Aktualitet

Kryeministri Edi Rama ka zgjedhur sot të citojë përmes rubrikës “Fjalët e Shenjta”, shkrimtarin e famshëm Albert Kamy.

“Fjalët e Shenjta: Më mirë të jetoj sikur ka Zot dhe kur të vdes të dalë që nuk ka, se sa të jetoj sikur s’ka Zot dhe të më dalë përpara kur të vdes “, shprehet Rama duke cituar shkrimtarin Kamy.

Përmes rubrikës “Fjalët e Shenjta”, Kryeministri Rama përcjell çdo mëngjes pasazhe nga librat e shenjtë ose nga personalitetet më në zë botërorë, si mesazhe urtësie e solidariteti për përballimin e situatës pas tërmetit. //atsh

Rritja me 24% e numrit të të punësuarve në hoteleri e shërbime, është një tjetër tregues i ecurisë pozitive në sektorin e turizmit, që njëkohësisht zgjeroi me 22,5% edhe shitjet për të njëjtën periudhë.

Rritja e punësimit në sektorin turistik është tashmë një tendencë e mbështetur nga shtimi i investimeve në struktura të reja akomoduese, resortet apo pikat agroturistike që po japin impakt në zhvillimin gjithëvjetor të sezonit turistik, ndonëse përqendrimi më i lartë mbetet ai gjatë sezonit veror.

Shifrat zyrtare të INSTAT tregojnë se për këtë periudhë, turizmi është sektori ekonomik me rritjen më të lartë të punësimit në Shqipëri, për të vijuar me teknologjinë e informacionit dhe komunikimit, ku numri i të punësuarve shënoi rritje dyshifrore me 17,5% në 3 mujorin e tretë 2019.

Investimi për arsimim profesional, kryesisht në degët e perspektivës siç është “biznesi teknologjisë” po zgjeron hapësirat e punësimit dhe po bëhet një nga sektorët më fitimprurës, jo vetëm për ekonomitë familjare por edhe atë të vendit.atsh

Ambasadori i Bashkimit Europian në Tiranë, Luigi Soreca deklaroi sot se 15 milionë euro janë hapi i parë që BE ka ofruar për t’i ardhur në ndihmë Shqipërisë pas tërmetit, duke shtuar se konferenca e donatorëve që pritet të mbahet në fund të muajit janar.

Gjatë një interviste për televizionin A2, Soreca vlerësoi edhe punën e bërë nga qeveria.

I pyetur për mëngjesin e 26 nëntorit kur ra tërmeti, Soreca tregoi se, “atë mëngjes besoj se të gjithë e filluam me tërmetin. Nga aspekti profesional, mëngjesi filloi rreth një orë më pas, kur pata komunikimin e parë me Kryeministrin për të diskutuar rreth situatës. Ne vijuam punën dhe gjysmë ore më pas, ne ofruam asistencën tonë. Pas asaj telefonate, më është thënë se Shqipëria ishte e gatshme që ne të sillnim këtë ekip”.

I pyetur nëse kishte një telefonatë nga kryeministri për të, Soreca tha se, “së pari i dërgova një mesazh për të kuptuar situatën. Për pak orë, ne patëm atë qendrën tonë të përgjigjeve ndaj emergjencat, të cilët kishin biseduar me të gjithë kryeqytetet e BE. Ky është një sistem tejet efikas, ku menjëherë kryeqytetet tregojnë gatishmërinë e tyre”.

I pyetur sesi u realizua teknikisht ndihma e menjëhershme e BE, Soreca u shpreh se, “kjo qendër punon 24 orë në ditë, 7 ditë në javë. Kështu që ata kanë mundësinë të kontaktojnë të gjitha shtetet anëtare gjatë gjithë kohës. Kështu që kur vjen një kërkesë nga një shtet anëtar apo një shtet kandidat si Shqipëria, është njësoj për ne. Fillon puna në mënyrë të menjëhershme. Është një listë njerëzish që mund të japin përvojën e tyre. Reagimi nga shumë njerëz anëtarë ka qenë i menjëhershëm.

I pyetur se çfarë ekspertize ofruan ekspertët që erdhën nga Bashkimi Europian, Soreca theksoi se, “në këto lloj fatkeqësish natyre ka tre faza, ajo e kërkim-shpëtimin, vlerësimi i dëmeve dhe faza e pas fatkeqësisë natyrore. Pra, për ne ishte e rëndësishme që ekipet e kërkim-shpëtimit të arrinin në vendndodhje të ndryshme në mënyrë që qytetarët të kishin ndihmën dhe të ishin edhe punonjësit e emergjencave shqiptare. Ne kemi pasur ekspertë nga shumë vende të BE. Ne kemi edhe një qendër koordinimi për të shmangur dyzimet. Kjo fazë zgjat 48 apo 72 orë, në mënyrë që ne të ndihmojmë ekipet shqiptare. Ndihma u dha dhe me ato jetë që u shpëtuan. Më pas, vjen faza e vlerësimeve”.

I pyetur se për sa kohë do të asistojnë ekspertët e BE në Shqipëri, Soreca nënvizoi se, “ata kanë arritur dy ditë më pas dhe çdo ditë në qytetin e Durrësit bëhet mbledhja e mëngjesit, ku koordinohet puna. Të gjithë specialistët takohen dhe ju jepen grafikat, ku ndahen nga Tirana deri në Lezhë. Tashmë po punohet për vlerësimet. Deri tani janë kontrolluar 14 mije ndërtesa. Kjo është shumë e rëndësishme si shifër. Mijëra në Durrës, 6 mijë në Tiranë dhe pjesa tjetër në Lezhë. Ata do të qëndrojnë rreth 1 javë tjetër. Kjo pjesë e kohës do të përqendrohet te trajnimet e ekipeve shqiptare dhe kjo është e rëndësishme. E kam parë këtë takim bashkërendimi që bëhet çdo ditë në Durrës. Në mënyrë që të përgatitet puna që do të bëhet. Shqipëria dhe BE kanë ecur bashkë në mënyrë për të shpëtuar jetë”.

I pyetur për anën financiare dhe angazhimin e BE, Soreca tha se, “folëm për dy fazat e para dhe që prej të shtunën është faza e vlerësimit të dëmeve pas fatkeqësisë natyrore. BE, Banka Botërore dhe OKB-ja për të realizuar këtë proces, i cili zgjat nga 6 deri në 8 javë për të vlerësuar dëmet në të gjitha këto ndërtesa. Këtu shikohet e gjithë pjesë e infrastrukturës, patjetër edhe banesat. Kjo është pjesë e mekanizimit të BE-së. Në rast se do të ndodhte një tjetër tërmet edhe popullsia të jetë e trajnuar që të dijë se çfarë të bëjë. Ne kemi 15 ekspertë nga BE që do të vijojnë punën në javët në vijim. Për të parë ku do të shkojnë paratë që janë premtuar. Prandaj do të bëhet edhe konferenca e donatorëve. Ne jemi të nderuar që do të organizojmë këtë konferencë. Kjo konferencë do të ndodhë në Shqipëri, duke marrë në konsideratë që do të jenë 300-400 përfaqësues të nivelit të lartë të organizatave ndërkombëtare, të institucioneve ndërkombëtare financiare, të shteteve të ndryshme. Ne besojmë që do të organizohet nga fundi i janarit, pasi ne besojmë që ky proces i vlerësimit të dëmeve pas kësaj fatkeqësie të jetë kryer në mënyrë që të jemi të sigurt për shifrat. Presidentja e Komisionit do të marrë pjesë në këtë konferencë. Angazhimi është për 15 milionë euro që janë për Shqipërinë dhe kjo është pjesë e angazhimit tonë. Ky është hapi i parë fare për ndihmën për Shqipërinë”.

I pyetur se cili është objektivi që pritet të realizohet në konferencën e donatorëve, Soreca theksoi se, “mendoj se në varësi të raportit që do të përpilohet. Sa më i mirë që të jetë ky raport aq më shumë do të kenë mundësi donatorët të shohin se nga cilët zëra do të mund të sjellin para”.

Soreca dha dhe një mesazh për popullin shqiptar pas tërmetit.

“Së pari, do të jap atë mesazhin institucional. Unë kam qenë në terren për orë të tëra dhe kam pasur mundësinë të ndihmoja dhe të shihja lidhjen që ekziston nëpërmjet qytetarëve shqiptarë dhe popujve të ndryshëm të BE. Ne kemi parë këtë dhimbje dhe se si shtetet anëtare kanë qenë të pranishëm që nga momenti i parë. Edhe unë kam qenë në fshatra dhe zona të ndryshme për të treguar praninë e BE-së. Ne mbështetjen duam ta tregojmë edhe me vepra përveçse me fjalë dhe këtë do ta tregojmë gjatë konferencës së donatorëve”, tha Soreca.

I pyetur se si e ka menaxhuar qeveria shqiptare këtë situate, Soreca u shpreh se, “qeveria e Shqipërisë ka reaguar ndaj tërmetit në mënyrë të menjëhershme. Është krijuar mekanizmi me ministrin Çuçi, me kolegë të tjerë të qeverisë dhe natyrisht që mund të ketë dobësi si në çdo proces. Ashtu siç e thash edhe më parë, edhe në këtë proces është pjesa e vlerësimit pas situatës që do të shikojmë. Në fakt, Shqipëria do të duhet të ketë edhe një mekanizëm pikërisht për Mbrojtjen Civile, një mekanizëm të fortë për të reaguar në lidhje me këto situata. Kjo konferencë donatorësh do të ndihmojë edhe për këtë gjë”./atsh

Gjermania jep 5.4 milionë euro për menaxhimin e mbetjeve të ngurta në Vlorë.

Ministrja e Financave dhe Ekonomisë, Anila Denaj nënshkroi dje me Bankën Gjermane për Zhvillim KfW marrëveshjen e grantit për rritjen e fondeve të programit aktual për menaxhimin e mbetjeve të ngurta të Vlorës me një shumë shtesë prej 5.4 milionë eurosh.

Sipas njoftimit për shtyp të Ambasadës Gjermane, granti i dhënë nga Qeveria Gjermane do të përdoret për masa shtesë për mbrojtjen e mjedisit si edhe për ngritjen e një sistemi për menaxhimin e mbetjeve në zonat e Vlorës dhe Selenicës. Programi i menaxhimit të mbetjeve të ngurta në rajonin e Vlorës bazohet mbi një studim të financuar nga Korniza e Investimeve në Ballkanin Perëndimor (WBIF).

Ai përfshin ndërtimin e një landfilli të ri sanitar ne Sherrishtë në të cilin do të depozitohen mbetjet e prodhuara në Vlorë dhe Selenicë, ndërtimin e mjediseve të seleksionimit dhe kompostimit për mbetjet e llojeve të ndryshme dhe mbetjeve të riciklueshme të para seleksionuara, blerjen e pajisjeve për mbledhjen e mbetjeve (kamionë për mbledhjen e mbetjeve si edhe kosha/kontenierë mbetjesh) për përmirësimin dhe zgjerimin e mbledhjes së mbetjeve dhe shërbimin e transportit të tyre në zonën ku shtrihet projekti. Po ashtu, programi parashikon një projekt pilot pajisjen me kamionë dhe kontenierë për ndarjen në burim të mbetjeve të riciklueshme dhe atyre organike, mbylljen e vend-depozitimeve të pakontrolluara dhe ilegale në zonën ku do te shtrihet programi. Punimet për këtë program priten të fillojnë në 2020. Duke përfshirë grantin e mësipërm, Qeveria Gjermane, përmes KfW-së ka dhënë një mbështetje prej 12 milionë eurosh në formën e një kredie të butë dhe 15 milonë euro grante për këtë program.

KfW-ja është një nga bankat për zhvillim lider në botë. Me eksperiencën e saj shumëvjeçare KfW është e angazhuar që në emër të Republikës Federale Gjermane si edhe të Landeve Federale të përmirësojë kushtet ekonomike, sociale, ekologjike si edhe kushtet e jetesës në mbarë botën. Në Shqipëri, KfW zbaton bashkëpunimin financiar dhe siguron grante dhe kredi të buta për investime kyçe në infrastrukturë dhe shërbime konsulencë që lidhen me projekte të ndryshme. Bashkëpunimi Gjermano-Shqiptar filloi në vitin 1988. Që nga ai vit Qeveria Gjermane ka angazhuar një shume totale prej mbi një miliard euro, duke u bërë kështu donator më i rëndësishëm bilateral në vend. Sektori i mbrojtjes së mjedisit është një nga sektorët kyç të Bashkëpunimit Financiar Gjermani-Shqipëri, për të cilin Qeveria Gjermane ka angazhuar më shumë se 41 milion euro, që nga viti 1988./atsh

Italia ka qenë dhe mbetet një avokate e fuqishme e integrimit europian të Shqipërisë.

Kryetari i Kuvendit, Gramoz Ruçi, priti Ambasadorin e Italisë, Alberto Cutillo, me rastin e përfundimit të mandatit të tij në Shqipëri.

Ruçi e përgëzoi Ambasadorin Cutillo për mandatin e tij të suksesshëm dhe kontributin në fuqizimin dhe zgjerimin e bashkëpunimit midis të dy vendeve.

“Italia ka qenë dhe mbetet një partner strategjik i Shqipërisë, partneri i parë tregtar dhe një nga donatorët kryesorë bilateralë të Shqipërisë, një fqinje dhe mike e çmuar, e cila i është gjendur pranë Shqipërisë dhe shqiptarëve në kohë të mira e të vështira. Italia ka mikpritur dhe integruar emigrantët shqiptarë, me të drejtat e tyre ekonomike, sociale e politike. Mbi 560 mijë emigrantë dhe rreth 40 mijë sipërmarrës të niveleve të ndryshme jetojnë e punojnë aktualisht në këtë vend”, tha Ruçi.

1 nga 3

“Italia ka qenë dhe mbetet gjithashtu një avokate e fuqishme e integrimit europian të Shqipërisë. Me Dhomën e Deputetëve dhe Senatin ne kemi marrëdhënie të shkëlqyera dhe bashkëpunim produktiv. Shpreh gjithashtu mirënjohjen edhe për ndihmën ndaj familjeve dhe popullsisë së prekur nga tërmeti i 26 nëntorit.”, vuri në dukje Kryetari i Kuvendit, Gramoz Ruçi.

Ambasadori Alberto Cutillo falenderoi Kryetarin Ruçi për vlerësimin e bashkëpunimit me Italinë si edhe të misionit të tij në Tiranë. Aj konfirmoi se mbështetja e Italisë do të vazhdojë edhe në të ardhmen sepse edhe Italia e konsideron Shqipërinë një partnere të rëndësishme.

Së shpejti në Tiranë do të vijë për vizitë edhe Kryetari i Dhomës së Deputetëve Roberto Fico dhe kjo do të përbëjë një hap tjetër të rëndësishëm të bashkëpunimit midis të dy vendeve./atsh

Konsulli i Përgjithshëm i Greqisë në Shqipëri, Lambros Kakissis, i shoqëruar nga Prefekti i Gjirokastrës, Astrit Aliaj, zhvilluan sot një turne vizitash në shkollat 9 – vjeçare dhe të mesme në qarkun e Gjirokastrës.

Në këtë vizitë Kakissis dhe Aliaj u pritën në Tepelenë nga përfaqësues të bashkisë, Zyrës Arsimore, si dhe drejtues të shkollave përkatëse.

Përmes këtij takimi u shpreh miqësia e mirë midis dy vendeve, mirënjohja ndaj solidarizimit të qeverisë dhe popullit grek ndaj fatkeqësisë që përfshiu vendin tonë nga tërmeti i 26 nëntorit, si dhe mbështetja e vazhdueshme qeverisë fqinje për çeljen e negociatave të vendit tonë me Bashkimin Europian.

Me këtë rast me mbështetjen e Ministrisë së Brendshme Greke u shpërndanë disa pako me dhurata me mjete kancelarike për shkollat, si dhe sete sportive për Qendrën Multifunksionale të Aktiviteteve Sportive në Tepelenë.

Këto janë hapat e parë në ngritjen e urave të komunikimit dhe zhvillimit midis vendeve, ku në të ardhmen do të shihet çdo hapësirë për mbështetje jo vetëm në aspektin material, por ç’ka është më e rëndësishmja në aspektin pedagogjik dhe shkëmbimit të eksperiencave midis shkollave të nivelit parauniversitar.

Kakissis në fjalën e tij, nuk ngurroi të përshëndeste punën serioze dhe kushtet mjaft të mira të mësimdhënies për gjimnazin “Abaz Shehu”, duke e krahasuar atë me shkollat më të mira të shtetit grek./atsh