Aktualitet

Deputetja Rudina Hajdari reagoi sot ndaj ndryshimeve në ligj për mediet online, të cilat sipas saj “i japin më shumë kompetenca AMA-s dhe AKEP, gjë që bën që mediet të bien në censurë dhe autocensurë”.

Në një konferencë për mediet, Hajdari tha se edhe masat administrative që parashikohen janë shumë të larta dhe nuk përballohen dot nga redaktorët dhe gazetarët.

“Shoqata e Medieve ka kërkuar që ‘Paketa antishpifje’ të rrëzohet dhe të merren parasysh institucione vetërregulluese. Në fakt, Rama i ka dhënë kompetenca të shtuara AMA-s të mbyllë medie pa vendim gjykate. Si mundet që AKEP dhe AMA të kenë këto kompetenca në kundërshtim me veprimet demokratike”, tha ajo.

Hajdari tha se “Gjykata duhet të jetë ajo që dënon shpifjet”. “Në një kohë që Reforma në Drejtësi vazhdon Rama merr kompetenca që nuk i takojnë. Krijon kompetenca paralele si kjo e antishpifjes dhe KÇK. I bëjmë thirrje të ndalojë degradimin e Reformës në Drejtësi, të lejojë që reforma të vazhdojë dhe të mos bëjë iniciativa ligjore që nuk i takojnë këtyre strukturave. Duhet të merren parasysh rekomandimet e OSBE për paketën antishpifje. Këto propozime nuk janë marrë parasysh. Kërkojmë që para seancës plenare qeveria të tërheqë paketën antishpifje pasi jemi para kryesimit të OSBE. Dhe nuk duhet të dobësojmë rolin e Shqipërisë. Duhet të tregojmë se ne jemi në gjendje t’i dëgjojmë”, tha Hajdari. //atsh

Specialistë të rinj, nëpërmjet rekrutimit të Departamentit të Administratës Publike, i janë bashkuar diplomacisë shqiptare.

Lajmin e ka bërë të ditur vetë ministri në Detyrë për Europën dhe Punët e Jashtme, Gent Cakaj.

Plotësimi i kuadrit diplomatik është pjesë e strategjisë së Ministrisë për Europën dhe Punët e Jashtme për të krijuar hapësirë më të madhe angazhimi për një gjeneratë ekselente dhe për të siguruar një profesionalizëm më të lartë në diplomacinë shqiptare.

“Kjo qasje do të vazhdojë edhe me tutje. Numri i të rinjve në diplomaci do të rritet më shumë dhe thirrja e ardhshme publike për aplikim në Ministrinë për Europën dhe Punët e Jashtme do të bëhet së shpejti”, shprehet Cakaj./atsh

“Projektligji është konsultuar e përpunuar prej një viti nen për nen e pikë për pikë me OSBE dhe do të hyjë në seancë pa asnjë cen në aspektin e standardeve të lirisë për t’u shprehur e të së drejtës për t’u informuar pa kufizim, po edhe të mundësisë për t’u mbrojtur nga shpifjet”, deklaroi sot Kryeministri Edi Rama, duke komentuar reagimet e opozitës për ndryshimet në ligj për mediet online.

Rama tha se “ose s’e kanë lexuar projektligjin, ose duan të prekin lirisht dinjitetin e çdokujt nëpër portale e faqe sociale dhe të tallen me të vërtetën e me opinionin publik, duke shkruar çfarë t’u teket, duke shpifur sa e si t’u teket, duke shantazhuar e duke i vënë gjoba kujt t’u teket”.

“Sa për “ERTV” faleminderit për publicitetin dhe mos ma prekni ju lutem fjalën time të drejtpërdrejtë, për të gjithë ata që hyjnë pa asnjë detyrim në faqen time të fejsbukut, ku po u pëlqeu rrinë, po s’u pëlqeu ikin”, tha Rama. /atsh

Këshilli i Emërimeve në Drejtësi realizoi diskutimin mbi vlerësimin dhe pikëzimin e kandidatëve të lejuar për Inspektor i Lartë i Drejtësisë. Rezultati paraprak i pikëzimit për secilin kandidat të vlerësuar është si më poshtë:

Artur Metani 89.6 pikë

Eris Hysi 78.3 pikë

Joana Asimi Sorraj 82.5 pikë

Lindita Troja 63.4 pikë

Sokol Stojani 89 pikë

Këshilli i Emërimeve në Drejtësi, në mbledhjen e tij të datës 11.12.2019, ka vendosur fillimin e procedurës së vlerësimit, pikëzimit dhe të renditjes së kandidatëve për vendin vakant të Inspektorit të Lartë të Drejtësisë dhe po në të njëjtën ditë ka realizuar edhe intervistat me kandidatët e lejuar për këtë vend vakant.

Në zbatim të nenit 239 pika 3 të ligjit nr.115/2016, duke vijuar të qëndrojë i mbledhur deri në përfundimin e procesit të vlerësimit dhe të renditjes së kandidatëve, pasi e përfundoi punën e tij për shqyrtimin e dokumentacionit të paraqitur nga vetë kandidatët dhe atij të siguruar nga Këshilli në komunikimin me institucionet e tjera lidhur me të dhënat e nevojshme për vlerësimin e kandidaturës dhe të të dhënave të nxjerra nga intervistat me kandidatët, ditën e sotme, Këshilli i Emërimeve në Drejtësi realizoi diskutimin mbi vlerësimin dhe pikëzimin e kandidatëve të lejuar për Inspektor i Lartë i Drejtësisë.

Krahas procesit të punës për zbardhjen e vendimeve të arsyetuara për vlerësimin dhe pikëzimin e secilit kandidat të lejuar, në zbatim të nenit 239 të ligjit nr.115/2016 dhe të pikave 67-74 të Vendimit nr.5 datë 02.04.2019 “ Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, në mbledhjen e ardhshme të Këshillit, do të shqyrtohen dhe miratohen: Lista përfundimtare e renditjes së kandidatëve për vendin vakant të Inspektorit të Lartë të Drejtësisë; Raporti i arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes së tyre, për vendin vakant të Inspektorit të Lartë të Drejtësisë.

Pas shqyrtimit dhe miratimit të këtyre akteve në mbledhjen e ardhshme të Këshillit të Emërimeve në Drejtësi, organit të emërtesës, Kuvendit të Republikës së Shqipërisë, do t’i dërgohen lista përfundimtare e renditjes së kandidatëve dhe raporti i arsyetuar i Këshillit ku përmbahet analiza lidhur me plotësimin ose jo të kushteve ligjore të kandidimit nga secilit kandidat në vendin vakant të Inspektorit të Lartë të Drejtësisë, për procedurën e ndjekur në vlerësimin, pikëzimin dhe renditjen e kandidatëve të lejuar, si edhe aktet përkatëse të verifikimit dhe të vlerësimit e pikëzimit për secilin kandidat. /atsh