Aktualitet

Kuvendi votoi sot me 105 vota pro Elsa Toskën dhe Fiona Papajorgjin si anëtare të Gjykatës Kushtetuese.

Kryetari i Kuvendit, Gramoz Ruçi sqaroi se, Këshilli i Legjislacionit e ka konsideruar kushtetuese procedurën e ndjekur, ndaj edhe vijoi me procesin e votimit.

“Për transparencë sot jemi në seancë që e kemi zhvendosur nga e enjtja, në të hënë, kjo për të plotësuar afatin 30-ditor që detyron Kuvendin të shprehet lidhur me kandidaturat që KED i ka çuar Kuvendit. Deputetët janë vënë në dijeni të qëndrimit të Presidentit, lidhur me këtë i jap drejtuar KED-së, e cila i është përgjigjur kërkesës me arsyetimet përkatëse, dhe konkludon se kandidatja e parë automatikisht është e zgjedhur anëtare. Duke pasur parasysh që kishte vlerësime politike dhe proceduriale i jam drejtuar këshillit legjislacionit që është i vetmi mekanizëm që ka Kuvendi, që jep mendimin për kushtetutshmërinë. Këshilli ka konkluduar se duke parë propozimet e KED etj., dhe procedurën që do të votojmë ka arritur në konkluzionin që është tërësisht kushtetuese”, – tha Ruçi.

“Në listën e KED ishin renditur: Arta Vorpsi, Elsa Toska, Besnik Muçi, ky i fundit i dekretuar nga Presidenti. Nga lista e paraqitur nga KED, Arta Vorpsi rezulton të jetë shpallur emëruar për vendin vakant, pas plotësimit të afatit 30-ditor, dhe në mungesë të ushtrimit të dekretimit, është botuar në fletore zyrtare. Kandidati i tretë gjithashtu i botuar në Fletoren Zyrtare, me dekret të Presidentit”, – tha Ruci.

“105 vota pro. Elsa Toska shpallet fituese për anëtare të Gjykatës Kushtetuese pas votimit të Kuvendit”, u shpreh Kryeparlamentari në përfundim të procesit të votimit.

Kuvendi gjithashtu votoi edhe Fiona Papajorgjin me 105 vota pro si anëtare e Gjykatës Kushtetuese.

Kuvendi miratoi sot projektligjin “Për aderimin e Republikës së Shqipërisë në Komisionin Ndërkombëtar për Eksplorimin Shkencor në Detin Mesdhe”.

Gjithashtu Kuvendi rrëzoi projektligjin “Për faljen e gjobave të vendosura nga Autoriteti Kombëtar i Ushqimit ndaj operatorëve të biznesit ushqimor”

Në Kuvend u miratua edhe zgjedhja e Pranvera Strakoshës në postin e Komisionerit për Mbikëqyrjen e Shërbimit Civil.

Kuvend miratoi edhe kalendarin 3-javor të punimeve të Kuvendit për periudhën 25 nëntor – 13 dhjetor 2019.

Kuvendi miratoi edhe kalendarin e veçantë të shqyrtimit të projektligjit të buxhetit dhe të projektligjeve financiare që kanë lidhje me të.

Kuvendi miratoi edhe projektligjin “Për aderimin e Republikës së Shqipërisë në Konventën Ndërkombëtare për Luftën Kundër Falsifikimit të Monedhës”./atsh

Janë 27 fëmijë të institucioneve të përkujdesit social të cilët janë birësuar apo janë kthyer në familjet e tyre biologjikë.

Në Ditën Botërore të Jetimëve, Ministrja e Shëndetësisë dhe Mbrojtjes Sociale, Ogerta Manastirliu ka ndarë historinë e Noes, i cili u birësua 5 muaj më parë.

“Prej pak muajsh Noes ka një familje që mezi e ka pritur “Muajt dhe ditët deri kur e morëm djalin në shtëpi më dukeshin vite, sot, na ka ndryshuar jeta, e kemi shtëpinë plot”! Manushaqja është sot nënë e lumtur e Noes 22 muajsh dhe thotë se birësimi i të voglit ka qenë gjëja më e bukur që i ka ndodhur në jetë”, shprehet Manastirliu.

Manastirliu thotë se po punohet çdo ditë për t’u mundësuar një familje, fëmijëve pa kujdes prindëror.

“Si Noes, 13 fëmijë të institucioneve të kujdesit social janë birësuar gjatë këtij viti; 14 fëmijë janë kthyer në familje biologjike. 217 fëmijë marrin përkujdesje në 9 institucionet e kujdesit social në të gjithë vendin. Me planin e deinstitucionalizimit punojmë çdo ditë pë t’i mundësuar çdo fëmije pa përkrahje prindërore një familje”, tha ministrja. /atsh

Projektbuxheti i vitit 2020 për Ministrinë e Bujqësisë dhe Zhvillimin Rural, ka përcaktuar një sërë prioritetesh, që synojnë rritjen e prodhimit vendas dhe mbështetjen e fermerëve.

Sipas relacionit që shoqëron projektbuxhetin 2020, në listën e prioriteteve renditen; rritja e numrit të fermerëve që përfitojnë nga skema e mbështetjes financiare, rehabilitimi i veprave mbrojtëse nga përmbytjet, rritja e numrit të punësuarve në bujqësi dhe agropërpunim dhe forcimi i kontrollit të sigurisë ushqimore e veterinare në vend.

Prioritetet e sektorit të bujqësisë, për periudhën afatmesme 2020-2022, janë:

Garantimi i sigurisë ushqimore, shëndetit dhe mirëqenies së kafshëve, dhe shëndetit të bimëve përmes adoptimit të standardeve përkatëse të BE-së në kuadrin normativ vendas; Konsolidimi i pronësisë mbi tokën bujqësore, administrimi i qëndrueshëm, ruajtja e saj nga dëmtimi, gërryerja, shpërdorimi dhe faktorë të tjerë; Nxitja e tregut të tokës dhe konsolidimi i fermës bujqësore duke rritur sipërfaqen dhe nxitur kooperimin; Mbështetje për agroindustrinë; Mbështjetje për tregjet dhe marketingun e produkteve bujqësore dhe blegtorale; Administrimi i sistemit të ujitjes nëpërmjet kujdesit, sigurimit dhe administrimit të qëndrueshëm të sistemit të ujitjes dhe shmangia e përmbytjeve; Mbështetje financiare dhe asistencë teknike për fermerët; Zhvillimin i qëndrueshëm i sektorit të peshkimit dhe akuakulturës, shfrytëzimin e përgjegjshëm të burimeve peshkore dhe kapaciteteve të flotës së peshkimit si dhe ngritjen e një sistemi kontrolli dhe inspektimi për peshkimin në det, në tokë dhe në të gjithë zinxhirin e tregut. Rritja e % së fermerëve që përfitojnë nga përmirësimi i infrastrukturës ujitëse dhe kulluese

Në fushën e zhvillimit Rural duke mbështetur Prodhimin Bujqësor, Blegtoral, Agroindustrial dhe Marketingun” synon rritjen e produktivitetit dhe konkurrueshmërisë së produkteve bujqësore dhe blegtorale përmirësimi i standardeve dhe garantimi i sigurisë ushqimore, si dhe zhvillimi i zonave rurale për një zhvillim bujqësor dhe rural të qëndrueshëm përmes nxitjes së shumëllojshmërisë së veprimtarive ekonomike në zonat rurale. /atsh

Në Qendrën për Hapje dhe Dialog, në kryeministri u çel sot ekspozita “Përtej Kujtimeve”, me rastin e 70-vjetorit të marrëdhënieve Shqipëri-Kinë.

“Përtej Kujtimeve” ekspozon një koleksion pullash përkujtimore me tematikë Kinën, të lëshuara nga Posta Shqiptare përgjatë viteve 1968-2009, gjithashtu dhe vepra tradicionale artistike nga qyteti Nanjing, Kinë.

Në aktivitetin e zhvilluar mori pjesë Kryeministri Edi Rama, Ambasadori i Republikës Popullore të Kinës në Shqipëri, Zhou Ding, diplomë e zyrtarë të shumtë të cilët shijuan ekspozitën e rrallë, e cila u hap në kuadër të aktiviteteve që po zhvillohen në Tiranë me rastin e 70-vjetorit të vendosjes së marrëdhënieve mes dy vendeve.

Gjatë fjalës së mbajtur me këtë rast, Rama tha se “kjo ekspozitë është shumë modeste për përmasën e veçantë të një marrëdhënie që daton 70 vjet, është sidoqoftë një moment kremtimi pikërisht këtij 70-vjetori. Një marrëdhënie sa e çuditshme aq edhe e veçantë mes një prej vendeve më të vegjël të Lindjes Europiane dhe më të madhin vend të lindjes së vetë rruzullit tokësor. Ky aktivitet është një moment kthimi vështrimi tek e shkuara nëpërmjet imazhesh që në shumicën e tyre na janë të njohur. Megjithatë, e përsëris që as kjo ekspozitë dhe as të gjitha aktivitetet e organizuara për këtë vit simbolik të marrëdhënies mes Shqipërisë dhe Kinës, nuk mund të përtërijë të gjithë afishën shumëngjyrëshe të kësaj historie”.

Rama tha ndër të tjera se “nga ana tjetër besojmë shumë që Kina është një potencial i pashfrytëzuar në aspektin kulturor dhe në aspektin e të gjithë asaj që sjell bashkë me një kulturë kaq të larmishme, edhe një dije shumë të thelle dhe gjithanshme. E them këtë sepse midis kulturave tona ka pasur dikur një marrëdhënie dashurie, të gjithë e mbajnë mend por sot ka një boshllëk që me vënien në funksion të disa elementëve të dy realiteteve të reja, të mund të sjellë shumë më tepër seç ka sjellë në të shkuarën.

Ambasadori i Kinës në Shqipëri, Zhou Ding u shpreh se “Kina brohoret për çdo përparim që bën Shqipëria dhe gjithmonë dëshiron t’i ofrojë ndihmë asaj. Ndjesia është e ndërsjelltë dhe siç tregohet edhe në 16 pullat e ekspozuara këtu sot me temë “Kinën” të emetuara nga Shqipëria në periudha të ndryshme historike, ne shohim një vend 10 mijë milje larg Kinës që Kinën e ka parë gjithmonë në një këndvështrim mjaft të apasionuar. Këto pulla të vogla janë përqendrim i ndjenjave thella të të dy popujve dhe kam vënë re që shumë vepra arti janë për miqësinë tonë. Artistët folklorikë gjithashtu edhe nxënësit e shkollave të mesme dërgojnë përshëndetjet e tyre nga Kina në Shqipëri nëpërmjet paper-cutting që është arti tipik i punës së dorës. Veprat e artit janë magjike sepse kapërcejnë hapësirat dhe kohën për të na lidhur. Unë shpresoj që lidhja miqësore midis nesh të mos të prishet nga askush dhe asnjë forcë. Shpirti i një vendi, i një populli të tij mund të perceptohet përmes kulturës dhe artit të tij. Si Kina ashtu edhe Shqipëria janë vende që e dashurojnë artin dhe shkëmbimet artistike midis nesh kanë qenë mjaft aktive sepse ne ndajmë vlerat e hapjes dhe gjithëpërfshirjes dhe nuk janë të vetmet vlera që ne ndajmë sepse historia na ka mësuar që të festojmë sidomos kulturën, pavarësinë, dinjitetin tonë”.

Ekspozita do të qëndrojë e hapur deri në datën 29 nëntor./atsh