Aktualitet

Kryeministri Edi Rama deklaroi sot se “ata që janë tek dera e parlamentit sot do të ishin me borxhe për të paguar pafundësinë e detyrimeve si rezultat i shkeljes së të drejtave të njeriut. Ata janë shkelës të të drejtave të njeriut, janë shkelës të të drejtës themelore të njeriut që të mos i cënohet në publik integriteti i tij”.

Duke iu referuar gazetarëve që po protestojnë para Kuvendit të Republikës kundër miratimit të paketës “anti-shpifje”, Kryeministri Rama theksoi se “ata janë shkelës të të drejtës dhe lirisë themelore të njeriut në demokraci për të ndërtuar sipërmarrjen e tij të lirë, janë shkelës të së drejtës së shoqërisë për të qenë e mbrojtur nga pasojat katastrofike të lajmeve të rreme apo shpifjeve”.

“Në 26 nëntor ka vdekur një njeri i pafajshëm si rezultat i veprimtarisë së atyre që janë tek dera e parlamentit, ka vdekur ka humbur jetën një baba, janë plagosur dhjetëra njerëz sepse dikush nga ata ka nxjerrë lajmin se spitali i Durrësit po shembet dhe dalja e atij lajmi e ka kthyer spitalin nga një vend pritës për të ndërhyrë dhe shpëtuar jetë dhe për të kuruar plagë të rënda në udhëkryqin e një kaosi me mjekë, infermierë, familjarë, të sëmurë që donin të dilnin një orë e më parë nga dera e spitalit”, – nënvizoi Rama.

Kreu i qeverisë u shpreh se “deri këtu mund të shkojë sepse shkoi efekti negativ i fjalëve të lëshuara pa asnjë përgjegjësi. Liria e shtypit, liria e fjalës për të thënë çfarë të duash është edhe përgjegjësi nuk është vetëm e drejtë. Po ata që janë atje kanë publikuar lajmin se qeveria fshihte 100 të vdekur në morgun e spitalit, duke krijuar një situatë kaotike me familjarë që për një arsye e tjetër kishin humbur kontaktet me anëtarë të familjes që ishin shëndoshë e mirë”.

“U jap raste shumë të freskëta nuk po u flas as për veten time, as për familjen time, as për nënën time, as per vajzën tonë, as për djalin tim, as për prindërit e Ditmir Bushatit, as për familjarët e atyre që janë këtu mbrapa meje, nuk po flas as për familjarët e Taulant Ballës dhe të askujt tjetër mes nesh. Po flas për ata që ndryshe nga ne nuk kanë një mikrofon për të thënë të vërtetën e tyre. Për ata që ndryshe nga ne nuk e kanë Facebook live me një milion ndjekës siç e kam unë për të treguar se çfarë bëj dhe nuk i kanë kushtet tona për të qenë sidoqoftë në mundësinë që tu themi atyre që lexojnë shpifjet dhe agresionet e përditshme ndaj nesh dhe familjeve tona se si është versioni në të vërtetë”-, tha Rama.

Kryeministri vuri në dukje se “këtu e kam fjalën për dhjetëra sipërmarrës që janë detyruar të shkojnë ti paguajnë ata , të paguajnë nën dorë të heqin lajmin se qumështi është i helmuar, se frutat janë me hormone se specat sjellin deformime për bebet në barkun e nënave. Ata si mbrohen në çfarë forme në formën që duhet të presin siç pres unë me shumë durim gjyqet, ndërkohë që një lajmi tillë u shkatërron biznesin dhe deri kur të mbarojë gjyqi biznesi i tyre të ketë falimentuar, me djathin që është me miell apo bukën që është me niseshte. //atsh

Kryeministri Edi Rama duke folur për paketën anti-shpifje që pritet të kalojë në Kuvend deklaroi sot gjatë seancës plenare se ligji për anti-shpifje është 100% i përputhur me standardet ndërkombëtare dhe se do të miratohet sot.

“Nuk ka ligj të përsosur çdo ligj është i përmirësueshëm por ne nuk mund ta shtyjmë në pafundësi në kërkim të perfeksionit miratimin sot, ky ligj do miratohet sot si një e drejtë e gjithkujt që të mbrohet nga llumi i shpifjes. Ne do vazhdojmë punën për aspektet proceduriale dhe rregullatore siç kemi rënë dakort dhe nga fjalia e parë deri tek fjalia e fundit ligji është jo 99% por 100% i përputhur me standardet ndërkombëtare”, deklaroi Rama.

Rama theksoi se, “këtë nuk e them unë së kështu them unë por e them të konfirmuar 100% me shkrim nga institucioni i përcaktuar për të ndjekur këtë proces që është OSBE-ja. Pasi u morën rekomandimet e BE-së u aplikuan 100% në tekst u lanë detyra që procesi të vazhdoj me OSBE-në, procesi vazhdoj me OSBE-në u bënë dhe disa saktësime të fundit dhe duan apo s’duan organizatat, duan apo nuk duan heronjtë që janë te dera, ky ligj do kaloj sot”.

Ky ligj sipas Ramës do t’i japi një instrument të thjeshtë çdo individi që mbasi kur del tek dera e shtëpisë ha një batare me llum dhe baltë syve të ketë një adresë ku të shkoj edhe të ankohet.

“Të shkoj të thotë këtë baltën ma hodhën po a ka mundësi të mos vazhdojnë të ma hedhin se kjo është shpifje, kaq dhe unë jam në krahun e këtij individi jo për veten time”, tha Rama.

“Të gjitha ndryshimet që janë bërë janë bërë ne konformitet të plotë me ekspertët e përcaktuar të OSBE-së . Drafti ynë është përmirësuar në çdo detaj deri në fund dhe thelbi është po ai qëkur kemi pranuar që nuk na lejohet të bëjmë një ligj si Gjermania ose si vendet e tjera të BE-së se ato i kanë shumë të ashpra. E kemi pranuar këtë do bëjmë një më të butë, ky ka qenë moment i tërheqjes sepse vendet e BE-së nuk i kanë siç duhet ligjet për shpifje i kanë shumë të ashpra”, vijoi Rama.

Rama gjithashtu deklaroi se, “në ligjin ekzistues rregullohet gjithë veprimtaria e ofruesve të këtyre shërbimeve jo veprimtaria e rrjeteve sociale. Këto vendet që janë anëtare të BE-së, këto vendet që kanë ligjet më të rënda kundër shpifjes kanë hyr tek rrjetet sociale. Këto vende ta këpusin në kryq profilin në sekond dhe profilet fallso nuk hapen dot atje, nëse ata nuk duan të hapen. Ne nuk kemi shkuar deri këtu, ne po synojmë të vendosim standarde për respektimin e dinjitetit të të drejtave themelore të njeriut”.

“Nuk janë njerëz vetëm këta që janë tek dera e parlamentit, njerëz janë dhe ata që hapin portalet e tyre dhe ata meritojnë të mbrohen në të drejtat e tyre. Ata nuk janë mish për tu shkelur nga këta sa herë që klikojnë dhe ju del përpara shkelmi i shpifjes edhe i gjithë bolorisë që prodhohet për të vënë nën presion shoqërinë dhe njerëzit dhe për të treguar forcë në raport me burimet e mundshme të financimit që unë të bëj gjëmën prandaj ti duhet të më paguash”, u shpreh Rama.

Rama shtoi se, ” ky ligj siguron procedura të shpejta administrative për të trajtuar ankesat sepse e thashë nuk mundet dot që për një efekt imediat të dëmshëm ndaj personit, personi të presi 1 vit ndërkohë që efekti bëhet i plotë nëse ajo përmbajtje që është dëmtore nuk lëvizet. Sigurisht kush e ka publikuar atë përmbajtje ka të drejtën e dëgjesës të shkoj atje dhe të thotë që ankesa nuk qëndron sepse unë këtë përmbajtje e kam ekspozuar bazuar në këto fakte”.

“Krijohet gjithashtu një regjistër ku këto subjekte do regjistrohen se këto subjekte bëjnë biznes. Ne nuk kemi gjë me ligjin, s’duam ligj fare thonin ata jashtë pasi internet është liria jonë, domethënë ne në jemi pushtuesit këtu dhe të gjithë njerëzit që futen në internet o duhet të bashkëjetojnë me pushtuesin ose nuk duhet të futen në internet. Identifikimi i pronësisë mundësohet për të gjithë që të dish se me kë ke të bësh jo me prita me ferra pas të cilave dikush të gjuan dhe ti nuk di nga të erdhi dhe nuk di ku të shkosh për tu ankuar. Ndërkohë që ajo që gjuan ndaj teje nuk të ndot ty po e marrin të gjithë. Si mundet të bashkëjetohet me këtë , në emër të kujt lirie apo të drejte. Njeriu duhet të vendoset përpara një ekzekutimi për diçka që është komplet shpifje”, tha Rama.

Rama thekson se ky ligj nuk parashikon mbylljen e portaleve dhe kush e thotë këtë gënjen.

“Autoriteti i Mediave Audiovizive nuk zëvendëson gjykatën, ajo është instanca ku konkludohet por gjykata dhe vetëm gjykata dhe jo AMA shqyrton çështjet kur ngrihet problem shpifës. Por kur nuk lexon ligjin ose kur thua ma kanë thënë miqtë atëherë flet kot sepse ligji e ka të qartë këtë”, tha Rama.

“Unë personalisht nuk merrem fare me AMA-në, unë me shpifësit do vazhdoj në gjykatë, më janë bërë deri tani 60 çështje mund të shkojnë dhe 600 varet sesa do rri këtu. Unë këtyre nuk i ndahem ose do vijnë të provojnë në gjykatë që ato që thonë janë të vërteta dhe nëse njëri do dali ta provoj unë do iki që këtu ose këta do dënohen në gjykatë si fajtor për përhapjen e shpifjeve”, përfundoi Rama. /atsh