Shërbimi Meteorologjik Ushtarak bën me dije se moti sot do të jetë i kthjellët në të gjithë territorin falë kushteve të qëndrueshme atmosferike.
Era, do të fryjë me drejtim Juglindje – Verilindje, 1-10m/sek, hera herës me rrahje në bregdet dhe zonat luginore deri në 18m/sek , duke u shoqëruar me një valëzim të forcës 2-4 ballë.
Presidenti i Republikës, Ilir Meta i është drejtuar sot deputetëve të Kuvendit në lidhje me zgjedhjen e anëtarëve të Gjykatës Kushtetuese.
Presidenti Meta është shprehur se, “sot është një ditë tepër e rëndësishme për të treguar përgjegjshmëri për të ardhmen europiane të Shqipërisë”.
“Ju e dini që krijimi i Gjykatës Kushtetuese është një nga nëntë kushtet kryesore të Bundestagut gjerman për çeljen e negociatave me Bashkimin Europian. Kushtetuta e ka përcaktuar qartë radhën se si kryhen emërimet për anëtarë të Gjykatës Kushtetuese! Presidenti i Republikës e zgjodhi anëtarin e parë të saj menjëherë ! Tani është radha e Kuvendit të zgjedhë anëtarin e dytë, edhe pse me vonesë!”, ka theksuar presidenti Meta.
“Presidenti po e ndjek me vëmendje këtë proces dhe do të shprehet menjëherë brenda 24 orëve për të zgjedhur anëtarin e tretë sapo Kuvendi të ketë shprehur vullnetin e tij”, ka shtuar Meta.
Ndaj, ka nënvizuar ai, “ju lutem, gjeni pesë minuta kohë, lexoni nenin 179, pika 2 dhe 12 të Kushtetutës dhe nenin 86 pika 4/a/c të ligjit për Gjykatën Kushtetuese dhe veproni pa humbur kohë!”
“Sa për marifetet e individëve të verbër partiakë të sistemit të drejtësisë dhe botimet kontrabandë në Fletoren Zyrtare, do t’i zbardhim për ju dhe publikun pak më vonë, bashkë me mbledhjet e pazbardhura të KED!!! Përshëndetje nga Forumi i Paqes në Paris!”, ka përfudnuar Meta.
Kuvendi zhvillon sot seancën plenare ku do të diskutohet për projektvendimin “Për zgjedhjen e anëtarit të Gjykatës Kushtetuese./atsh
“Njerëz të Padukshëm” solli sot historinë frymëzuese të tre vajzave gjimnaziste që me aplikacionin e tyre GjejZâ, që u vjen në ndihmë grave dhe vajzave të dhunuara, përfaqësuan Shqipërinë në konkursin Technovation Challenge në Silicon Valley, San Francisco ku u u shpallën edhe fituese.
Dea Rrozhani, Jonada Shukarasi dhe Arla Hoxha, pjesë e grupit ” D3c0ders” krijuan GjejZâ, një aplikacion që ndihmon gratë shqiptare me qasje në burimet e nevojshme për t’i ndihmuar ato të kapërcejnë pasojat e dhunës me bazë gjinore.
“Në divizionin tonë ishin 6 skuadra nga 173 që ishin në gjysmë finale dhe për ne ishte diçka e madhe të ishim atje dhe sidomos për Shqipërinë, e cila ka katër vjet që merr pjesë në Technovation Challenge dhe kjo ishte hera e parë që një skuadër kalonte në finale”, shprehet Dea Rrozhani.
Jonada Shukarasi tregon se “kur tha emrin decorders që ne kishim fituar çmimin e parë nuk na besohej dhe pastaj pamë njëra tjetrën dhe filluam të qanim”.
“Shumë e madhe, por që vjen edhe me shumë përgjegjësi se në fund të fundit ne nuk përfaqësonim vetëm veten, projektin tonë , por jemi duke përfaqësuar një vend. Duke parë lajmet dhe sesa prezent ishte problemi i dhunës me bazë gjinore, zgjodhëm që gjithë këtë kohë, që ne harxhojmë para kompjuterit, në celularët tanë ta kanalizonim në diçka që është në të mirë të komunitetit dhe ndërtuam GjejZâ”, thekson Rrozhani.
Sipas saj, ky është i pari aplikacion i llojit në Shqipëri, ai ndërthur organizata joqeveritare shërbimet që ofron qeveria dhe specialistët, të gjithë në një aplikacion, vetëm një prekje larg.
“Ka mbi 30 organizata joqeveritare në Shqipëri që ofrojnë shërbime per gra në situata të tilla si dhe 31 koordinatorë bashkie. Por arsyeja pse gratë nuk i përdorin këto shërbime që u ofrohen sepse u mungon informimi”, shprehet Jonada duke shtuar se GjejZâ e ka një domethënie gjej zë, gjej zërin tënd.
Së shpejti, shton ajo, GjejZâ do të jetë i disponueshëm në google playstore dhe në apple appstore.
“Sidomos ne në këtë moshë në adoleshencë kemi një perspektivë shumë të ndryshme të problemeve të sotme nga çfarë kanë të rriturit , ndaj është shumë e rëndësishme që ne të angazhohemi për ti zgjidhur problemet që shohim në komunitet”, thotë Dea.
Jonada sqaron se “nuk është kurrë herët për të filluar , madje pavarësisht se ne jemi shumë të vogla , pjesa më e madhe e problemeve me të cilat përballet shoqëria janë shumë të prekshme dhe shumë të afërt për ne prandaj nuk mund të qëndrojmë indiferent”.
D3C0ders janë një ekip i dedikuar për nxitjen e ndryshimeve pozitive sociale përmes zhvillimit teknologjik dhe programimit. Përmes seminareve të zhvillimit të aftësive, burimeve të bollshme dhe stafit të angazhuar të siguruar nga Këndi Amerikan në Tiranë, D3C0ders ishin në gjendje të vinin dijet e tyre së bashku dhe të hynin në Sfidën Technovation të këtij viti./atsh
Kryeministri Edi Rama solli në vëmendje gjatë konferencës së përbashkët pas samitit të Ohrit, se Kosova nuk duhet të vetëpërjashtohet nga procesi, për të cilin është dakordësuar me 6 vende të Ballkanit Perëndimor në shumë tryeza të tjera, si në Sofje, Londër, Poznan, Vjenë, Durrës Shkup apo Ulqin e Sarajevë.
Duke u ndalur tek mungesa e përfaqësimit të Kosovës në samitin e Ohrit ku u dakordësua përshpejtimi i zbatimit të marrëveshjeve për 4 Liritë e Bashkimit Europian në rajonin e Ballkanit Perëndimor – Liria e Lëvizjes së Njerëzve; Mallrave; Shërbimeve; Kapitaleve, Rama deklaroi se “nuk është ky momenti për të shpjeguar pse, sipas meje, bëjnë sikur nuk kuptojnë, apo nuk duan të kuptojnë, por është momenti për të thënë që sa herë jemi takuar, jemi ulur, kemi biseduar dhe kemi dakordësuar për gjithçka që shkruhet e zeza mbi të bardhë, tanimë jo si një dokument mirëkuptimi, por si një plan veprimi në këtë nismë mes liderësh të 6 vendeve të Ballkanit Perëndimor në Sofie, në Londër, në Poznan, në Trieste, në Paris, në Berlin, në Bruksel, në Vjenë, në Durrës, në Shkup, në Sarajeve, në Ulqin, me sa unë kujtoj, nuk më rezulton se në gjithë këto takime, Serbia apo Bosnje Hercegovina e kishin njohur Kosovën”.
“Por kjo nuk e ka penguar as Presidentin e Kosovës, as Kryeministrin e Kosovës të marrin pjesë dhe të flasin në emër të Kosovës, si të barabartë me të tjerët dhe të dakordësohen për të gjithë elementët e kësaj nisme, në dokumente të bashkëmiratuar me partnerët tanë europianë”, theksoi kryeministri.
“Në kujtesën time, pas luftës për pavarësinë e Kosovës u desh një kohë jo e shkurtër që përfaqësuesit e shtetit të ri të Kosovës të pranoheshin në tavolinë, qoftë nga autoritetet e atëhershme të Serbisë, qoftë nga autoritetet e atëhershme të Bosnjë-Hercegovinës, kur bëhej fjala për takime ndërkombëtare, sepse asnjëra nga të dyja palët nuk pranonte të ulej me ta në tavolinë.
Tani, prej të paktën prej 5 vjetësh nga nisja e Procesit të Berlinit, pjesëmarrja e Kosovës as është vënë kurrë në diskutim dhe nuk di, mbase nuk arrij dot ta kuptoj, por as e gjej dot interesin, as e gjej dot përfitimin nga rikthimi vite e vite të largëta më parë, kësaj radhe, jo me mospranim, por me vetëpërjashtim”, tha Rama.
“Bashkëpunimi rajonal dhe njehsimi i katër lirive të Bashkimit Europian në bashkëpunim me vendet e rajonit, përfshi edhe Serbinë, edhe Bosnje Hercegovinën, të cilat nuk e njohin Kosovën, nuk do të thotë as se Shqipëria ka ndryshuar qëndrim ndaj Serbisë lidhur me njohjen e Kosovës, as se kam ndryshuar mendimin tim, që unë publikisht e kam thënë në vizitën time të parë në Beograd, se Serbia duhet të njohë Kosovën. Por, në ndërkohë, moszgjidhja ende e kësaj çështje nuk është absolutisht një arsye që Kosova papritur të vetëpërjashtohet, apo aq më tepër nuk është një arsye që Shqipëria dhe Kosova të mos mbrojnë interesat e zhvillimit ekonomik dhe social të qytetarëve të tyre, të cilat kalojnë përmes integrimit, kalojnë përmes bashkëpunimit, kalojnë përmes gjithëpërfshirjes dhe jo përmes vetëpërjashtimit dhe izolimit”, theksoi ai.
“Pyetja e thjeshtë që do ndihmonte qytetarët e Kosovës dhe të Shqipërisë që kanë kaq vite që heqin të zitë e ullrit në kufi është nëse do të donin të vazhdonin me mallrat që presim me orë e ditë, me njerëzit që mbajnë radhë kilometrike në kufi apo do donin që njësoj si në gjithë Ballkanin Perëndimor edhe mes Shqipërisë dhe Kosovës të çelet plotësisht kufiri për 4 liritë e BE”, tha Rama.
“Një pyetje e thjeshtë do të ndihmonte qytetarët e Kosovës, por edhe të Shqipërisë, që kanë kaq vite që heqin të zitë e ullirit në kufirin midis Shqipërisë dhe Kosovës; A do të donin të vazhdonte njësoj historia me mallrat që rrinë presin me orë dhe ndonjëherë edhe me ditë dhe me njerëzit që mbajnë radhë kilometrike për të hyrë në krahun tjetër, apo do të donin që njësoj si në të gjithë Ballkanin Perëndimor, edhe mes Shqipërisë dhe Kosovës të çelej plotësisht kufiri për të katër liritë e lëvizjes së Bashkimit Europian; liria e lëvizjes së njerëzve; liria e lëvizjes së mallrave; liria e lëvizjes së kapitaleve; liria e lëvizjes së shërbimeve”, nënvizoi Rama.
“Unë besoj se heqja e kufirit mes vendeve të Ballkanit Perëndimor nuk është një “Minishengen”. Nuk e di kush e gjeti këtë fjalën “mini”. Të paktën mua personalisht, kjo “mini” nuk më konvenon. Sepse duke qenë edhe 198 centimetra, s’jam ndjerë kurrë pjesë e ndonjë “mini”, tha ai.
“Ashtu sikundër, nëse duam ta quajmë ashtu siç është, është WB Shengen, (Western Balkan Schengen) që do të thotë që të gjithë qytetarët, jo vetëm ata të BE-së, por dhe ata të këtij rajoni, kanë të drejtë të lëvizin lirisht në të gjithë rajonin, kur të duan, ku të duan, pa patur pengesat absurde që kanë sot. Pengesa, të cilat përkthehen në kosto marramendëse. Janë miliarda euro që rajoni i ka humbur dhe i humb, që do të thotë ne i kemi humbur dhe i humbim si vende nga ky lloj barrikadimi pas kufijsh, të cilëve u ka dalë përfundimisht koha dhe funksioni”, vijoi kryeministri.
“Unë e konsideroj me rendësi të veçantë në këtë nismë që kufiri midis Shqipërisë dhe Kosovës, njësoj si të gjithë kufijtë e tjerë, të zhduken dhe që kjo e ka dakordësinë edhe të palëve të tjera, përfshirë edhe Serbinë. Kush flet për Jugosllavi mbase ka jetuar shumë gjatë në Jugosllavi. Unë nuk kam jetuar asnjë ditë në Jugosllavi dhe kush flet për rilindjen e Jugosllavisë mbase është ende i lidhur me kujtimet e Jugosllavisë. Unë nuk kam asnjë kujtim nga Jugosllavia.
Ndërsa kush flet për Shqipëri të madhe, kur unë flas për heqjen e kufirit mes Shqipërisë dhe Kosovës, tani do duhet thjeshtë të heshtë. Nuk ka mundësi që unë të jem edhe “mini-jugosllav”, edhe “shqiptaro-madh”. Unë jam thjesht një qytetar europian, që s’po bëj asgjë të re, por thjesht po marr pjesë në një proces që e kam kërkuar vetë prej vitesh, që të mos mbetemi thjeshtë e vetëm pjesëtarë të nismave që organizohen në Bruksel dhe thjesht e vetëm pre e proceseve burokratike që nuk përkthen në të mira për qytetarët”, përfundoi Rama. /atsh
“Nuk është politikë e mirë për Kosovën që të sulmohet politika e Shqipërisë, nuk sjell asgjë të mirë që të vetë përjashtohet Kosova pa asnjë arsye. Çfarë ka ndodhur që s’ka ndodhur më parë dhe në kohën e ndezur të debatit të tarifës, Kosova ka qenë pjesëmarrëse dhe është ulur në tavolinë, ku secili ka mbajtur pozicionin e tij. Kjo s’ka penguar vijimin e diskutimit. Nuk di të ketë pasur ndonjë zgjidhje në botë duke u vetëizoluar”-, tha kryeministri Rama, duke folur për mediet shqiptare pas samitit të Ohrit.
“Jam i befasuar nga deklarata e Isa Mustafës. Të flasësh për këtë proces për një proces që rikrijon Jugosllavinë është e tepërt dhe jo fort elegante. Çfarë është Shengeni ballkanik dhe lajmi këtu është pjesëmarrja e Serbisë. Pasi kjo nisëm është refuzuar nga BE dhe Serbia, të cilat e kanë parë si kërcënim. Sot kur Serbia lëshon në këtë drejtim sepse sheh interes që të përfitojë nga shtetet e tjera ne kundërvihemi. Sa herë është folur për hapjen e kufijve, është vënë kuja për Shqipërinë e madhe. Unë i kam thënë Vuçiç se nëse nuk përfshihet lëvizja e lirë ne nuk përfshihemi. Kam dëgjuar nga Albin Kurti që ka thënë se Kosova është mirë të jetë në tryeza por unë nuk marr përsipër të bëj më të madhin dhe të bind njeri. Janë liderët e Kosovës që vendosin”-, tha Rama.
“Nuk kemi marrë ndonjë nismë ta pa-dakordësuar nga 6 vendet. Fakti është se kjo gjë nuk ka ndodhur. Nuk është një nismë për të shpikur ndonjë gjë të re. Këto janë qasje dritëshkurtra të atyre që bëjnë sikur nuk kuptojnë. Unë se bëjë këtë as për Serbinë, as për Malin e Zi, as për Bosnjen, as për Maqedoninë e Veriut, por për Shqipërinë dhe Kosovën. Për Shqipërinë, se këto vende drejtohen nga të tjerë njerëz, unë skam asnjë lidhje dhe asnjë kapacitet për të punuar dhe folur për interest e tyre, por kam interes Shqipërinë, por nëse heqim kufirin, dhe realizojmë lëvizjen e lirë të plotë, gjë që nuk e bëjmë dot vetëm, pasi nuk të lë njëri ta bësh, të bllokojnë nga katër anët, se s’jemi as SHBA dhe as Kina, por jemi dy shtete shqiptare, që jemi të vegjël, por që duhet të bëjmë gjërat me vizion. Si t’ja u shpjegojë unë juve një gjë që është gjëja më e qartë dhe që është ndoshta e vetmja gjë si dritë e diellit, pa Serbinë në këtë proces nuk mund të hiqen kufijtë, është dhe Bosnja që është kundër, por është një tjetër aktor më me pak revelancë”-, tha Rama. /atsh
“Të gjithë duhet të biem dakord se Ballkani po ndryshon. Plani parashikon lëvizjen e lirshëm, me kartë identiteti të qytetarëve të këtij rajoni”.
Kështu u shpreh sot Kryeministri i Maqedonisë së Veriut, Zoran Zaev, në konferencën e përbashkët për shtyp bashkë me liderët e vendeve të Ballkanit Perëndimor, pas punimeve të samitit të Ohrit, ku ndër të tjera theksoi se, “Serbia , Maqedonia e Veriut dhe Shqipëria hapën një nismë ku ftojnë vendet e tjera të Ballkanit Perëndimor të bëjnë më shumë nga ajo që jemi duke bërë përmes procesit të Berlinit dhe agjendës Europiane ekonomike. Të gjithë duhet të pajtohen se Ballkani po ndryshon në një vend më të mirë dhe faktor më i rëndësishëm në Europë”.
“Nisma që paraqesim, flet për një ëndërr të qytetarëve dhe ky është Ballkani i ri modern i shekullit të 21, ku qytetarët nga gjithë rajoni kërkojnë të avancojnë për kushte më të mira për gjeneratat e reja, si ti motivojmë të rinjtë për të kontribuar më shumë në vendet tona përmes potencialeve të përbashkëta dhe nxitje të investimeve të huaja, por dhe të nxisim vëmendjen e partnerëve tanë”- tha ai.
“Plani parashikon lëvizjen e lirshëm, me kartë ID të qytetarëve të këtij rajoni. Paraqesim një ëndërr për qytetarët e vendeve tona, një Ballkan të ri Perëndimor, me më shumë investime për të rinjtë. Nisma parashikon në të gjithë ditët e javës mundësinë e lëvizjes së qytetarëve me kartë ID, qarkullim të shpejtë të kamionëve, mundëson kushte për planveprimi me qëllim njohjen e ndërsjelltë të dokumenteve nga agjencitë e ushqimit të veterinarisë, me qëllim që të jepet mobilitet kapitalit dhe shërbimeve që paraqesin 4 liritë europiane. Sjell të mira për të gjithë Ballkanin dhe na faktorizon më shumë në Europë” -u shpreh Zaev./atsh
Kreu i Partisë Demokratike, Lulzim Basha ka reaguar lidhur me samitin e Ohrit, ku u diskutua përshpejtimi i zbatimit të 4 lirive të BE-së në Ballkanin Perëndimor.
Sipas Bashës, “lëvizja e lirë e njerëzve, mallrave, shërbimeve dhe kapitalit është thelbi i integrimit europian dhe Europës së bashkuar. Parakushte për lëvizjen e lirë janë demokracia, sundimi i ligjit dhe garantimi i të drejtave dhe lirive themelore të njeriut”.
“Dështimi me integrimin europian nuk mund të zëvendësohet nga propaganda anti-europiane e një autokrati të korruptuar, shkaktar i prapambetjes ekonomike dhe varfërimit të qytetarëve shqiptarë. Ka ardhur koha që Shqipëria të nxjerrë në dritë potencialin e saj të vërtetë!”-, nënvizoi Basha./atsh
Zyrat e Punës po funksionojnë si instrumente strategjikë të punësimit në të gjithë vendin.
Ministrja e Financave dhe Ekonomisë, Anila Denaj, bëri të ditur sot se, “491 punësime janë realizuar gjatë kësaj jave nëpërmjet Zyrave të Punës”.
Gjithashtu vijon procesi i punësimit nëpërmjet Zyrave të Punës, ku ministrja Denaj sjell në vëmendje rastin e Leonisës, e cila pasi kreu praktikën profesionale, të mundësuar nga Zyra e Punësimit Has, aplikoi për punë pranë një kompanie.
Pas periudhës së provës, ajo sot është e punësuar si ekonomiste pranë kësaj kompanie.
Falë Shërbimit Kombëtar të Punësimit, çdo shtetas tashmë ka mundësinë që jo vetëm të kërkojë punë, por edhe të trajnohet për përmirësimin e aftësive personale./atsh
