Aktualitet

Agrobiznesi po tërheq gjithnjë e më shumë vëmendjen e biznesit për sipërmarrje të reja.
Produktet e bimëve mjekësore e aromatike (BMA) dhe fruta-perimeve, së bashku po udhëheqin rritjen e eksporteve shqiptare, duke zënë rreth 42% të totalit të vlerës së eksportit, në kategorinë e ushqimit, pijeve dhe duhanit, si dhe me rritje në vëllime dhe vlerë, nga viti në vit.
Për vetë ritmet e rritjes dhe potencialin që bart, ky sektor po tërheq vëmendjen e sipërmarrjeve të reja që po shtojnë investimet dhe po shtojnë numrin e të punësuarve.
Në sektorin e grumbullimit të bimëve mjekësore dhe aromatike (BMA) janë të angazhuar rreth 100.000 familje rurale në shkallë vendi, të cilat sigurojnë të ardhurat nga vjelja dhe grumbullimi i BMA-ve.
Rreth 95% e prodhimit të përgjithshëm të BMA-ve eksportohet, duke përfaqësuar 20% të vlerës së eksporteve bujqësore të vendit
Ndërsa zinxhiri i vlerës së këtij sektori, përbëhet kryesisht nga: 35 shoqëri përpunuese dhe eksportuese në shkallë vendi, prej të cilëve 15 eksportues të mëdhenj; 150 grumbullues lokalë në shkallë vendi, prej të cilëve 10 grumbullues rajonalë.
Sektori i BMA-ve paraqet kështu mundësi të mëdha për zgjerim të investime dhe krah të ri pune.
Gjithashtu sektori i fruta-perimeve përbën një tjetër sektor strategjik për eksportet shqiptare.
Ky sektor përbën rreth 30% të vlerës së eksportit të kategorisë së ushqimit, pijeve dhe duhanit. Pritet që ecuria e sektorit të rritet më tej, pasi ka përpjekje nga eksportues që synojnë të hyjnë në tregjet me vlera më të larta në Europë. Aktualisht rreth 65% e të ardhurave nga eksporti i perimeve vjen nga eksporti drejt vendeve të Ballkanit Perëndimor.
Gjithsesi, për të pasur qasje në tregjet cilësore të BE-së, është e domosdoshme të sigurohet përputhshmëria me standardet dhe certifikimet përkatëse. Shumica e rrjeteve të mëdha të supermarketeve në Europë kanë si objektiv të kenë deri në 100% të produkteve të certifikuar në raftet e tyre. Në këtë kontekst, eksportuesit në Shqipëri kanë nisur procesin e certifikimit Global G.A.P në grup, në bashkëpunim me fermerët e tyre, për të realizuar një standard që rrit sigurinë e produktit, mbrojtjen e shëndetit të njerëzve dhe mjedisit.
Ndërsa skemat IPARD dhe skema të tjera përbëjnë një mundësi për përballimin e këtyre investimeve. /atsh

Zv.ministrja e Brendshme, Romina Kuko, bëri të ditur sot të gjitha proceset që do të ndiqen për pranimin e aplikantëve të rinj në Policinë e Shtetit.

Në një intervistë televizive zv.ministrja Kuko deklaroi se do të shqyrtohen të gjitha dosjet e kandidatëve, për të parë nëse ata i përmbushin kriteret bazë.

“Pas aplikimit do ketë shqyrtim të dosjeve, për të parë nëse aplikantët përmbushin kriteret bazë. Pastaj është testi me shkrim, ku pyetjet do bëhen me praninë e ndërkombëtarëve, një intervistë me të gjithë kandidatët dhe një filtër psikologjik të kandidatëve dhe në fund është testi fizik”, – nënvizoi Kuko.

Për testin fizik, tha ajo, kriter është gjatësia, te meshkujt 1.75 m e lart dhe për vajzat 1.65m. /atsh

Ministria e Infrastrukturës dhe Energjisë dhe gjithë institucionet e saj të varësisë kanë qenë në gatishmëri të plotë për të përballuar dhe eliminuar pasojat e motit të keq që përshiu jugun e vendit në mbrëmjen e datës 10 korrik 2019.

Nga raportimet e institucioneve kryesore të infrastrukturës dhe energjisë rezulton se: Situata e akseve rrugore gjatë natës së mbrëmshme në aksin Elbasan-Qafë Thanë ka pasur rënie gurësh. Grupi i mirëmbajtjes ka qenë në gatishmëri gjatë gjithë kohës. Nuk ka pasur probleme me trafikun.

Në aksin Pogradec-Tushemisht një pemë ka bllokuar rrugën pas ndërhyrjes u bë pastrimi dhe hapja e rrugës për trafikun. Aksi Qafë Thanë – Doganë ka pas probleme me rënien e gurëve, ndërsa në Qafë Thanë – Qafë Plloçë ka pas probleme në Qafë Plloçë me rënien e një peme dhe prurje inertesh, por jo probleme serioze ne trafik.

Në rrugën Korçë – Bilisht ka pas rënie peme në Zëmblak, por edhe kjo nuk ka qenë serioze për trafikun. Menjëherë u morën masa për pastrimin dhe largimin e pemëve nga pjesa e rrugës. Bisht i Zhurit-Fier ka pasur dëme vetëm në sinjalistikën vertikale, janë marrë të gjitha masat nga ana jonë për riparimin e tabelave.

Në Vlorë ka pasur inerte në rrugë dhe degë pemësh të thyera. Në Gjirokastër ka pasur rënie të dy pemëve në rrugë dhe një tabelë e madhe informuese në Vanister, ndërsa në zonën e Sarandës një rrëshqitje në segmentin Ura e Kranesë – Qafë Muzinë dhe inerte në zona të ndryshme të bregut.

Grupet e punës të ARRSH vazhdojnë të jenë prezente dhe punojnë që nga nata e mbrëmshme.

Operatori i Shpërndarjes së Energjisë Elektrike

Pasojat e motit sollën dëme të shumta në rrjetin elektrik shpërndarës të OSHEE, që pavarësisht masave tekniko-organizative të marra, e kishte të pamundur të ndërhynte gjatë natës dhe në kushte aspak të favorshme klimaterike. Paraditen e datës 10 korrik, raportohej për 46 fidera të stakuar për shkak të motit të keq dhe rajonet më të prekura ishin Shkodra (Lezha kryesisht), Burreli dhe Durrësi (zona e Fushë-Krujës) dhe kryesisht zonat rurale të vendit, që furnizohen me rrjet ajror 6kV, i ndjeshëm ndaj stuhive, sidomos me shkarkesa atmosferike.

Gjatë orëve në vijim të datës 10 korrik, me rregullimin e pjesshëm të kushteve të motit, u përmirësua situata e furnizimit me energji elektrike në masën 70%. Në veri të vendit pothuajse të gjithë fiderat ishin në punë, por me kalimin e orëve, në mbrëmje, gjendja e motit u përkeqësua duke vijuar deri në orët e para të datës 11. Tashmë rajonet më të prekura nga kufizimi i energjisë elektrike ishin në qendër dhe jug të vendit, si Elbasani, Berati, Fieri, Korça (Pogradeci) dhe Vlora.

Dëmet e shumta mbi rrjetin elektrik gjatë natës sollën ndërprerje të energjisë elektrike në 84 fidera, ku si rezultat i motit të keq me shtrëngata shiu dhe erë të fortë u prekën rajonet Elbasan, Berat, Gjirokastër, Vlorë dhe Fier, ndërsa situata në rajonet e veriut ka qene disi më e qetë natën, përveçse në zonën e Velipojës ku ka pasur stakime.

Aktualisht, sipas raportimit të fundit, ora 12:30 të datës 11 korrik, kemi një përmirësim me 65% të situatës më furnizim të energjisë elektrike, ndërsa rajonet më të prekura vijojnë të jenë Berati, Fieri, Vlora, Gjirokastra dhe tashmë është shtuar edhe Tirana (pjesërisht Kombinati, Shinat e Trenit, Zall Bastari dhe Yzberishti). Është e rëndësishme të theksohet se fiderat që furnizojnë me energji elektrike hidrovoret dhe institucioneve të rëndësisë së veçantë janë në punë. Gjithashtu, rrjeti i tensionit të lartë (TL) 35kv apo dhe Nënstacionet kanë qenë në funksion të plotë. Operatori i Sistemit të Transmetimit OST Për shkak të motit të keq, ka pasur stakime kalimtare linjash TL 110.

Kjo ka shkaktuar ndërprerje të përkohshme të tensionit nga 5 – 10 minuta, në nënstacionet Bulqizë 110, Peshkopi 110, Gjirokastër 110, Drenovë 110, Berat 110 dhe Uznovë 110.

Portet Detare – Nuk janë konstatuar probleme në portet detare të Durrësit dhe Vlorës. Trageti i linjës Vlorë – Brindisi – Vlorë, më datë 11.07.2019 është akostuar me 1 orë vonesë e shkaktuar nga kushtet e vështira meteorologjike në det./atsh

Sipas Shërbimit Meteorologjik Ushtarak, moti parashikohet i kthjellët me vranësira të pakta kalimtare në mëngjes dhe mesditë.

Era do të fryjë me drejtim Verilindje-Veriperëndim deri në 15 m/sek dhe në bregdet deri në 25-30 m/sek.

Përgjatë orëve të mesditës dhe pasdites era përgjatë vijës bregdetare dhe zonat luginore të vendit intensive dhe me rrahje.

Valëzimi në dete i forcës 3-4 ballë.

Temperaturat parashikohen:

QYTETET Temperaturat në °C Sigla
Shkodër 16/27 Diell
Kukës 14/25 Diell
Lezhë 16/29 Diell
Dibër 12/23 Diell
Durrës 19/28 Diell
Tiranë 19/28 Diell
Elbasan 19/29 Diell
Berat 16/30 Diell
Vlorë 20/28 Diell
Korcë 16/25 Diell
Gjirokastër 14/28 Diell
Sarandë 19/28 Diell/atsh

Në këto ditë të nxehta të gjithë ëndërrojmë plazhin, por jo të gjithë kanë mundësi të shkojnë në bregdet. Prandaj zgjidhje për shumë njerëz janë pishinat. Përpara se të shkoni të laheni në pishina duhet të lexoni disa këshilla sesi të kujdeseni.

Sipas specialistëve, sëmundjet më të zakonshme që vijnë nga larja në pishina janë infeksionet e veshit dhe infeksionet e lëkurës. Kjo ndodh për shkak të pranisë së mikroorganizmave të padukshme që ndodhen në ujë.

– Mos u lani kurrë në pishinë, kur keni një plagë të hapur, pasi ndotet uji.

– Mos u lani në pishina kur keni temperaturë apo dhimbje fyti, qoftë edhe e thjeshtë. Këto raste, sipas specialistëve përbëjnë kushtet ideale të rritjes së stafilokokut. Për të reduktuar deri në minimum riskun e infeksioneve, bëni një dush para larjes në pishinë. Ndoshta nuk e dinit, por eliminon 80% të florës bakteriale tranzitore që kemi thithur pa e ditur as ne.

Klori që përdoret në pishina nuk mjafton për të siguruar higjienën totale. Dizifektuesit me bazë klorin formojnë kompozime organo-klorikale, të cilat nëse thithen në sasi të madhe nga personat që notojnë mund të shkaktojnë ekzema dhe skuqje të lëkurës. /atsh