumë të kufizuara që kemi pasur, por e dime shumë mirë, jemi plotësisht të vetëdijshëm për çfarë stresi e peripecish rriten përditë për njerëzit tanë që kanë mbetur rrugëve të Europës”, tha Rama.

Ai theksoi se grupi më i madh është në Itali ku janë 650 persona, në Britaninë e Madhe janë 114 persona, në Kroaci 341 persona, në Zvicër 77, në Greqi 45, në Gjermani 45, në Francë 37, në Suedi 21, Austri 19 dhe pastaj një sërë vendesh të tjera ku ka 1-2 deri në 11-12 persona.

Rama ndau lajmin e mirë se “ditën e hënë do të nisin fluturimet për t’i sjellë në atdhe”.

“Nesër do të publikojmë kalendarin e misioneve të riatdhesimit dhe pikat përkatëse ku do të bëjmë imbarkimin e personave të listuar tanimë”, tha Rama.

Ai theksoi se “këto misione do t’i kryejmë pa pagesë nga ana e individëve”. “I takon ‘Lasgushit’ t’i sjellë njerëzit tanë në shtëpi. ‘Air Albania’ është kompania e flamurit kuqezi dhe në këtë hall të madh kombëtar unë i kam kërkuar kompanisë të marrë përsipër barrën e të qenit shtëpia e shqiptarëve në qiejt e Europës dhe të mos kërkojë lekë për të kryer këto misione humanitare. Jam i lumtur se gatishmëria e kompanisë ka qenë e menjëhershme”, tha Rama.

Ai tha se ndërkohë Ministrja e Infrastrukturës dhe Energjisë ka punuar dhe po punon për lejet speciale të këtyre fluturimeve çarter.

“Shpresoj miq që ky mesazh përcjell te ju edhe një të vërtetë tjetër. Unë nuk jap premtime pa u siguruar mirë që do të realizohen. Ndërkohë që ju ankoheni e ankoheni ne punojmë për ta adresuar gjithë tërësinë e ankesave. Ne nuk jemi një shtet i madh, as një shtet me fuqi të pakufijshme, por ju siguroj se përkushtimin e kemi të madh dhe fuqinë për të luftuar për Shqipërinë dhe shqiptarët e kemi të pakufijshme”, tha Rama.

Ai tha se “do të luftojmë kështu përditë, përnatë deri në fund duke besuar se do të bëni të gjithë luftën tuaj dhe do të na i bëni hallall vuajtjet e kësaj lufte që nuk e e solla unë, por nuk kemi rrugë tjetër”./atsh

https://www.facebook.com/Agjencia.Telegrafike.Shqiptare/videos/779056915951722/?t=0

Kryeministri Edi Rama deklaroi sot se është gati aplikacioni online ose me sms për leje-daljen e vetëm një personi nga familja për të bërë pazar.

“Njësoj si javën e shkuar, nga ora 13:00 nesër deri të hënën 05:00 të gjithë në shtëpi dhe të gjithë qepenat mbyllur”, tha Rama.

Ndërkohë Rama tha se “nga e hëna askush nuk del dot më në pazar, pa marrë lejen digjitale me e-mail ose telefon në emër të familjes”.

Kryeministri tha se pas pak do të bëhet edhe prezantimi i aplikacionit që është shumë i thjeshtë dhe nga e hëna e deri në mbarim të luftës, do të jetë e vetmja rrugë për të dalë nga shtëpia në Tiranë e në qendrat urbane. /atsh

Rreth 1500 familje në nevojë në bashkinë e Vlorës do të përfitojnë ndihma për shkak të situatës së krijuar nga COVID-19.

Kryetari i bashkisë së Vlorës, Dritan Leli, tha sot për ATSH-në se “që në ditët e para kemi ndarë rreth 300 ndihma, falë mbështetjes së donatorëve. Nga dje, ka filluar një aksion humanitar i bashkisë me të gjithë stafin, ku do të shpërndahen ndihma në 1500 familje, të cilat janë evidentuar si më problematike nga bashkia”.

Sipas Lelit, kjo është një pandemi që ka gjunjëzuar njerëzimin.

“Pjesa më e rëndësishme ka qenë përballja me problematikat e higjienës, dezinfektimi i hapësirave publike. Higjiena personale dhe ajo në komunitet është më e rëndësishmja dhe për këtë kemi gjetur edhe mbështetjen e qytetarëve.

Në lidhje me masat e marra, Leli u shpreh se përgjegjshmëria është çelësi i suksesit.

“Në këtë luftë të bëhemi të gjithë palë dhe të jemi sa më të përgjegjshëm. Ndërgjegjësimi i qytetarëve të Vlorës është rritur. Do të doja që masat të ishin edhe më të forta. Njerëzit duhet të dalin një herë në dy apo tre ditë, që të minimizojnë kontaktet. Kjo ëndërr e keqe duhet të ketë fundin e saj sa më shpejt. Përgjegjshmëria njerëzore është çelësi i suksesit në këtë luftë të njerëzimit”, tha Leli.

Në qytetin e Vlorës vijon gjithashtu edhe dezinfektimi i hapësirave publike, institucioneve, si spitale, qendra shëndetësore, shkolla, kopshte, rrugë, pallate, etj./atsh

Kryeministri Edi Rama tha sot se “flota e re e autoambulancave të emergjencave civile është gati për t’u nisur nga Turqia drejt Shqipërisë”.

Kryeministri ndau pamje të autoambulancave të reja të cilat janë të mirëpajisura dhe do t’i shtohen flotës së autoambulancave në vend, për të përballuar situatën e krijuar nga COVID-19.

Ditën e djeshme Kryeministri Edi Rama vlerësoi faktin se “qeveria turke hapi kanalin e eksportit të materialeve mjekësore për Shqipërinë me urdhrin e Presidentit, Recep Tayyip Erdogan”.

Po dje nga Turqia, mbërriti një sasi prej 50 mijë mjetesh të mbrojtjes personale, materiale të blera nga qeveria shqiptare për stafet mjekësore, të cilat kanë filluar të shpërndahen në të gjithë spitalet./atsh

Procesi i lirimit përkohësisht të 600 të dënuarve, me qëllim mbrojtjen e shëndetit të personave të privuar nga liria për shkak të rrezikut që mund t’i vijë nga pandemia COVID 19, ka nisur me shqyrtimin në imtësi të dokumentacionit të të dënuarve.

Ministrja e Drejtësisë, Etilda Gjonaj, në një mesazh të publikuar sot, thekson se ky proces do të kryhet për 5 ditë nga komisionet përkatëse të IEVP-ve dhe me pas Drejtori i Përgjithshëm i Burgjeve brenda 3 ditëve do të lëshojë urdhrin e lirimit të përkohshëm.

“Dje gjatë mbledhjes së posaçme të Këshillit të Ministrave, mbi masat e marra për përballimin e situatës së COVID-19, raportova mbi ecurinë e zbatimit të aktit normativ për lirimin e përkohshëm të një pjese të të dënuarve, me qëndrim të përkohshëm në shtëpi”,- thekson Gjonaj.

“Këto masa merren me qëllim mbrojtjen e shëndetit të personave të privuar nga liria për shkak të rrezikut që mund t’i vijë nga kjo pandemi. Për çdo të dënuar, Komisionet e ngritura në çdo IEVP, janë duke shqyrtuar me imtësi dokumentacionin e plotë administrativ dhe po kryejnë verifikimin e duhur me prokuroritë e rretheve, policinë dhe komisionin disiplinor të burgjeve për të përmbushur elementët e përcaktuar në aktin normativ me qëllim garantimin e sigurisë”,- tha Ministrja e Drejtësisë.

“Ky proces do të kryhet për 5 ditë nga komisionet përkatëse të IEVP-ve dhe me pas Drejtori i Përgjithshëm i Burgjeve brenda 3 ditëve do të lëshojë urdhrin e lirimit të përkohshëm. Çdo komision i IEVP-ve gjendur në këtë situatë, po merr kontaktet me familjarët e të dënuarve për të plotësuar dokumentacionin e kërkuar dhe për të dhënë dakordësinë e qëndrimit në të njëjtën banesë. Formularët e proçedurës për çdo të interesuar gjenden të publikuara në faqen e DPB: ➡http://www.dpbsh.gov.al/newweb/…“,-përfundon Gjonaj./atsh