Aktualitet

Luan Kapaj, shefi i ndërhyrjes në Stacionin zjarrfikës të bashkise së Vlorës, pas operacionit të shpëtimit të një tjetër banori në Durrës. Probleme me rrugët e frymëmarrjes.
Urime dhe një Bravo e madhe për Shërbimin Zjarrfikës! Një tjetër jetë e sigurt !

Zjarrfikësit e sakrificës, heronjtë e gjallë po punojnë në kushtet ekstreme për të shpëtuar jetë njerëzish !
Luan Kapaj, zjarrfikësi nga Vlora ka shpëtuar një prej të mbijetuarve nën rrënoja dhe lufton për të shpëtuar të tjerë, me gjithë forcën e tij fizike dhe shpirtërore!

Ekipet e kërkim-shpëtimit po punojnë me kujdes për nxjerrjen e personave të mbijetuar nën rrënojat e disa ndërtesave që u shembën, pas tërmetit të fortë me magnitudë 6.3 Rihter që goditi vendin tonë mëngjesin e së martës.

Gazetarja e ATSH-së, Zina Tosku raporton nga Durrësi se ekipet e shpëtimit kanë mbërritur që prej momenteve të para pas tërmetit pranë çdo banesë të dëmtuar duke bërë të pamundurën për të shpëtuar jetë./atsh

Instituti i Gjeoshkencave, Energjisë, Ujit dhe Mjedisit po monitoron të gjithë situatën e pas tërmetit dhe pasgoditjeve të lëkundjeve sizmike që prej orës 03:54 minuta të ditës së sotme.

Në një prononcim për ATSH, sizmolog i IGJEUM, Rexhep Koçi shprehet se tërmeti i regjistruar mëngjesin e sotëm, me magnitudë 6.3 të shkallës Rihter, thellësi 40 km i lokalizuar në veri të Durrësit, u shoqërua nga një numër i konsiderueshëm pasgoditjesh, të cilat kanë qenë më të lehta çka provon rënien e aktivitetit sizmik gjatë ditës.

Deri në orën 15:00 të ditës së sotme janë regjistruar 250 pasgoditje me magnitudë nën 5 të shkallës Rihter. Ne vazhdojmë të ndjekim situatën. Jemi duke monitoruar çdo moment, por trendi tregon që tërmeti është duke ulur fuqinë goditëse,” shprehet Koçi.

Ai deklaron se nuk ka vend për panik pasi pavarësisht momenteve me ndonjë impuls më të lartë, lëkundjet sizmike pas tërmetit të parë kanë qenë të gjithë poshtë magnitudës 5 Rihter.

“Nga tërmeti i 21 shtatorit aktiviteti sizmik në vendin ka qenë shumë aktiv, por sot ai u rigjenerua përsëri duke regjistruar këtë ngjarje kryesore,” pohon sizmologu.

Ai gjithashtu deklaron se tërmetet nuk mund të parashikohen por pas goditjes kryesore lëkundjet e mëvonshme nuk do të jenë aq të forta. “Shpresojmë që të mos jenë me impakt dhe me ndjeshmëri të lartë,” nënvizoi ai. /atsh

Kryeministri Edi Rama vizitoi sot Thumanën, një prej zonave më të prekura nga tërmeti që goditi vendin mëngjesin e sotëm.

I shoqëruar nga zv.kryeministri Erion Braçe dhe ministri i Brendshëm, Sandër Lleshaj ai ka takuar dhe ka biseduar me banorët të cilëve u janë shembur banesat nga tërmeti i fuqishëm që goditi mëngjesin e sotëm. Banorët kanë treguar se kanë ende njerëz nën rrënoja.

“O shpirt i motrës, o pëllumb’…Më nxirrni vëllanë me nusen”, u shpreh një banore e Thumanës e cila kërkoi ndihmë për nxjerrjen e familjarëve nga rrënojat.

Në Thumanë po vijojnë operacionet e kërkim-shpëtimit, të cilave u janë bashkuar edhe ekipet e specializuara të Emergjencave Civile të Italisë dhe Greqisë.

Pasojat e tërmetit të fortë që goditi vendin mëngjesin e kësaj të marte janë të rënda në Thumanë. Shembja e dy pallateve ka sjellë një bilanc tragjik.

Pesë trupa të pajetë janë nxjerrë nga rrënojat ndërsa efektivët xhenio, efektivë të Forcave Speciale dhe të kërkim-shpëtimit kryen kërkimet duke nxjerrë të mbijetuarit.

Operacionet e kërkim-shpëtimit janë ndjekur me padurim nga të mbijetuarit, e sidomos nga familjarët e atyre që kishin mbetur nën rrënoja.

Tërmeti me magnitudë 6.3 ballë të shkallës Rihter ra në orën 03.55 të mëngjesit të së martës.

Sipas të dhënave nga Instituti i Gjeoshkencave, Energjisë, Ujit dhe Mjedisit, raportohet se epiqendra e tërmetit ishte 10 kilometra nga Durrësi dhe 31 kilometra nga Tirana./atsh

Instituti i Gjeoshkencave, Energjisë, Ujit dhe Mjedisit ka bërë një panoramë të tërmetit që goditi sot vendin. Në një prononcim për ATSH, Llambro Duni, sizmolog i IGJEUM thotë se tërmeti kishte një magnitudë 6.3 ballë, por sa i përket ndjeshmërisë vlerësohet 8-9 ballë.

“Tërmeti, sipas të dhënave të IGJEUM ishte me magnitudë 6.3 Rihter dhe me intensitet 8-9 ballë. Kjo goditje është pasuar me të tjera më e madhja e të cilave ishte 5.5 Rihter”, – shprehet Duni.

IGJEUM këshillon qytetarët të mos kthehen në banesa pa u kryer më parë inspektimi nga ekspertët e ndërtimit, pasi pasgoditjet e tërmetit mund të vijojnë.

“Duke qenë së goditjet do vijojnë për një periudhë kohe është e këshillueshme që njerëzit të mos futen në ndërtesa përpara se të kryhet inspektimi nga ekspertët e ndërtimit”, deklaron për ATSH sizmologu.

Nga ana tjetër eksperti i Institutit të Gjeoshkencave shprehet se nuk ka vend për panik pasi goditja kryesore ka kaluar.

“Mendojmë që goditja kryesore ka kaluar. Do ketë më të vogla, por e keqja më e madhe ka kaluar”, – pohoi Duni për ATSH.

Ai shprehet se ende nuk ka një bilanc të dëmeve të cilat do të kryhen në një moment të dytë. “Tërmetet e kësaj madhësie karakterizohen nga goditje të fuqishme të tokës, por një bilanc më i saktë do të bëhet më vonë”, – thotë ai.

Epiqendra e tërmetit ishte në afërsi të qytetit të Durrësit, në thellësi të Adriatikut, 32 kilometra nga Tirana. “Fakti që goditja kryesore ishte në det ka ndihmuar që forca goditëse në tokë të mos ishte kaq e madhe”, – shprehet Llambro Duni, sizmolog i IGJEUM. /atsh