Aktualitet

Kryetari i Partisë Demokratike, Lulzim Basha u bëri thirrje sot qytetarëve që të mos rrezikojnë jetën e tyre dhe të fëmijëve të tyre duke u kthyer në shtëpitë e dëmtuara.

Sipas Bashës, “dy javë e gjysmë nga tërmeti i 26 nëntorit, ende qytetarët në fshatrat e Durrësit dhe kudo në zonën e goditur, nuk kanë asnjë qartësi se ç’do të bëhet me ta”.

“E gjithë vëmendja e qeverisë është tek propaganda për të mbuluar dështimin, neglizhencën kriminale që mori 51 jetë njerëzish. Situata është e rrezikshme për shumë familje, të cilat në pamundësi të një strehe, po rikthehen në shtëpitë e tyre që nga verifikimet e para janë konsideruar të pabanueshme, duke rrezikuar jetën e këtyre familjeve”, tha Basha.

Ai tha se “nga shteti nuk është kujtuar askush t’u çojë një çadër, apo ushqimet më minimale, duke i detyruar të flenë jashtë, apo në rastin më të mirë, te miq a të afërm”.

“Ky dështim po na shtyn drejt një krize humanitare. Në vend të vërtitjes si korbi nëpër gërmadha, duhet urgjent të alokohen fonde për strehimin dhe ushqimin e çdo fëmije, çdo prindi, çdo nëne dhe babai, çdo pensionisti në nevojë”, tha Basha.

Ai kërkoi që të akordohen menjëherë për qytetarët e goditur nga tërmeti 150 milionë dollarët që Ministri i Inceneratorëve dhe Rrugës së Florinjtë, prapë ua la oligarkëve me buxhetin që sapo miratuan fshehtas 1 orë më parë.

“Si mund të lihen qytetarët në mëshirën e fatit, ndërsa paratë e taksave të tyre shkojnë në xhepat e 10 oligarkëve dhe qeveritarëve të lidhur me ta? Nuk ka dështim dhe paaftësi më të kobshme për një qeveri, që 17 ditë pas tërmetit nuk e di ende sa qytetarë ka të pastrehë, pa ushqim, pa asnjë ndihmë, sa banesa ka të dëmtuara dhe jashtë funksioni. Kjo neglizhencë dhe ky dështim kushtojnë jetë”, tha Basha./atsh

Kryetari i grupit parlamentar të Partisë Socialiste, Taulant Balla kërkoi sot që, Gjykata të bëjë drejtësi dhe të zbardhë edhe akuzën për pastrim të produkteve të veprimtarisë kriminale në rastin e Lulzim Bashës.

Balla ngre pyetje se “kush është burimi i Lulzim Bashës për 500 mijë dollarë dhe si u transferuan ato”.

“Heshtje e madhe për dërgimin në Gjykatë të të pandehurit Lulzim Basha vetëm me akuzën si falsifikator. Gjykata të bëjë drejtësi dhe të zbardhë edhe akuzën për pastrim të produkteve të veprës/veprimtarisë kriminale. Kush është burimi i L.Bashës për 500 mijë dollarë dhe si u transferuan ato?”, tha Balla.

Basha u mor i pandehur në qershor për shkak të shpenzimit prej Partisë Demokratike të 650 mijë dollarëve për lobim në SHBA gjatë vitit 2017, para që nuk ishin deklaruar si shpenzime në bilancin që PD ka dorëzuar në Komisionin Qendror të Zgjedhjeve./atsh

Për ne hebrenjtë është privilegj madhor që t’ju ndihmojmë në këto ditë të vështira”.

Kështu u shpreh ambasadori i Izraelit në Shqipëri Noah Gal Gendler, pas marrjes së medaljes nga Kryeministri Edi Rama për ekipin izraelit të kërkim-shpëtimit.

“Për mua si hebre, ne ju detyrohemi kaq shumë popullit shqiptar, qytetarëve të Shqipërisë dhe për ne është një privilegj madhor që t’ju ndihmojmë në këto ditë të vështira. Është thjesht një borxh që ne ju detyrohemi ju dhe populli ynë hebre ndjehet krenar që kemi pasur mundësinë t’ju ndihmojmë”.- deklaroi ambasadori izraelit./atsh

Ish-trajneri i Kombëtares shqiptare të futbollit, Gianni de Biasi është solidarizuar me të prekurit nga tërmeti i 26 nëntorit që goditi Shqipërinë.

De Biasi është bërë promotor i një fushate në Itali në mbështetje të familjeve të prekura nga tërmeti i 26 nëntorit.

Me anë të një postimi në rrjetet sociale, De Biasi ka dhënë një mesazh sensibilizues, ku thekson se, “në 14 dhjetor miqtë e mi organizojnë një aktivitet çiklistik për mbledhje fondesh, që do i vijnë në ndihmë të prekurve nga tërmeti në Shqipëri. Ju ftoj të marrim pjesë të gjithë, të shumtë në numër. Edhe ne mund të japim ndihmën tonë. Forca Shqipëri”.

Gianni de Biasi mbetet një idhull i tifozerisë shqiptare, pasi është trajneri i parë dhe i vetëm i cili arriti të kualifikojë ekipin përfaqësues në një aktivitet si “Euro 2016”./atsh

Kryeministri Edi Rama ishte pasditen e sotme në Kamëz, në shtëpinë e re të 7-vjeçarit Aurel Lala, i cili shpëtoi mrekullisht nga tërmeti i 26 nëntorit, duke u hedhur nga kati i tretë i pallatit që u shemb plotësisht në Thumanë.

“Në shtëpinë e ëngjëllit, i cili fluturoi nga kati i tretë për t’i thënë ‘JO’ vdekjes e që sot pas ëndrrës së realizuar për të takuar Ronaldon, vazhdon jetën plot me ëndrra e dëshira të cilat një kampion i këtij niveli do i arrijë patjetër”, tha Rama.

Duke folur me familjarët, Kryeministri i siguroi ata për mbështetjen e vazhdueshme të qeverisë, ndërsa u premtoi se do të rregullohen me punë të dy bashkëshortët e familjes Lala.

“Populli thotë: hallin që s’ma zgjidh të paktën ma qaj. Hallin që ju ra juve nuk e zgjidh dot njeri se janë punët e Zotit, por këto të tjerat do t’i qajmë bashkë”, tha Rama.

Ndërsa Aurelin e vogël, Rama e surprizoi sërish duke i dorëzuar çelësin e dhomës së tij, e cila ishte mobiluar me porosi të vetë kryeministrit.

Rama premtoi po ashtu se ditën e parë të shkollës do ta shoqëronte vetë në shkollë Aurelin, të cilit i kërkoi të mësojë e të stërvitet që të bëhet i famshëm nga vetja kur të rritet dhe jo vetëm pse takoi Ronaldon.

Nga shembja e pallatit në Thumanë, Aurel Lala humbi motrën e tij, ndërkohë që vetë shpëtoi mrekullisht.

Kryeministri Edi Rama i vizitoi fillimisht dy vogëlushët që shpëtuan mrekullisht nga shembja e pallatit, Aurel Lalën dhe Alesio Cakonin, në Spitalin e Traumës, ku ndër të tjera i premtoi tifozit të vogël të Juventusit edhe realizimin e ëndrrës së tij për një bluzë me firmë nga Ronaldo.

Kryeministri tejkaloi pritshmëritë e dy vogëlushëve, duke organizuar në Romë, Itali, një takim disaminutësh mes tyre dhe legjendave të futbollit, Ronaldo dhe Buffon./atsh

Prokurori i Përgjithshëm, Olsian Çela zhvilloi sot një takim në ambientet e Prokurorisë pranë Gjykatës së Rrethit Gjyqësor Tiranë me prokurorë dhe drejtues të këtij institucioni.

Sipas njoftimit zyrtar të prokurorisë, në takim u diskutuan probleme që lidhen me funksionimin e policisë gjyqësore, vlerësimin e performancës së saj, organizimin e punës pas rritjes së numrit të prokurorëve në këtë prokurori, çështje që lidhen me zbatimin e ligjit për prokurorinë, pavarësinë dhe përgjegjshmërinë e prokurorëve, ndërtimin e një sistemi efikas të monitorimit të zbatimit të ligjit në këto aspekte, si dhe u trajtuan çështje që lidhen me zbatimin e ligjit, “Për parandalimin dhe goditjen e krimit të organizuar”.

Në fokus të veçantë të takimit ishte mbështetja që kryeprokurori Çela i ofroi drejtuesve dhe prokurorëve të kësaj prokurorie për procedimet që lidhen me dëmet e shkaktuara nga tërmeti i datës 26 Nëntor, përmes sigurimit të asistencës teknike dhe ekspertizës që do të ndihmojnë në hetimin e shpejtë dhe të plotë të rasteve.

Ai inkurajoi prokurorët të kryejnë hetime gjithëpërfshirëse, për të individualizuar autorët e veprave penale dhe për t’i vënë ata para përgjegjësisë penale./atsh

Kryeministri Edi Rama përcolli sot fjalët e shenjta nga Hafiz Ali Korça tek “Mirë se ke ardhur”, në një mesazh për solidaritet dhe kontribut në ndihmë të të prekurve nga tërmeti i 26 nëntorit.

“Feja myslimane mos kurse të thotë as shpirt, as fëmijë fare gjë në botë, po çkriji të gjitha veç shpëto atdhenë, se n’atdhet të dashur mundet ta mbash fenë”, shkruan kryeministri Rama duke cituar Hafiz Ali Korçën.

Pas tërmetit shkatërrimtar të 26 nëntorit, i madh ka qenë solidariteti nga shqiptarët, por edhe nga vendet e rajonit dhe ato partnere, ndërsa vendi bëhet gati të nisë Programin e Rindërtimit. /atsh