Aktualitet

Fondi Social mundëson një tjetër shërbim falas për disa kategori fëmijësh.

Bashkia e Gjirokastrës bën të ditur se “krahas mbështetjes për kujdestarinë alternative, veshmbathje, ushqime, transport, së fundmi, disa kategori fëmijësh do të përfitojnë medikamente”.

“Nga ky shërbim përfitojnë fëmijët , familjet e të cilëve trajtohen me ndihmë ekonomike, ata që u përkasin komuniteteve rom dhe egjiptiane, me status jetimi, me aftësi ndryshe dhe për periudhën e urdhrit të mbrojtjes së prindërve dhe rastet që menaxhohen nga njësia e mbrojtjes së fëmijëve”, thekson bashkia.

Sipas bashkisë, të gjithë fëmijët që i përkasin kategorive të mësipërme, si dhe ata që kanë dy prindërit me AK janë të përjashtuar edhe nga pagesa ushqimore mujore në çerdhe/kopshte./atsh

“Dëmi i shkaktuar nga tërmeti i 26 nëntorit shkon përtej asaj çka është njerëzisht e përballueshme nga ne”, deklaroi sot, Kryeministri Edi Rama në fjalën e mbajtur në konferencën ndërkombëtare të nivelit të lartë për investimet publike e private, me ftesë të Presidentit Erdogan.

Në fillim të fjalës së tij, Kryeministri Edi Rama shprehu mirënjohjen e thellë për reagimin e menjëhershëm pas ngjarjes tragjike që theu zemrën e Shqipërisë.

“Më lejoni së pari e mbi të gjitha që të shpreh mirënjohjen që jam përballë kësaj audience të nderuar dhe t’ju shpreh mirënjohjen më të thellë për reagimin e menjëhershëm pas ngjarjes tragjike që theu zemrën e vendit tim. Ju ishit atje për mua dhe për popullin shqiptar qysh prej mëngjesit të parë, që na u desh të merreshim me pasojat shkatërrimtare të tërmetit të 26 nëntorit”, – tha Rama.

Kryeministri tha se “nuk do jem kurrë në gjendje të gjej fjalët që do të përshkruanin se sa shumë thotë për popullin shqiptar e për mua angazhimi juaj personal dhe mobilizimi i njerëzve tuaj që erdhën në Shqipëri me shpejtësi të plot, me zemrën plot, me ndihmën plot”.

Rama tha se “asnjëherë nuk do të harrojmë dedikimin në terren të ekipeve tuaja të shpëtimit që vendosën jetën në rrezik për të shpëtuar jetën e tanëve dhe kurrë nuk do të harrojmë premtimin për të qenë atje për ne, për rindërtimin”.

“Faleminderit shumë për sot që jeni këtu me mua dhe që më keni krijuar këtë mundësi unike për t’ju drejtuar një forumi kaq special personash të pasur, në një kohë kaq vendimtare për vendin tim, që ka nevojë reale për ndihmë për t’i mbijetuar plagëve të thella që i janë shkaktuar”, -tha Rama.

Duke informuar për situatën pas tërmetit, Kryeministri tha se “në vijim të tërmetit të tmerrshëm që goditi Shqipërinë në 26 nëntor, e të përballur me pasojat e tij tragjike me 51 të vdekur, mbi 900 të plagosur, dhjetëra mijëra të pastrehë e dëme të panumërta qëndroj para jush për t’ju kërkuar ndihmë”.

“Cila është vërtetë fytyra më e bukur në Islam? Sipas Profetit të Zotit, paqja qoftë mbi të, të ushqesh atë që është në nevojë, të përshëndesësh, të shpëtosh ata që njeh e ata që nuk njeh. Një parim themelor që gjen jehonë përmes fjalëve të fisme të Profetit të përcjella nga Adi Ibn Hatim: Shpëtojeni veten nga zjarri i ferrit edhe duke dhënë në bamirësi vetëm gjysmë hurme”, – tha Rama.

Kryeministri Rama falënderoi “secilin prej vëllezërve tanë që deri tani kanë qenë shembëllim i kësaj fytyre dhe dua të falënderoj paraprakisht të gjithë ata prej jush që do të bëhen fytyra e këtyre fjalëve. Qoftë bamirësia juaj e pranuar”.

Rama tha se “shqiptarët e të gjitha besimeve e fushave të jetës, të pasur e të varfër, brenda e jashtë Shqipërisë, nga Tirana në SHBA, nga Prishtina në Europë, nga Tetova, Ulqini, Lugina e Preshevës deri në pikat më të largëta të globit dhanë e vazhdojnë të japin gjithçka që kanë”.

“Mijëra e mijëra prej tyre kontribuan në fondet e solidaritetit pas katastrofës, duke na ndihmuar të mbledhim një vlerë prej dhjetëra mijëra, që për vendin tonë të vogël është shumë. Të moshuar me një pension vetëm 200 dollarë në muaj kanë ofruar strehë e ngrohtësi për fqinjët e pastrehë, nënat kanë liruar shtretërit e fëmijëve të tyre për jetimët, fëmijët në nevojë për një çati. Të rinj e të reja në diasporë kanë lënë shkollat, punët, për të ardhur e për të punuar vullnetarisht kudo që ka qenë nevoja në atdheun e tyre”, – tha Rama.

Kryeministri tha se gjithë ky solidaritet është një dëshmi e gjallë e poemës së mrekullueshme turke: Në pyjet e netëve me borë, fuqia jonë e çuditshme është kurajoja për të jetuar duke e ditur që do të vdesim.

“Megjithatë nuk ka nevojë të shpjegoj se i gjithë ky solidaritet brenda nesh pavarësisht sesa i madh është për zemrën e vendit është larg së qeni mjaftueshëm për atë që ka nevojë dhe ndihmë për të kapërcyer këtë tragjedi”, – tha Kryeministri Rama.

E pranoj, vijoi Rama, që të mos ishte për dy hadithe të mrekullueshme të Profetit do të kishte qenë thuajse e pamundur për mua të vija këtu para jush dhe të bëja këtë thirrje për ndihmë.

“Ja çfarë thonë ‘Njerëzit që Allahu do më shumë janë ata që janë të dobishëm për të tjerët dhe kushdo që ndihmon një njeri në vështirësi Allahu do ta lehtësojë nga vështirësia në ditën e ringjalljes”. Më lini të jem i qartë miqtë e mi unë nuk ofroj një ringjallje, por po kërkoj dritën në zemrat tuaja me besimin që shkrimtari turk Mehmet Murat Ildan kishte te drejtë kur shkroi se ”Drita më e çmuar është ajo që të vjen në orën më të errët”, nënvizoi Rama.

Më tej, kryeministri Rama , u shpreh “më lini të kërkoj falje nëse përsëris veten, por për të thënë të vërtetën kjo dritë pa tek Turqia një prej rrezeve, fanarëve të saj. Mes dhimbjes së papërshkruar për jetët e humbura dhe për shkatërrimin që ka qenë thuajse apokaliptik në disa zona, Turqia e provoi edhe një herë që i përmbahet urtisë së saj, sepse nuk braktisi një mik e vëlla në nevojë edhe siç thotë edhe thënia e vjetër të ecësh me një mik në errësirë është më mirë se të ecësh i vetëm në dritë”.

“Për të gjithë këtë e për premtimin më shumë se fisnik të zotit President për të ndërtuar menjëherë 500 banesa për të gjithë mirësinë e mbështetjen përmes tij e popullit turk në tokën e plagosur të Shqipërisë kam ardhur këtu t’iu falënderoj dhe me përulësi t’iu kërkoj të gjithëve që të bashkoheni në këtë rrugëtim të dhimbshëm, por të paharruar”, – theksoi Rama.

Duke u ndalur në fjalët e Kuranit, Kryeministri Rama tha se “Kurani i lavdishëm na mëson se asnjë gjethe nuk e prek dot tokën, pa lejen e Zotit, Kurani i madhërishëm gjithmonë na mëson gjithashtu se katastrofat natyrore janë sprova që i jepen njerëzimit në mënyrë që të pastrohet nga mëkatet e të pendohet”.

Rama shprehu dëshirën që katastrofa që po përballemi të kthehet në frymëzim, dhimbja që po ndiejmë ta kthejmë në forcë dhe shkatërrimi që ne po shohim të shndërrohet në një peizazh të bukur në të ardhmen.

“Duke iu bashkuar çdo mëngjes dhe darkë shqiptarëve të mi në lutjen “Zot mbaje dorën” nuk mund të resh së kujtuari e të menduari se tërmeti shkatërrimtar më i madhi që kemi pasur na ka sfiduar në mënyrë të pakrahasueshme me asnjë sfidë tjetër gjatë gjithë historisë modern. Ka përkulur qytetet tona më të rëndësishme Tirana dhe Durrësi”, tha Rama.

Kryeministri tha se, Durrësi është qyteti që udhëtari otoman e eksploruesi Evlija Çelebie përmend në librin e tij të udhëtimeve në 1670 për Limanin, portin e vet të rëndësishëm, rrënojat e kështjellës së rrënuar nga tërmeti i mëparshëm dhe xhaminë e mrekullueshme Fatihe ndërtuar për nder të Mehmet pushtuesit në 1502. Vite më vonë udhëtarë të tjerë do të përshkruanin bukurinë marramendëse të xhamisë Fatih e gjendur në një kodrinë hijerëndë e rrethuar nga tulipanë e narcisë, lulet e preferuara të tulipanëve.
Tani e njëjta xhami rrethohet nga rrënoja”.

Rama tha se “dua të besoj se edhe me ndihmën tuaj do të arrijmë për Durrësin e të gjitha zonat e tjera të prekura nga tërmeti atë që Turqia bëri për Izmirin pas tërmetit shkatërrimtar të 1999”.

“Të dhënat tona paraprake janë tronditëse dhe shumica e ndërtesave të shkatërruara janë banesa të ndërtuara me ndërtime të dobëta nga periudha komuniste apo nga koha kur nuk ka patur, plan kontroll apo përgjegjësi. Shumica e këtyre ndërtesave janë struktura shumëkatëshe, ku secila prej tyre përmban dhjetëra familje. Kjo është arsyeja që edhe pse nuk kemi një shifër finale zyrtare pas shumë ndërtesave që po kontrollohen e inspektohen nga ekspertë ndërkombëtarë, përfshirë edhe ata turq, që janë ende në terren ne besojmë se dëmi i shkaktuar shkon përtej asaj çka është njerëzisht e përballueshme nga ne”, tha ai.

Pa kontribute nga jashtë, – sipas Kryeministrit Rama, – koha që do të na duhet për të shëruar plagët tona do të jetë shumë e gjatë për durimin që njerëzit mund të kenë dhe për frymën e shpresës në të ardhmen e vendit dhe koha me dimrin në Shqipëri dhe rrëmujën shpërqendruese të politikës ndërkombëtare është për fat të keq një komoditet që nuk e kemi.

“Megjithatë përtej debateve tokësore le të kemi besim në Hadithin e çmuar që i thotë gjithsecilit që do të dëgjojë se zoti pranon vetëm atë çka është e drejtë. Dhe ndërkohë që ju kërkoj ndihmë më lejoni t’i bëj thirrje ndjenjës suaj të dashurisë dhe mirësisë fjalë që kanë 50 sinonime në Kuranin e shenjtë, fjalë që askund nuk përshkruhen kaq bukur e në mënyrë kaq të gjithanshme sa në Librin e shenjtë”, tha Rama.

E më shumë se kaq, Rama tha se “Kurani i madhërishëm ka një përkufizim unik për bujarinë, një akt sinqeriteti ndaj krijuesit, çfarëdo që ju shpenzoni nga ajo që është e mirë, është për prindërit, për të afërmit, për jetimët, për ata në nevojë e për udhëtarët. E çfarëdo që të bëni që është e mirë Allahu e di më së miri”.

“Duke iu kërkuar falje që ndërhyra në konferencën tuaj me një çështje kaq të rëndë e shqetësuese për një vend që shumica prej jush nuk e njohin e duke ndarë me ju të njëjtën bindje të atit themelues të këtij shteti të madh, Qemal Ataturk i cili besonte se njerëzimi është një trup i vetëm dhe çdo komb gjymtyrë e këtij trupi ju falenderoj me zëmër për durimin falënderoj presidentin Erdogan për dhimbshurinë e tij”, tha Rama./atsh

Kryeministri Edi Rama deklaroi sot nga Stambolli se jemi duke përcaktuar vendet për ndërtimin e 500 banesave që do të ndërtohen nga Turqia.

Në një prononcim per mediet nga Turqia ku u mbajt konferenca ndërkombëtare e nivelit të lartë për investimet publike e private, Kryeministri Edi Rama deklaroi se “për banesat ka filluar puna, Ministria e Kulturës si koordinatore e planifikimit ka mbledhur edhe ekipin e arkitektëve jemi duke përcaktuar vendet dhe kemi identifikuar si më të përshtatshme për masën e projektit dhe për të ruajtur koherencën e projektit në zonën e Laçit, pastaj edhe mbase një bllok tjetër në varësi të nevojave rrotull apo gjetkë”.

“Takimi me Presidentin Erdogan zgjati 3 orë, folëm për të gjitha aspektet e rindërtimit, ndërkohë që u garantuam që kemi të gjitha çadrat e dimrit të nevojshme, kanë filluar të instalohen por të tjera nisen sot, kemi faktikisht ka qenë takim pune sepse gjatë gjithë kohës gjërat thuheshin dhe pastaj bëheshin telefonatat”-, theksoi Rama.

Kreu i qeverisë u shpreh se “kemi identifikuar disa prej vendeve që do të ushtrojmë një trysni pozitive të veçantë. Presidenti Erdogan ka komunikuar vetë me telefon me disa prej liderëve të rajonit të vendeve myslimane, gjithçka duket se po shkon në drejtimin e duhur dhe do vazhdojmë sepse siç e tha edhe vetë Presidenti kur flasim për mjaltin nuk ta ëmbëlson gojën, se po nuk e preke me buzë nuk ke bërë asgjë”.

I pyetur se Presidenti Erdogan e ka bërë të qartë që një ditë pas tërmetit se Turqia do të ndërtojë 500 banesa, krahas kësaj dhe çadrave a mendohet ndonjë ndihmë tjetër, Kryeministri tha se “ndihma ka qenë e gjithanshme ne flasim për çadra , por kanë dhjetëra e dhjetëra njerëz për ekipet e shpëtimit , janë dhjetëra e dhjetëra inixhinierë aktualisht që flasim sot në Shqipëri, pa folur për ndihmat e tjera materiale, ushqime e veshje. Me Presidentin Erdogan kemi folur edhe për disa nxitje të natyrës strategjike për disa investime që do të shoqërojnë procesin e rindërtimit si investime private, por këto janë gjëra që janë në diskutim e sipër”.

Ndërsa pyetjes nëse ka marrë një ftesë nga Franca për të organizuar një samit për të ndihmuar Shqipërinë, Rama tha se ” kam folur me presidentin Macron dhe ai ka shprehur gatishmërinë për ta mikpritur, por kjo është një çështje që do të zgjidhet mes tyre, sepse edhe Gjermania ka shprehur interes, Bashkimi Europian, vetë Komisioni do ta koordinojë këtë proces”.

“E rëndësishme është të kemi të gjitha shtetet në tavolinë, ndërkohë ne po punojmë shumë intensivisht me ekspertët e huaj për të përgatitur raportin e post katastrofës në mënyrë që të kemi shifra konkrete që të jene pastaj në tryezën e vendimmarrjes”,- tha Rama./atsh

Shënohet sot Dita Kombëtare e Rinisë. Prej vitit 2009, me vendim të marrë nga Kuvendi i Shqipërisë, kjo datë përkujtohet si festë kombëtare në nderim të të gjithë studentëve të dhjetorit 1990 dhe gjithë rinisë shqiptare.

Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.

Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.

Akti i tyre publik, sa qytetar aq edhe politik, i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.

Vlerat e kësaj dite bëhen gjithnjë e më shumë vlera kombëtare, sepse ndryshe nga ngjarjet e tjera 8 dhjetori nuk pati dy palë, një fituese dhe një të humbur. /atsh

Kryeministri Edi Rama solli sërish sot përmes fjalëve të shenjta, një mesazh solidariteti për përballimin e situatës së shkaktuar nga tërmeti i 26 nëntorit.

“Gjithçka doni që të tjerët të bëjnë për ju, bëjeni vetë për ta: këtu përmblidhet gjithë ligji, bashkë me profetët”.

Kryeministri Rama zgjodhi fjalët e Ungjillit sipas Mateut, 7:9-12, për të dhënë një mesazh solidariteti për të ndihmuar njerëzit në kapërcimin e situatës së shkaktuar nga tërmeti i 26 nëntorit./atsh

Kryeministri Edi Rama vizitoi sot banorët e sistemuar në Manëz, ku janë vendosur edhe 15 njësitë e parë të lëvizshme për banim.

I shoqëruar nga zv.ministrja e Mjedisit, Ornela Çuçi, kryeministri Rama pa nga afër gjendjen e banorëve të sistemuar në Manëz, ku përveç strehimit sigurohet edhe asistencë psikologjike dhe aktivitete të ndryshme sociale për fëmijët.

Çuçi informoi se në Manëz janë montuar 15 njësitë e para të lëvizshme të banimit, ku janë akomoduar deri tani 81 persona, ose afërsisht 27 familje, që ishin më parë në çadra.

Njësitë e banimit, sipas Çuçit, janë të kompletuara me kanalizime të ujërave të zeza, të ujërave të bardha, me elektricitet dhe kondicionerë në çdo shtëpi.

Ndërkohë sipas saj, pritet edhe montimi i 10 njësive të tjera lëvizëse të banimit pranë qendrës shëndetësore.

Çuçi informoi po ashtu se janë shpërndarë mbi 40 çadra dimërore për familjet në zonat e largëta rurale. Sipas saj, çadrat kanë ardhur nga Izraeli.

Kryeministri pa nga afër kushtet e banimit në këto njësi të lëvizshme, ku janë akomoduar familje me foshnja të vogla e fëmijë, si dhe me të moshuar.

Në bashkëbisedim me një të moshuar, Rama tha se “secili ka detyrat e veta në këtë botë, ca të shkatërrojnë ca të ndërtojnë, ca të prishin ca të rregullojnë, ca t’ia fusin kot, ca ta bëjnë tamam, por siç thotë ajo shprehja ‘bylmezi e gjen vetë rrugën e humbjes”.

Kryeministri vizitoi po ashtu edhe ambientet e shkollës së Manzës, e cila është kthyer në një qendër për fëmijët, që përveç aktiviteteve marrin edhe 3 vaktet e ushqimit.

Përveç stafit arsimor, aty janë angazhuar edhe dhjetra vullnetarë nga “Save the Children”, UNICEF etj për të bërë të mundur tejkalimin e kësaj situate. /atsh