Lajmi i fundit

Mjekut infeksionist Pëllumb Pipero iu akordua sot titulli “Qytetar Nderi” nga bashkia e Skraparit.

Me propozim të kryetarit të bashkisë së Skraparit, Adriatik Mema, këshilli i bashkisë Skrapar i dha sot titullin “Qytetar Nderi”, profesor doktor Pëllumb Piperos.

Titulli iu dha me motivacionin: “Për veprimtari të shquar profesionale dhe akademike gjatë karrierës së tij në fushën e mjekësisë, veçanërisht në atë të sëmundjeve infektive, si dhe për kontributin e çmuar profesional dhe publik në përballimin e situatës së pandemisë të shkaktuar nga COVID-19”.

Mjeku Pëllumb Pipero është në vijën e parë të frontit të luftës kundër koronavirusit./atsh

Ministrja e Mbrojtjes Olta Xhacka vlerësoi kontributin e Forcave të Armatosura në kuadër të Aleancës së NATO-s në çdo cep të globit.

Xhaçka shprehet se “nga njëri cep i globit në tjetrin, ushtarakët shqiptarë vijojnë të vlerësohen për kontributin e tyre”.

“Në këtë periudhë pandemie vëmendja ndaj personelit shëndetësor është shtuar edhe në misionet e NATO-s. Infermierët ushtarakë shqiptarë nëntoger Eno Shyti dhe tetar Viktor Skuqi janë dekoruar nga komandanti turk i bazës së tyre në Aeroportin Ndërkombëtar të Kabulit”, shprehet ajo.

Forca e Armatosura të Shqipërisë kontribuojnë në Afganistanin, Letoni, Kosovë, detin Egje dhe në shumë struktura e komanda të NATO. Po ashtu, uniformat ushtarake shqiptare janë pjesë në misionet e Bashkimit Evropian në Bosnjë-Hercegovinë dhe Mali. /atsh

Kryetari i grupit parlamentar të Partisë Socialiste, Taulant Balla paraqiti sot në Kuvend ecurinë e procesit të “pagës së luftës” prej 26 mijë lekësh dhe bonusit prej 40 mijë lekësh për të gjithë ata punonjës që u prekën në punën e tyre për shkak të situatës së krijuar prej COVID-19.

“Unë e mirëkuptoj çdonjërin prej jush që kompleksohet me xhiron nëpër kafe që bën Luli. Kur je pa punë xhiro nëpër kafe do të bësh, se s’ke çfarë të bësh tjetër. Luli nuk ka nevojë për bonusin prej 40 mijë lekësh, sepse Luli është klienti më i madh i oligarkëve, në këtë vend, nëse ka oligarkë, por atyre që Luli i quan ‘oligarkë’, biznesmenëve të mëdhenj, me të cilët ka kontrata të mëdha financiare familjare të përditshme”, deklaroi Balla.

Sipas tij, të dhënat janë bërë publike nga dy deputetët Ervin Bushati dhe Klotilda Bushka.

Më tej, Balla publikoi edhe shifrat e përfituesve të dy paketave financiare të mbështetjes.

“Në paketën e parë, në total numri i aplikime është 64 093 tatimpagues për 124 670 punonjës. 65 078 qytetarë që i përkasin 38 672 subjekteve e kanë marrë ndihmën financiare. Nga totali i aplikimeve kanë kaluar për pagesë të këstit të parë 64 964 me një shumë në vlerën 1.678 miliardë lekë“, tha Balla.

Lidhur me paketën e dytë, Balla bëri të ditur se janë 43 430 aplikime.

“38 851 subjekteve ose e përkthyer në numër punonjësish, 141 351 qytetarë shqiptarë janë të trajtuar financiarisht nga shteti shqiptar. Numri i kërkesave të aprovuara është aktualisht 36 693 për 111 830 mijë punonjës. Janë paguar 109 664 që u përkasin 34 416 subjekteve tregtare. Vlera e paguar është 4.386 miliardë lekë“, u shpreh kreu i grupit socialist.

Balla tha se nga paketa e dytë financiare kanë përfituar 4 265 punonjës të angazhuar në strukturat akomoduese si dhe 720 naftëtarët e rafinerisë së Ballshit./atsh

Gjithmonë krah miqve tanë, kështu shprehet ambasadorja Amerikane në vendin tonë, Yuri Kim, teksa thekson se SHBA kanë dhuruar përmes ndihmave shëndetësore në të gjithë globin, për të luftuar COVID-19, 1 miliard dollarë.

“Siç kemi bërë për HIV/AIDS, malarien, etj., SH.B.A. do të qëndrojë gjithmonë me miqtë dhe do të udhëheqë luftën kundër kërcënimeve globale”, tha ambasadorja Yuri Kim. /atsh

Bashkia e Selenicës vijon shpërndarjen e ndihmave për familjet në nevojë dhe të moshuarit, ku vetëm dje u shpërndanë mbi 400 pako ushqimore.

Kryetari i bashkisë së Selenicës, Pëllumb Binaj, tha për ATSH-në se “gjatë ditës së djeshme shpërndamë 390 pako ushqimore nga bashkia dhe 42 nga rezervat e shtetit”.

Sipas tij, u ndihmuan me ndihma familjet në nevojë në njësitë administrative Selenicë, Armen, Vllahinë, Brataj Kotë dhe Sevaster.

Bashkia e Selenicës do të vazhdojë edhe ditët e ardhshme shpërndarjen e ndihmave për t’iu gjendur sa më pranë në këto ditë të vështira./atsh

Ministrja e Mbrojtjes Olta Xhaçka u shpreh krenare për trupat e Forcave të Armatosura që shërbejnë jashtë vendit, duke sjellë shembullin e nënkolonel Roland Shulit i cili u dekorua nga sekretari i Përgjithshëm i Aleancës me medaljen “NATO Meritorious Service Medal”.

Xhaçka tha se “ushtarakët tanë janë ambasadorët më të mirë të Shqipërisë në misionet apo strukturat ndërkombëtare ushtarake, ku ata shërbejnë”.

“Nënkolonel Roland Shuli është një prej tyre dhe sapo është dekoruar nga sekretari i Përgjithshëm i Aleancës me medaljen “NATO Meritorious Service Medal” për shërbime të shquara. Krenare për nënkolonel Shulin dhe për gjithë burrat dhe gratë në uniformë që shërbejnë në misionet jashtë vendit dhe mbajnë lart emrin e Shqipërisë dhe flamurin kuqezi”, tha Xhaçka. /atsh