Aktualitet

Kryeministri Edi Rama deklaroi sot se po negociohet për një marrëveshje me një kompani turke të njohur në tregun botëror, për shtëpi ekologjike antisizmike që do të zgjidhë në një kohë të shpejt problemin për disa nga banesat e dëmtuara nga tërmeti i 26 nëntorit.

Kryeministri Rama ishte sot në njësinë administrative nr. 7, në kryeqytet, ku vizitoi familjen e të ndjerit Çim Vladi, “futbollisti i Tironës legjendare të brezit të artë, ndarë nga jeta përpara disa vitesh”, që është sistemuar me qira në kushte të mira, pak metra larg shtëpisë së vjetër prej qerpiçi, të rrënuar nga tërmeti.

Kryeministri siguroi se “shumë shpejt zonja dhe dy fëmijët do të kthehen në oborrin e tyre, ku do të kenë shtëpinë e re me kushte optimale”.

Rama informoi familjarët se “do të bëjmë një marrëveshje me një kompani shumë të madhe turke, që është e njohur në gjithë tregun botëror për shtëpi ekologjike antisizmike”.

“Shtëpitë janë super, ata i shesin në Amerikë përgjithësisht, sepse atje nuk ndërtohet me mure e suva, por me beton special. Shtëpitë janë të lehta dhe nesër do të shkojë një ekip atje. Nëse do ta mbyllë atë marrëveshje me ta do të bëjmë një investim shumë të shpejtë, pasi shtëpitë vijnë gati, montohen dhe nuk kanë as probleme teknike, as pisllëk”, – tha Rama.

Për sa i takon hapësirës, Kryeministri tha se “ka disa opsione, por ne do të rrimë tek mesatarja mes 75-100 metra katrorë, në bazë të familjes”.

Të gjithë ata që e kanë pasur shtëpinë të dëmtuar, Kryeministri i siguroi se do të kenë një shtëpi më të mirë se ajo që kishin”.

“Po shpresoj ta mbyllim këtë marrëveshje këtë javë. Ato montohen shpejt, janë super dhe kanë një termoizolim fantastik, kështu që edhe nga pikëpamja energjetike kursejnë energji dhe ulin faturat. Është inovacion”, – tha Rama.

Ndërkohë, kryetari i bashkisë së Tiranës, Erion Veliaj informoi se dje u miratuan edhe 266 qira të tjera dhe në total kanë shkuar në 1118 qira.

“Kishim edhe disa raste të tjera për ish-të përndjekurit p.sh. Gjithë ajo që ndodhi, u thashë edhe këtyre të shoqatave, sa bëni statuse në ‘facebook’ dhe hartime, me dy rreshta, vetëm me kopjen e kartës së identitetit ne i kaluam. Kështu që në momentin që lanë hartimet në ‘facebook’ dhe u fokusuan ta zgjidhin problemin, u zgjidh për 2 minuta”, tha Veliaj.

Ai informoi se këshilli bashkiak do të mblidhet sërish për rastin e Kodër-Kamzës. “Do të prishen të dhjeta konviktet, edhe te të zaptuarit, edhe dy konviktet e vjetra. Janë konvikte që janë bërë me punë vullnetare. Aty po i prishim të dhjeta sipas vlerësimit të Institutit të Ndërtimit”, tha Veliaj.

Kryeministri tha se “historia e Ajtanga Lubonjës është një histori tipike e shfrytëzimit të një situate për t’u dukur”. “Ne kur i prishëm i kishim gati qiratë, por këta të pseudohumanizmave duan halle t’i nxjerrin në televizor, nuk duan zgjidhje, zgjidhjet i lënë pa punë”, tha Rama./atsh

https://www.facebook.com/edirama.al/videos/2851661801519185/?t=0

Prokuroria e Tiranës dha sot pretencën e ku kërkoi dënimin me 1 vit e 6 muaj burg për ish-deputetin e PD-së, Ervin Salianji, në lidhje me çështjen e ashtuquajtur “Babale”.

Në një prononcim për medien, pas dhënies së pretencës, ish-deputeti Salianji tha se sulmet ndaj tij ishin politike.

“Në gjasme pretencë prokuroria bëhet pjesë me llumin. Asnjë pabesi nuk e mposht dot të drejtën. Prokuroria politike lexoi fiks atë që tha kryeministrin. Pala që përfaqësonte Xhafajn kishte të njëjtin qëndrim me prokurorinë. Prokuroria nuk mori parasysh asnjë provë që ne kemi paraqitur. Kjo nuk është drejtësia e re, janë prokurorë të drejtësisë së vjetër. Dënimi im është kërkuar që në momentin kur kam bërë publik rastin”, tha Salianji.

Prokuroria kërkoi 1 vit e 6 muaj burg për ish-deputetin Ervin Salianji, që të konvertuara shkojnë në 3 muaj shërbim prove.

Sipas prokurorisë, të pandehurit duhet të deklarohen fajtorë për akuzën e “kallëzimit të rremë”, kryer në bashkëpunim. Nga ana tjetër, për Albert Veliun kërkohen 3 vite e 6 muaj, pasi akuzohet për “kallëzim të rremë” edhe për “kalim të paligjshëm të kufirit”, e ndërsa për Fredi Alizoin, 3 vite./atsh

Dy kontingjente me trupa nga Forcat e Armatosura u nisën sot për në Afganistan, ku për rreth 6 muaj do të shërbejnë në dy baza të ndryshme në misionin e NATO-s, Resolute Support.

Kontingjenti i parë i përbërë nga pjesëtarë të Batalionit të Mbështetjes me Luftim do të dislokohet në Aeroportin Ndërkombëtar të Kabulit, ndërsa grupi i dytë nga Forcat Speciale do të shërbejë në Bagram.

Për përcjelljen e trupave tanë për në mision ishte i pranishëm zëvendësministri i Mbrojtjes Petro Koçi, shefi i Shtabit të Përgjithshëm të FA-së gjeneral brigade Bardhyl Kollçaku, komandanti i Forcës Tokësore gjeneral brigade Albert Mullai, si dhe familjarë të ushtarakëve.

Zëvendësministri Koçi e konsideroi nisjen e trupave në mision si ditë të shënuar për FA dhe vuri në dukje pjesëmarrjen e trupave tanë në të gjithë misionet e NATO-s.

“Sot është një nga ditët e krenarisë të FA sepse dy kontingjente, një togë e Batalionit të Mbështetjes në Luftim dhe një grup nga Batalioni Special nisen për në Afganistan, përkatësisht në Kabul dhe në Bagram. Është një mision i vështirë, por që përputhet plotësisht me misionin kushtetutës të FARSH”, tha ai.

Koçi tha se “është detyrë e Forcave tona të Armatosura, është detyrë e Republikës së Shqipërisë si anëtare e NATO-s për t’i shërbyer angazhimeve tona që ne kemi marrë përsipër përkundrejt kësaj aleance historike”.

Ai tha se “ne jemi një nga vendet e para në NATO që krahasuar me numrin e ushtarakëve që ka Forca jonë e Armatosur kontribuon në misione ndërkombëtare”.

“Këto ditë Shqipëria jeton ditë të vështira. Ne jemi krenarë me punën që kanë bërë FA që nga orët e para të tërmetit të 26 nëntorit. Ne do të vazhdojmë të jemi kudo ku populli ka nevojë, ku halli i qytetarit është i madh, ku rrezikohet jeta e qytetarit aty do të jetë ushtaraku ynë”, u shpreh Koçi.

Komandanti i Forcës Tokësore gjeneral brigade Albert Mullai theksoi se ushtarakët e përzgjedhur për t’u dërguar në mision janë me përvojë e të mirëpërgatitur dhe siguroi familjarët e ushtarakëve për mbështetjen e pakursyer që ata do të kenë.

Toga e Batalionit të Mbështetjes me Luftim do të jetë kontingjenti i VII shqiptar në misionin Resolute Support në Kabul, ndërsa grupi i Forcave Speciale në Bagram, do të jetë kontingjenti i IV që trajnon kolegët e tyre afganë./atsh

Në kuadër të Reformës në Drejtësi janë miratuar për herë të parë gjyqtarët e medieve.

Vendimi është marrë nga Këshilli i Lartë Gjyqësor ku ka miratuar në mbledhjen e sotme gjyqtarët për mediat.

“Në përmbushje të detyrimeve ligjore si organ përgjegjës për mbarëvajtjen e marrëdhënieve të gjyqësorit me publikun, Këshilli i Lartë Gjyqësor caktoi në pozicionin e Gjyqtarit për Mediet, për çdo juridiksion apeli, gjyqtarët e mëposhtëm: Vojsava Osmanaj -juridiksioni i Apelit Shkodër, Edlira Petri – juridiksioni i Apelit Tiranë, Desart Avdulaj -juridiksioni i Apelit Durrës, Klodiana Gjyzari – juridiksioni i Apelit Vlorë, Etleva Temo – juridiksioni i Apelit Korçë, Enton Dhimitri – juridiksioni i Apelit Gjirokastër, Lindita Sinanaj – juridiksioni i Apelit Administrativ si dhe Saida Dollani – juridiksioni i Apelit për Krime të Rënda/ për gjykimin e veprave penale të krimit të organizuar dhe korrupsionit”, thuhet në njoftimin për mediet të KLGJ-së.

Gjithashtu, Këshilli miratoi programin e vlerësimeve etike dhe profesionale për vitin 2020, i cili përmban listën e gjyqtarëve që do të vlerësohen dhe periudhën e vlerësimit përkatës. Me këtë vendimmarrje, i hapet rruga fillimit të procesit për vlerësimin periodik të të gjithë gjyqtarëve, duke mundësuar në vijim dhe lëvizjet paralele apo promovimin e tyre si në shkallët më të larta ashtu dhe në gjykatat e specializuara.

Gjatë kësaj mbledhje, Këshilli vendosi deklarimin e mbarimit të statusit të magjistratit, për shkak të dorëheqjes nga detyra e gjyqtarit, të L.S, K.B, dhe T.S, si dhe shpalli kërkesën për kandidatura nga radhët e gjyqtarëve për komandim në Ministrinë e Drejtësisë.

“Për shkak të natyrës konfidenciale të materialeve që u trajtuan në pikën 5 dhe 6 të rendit të ditës, mbledhja vijoi me dyer të mbyllura. Më konkretisht, pasi u njoh me rezultatet e verifikimit të kushteve dhe kritereve ligjore të kandidimit për në Formimin Fillestar në Shkollën e Magjistraturës, për magjistrat, profili gjyqtar, për kandidatin z. E.L., Këshilli vendosi skualifikimin e tij. Kandidati ka të drejtën e ankimit në Gjykatën Administrative të Apelit, brenda 5 ditëve nga dita e njoftimit të vendimit të arsyetuar të Këshillit të Lartë Gjyqësor”, sqarohet në njoftim.

“Në vijim të mbledhjes, Këshilli pasi dëgjoi relatorët për verifikimin e kushteve dhe kritereve ligjore për rekrutimin e kandidatëve nga radhët e juristëve të spikatur, për në Gjykatën e Lartë, vendosi skualifikimin e kandidateve J.RR dhe R.M. Kandidatët kanë të drejtën e ankimit në Gjykatën Administrative të Apelit, brenda 5 ditëve nga dita e njoftimit të vendimit të arsyetuar të Këshillit të Lartë Gjyqësor”, sqaron KLGJ./atsh