Aktualitet

“Shqipëria duhet të hyjë në epokën e referendumeve, partitë politikë dështuan në 30 vite. Në momentin që do t’i kthej popullit shqiptar këtë mundësi do largohem nga politika dhe Tirana”, – tha sot Presidenti Ilir Meta në një konferencë për shtyp, ndërsa tha se më 8 dhjetor do të shpalosim platformën.

Meta tha se klasa politike ka dështuar dhe është në degradim total duke shtuar se më 8 dhjetor fillon një lëvizje e re, fillon një dhjetor i dytë.

“Pas 30 viteve eksperiencë, klasa jonë politike në vend që të piqet, të jetë më e hapur, të jetë më përfshirëse, ka një degradim total dhe mban zero përgjegjësi për çdo akt që merr në raport me popullin shqiptar dhe asgjësuar çdo lloj përfaqësimi politik. Në Shqipëri nuk ka më votime, ka vetëm komandime, kjo gjë do të marrë fund dhe do ta realizojmë të gjithë së bashku”, – tha ai.

I pyetur në lidhje me protestën e 8 dhjetorit, Meta tha se më 8 dhjetor fillon një lëvizje e re, fillon një dhjetor i dytë që nuk përfundon derisa populli shqiptar të fitojë atë të drejtë që ia ka dhënë vetes së vet me referendum para 21 vitesh dhe që është bllokuar nga kjo klasë politike, që të mos e ushtrojë atë pushtet dhe demokracinë e vet të drejtpërdrejtë, për të mos vendosur për të gjitha çështjet e rëndësisë së veçantë që ai gjykon. Dhe kjo është e qartë dhe nuk do përfundojë më 8 dhjetor, por kjo nuk do thotë se mitingu i 8 dhjetorit do jetë pa mbarim, një javë, por kjo do të thotë se në të gjitha sheshet e Shqipërisë presidenti do të komunikojë me popullin dhe është palë me popullin dhe referendumin dhe do të bëjë çdo gjë, derisa populli të marrë në dorë fatet e tij përmes referendumit, në mënyrë që populli të mos mbetet më në dorën e partive dhe të mos jetë viktima e lojërave të partive, por përkundrazi të jenë partitë nën presionin e popullit shqiptar dhe t’i nënshtrohen popullit shqiptar”.

I pyetur se përmes kësaj lëvizje do të ndryshohet ligji apo Kushtetuta, Meta tha se “Kushtetuta është e qartë, ligji në zbatim të Kushtetutës dhe të vullnetit të popullit shqiptar dhe pastaj do merren iniciativa për referendum, sepse nuk bëhet fjala thjeshtë për një referendum, se nuk e zgjidh hallin e Shqipërisë një referendum. Hallin e Shqipërisë e zgjidh e drejta e popullit shqiptar që sa herë ta gjykojë, siç e parashikon Kushtetuta që të bëhet një referendum, ta ushtrojë këtë të drejtë dhe këtë ta dinë të gjitha forcat politike që janë në pushtet, që në qoftë se do të bëhet një ligj që cenon interesat publike, cenon interesat e popullit shqiptar, populli do i përgjigjet me referendum”.

Për sa i përket pyetjes që do shtrohet në referendum, Meta tha se më 8 dhjetor do të kemi një platformë me të qartë, por bëhet fjala për të filluar një epokë të re, epoka e partive përfundoi, ato nuk mund të prodhojnë më as dialog politik të qëndrueshëm, as të besueshëm, as të bashkohen për interesin publik, as për kombëtar, gjithmonë do të bëjnë lojëra të tilla, gjithmonë do ia vënë fajin njëra-tjetrës, gjithmonë këtu do të vazhdojë të pasurohen një grup oligarkësh dhe bandat do vazhdojnë të qeverisin, sikurse po ndodh”.

“Kjo është një histori që ka përfunduar. Shqipëria duhet të hyjë patjetër në epokën e referendumit, kjo klasë politike dështoi në mënyrën më absurde dhe më të turpshme”, – theksoi ai.

“Populli shqiptar e ka vendosur vetë të drejtën e referendumit dhe kjo e drejtë do të kthehet dhe do të bëhet shumë shpejt e detyrueshme. Partitë dështuan. Ka humbur çdo lloj përgjegjësie ndaj qytetarëve, ka humbur sistemi llogaridhënës. Shqipëria po shkon tatëpjetë dhe ne do e ndalojmë këtë, duke i dhënë mundësinë popullit të bëjë një zgjidhje të mençur dhe do t’i ndajë çështjet që hidhen në referendum me votën e tij”, shtoi ai.Meta tha se për çështje të rëndësishme populli duhet t’i drejtohet referendumeve.

“Presidenti të zgjidhet nga parlamenti dhe t’i thonë të kemi zgjedhur ne, e t’i thonë na shërbe neve, apo të zgjidhet nga populli dhe t’i përgjigjet popullit. A doni zgjidhje aktuale? Keni një debat të shpikur nga parlamenti që donte të vidhte në mes të ditës një anëtar të Gjykatës Kushtetuese dhe ta kthente atë në një gjykatë në një pushtuese ku populli shqiptarë. Ata thanë se presidenti donte të pengonte Reformën në Drejtësi, atëherë të kërkojmë referendum. Të zbatohet e drejta e popullit shqiptar për referendum dhe unë jam me këtë dhe e mbroj deri në fund, dhe në momentin që do t’i kthej popullit shqiptar këtë mundësi, do largohem nga politika dhe Tirana, por jo jashtë shtetit”, – tha Meta.

Mata tha se tani zgjidhja është referendumi, nuk ka zgjidhje tjetër.

Në lidhje me akuzën tjetër nga mazhoranca për dekretimin e Marsida Xhaferllarit si anëtare e Gjykatës Kushtetuese dhe mbledhja e firmave nga PS për ta depozituar në Komisionin Hetimor, Meta tha se “Presidenti ka këtë qëndrim që ua bëri të ditur këtu. Me teledeputetët, presidenti nuk ka asnjë shqetësim, i ka respektuar më shumë se ç’duhet gjatë këtij procesi. Presidenti ka vetëm një raport tani, me popullin shqiptar, prandaj më 8 dhjetor, vetëm me flamuj kombëtarë”./atsh

Efektivët e Policisë Rrugore kanë zhvilluar një orë mësimore sensibilizuese mbi rregullat e qarkullimit rrugor, në një shkollë 9-vjeçare, në fshatin Sohodoll në Dibër.

Policia Rrugore e Dibrës, që prej fillimit të vitit të ri shkollor, ka marrë një sërë masash për rritjen e parametrave të sigurisë së nxënësve në rrugë , jo vetëm në shkollat që ndodhen në qytet apo pranë rrugëve kryesore, ku dhe lëvizja e mjeteve është më e shtuar, por fokusi është shtrirë edhe në shkollat në zona rurale.

Punonjësit e Policisë Rrugore, nën drejtimin e Shefit të Sektorit të Policisë Rrugore Robert Aga, kanë zhvilluar një orë mësimore në shkollën 9-vjeçare, në fshatin Sohodoll të Dibrës. Ata i kanë fëmijëve rregullat e qarkullimit rrugor dhe sinjalistikën horizontale dhe vertikale.

Shefit të Sektorit të Policisë Rrugore Aga theksoi se “njohja e sinjalistikës dhe zbatimi i saj çon në ndërgjegjësimin e gjithë përdoruesve të tjerë të rrugës, me qëllim që të kemi një siguri rrugore me parametra sa më të mirë”.

“Siguria e nxënësve për ne është prioritet dhe në përmbushje të tij do vijojmë të bashkëpunojmë me stafet pedagogjike, bordet e prindërve dhe me qeveritë e nxënësve për të bërë të mundur që së bashku të rrisim parametrat e sigurisë rrugore, jo vetëm për nxënësit, por për të gjithë përdoruesit e rrugës”, – u shpreh Aga. /atsh

Ministri i Brendshëm, Sandër Lleshaj deklaroi mbrëmjen e sotme gjatë një emisioni televiziv se paketa anti KÇK, do të japë goditje krimit e korrupsionit në nivel të panjohur më parë.

Lleshja tha se “kjo nismë ligjore është nismë dhe vullnet politik për t’i dhënë goditje krimit e korrupsionit në nivel të panjohur më parë. Kjo lidhet me situatën në të cilën ndodhet vendi sot. Ndodhet në një situatë, që karakterizohet nga Reforma në Drejtësi, dhe tashmë kjo reformë po afrohet drejt fazave finale të saj”.

“Ka një demotivim, ose motivim për keq, të atyre që parashikohet të mos e kalojnë Vettingun. Këta po krijojnë kosto, përmes vendimeve skandaloze, që po japin, duke bërë që persona me rekorde kriminale të mos dënohen, të dënohen pak, ose të lirohen në sallë e gjyqit. Kriminelët të dalin dhe të bëjnë sërish krime. Kemi një trup të caktuar gjyqtarësh e prokurorësh, që po bëjnë të kundërtën e asaj që duhet. Për të mbuluar edhe boshllëkun e SPAK, BKH, ne kërkojmë të adresojmë dhe zgjidhim këtë problem. Ka dy qasje, e para të dekurajojë krimin, kokat e krimit që kanë komoditetin për të bërë më shumë krime, dhe të fuqizojë instrumentet e luftës ndaj tyre që është policia dhe struktura të tjera”, tha Lleshaj.

Ministri u shpreh se “ne kemi një situatë të tillë që duhet të merremi me luftën ndaj krimit të organizuar për 100 e një arsye. Arsyeja e parë është se qytetarët meritojnë më shumë siguri, më shumë drejtësi, perspektiva europiane meriton një qasje më të fortë ndaj krimit të organizuar”.

Po ashtu, theksoi Lleshaj, “ne e kemi objektiv madhor lutën ndaj krimit se është nevojë e madhe ndaj shqiptarëve e Shqipërisë. Masë kryesore është sekuestrimi i pasurisë, ne duam ta shkatërrojmë këtë biznes, sepse krimi i organizuar është biznes. Duhet të shkatërrojmë biznesin kriminal, që punon për të siguruar të ardhura. Ndonëse i gjithë krimi është i fshehtë, ka një gjë që është e dukshme: pasuria, në makina, vila”.

Sipas tij, për shkak të mungesës së një ligji për deklarimin e pasurisë për qytetarët e thjeshtë, ky ligj i detyron personat e dënuar të deklarojnë se si e kanë bërë pasurinë, të cilën duhet ta provojnë në gjykatë.

“Ne na mungon detyrimi i qytetarëve për të deklaruar pasurinë. Ky ligj, thotë, për një të dënuar që ka dalë nga burgu: t`i që ke këtë makinë luksoze, shko në gjykatë, provoje që është makina jote dhe hajde merre. Pra gjithë cikli mbyllet në gjykatë. Nëse policia e ka gabim, do e dëmshpërblejë. E ka të shkruar ligji. Ne po i vendosim kriminelët në situatë siç kemi vendosur politikanët dhe gjyqtarët, pra të deklarojnë të ardhurat e tyre. Nëse ka mos përputhje të mbajnë përgjegjësi”, tha Lleshaj.

Ministri shtoi se “sot Policia e Shteti ka depozituar për shkak të ligjit anti-mafia mbi 200 e sa raste në prokurori dhe nuk janë prekur me dorë. Kemi raste të shumta që lirohen nga salla e gjyqit në seancë e parë persona të akuzuar për vepra të renda dhe për vrasje në një kohë kur gjykata ka marrë masa mbrojtje për të lënduarit. Kemi raste të pafundme që na dëshmojnë një gjeq ë kemi një situatë të pazakontë në sistem. Kemi një kategori gjyqtarësh dhe prokurorësh që e kanë leshura pa fre”.

Duke folur për masat, Lleshja theksoi se “do të reduktojmë hapësirën dhe komoditetin e lirisë së personave të cilët kanë barrë dhe ngarkesa kriminale. Kemi disa nene të Kodit Penal për të cilat janë dënuar njerëz por to për krim të organizuar, mafia, trafik, drogë dhe të gjithë subjekte që janë dënuar për këto vepra penale ose janë në hetim për këto vepra penale ose që kanë patur një akuza por që nuk janë dënuar do të quhen subjekte të këtij ligji, automatikisht këtyre u vihet një pikëpyetje e madhe dhe prozumohen të fajshëm”.

“Pra pas identifikimit, u kufizojmë lirinë, do i nxjerrim jashtë nga zona e komfortit dhe do t’i fusim në një zonë jo komode, do lëvizin brenda qarkut ku je, vetëm brenda Shqipërisë. Kjo është një masë e jashtëzakonshme e përkohshme e cila ka një hapësirë juridiksioni shumë të qartë, që ka një kategori personash që kanë kryer këto vepra penale, janë target i ligjit”, tha ai./atsh