Aktualitet

Kompanitë e teknologjisë së informacionit dhe komunikimit, kryesisht ato italiane, prej vitesh po zhvendosin sipërmarrjen e tyre në Shqipëri.

Ministrja e Financave dhe Ekonomisë Anila Denaj sjell shembullin e Innovaway, që sipas saj, është një prej shumë kompanive italiane që ka investuar në Shqipëri.

E themeluar në vitin 2015, sot ka të punësuar 80 persona, ndërsa parashikon që deri në fund të këtij vitit ky numër të arrijë në 100.

“Jemi këtu për sistemin fiskal shumë më favorizues se sa në Itali. Në 2015 ne ishim vetëm 25 punonjës. Kompanitë serioze duhet të investojnë këtu sepse sistemi fiskal është shumë i mirë. Të kursesh do të thotë të fitosh në fund të vitit”, – thotë Matilda Merxhani, Drejtore e përgjithshme e kompanisë.

Kjo sipërmarrje ofron zgjidhje të personalizuara me teknologji të përparuar që përdoren nga më shumë se 150 klientë, të cilët i përkasin sektorit privat dhe atij shtetëror.

Agjencia Shqiptare e Zhvillimit të Investimeve (AIDA) ofron mbështetje për çdo investitor të huaj ku pjesë e kësaj mbështetje ishte dhe Innovaway. “Kemi përfituar shërbimin “After care dhe shërbimi më i rëndësishëm që kemi pasur ka qenë takimet e shpeshta që kemi bërë me disa universitete, si publike ashtu dhe private për punonjësit që na duhen”, – thotë Merxhani.

Shërbimi “After Care” i AIDA-s do të vazhdojë të mbështesë me asistencë, çdo investitor të huaj, në çdo hap të rritjes së tij./atsh

Instituti i Statistikave (INSTAT) ka planifikuar të kryejë censin e ardhshëm të popullsisë dhe banesave në vitin 2020.

Censi do të ofrojë informacion mbi popullsinë rezidente në Shqipëri dhe karakteristikat e tyre gjeografike, demografike, ekonomike, arsimore, mbi migracionin, banesat dhe karakteristikat e banesave.

Shqipëria gjatë historisë së saj ka kryer gjithsej 11 cense, ku pas viteve ’90 janë zhvilluar vetëm 2 , në vitin 2001 dhe në vitin 2011.

Censi i Popullsisë dhe Banesave 2020 do të luajë një rol vendimtar në përditësimin e informacionit statistikor të nevojshëm në nivel lokal dhe rajonal dhe në kuptimin dhe paraqitjen e ndryshimeve që kanë ndodhur në Shqipëri.

Censi është thelbësor për hartimin e politikave të bazuara në dëshmi dhe përcaktimin e qëllimeve socio-ekonomike dhe planeve për zhvillim të qëndrueshëm në nivel kombëtar, rajonal dhe lokal, si dhe për një sistem statistikor të qëndrueshëm dhe efikas, bazuar në një kombinim të të dhënave administrative dhe të anketës.

Prej 21 tetorit, INSTAT do të nisë aktivitetin pilot të Censit të Popullsisë dhe Banesave, i cili po zhvillohet në terren për 6 javë në 10 zona të caktuara për pilotin./atsh

Këshilli i Ministrave përcaktoi sot kufijtë territorialë e hidrografikë të baseneve ujore në Republikën e Shqipërisë dhe të qendrës së përbërjes së Këshillit të secilit prej tyre.

Sipas këtij vendimi, territori i Shqipërisë, në funksion të menaxhimit të burimeve ujore, ndahet në shtatë basene ujore: baseni ujor Drin-Bunë, me qendër në Shkodër; baseni ujor Mat, me qendër në Lezhë; baseni ujor Ishëm, me qendër në Durrës; baseni ujor Erzen, me qendër në Tiranë; baseni ujor Shkumbin, me qendër në Elbasan; baseni ujor Seman, me qendër në Fier; baseni ujor Vjosë, me qendër në Vlorë.

Në çdo basen ujor funksionon Këshilli i Basenit Ujor (KBU), me kryetar prefektin e qarkut.

Duke përcaktuar përbërjen e këtyre këshillave, qeveria vendosi që anëtarët e KBU-së shpërblehen sipas legjislacionit në fuqi për shpërblimin e anëtarëve të këshillave, bordeve ose komisioneve të përhershme të njësive të qeverisjes qendrore, por jo më shumë se gjashtë pagesa në vit./atsh

Ministri i Brendshëm Sandër Lleshaj zhvilloi një takim me drejtues të shërbimit zjarrfikës në vend, për të diskutuar mbi mënyrat se si mund të përmirësohet kjo strukturë dhe projektet që janë konceptuar në funksion të këtij qëllimi.

Ai vuri theksin te përgatitja dhe rritja e profesionalizmit në radhët e këtij shërbimi.

Lleshaj theksoi se duhet ngritur sa më parë një qendër trajnimi shumë-funksionale për personalin zjarrfikës, ndërsa nënvizoi se marrja e personelit në këtë shërbim duhet bërë vetëm nëpërmjet një shkolle të posaçme.

Ministri u shpreh se shërbimi zjarrfikës duhet të plotësohet me punonjës që kanë përgatitje si forcat speciale, madje duke e krahasuar vështirësinë që duhet të përballin personeli zjarrfikës me ata të trupave speciale, ai tha se sfidat e zjarrfikësve janë më të rënda se ato të trupave speciale të policisë.

“Ne na duhet të kemi një shërbim zjarrfikës që të jetë forcë speciale e Shqipërisë. Ne kemi forca speciale në ushtri, në polici, dhe kjo duhet të jetë një forcë speciale. Në kuptimin që ata që punojnë zjarrfikës duhet të jenë më të fortë se ata të RENEA–s që kemi, në çdo aspekt.

Duhet të jenë më të zotët, në çdo aspekt, sepse e kanë luftën më të fortë sesa luftë me një bandit me kallashnikov, është lufta me një grataciel, që të ngjitesh në katin e 20-të me shkallë, nëpër flakë e të dalësh me sukses. Është punë që pak njerëz e bëjnë. Me këtë synim duhet të ecim për të krijuar një shërbim, i cili ka këtë standard, të paktën t’i kemi si këto FNSH-të, si këto RENEA-t, në këtë nivel, njerëzit, por edhe standardet e tjera,” tha Ministri.

Në lidhje me projektet që janë ideuar dhe do të punohen, Ministri Lleshaj u shpreh se “përveç ligjit njëherë që duhet ta shohim, duhen hartuar disa dokumente bazë, disa strategji bazë, që kanë të bëjnë me arsimimin, me kualifikimin, me rekrutimin, promovimin në karrierë. Duhet të hartojmë një tabelë të organizimit të pajisjeve standard. Të dimë se çfarë ka një stacion. Një stacion në Dropull, edhe në Tropojë, duhet të jetë në të njëjtin organikë. Qoftë si stacion, qoftë individët, pra për t’i standardizuar këto gjëra.
Duhet të punojmë për të hartuar disa projekte të rëndësishme. Projekti i parë që unë kam ndërmend të merrem është projekti për qendrën e trajnimit të zjarrfikësve. Mbetet kërkesë imediate, një orë e më parë duhet bërë! Dhe thashë, ne do të punojmë për ta perceptuar si një qendër trajnimi shumëfunksionale, ku zjarrfikësit kanë një bllok të vetin,” theksoi Lleshaj.

Për rekrutimin e personelit në shërbimin zjarfikës, Ministri tha se “hyrja në shërbimin zjarrfikës duhet të ketë vetëm një derë dhe kjo do të jetë dera e shkollës. Si çdo shërbim profesional në botë, nuk hyhet nga dritarja, hyhet nga dera kryesore, e cila është e cila është shkolla “X”. Bën trajnimin bazë i cili është 6 muaj apo 1 vit, futesh dhe pastaj ngjitesh”.

Ministri u shpreh gjithashtu edhe për rritjen e profesionalizmit në radhët e shërbimit zjarfikës dhe nënvizoi se “do të bëjmë shumë projekte, të cilat do të bëhen në mënyrë të përqendruar, dhe do të ekzekutohen nga bashkitë. Qeveria u jep bashkive fonde të pakushtëzuara. Dhe kur ua jep këto, u thotë që “do t’ju jap kaq, por kaq i ke për uniformat, kaq i ke për të blerë zjarrfikëse të reja!”

Qëllimi është të arrijmë një sistem dhe një trupë zjarrfikëse, e cila të jetë profesioniste. Na shërben më shumë, se sa shumë struktura të tjera”. /atsh