Lajmi i fundit

Të hënën e 27 prillit do të rinisë shërbimi i taksive për lëvizjet brenda qytetit të cilat do të funksionojnë duke respektuar protokollet e ndërmarra në situatën e emergjencës COVID-19.

Fillimisht shoferi dhe pasagjeri duhet të jenë të pajisur me maska, doreza dhe dezinfektant si dhe duhet të shmangin kontaktet fizike.

Ndërkaq, nuk do të lejohet më shumë se një klient në taksi dhe ai duhet të ulet mbrapa dhe diagonalisht me shoferin e mjetit. Përjashtim nga ky rregull bëjnë vetëm rastet nga e njëjta familje dhe të shoqërimit me të mitur apo persona me paaftësi.

Po ashtu, kondicioneri në makinë duhet të qëndrojë i fikur ndërsa dritaret e mjetit duhet të qëndrojnë paksa të hapura. Duhen respektuar gjithashtu edhe kërkesat e ministrisë së Shëndetësisë për të mbuluar gojën dhe hundën me një pecetë ose bërryl kur kolliten apo kur teshtin, si dhe të shmanget prekja e syve, hundës ose gojës me duar të palara.

Rregulla duhet të ndiqen edhe për pagesën e udhëtimit, pasi shoferi pas pagesës me kartë apo kesh, shoferi dhe pasagjeri duhet të dezinfektojnë duart. Ndërkohë shoferi pas çdo pasagjeri, duhet të dezinfektojë: timonin, dorezat e dyerve të mjetit, sediljet, rripat e sigurimit, kontrollet e dritareve, butonin e bagazhit./atsh

Kryeministri Edi Rama deklaroi sot se “të shtunën dhe të dielën do të jetë çdo gjë e bllokuara siç ishte javën e kaluar. Të gjithë në shtëpi përveç atyre që janë në ato punë të lejuara për të shtunë dhe të dielë”.

Në një komunikim të drejtpërdrejtë Kryeministri Rama tha se “jemi në një situatë positive, por sitiuata positive është përmbysshme sa hap e mbyll sytë, nëse ne lëshohemi”./atsh

Kryeministri Edi Rama deklaroi sot se do të ketë lehtësim të lëvizjes në disa zona që nuk janë të prekura nga infeksioni COVID-19.
“Ne do të bëjmë lëvizje të përshkallëzuar në një sërë zonash që janë me risk të ulët”, u shpreh kryeministri.

Kryeministri deklaroi se do të mbetet e mbyllur lëvizja ndërqytetase.

Sipas Kryeministrit, në qarkun e Gjirokastrës në qarkun e Dibrës, në bashkinë e Divjakës në Bashkinë e Sarandës, në Konispol e Himarë, Pogrades Përrenjas e Librazhd do të ketë më shumë liri lëvizjeje.

Në Sarandë, Konispol e Himarë, si dhe në Pogradec, Përrenjas e Librazhd, u shpreh Kryeministri, do të ketë liri lëvizje të ndërmjetme, pra edhe mes njëra-tjetrës.

Kryeministri theksoi se ministrja e Shëndetësisë do të bëjë të ditura edhe rregullat që do të funksionojnë në këto zona.

Hapja, sipas Kryeministrit, është një proces që duhet filluar.

“Hapja sjell jo vetëm rrezikshmëri më të lartë për infektimin, por edhe mundësi që numrat të rriten, pra aty ku ska raste deri tani, mund të kemi shfaqje të infeksionit. Por ne nuk mund të qëndrojmë të mbyllur deri sa të dalë vaksina, pasi ende nuk ka një kohë të caktuar se kur mund të dalë. Jo se do të vdesim për bukë, pasi në historinë e Shqipërisë, nuk ka vdekur njeri për bukë, por se nuk mban më, pasi se di askush kur do të dalë vaksina për 1 vit apo dy vjet”, vuri në dukje Kryeministri.

Por theksoi ai, duhet të garantojmë sjelljen dhe rregullat në të gjitha aspektet.

Sipas tij, këtu nuk është çështja e Kodit Penal, por kodit njerëzor, pasi duke zbatuar rregullat, ti mbron familjen tënde.

Në këto zona , theksoi Rama, do të mundësojmë që lëvizja fshat-qytet të jetë më e relaksuar.

“Do të mundësojmë që pensionistët të dalin në një fashë të tyren në mëngjes, ashtu sikurse edhe për nënat me fëmijë deri në moshën 10 vjeç. Por nuk do të lejohet grumbullimi më shumë se 2 persona, apo në parqe e pikniqe, pasi thyerja e rregullave mund të na kthejë mbrapa”, deklaroi Rama./atsh

Të moshuarit do të kenë sërish të shtunën mundësinë të dalin deri në orën 11:00, ndërkohë që të tjerët do të qëndrojnë në shtëpi si masë parandaluese ndaj përhapjes së COVID-19.

Kryeministri Edi Rama në komunikim me kryebashkiakët e zonave të gjelbra, të premten pasdite, nënvizoi se nesër sërish gjyshërit dhe të moshuarit do të kenë mundësi të lëvizin, vetëm, deri në orën 11:00.

“Domosdoshmëri për të monitoruar, jo vetëm nga Policia e Shtetit, por dhe nga ju, si kryetarë bashkie dhe me gjithë sistemin e kryepleqve që keni, lokalet, mund të tundojnë pronarët të hapin qepenat, por është katastrofë nga pikëpamja e epidemisë. Ai shembulli skandaloz, që unë e solla në vëmendje të gjithëve, për djalin që e merr malli për prindërit dhe që i infekton të dy dhe që i fut në një rrugë që dashtë zoti ia dalin, nuk duhet të ndodhë më”,- theksoi Rama.

“Kush i ka prindërit më vete duhet t’i ruajë dhe ndihmojë duke i çuar ushqimet te dera, jo të futen në shtëpi e t’i përqafojnë, se sado jo njerëzore të duket kjo është e vetmja mënyrë për t’i mbrojtur. Pensionistë në makina në asnjë mënyrë”,- shtoi Rama.

“Është e domosdoshme që pensionistët t’i lehtësojmë, nesër është dita e tyre në gjithë Shqipërinë. Në zonat tuaja të gjelbra, do e kenë lirinë deri ne 8 e 30 edhe gjatë javës, s’do dalë njeri tjetër, do dalin vetëm ata, por jo domino edhe të tjera, sepse rrezikojnë jetën. Dy janë elementët, të moshuarit dhe lokalet. Vizitat nëpër shtëpi nuk kontrollohen me polici, por duhet vullnetarizëm për të zbatuar rregullat. Secili duhet të jetë roje i vetes”,- tha Rama. /atsh

Punonjës të Policisë Bashkiake, vendosën të heqin një pjesë nga paga e tyre për t’u ardhur në ndihmë 20 familjeve në vështirësi.

Kryetari i Bashkisë së Vlorës, Dritan Leli e ka konsideruar një nismë njerëzore domethënëse, ndërsa ka shprehur mironjohjen për secilin prej tyre.

“Shoqëria jonë ka nevojë për shembuj të tillë. Faleminderit komandant Altini dhe të gjithë ju, që ju bashkuat këtij akti solidariteti”, deklaroi Leli./atsh