Aktualitet

Në tremujorin e tretë 2019, shkalla zyrtare e papunësisë në Shqipëri është 11,4 %.

Sipas INSTAT, në terma vjetorë shkalla zyrtare e papunësisë u ul me 0,8 pikë përqindje.

Krahasuar me tremujorin e tretë të vitit 2018, shkalla zyrtare e papunësisë u ul me 0,8 pikë përqindje, ndërkohë krahasuar me tremujorin e dytë 2019, shkalla zyrtare e papunësisë u ul me 0,1 pikë përqindje.

Shkalla zyrtare e papunësisë si për burrat dhe për gratë është 11,4 %. Krahasuar me të njëjtin tremujor të vitit 2018, shkalla e papunësisë për burrat ka rënë me 1,2 pikë përqindje, ndërsa për gratë ka rënë me 0,3 pikë përqindje.

Ndërkohë për të rinjtë 15-29 vjeç, shkalla zyrtare e papunësisë është 21,4 %. Krahasuar me tremujorin e tretë të vitit 2018, shkalla e papunësisë për të rinjtë në tremujorin e tretë të vitit 2019 është 1,8 pikë përqindje më e ulët.

Shkalla e papunësisë për grup-moshën 30-64 vjeç është 8,5 %. Në terma vjetorë ky tregues pësoi një rënie prej 0,4 pikë përqindje. Krahasuar me tremujorin e mëparshëm për këtë grup-moshë shkalla e papunësisë u ul me 0,3 pikë përqindje./atsh

Në tremujorin e tretë të vitit 2019, shkalla e pjesëmarrjes në forcat e punës, për popullsinë 15-64 vjeç, është 69,8 %, ose 1,5 pikë përqindje më e lartë se e njëjta periudhë e një viti më parë.

Ndërkohë krahasuar me tremujorin e mëparshëm ky tregues shënon të njëjtin nivel, 69,8 %.

Për gratë, shkalla e pjesëmarrjes në forcat e punës është 62,0 %, ndërsa për burrat ky tregues është 77,7 %. Për burrat, shkalla e pjesëmarrjes në forcat e punës është 15,7 pikë përqindje më e lartë sesa për gratë.

Krahasuar me të njëjtin tremujor të vitit 2018, shkalla e pjesëmarrjes në forcat e punës për gratë është rritur me 2,7 pikë përqindje dhe për burrat është rritur me 0,3 pikë përqindje.

Gjatë tremujorit të tretë të vitit 2019, shkalla e pjesëmarrjes në forcat e punës për të rinjtë e moshës 15-29 vjeç është 52,5 % me një rritje prej 1,1 pikë përqindje krahasuar me një vit më parë.

Për popullsinë 30-64 vjeç, në tremujorin e tretë 2019, shkalla e pjesëmarrjes në forcat e punës është 79,0 % duke shënuar një rritje prej 1,5 pikë përqindje krahasuar me tremujorin e tretë të vitit paraardhës./atsh

Deputetja socialiste e qarkut të Durrësit, Eglantina Gjermeni ka qëndruar gjatë gjithë këtyre ditëve pranë banorëve të bashkisë së Krujës të prekur nga tërmeti i 26 nëntorit.

Eglantina Gjermeni vijon t’u shërbejë banorëve të dëmtuar të Krujës me përulësi, duke u garantuar që në rrugën e ringritjes jemi të gjithë bashkë.

“Përkujdesja ndaj njeriut është për mua themeli i çdo shoqërie njerëzore. Jo vetëm për background-in që kam por edhe se jam deputete e qarkut Durrës dhe bashkisë Krujë”, thekson ajo.

Duke treguar për ditën e tërmetit dhe ditët që e pasuan, Gjermeni tregon se, “ato ditë ishim në Thumanë aty ku kishte dhe jetë të humbura dhe jetë në gërmadha dhe të ishim pranë familjeve dhe të shpëtonim sa më shumë jetë. Më pas të përpiqeshim të shpëtonim qytetarët në kampe. Kruaj u trondit shumë dhe shumë banesa të qytetarëve u dëmtuan rëndë. E gjithë vëmendja ishte që t’i ofronim qytetarëve siguri qoftë me strehim në hotele, konvikte dhe të ishim pranë tyre”.

Gjermeni shton se, “në qytetin e Krujës i kemi të shpërndarë qytetarët, të cilëve iu dëmtuan banesat dhe e kanë të pamundur të jetojnë aty në banesat që kishin. Janë rreth 40 këtu në palestrën e shkollës së mesme Gjergj Kastrioti Skënderbeu. Janë 130 në palestrën e shkollës nr 4 dhe në konviktin që është pranë saj. Dhe rreth 20 e ca familje janë në një hotel të vogël në Hotel Grand”.

“Nga pallatet që janë evidentuar nga ekspertët, 6 prej pallateve që janë evidentuar janë shpallur të pabanueshme, ndërkohë që një pjesë e mirë e tyre gati 47 që kanë pasur dëmtime, një pjesë e tyre kanë dhe dëmtime goxha të rënda dhe nuk këshillohet të shkojnë qytetarët në to. Ndërkohë që vazhdon evidentimi, të gjitha ekipet janë në terren për të parë me kujdes për të bërë ekspertizën e duhur dhe për të dhënë vendimin nëse mund të banohen apo jo”, thotë deputetja Gjermeni.

Gjermeni nënvizon se, “qendra shëndetësore këtu dhe spitali i Krujës në të gjitha njësitë vendore ka ofruar shërbim shëndetësor për qytetarët 24 orë. Dhe në kamp kur ishte në Thumanë, dhe në Bubq, dhe në Krujë po ashtu”.

Ndërkohë Gjermeni falënderon të gjitha organizatat e shoqërisë civile që kanë mbështetur qytetarët e prekur nga tërmeti. “Kanë ardhur ndihma, veshje, batanije, ushqime, paketa higjienike. Kjo tragjedi na bëri të gjithëve bashkë me solidaritet dhe në këtë situatë mbizotëroi humanizmi dhe solidariteti”, thekson Gjermeni./atsh

Mbledhja e Komisionit të Reformës Zgjedhore që pritej të zhvillohej sot u anulua për shkak të mungesës së kuorumit.

Në një deklaratë për mediet, bashkëkryetari i këtij Komisioni, Damian Gjiknuri tha se shpreson që kjo gjë të mos çojë në bojkot, teksa shtoi se, është në pritje të propozimeve për ndryshimin e sistemit nga ana e opozitës parlamentare, gjë që sipas tij nuk ka ndodhur.

“Nuk u bë kuorumi i mbledhjes se disa prej anëtarëve nuk ishin, ndërkohë që bashkë kryetarja e Komisionit nuk ishte në gjendje të mirë shëndetësore. Kjo ishte e vetmja arsye. Mbledhja nuk u vazhdua sepse nuk kishte kuorum, por puna vijon”, tha Gjiknuri.
“Puna vazhdon. Shumë shpejt do të keni njoftimin për mbledhjen e radhës se ne duam këtë mbledhje ta zhvillojmë përpara se të mbyllim sesionin e Kuvendit”.

I pyetur nëse mungesa e kuorumit tregon nisjen e një ngërçi, Gjiknuri tha se, “shpresoj që të mos jetë ngërç dhe bojkot pasi të gjitha partitë në parlament janë angazhuar për mbështetjen e reformës zgjedhore. Aq më tepër që janë ata që kanë kërkuar që një nga pikat që duhet të trajtohet është çështja e sistemit zgjedhor. Kështu që ne mirëpresim partitë e opozitës parlamentare që të vijnë me një propozim për sistemin zgjedhor, por deri tani kjo gjë nuk ka ndodhur. Ne jemi të hapur për të vazhduar komunikimin”.

“Njëkohësisht komisioni ka një mandat, ka një afat dhe duhet të vazhdojë punën. Besoj se shumë shpejt do të kemi njoftimin për mbledhjen e radhës ku puna do të vazhdojë”, tha Gjiknuri./atsh

Në Tiranë u lançua sot ngritja e Komitetit Rajonal të Lehtësimit të Tregtisë.

Ministrja e Financave dhe Ekonomisë, Anila Denaj u shpreh se në kuadër të kryesimit të Shqipërisë në CEFTA në vitin 2019, u krijua në Tiranë Komiteti Rajonal i Lehtësimit të Tregtisë.

“Në takimin e parë të Javës së CEFTA-s që zhvillojmë në Tiranë, përcolla mesazhin e nevojës për një platformë rajonale dhe afatgjatë, e cila krijon kushte lehtësuese për një bashkëpunim në rritje të sektorit publik dhe privat”, theksoi Denaj.

1 nga 6

Krijimi i këtij Komiteti, shtoi Denaj, “u mirëprit nga pjesëmarrësit, si një strukturë e cila do të sjellë më pranë institucionet politikëbërëse dhe bizneset për një klimë më të favorshme për sipërmarrësit e të gjithë anëtarëve të CEFTA”.

“Mobilizimi i përbashkët për një lehtësim në rritje të tregtisë së mallrave dhe shërbimeve mbetet angazhim thelbësor në përpjekjet për një zhvillim të qëndrueshëm të ekonomisë së rajonit”, tha Denaj./atsh

Shërbimi Meteorologjik Ushtarak bën me dije se sot moti do të jetë i kthjellët me vranësira të pakta kalimtare. Era do të fryjë me drejtim Juglindje – Lindje me shpejtësi deri në 8 m/sek, hera-herës me rrahje deri në 15m/sek. Valëzimi në dete parashikohet i forcës 1-3 ballë.

Temperaturat parashikohen:

QYTETET Temperaturat në °C Sigla
Shkodër 7/15 Diell re
Kukës 2/15 Diell re
Lezhë 7/16 Diell
Dibër 2/11 Diell re
Durrës 10/19 Diell
Tiranë 9/19 Diell
Elbasan 6/19 Diell
Berat 4/20 Diell re
Vlorë 10/21 Diell
Korçë 0/10 Diell re
Gjirokastër 2/16 Diellre
Sarandë 7/21 Diell re/atsh