Aktualitet

Ndërtimi i lagjeve të reja në Tiranë, Durrës, Thumanë, Kurbin dhe Laç për të strehuar banorët, shtëpitë e të cilëve u shkatërruan plotësisht nga tërmeti, si dhe rindërtimin masiv i banesave të dëmtuara me angazhimin edhe të firmave të ndërtimit për riparimin e pallateve që ato kanë ndërtuar janë dy prej drejtimeve kryesore për zgjidhjen e situatës së krijuar nga tërmeti.

Kështu shpreh sot, gjatë një konference për shtyp, ministri i Bujqësisë dhe Zhvillimit Rural, Bledi Çuçi, njëkohësisht drejtues qendror i Operacionit për Menaxhimin e Fatkeqësisë Natyrore.

Lidhur me vlerësimin monetar të dëmeve, Çuçi tha se “nuk kemi ende një faturë të saktë dhe përfundimtare të dëmeve që na shkaktoi tërmeti i dy javëve më parë”.

Ne si qeveri, tha ai, “kemi filluar përgatitjen e planeve konkrete për zgjidhjen afatgjatë të problemeve që shkaktoi tërmeti i dy javëve më parë”.

Këto zgjidhje ndër të tjera përfshijnë edhe ndërtimin e infrastrukturës shoqëruese në lagjet e reja, si shkolla, kopshte, qendra shëndetësore, infrastrukturë tokësore dhe nëntokësore, si dhe ndërtimin e shtëpive ekologjike në zonat rurale.

“Verifikimi i detajuar i dëmeve në ndërtesat e prekura nga tërmeti është hapi i parë në përgatitjen e raportit të sëmeve. Caktuam Milva Ekonomin në rolin e Koordinatores Kombëtare për Raportin e Dëmeve, si dhe ngritëm grupin e përbashkët të punës me BE-në, Bankën Botërore dhe misionin e Kombeve të Bashkuara në Shqipëri për ta përgatitur këtë raport, i cili do të paraqitet në 16 janar”, tha ai./atsh

Senati i Berlinit shpalli sot një emergjencë klimatike për kryeqytetin gjerman, duke i hapur rrugën përpjekjeve shtesë për sa i përket veprimeve mbi ndryshimin e klimës.

“Kemi bërë me dije se duam të shkojmë përtej qëllimeve tona aktuale për të ulur emetimet e dyoksidit të karbonit me 85%, krahasuar me nivelet e 1990”, deklaroi kryebashkiaku i Berlinit Michael Mueller.

Senatori Regine Guenther, i cili drejton departamentin e Mjedisit në Senat dhe hartoi vendimin, dëshironte të përfshinte një qëllim prej të paktën 95% para vitit 2050, por nuk mund të siguronte miratimin.

Me këtë vendim, Berlini ndjek gjurmët e shumë bashkive në të gjithë botën, duke përfshirë rreth 50 në Gjermani, që kanë deklaruar emergjencë klimatike. /atsh

Kryeministri Edi Rama përcolli sot fjalët e Shenjta të Lajmëtarit të Zotit që vijnë nga Abû Umâma Sudayî b. ‘Ajlân, si një mesazh për solidaritet me familjet e prekura nga tërmeti i 26 nëntorit.

“Abû Umâma Sudayî b. ‘Ajlân sjell fjalët e Lajmëtarit të Zotit: Dora që jep ka më shumë meritë se dora që merr”, shkruan kryeministri Rama.

Pas tërmetit shkatërrimtar të 26 nëntorit, që ka lënë pas shumë dëme materiale, solidariteti i shqiptarëve ka qenë i madh, sikundër edhe ai vendeve partnere dhe atyre fqinje. Pas kalimit të fazës së emergjencës ku u mblodhën ushqime e veshmbathje, tashmë po mblidhen fonde për rindërtimin duke kontribuar në platformën e-Albania. /atsh

Kryeministri Edi Rama zhvilloi sot një takim me përfaqësues nga unionet e besimtarëve myslimanë të Zvicrës, Austrisë, Gjermanisë dhe të Italisë, të cilët së bashku kanë ndërmarrë një iniciativë solidarizimi si të gjithë shqiptarët në tërësi në gjithë botën.

“Dita sot fillohet me një surprizë. Me liderët e përfaqësuesit e katër unioneve shqiptare të besimit musliman në Zvicër, Gjermani, Austri dhe Itali, të cilat kanë mbledhur një fond të konsiderueshëm solidariteti në xhamitë respektive dhe kanë ardhur në Shqipëri për të nisur bashkëpunimin konkret, në funksion të Rindërtimit. Sot u njohëm me përpjekjen dhe dëshirën e tyre të madhe për të kontribuar duke bashkuar të gjitha fondet e mbledhura në funksion të një qëllimi. I falënderoj për gjithçka kanë bërë”, tha Kryeministri.

Kryeministri Rama shprehu mirënjohjen që në një moment kaq dramatik, kaq tragjik për disa familje që humbën familjarët dhe kaq të vështirë për shumë familje me të plagosur dhe të mbetur pa çati, shqiptarët kudo janë u solidarizuan duke treguar një shpirt përkatësie”.

Rama falënderoi shqiptarët nga Kosova, nga Maqedonia e Veriut, nga Lugina e Preshevës, nga Mali i Zi dhe pastaj në gjithë Europën, SHBA dhe përtej këtyre destinacioneve për solidarizimin me Shqipërinë.

“Po ashtu më vjen shumë mirë që ky është momenti ku kemi mundësi të bashkëpunojmë më fort se sa para tërmetit. Kemi diskutuar edhe për disa fjalë të shenjta, si p.sh. që Zoti e dërgon tërmetin që t’u japë një mundësi njerëzve të pastrohen dhe pendohen, edhe pse pendesa nuk është karakteristikë kryesore e jona në tërësi. Por pa diskutim ky është një moment për të bashkuar forcat. Kam shumë besim se myslimanë e të krishterë i lexojnë fjalët e shenjta si pasuri të njerëzimit”, tha Rama.

Përfaqësuesit e unioneve të myslimanëve në Zvicër, Austri, Gjermani dhe Itali shprehën solidaritetin me popullin shqiptarë për kapërcimin e pasojave të tërmetit./atsh

https://www.facebook.com/edirama.al/videos/796661200795146/?t=0

Autoriteti Rrugor Shqiptar po vijon punën për mirëmbajtjen dimërore të rrugëve në të gjithë vendin.

Gjatë natës së mbrëmshme në qarkun e Korçës ka pasur reshje dëbore.

Sipas ARRSH-së, në aksin Boboshticë-Dardhë, kontraktori i mirëmbajtjes ka bërë pastrimin e rrugës nga dëbora dhe qarkullimi bëhet pa zinxhir.

“Qarkullimi vazhdon normalisht në të gjitha akset e vendit. Kontraktorët janë në gatishmëri me mjete dhe punëtorë”, shprehet ARRSH.

Fillimi i muajit dhjetor u shoqërua me reshjet e para të dëborës në zonat malore dhe juglindore të vendit. ARRSH ka marrë të gjitha masat e para të mirëmbajtjes dimërore dhe ka nisur puna për pastrimin e saj dhe hedhjen e kripës. /atsh

Zëvendësasistentja e Sekretarit të Mbrojtjes së SHBA–së, Laura Cooper, deklaroi sot se SHBA janë miq të Shqipërisë dhe do të jenë bashkë në kohë të vështira.

Në fjalën e saj në konferencën e Ministerialit të Mbrojtjes të nismës SHBA– Karta e Adriatikut, Cooper theksoi se do të doja të fillojë me ngushëllime për familjet që vuajtën si pasojë e këtij tërmeti. Shtetet e Bashkuara janë miqtë e Shqipërisë si gjithë amerikanët dhe shqiptarët kanë qenë bashkë në kohë të vështira”.

“Të gjitha vendet që janë sot këtu reaguan menjëherë pa asnjë kusht dhe kanë dhënë mbështetjen e nevojshme për të ndihmuar Shqipërinë në këtë periudhë të vështirë”,- nënvizoi Cooper.

Ajo shprehu mirënjohjen për Shqipërinë, e cila drejton A5 në 2019.

“Ka qenë vit produktiv për gjithë Shqipërinë por plot me sfida e mundësi për të mbështetur aleancën e NATO-s, partneritetet dhe koalicionet. Shqipëria është një shembull i jashtëzakonshëm për të mbështetur operacionet e NATO-s në të gjitha koalicionet. Doja t’iu siguroja se angazhimi i SHBA-së për aleancën e NATO-s dhe partneriteti që kemi mbetet shumë i fortë”, theksoi Cooper.

“Unë udhëtoj shumë në vende të ndryshme si pjesë e detyrës sime dhe shikoj se udhëtimi në vendete A5 është gjithmonë më rendësi të posaçme duke qenë se kemi sfida të ndryshme, të përbashkta përsa i përket sigurisë. Angazhimi i SHBA-së në Europën Juglinodre është vazhdimisht prezent dhe jo vetëm gjatë angazhimit nëpërmjet mbështetjeve të ndryshme, por kohët e fundit edhe në takimet e Ministerialit të Mbrojtjes.
Duke pasur parasysh asistencën e sigurisë së SHBA , gjithë këtë angazhim dhe mbështetjen në kuadrin e mbrojtjes në vendet tuaja dhe vetëm nga departamenti i mbrojtjes kanë qenë mbi 743 milionë dollarë që nga viti 2012”, – tha Cooper.

Më tej , ajo shtoi se , të gjitha këto kanë qenë pjesë e bashkëpunimit për sigurinë dhe ngritjes së kapaciteteve jo vetëm në vendet anëtare , por edhe ato vëzhguese gjatë kësaj periudhe.

“Angazhimi i SHBA-së për këtë rajon reflekton gjithashtu edhe vlerësimin që kemi për kontributet tuaja për sigurinë globale dhe rajonale. Shumë prej forcave tona të armatosura qëndrojnë afër me njëra tjetrën, sup më sup të lidhura për të mbështetur misionet në Afganistan e të tjera. Vendet tuaja janë të rëndësisë përsa i përket ofrimit të sigurisë jo vetëm për vendet e rajonit por edhe në kuadrin ndërkombëtar”, – tha Cooper.

Sipas saj, mbështetja e SHBA-së në kuadrin e politikës së dyerve të hapura të NATO-s- dhe mundësia që ka secili nga vendet për të përzgjedhur rrugën e vet, nëse kjo është rrugë e NATO-s apo BE-së, kjo ndryshon, jemi gjithmonë mbështetës të progresit në rajon.

“SHBA e shikon A5 si një element shumë të rëndësishëm për ngritjen e besimit të konfidencës për të arritur objektivat tona të përbashkëta duke pasur parasysh përvojat tona unikale, të rëndësishme dhe bashkarisht mund të kuptojmë më mirë mjedisin e sigurisë dhe të krijojmë mundësi të tjera për një bashkëpunim të mëtejshëm”, tha Cooper./atsh

Kryeministri Edi Rama takoi sot banorët e Fushë-Mamurrasit në Kurbin, ku shprehu bindjen se “brenda mesit të vitit të ardhshëm do t’i kemi sistemuar shumicën dërrmuese të banorëve të dëmtuar nga tërmeti me shtëpi të reja”.

Rama pa sot nga afër gjendjen në Fushë Kurbin, aty ku po mbaron sistemimi në çadrat dimërore dhe ku në trojet e shtëpive të rrënuara do të ndërtohen shtëpi të reja, shumë më të mira se ato që ishin.

Kryetarja e bashkisë Kurbin, Majlinda Shalsi informoi kryeministrin se në këtë zonë kemi vendosur 17 çadra dimërore, ndërsa po vazhdon edhe verifikimi në terren i banesave. Ajo tha se në këtët zonë “kemi po ashtu edhe disa banesa të dëmtuara nga tërmeti i 21 shtatorit”.

Kryeministri siguroi banorët e dëmtuar se do të sistemohen në banesa të reja, ndërsa u kërkoi që të bëjnë durim.

“Do t’i rregullojmë pa asnjë dyshim. Me këtë rast do të rregullojmë edhe infrastrukturën këtu se qenka copë-copë. Fillimisht do t’i rregullojmë të gjithë me çadra dimërore, derisa të bëjmë shtëpinë e re”, tha Rama.

Kryeministri u shpreh se “duhet të angazhohemi me shpejtësi që të bëjmë një risistemim dhe me këtë rast edhe infrastrukturën”. “Të pastrojmë muret dhe pislliqet që të bëhet një gjë humane dhe normale. Duhet bërë shpejt. Shtëpitë e regjistruara si të dëmtuara do t’i shembim dhe do t’i bëjmë”, tha Rama. /atsh