Aktualitet

Drejtoria e përgjithshme e Tatimeve informon tatimpaguesit për lehtësitë fiskale që ofrohen përmes ndryshimeve me anë të Akteve Normative në kuadër të gjendjes së fatkeqësisë natyrore.

Në Ligjin për Tatimin mbi të ardhurat:

Me anë të Aktit Normativ Nr.5, datë 30.11.2019, “Për një shtesë në Ligjin Nr.8438, datë 28.12.1998, “Për tatimin mbi të ardhurat”, të ndryshuar”, në nenin 21 “Shpenzime të panjohura”, është shtuar gërma p, me përmbajtje:

“Donacionet në mjete monetare mbi nivelin 5% të fitimit para tatimit, të bëra për rastet e shpalljes së “gjendjes së fatkeqësisë natyrore” brenda afatit të përcaktuar dhe të transferuara në llogaritë e thesarit. Në rastet kur donacionet për shkak të shpalljes së “gjendjes së fatkeqësisë natyrore” janë në formën e pasurive të paluajtshme, vlerësimi i kontributit deri në nivelin 5%, në raport me fitimin para tatimit, llogaritet sipas procedurave të përcaktuara me vendim të Këshillit të Ministrave”.

Me anë të kësaj shtese, donacionet me mjete monetare dhe në formën e pasurive të paluajtëshme, të bëra nga tatimpagues të ndryshëm dhe që kryhen brenda periudhës së “Gjendjes së fatkeqësisë natyrore”, të cilat janë deri në nivelin 5% të fitimit para tatimit, do të konsiderohen si shpenzime të zbritshme. Donacione të tilla për këtë qëllim, mbi këtë normë, do të konsiderohen shpenzime të panjohura.

Lidhur me vlerësimin për donacionet në formën e pasurive të paluajtëshme, procedura e detajuar do të trajtohet në VKM-në që do të miratohet për këtë qëllim.

Në Ligjin për Tatimin mbi vlerën e shtuar:

Me anë të Aktit Normativ Nr. 4, datë 30.11.2019, “Për disa shtesa dhe ndryshime në ligjin Nr. 92/2014, datë 24.07.2014 “Për tatimin mbi vlerën e shtuar në Republikën e shqipërisë”, të ndryshuar”, me qëllim përjashtimin nga TVSH-ja në import, bëhen këto ndryshime.

Në fund të pikës 21 të nenit 56 “Përjashtime të veçanta në import”, është shtuar paragrafi, “… përjashtuar materialet dhe pajisjet e importuara për këtë qëllim nga organe shtetërore për rastet e shpalljes së “gjendjes së fatkeqësisë natyrore” brenda afatit të përcaktuar”. Me anë të këtij përcaktimi, përjashtohen nga TVSH-ja në import, materialet dhe pajisjet e importuara nga organet shtetërore, me qëllim të rindërtimit të zonave të prekura nga fatkeqësitë natyrore apo luftërat.

Po ashtu, janë të përjashtuara nga TVSH-ja në import, mallrat dhe pajisjet për qëllime ushtarake dhe që përdoren si armë, municion apo bazë materiale luftarake dhe të cilat janë projektuar, zhvilluar, prodhuar, montuar apo modifikuar për përdorim ushtarak, që importohen në emër të Ministrisë së Mbrojtjes./atsh

Qeveria ka rritur në 3 miliardë lekë buxhetin 2020 në mbështetje të investimeve të reja, në sistemin e ujitjes, kullimit dhe parandalimin e përmbytjeve në zonat rurale.

Ministria e Bujqësisë dhe Zhvillimit Rural, bën të ditur se, zgjerimi i investimeve në veprat ujitëse synon të rrisë në 76% numrin e fermerëve që përfitojnë nga infrastruktura ujitëse kundrejt 70,3% që shënoi në vitin 2019 ky tregues.

Strategjia e Ministrisë së Bujqësisë për vitin që vjen, parashikon në fushën e “Infrastrukturës së Ujitjes dhe Kullimit”, të realizojë investime të rëndësishme për rritjen në 72% të sipërfaqes ujitëse ku fermerët kanë akses për ujë për ujitje, kundrejt sipërfaqes potencialisht të ujitshme (360 000 ha) nga 66,6% që është në vitin aktual.

Gjithashtu investimet do të rrisin numrin e hidrovoreve të rehabilituara, ndërtuara, rikonstruktuara, kundrejt totalit të nevojshëm (14 hidrovorë) nga 21,4% në vitin 2019, në 36% në vitin 2020.

Ndërsa mirëmbajtja vjetore e rrjetit kullues do të arrijë në 45 000 hektarë tokë.

Investime janë parashikuar edhe në vepra të mbrojtjes nga përmbytjet si (argjinatura gjatësore dhe penele tërthorë), kundrejt totalit të nevojshëm (300 km) nga 12% në vitin 2019, në 28% në vitin 2020./atsh

Drejtoria e Përgjithshme e Arkivave nënshkroi sot marrëveshje bashkëpunimi me dy komunitete fetare, Kishën Ortodokse Autoqefale të Shqipërisë si dhe Rabinatin e Shqipërisë për kryerjen e procesit të dixhitalizimit të fondeve arkivore dhe të çdo materiali tjetër që është krijuar nga dy komunitetet, që ruhen në AQSH.

Në marrëveshjen e parë të pranishëm ishin drejtori i Përgjithshëm i Arkivave, Dr. Ardit Bido dhe përfaqësuesi i Kishës Orthodokse Autoqefale të Shqipërisë Episkop Asti. Kjo marrëveshje ka si qëllim bashkëpunimin e dy institucioneve për dixhitalizimin e dokumenteve arkivore të Komunitetit Ortodoks dhe institucioneve të tij që ndodhen në AQSH.

Drejtori i Përgjithshëm i Arkivave informoi përfaqësuesit e KOASH mbi marrëveshjet e tjera me komunitetet fetare. Përmes kësaj marrëveshjeje, përmbyllet dixhitalizimi i fondeve arkivore të të katër komuniteteve fetare në Shqipëri. Hirësi Asti vlerësoi marrëveshjen si një hap të rëndësishëm për të dy institucionet.

“Marrëveshja me Kishën Ortodokse që nënshkrova bashkarisht me Hirësi Astin pak ditë përpara Krishtlindjeve përbën përmbylljen e dixhitalizimit të fondeve arkivore të të katër komuniteteve fetare në Shqipëri, teksa ka përfunduar dixhitalizimin e dokumentacionit të komuniteteve myslimane e bektashie, si dhe po kryhet paralelisht me KOASH dhe ajo i komunitetit katolik”, theksoi Bido.

Ndërkaq, Rabinati shqiptar u përfaqësua nga kryerabini i Shqipërisë, Yoel Kaplan. Marrëveshja parashikon dixhitalizimin e të gjithë fondit arkivor të personave dhe organizmave të hebrenjve në Arkivin Qendror Shtetëror, me kostot e Rabinatit, si dhe do të bashkëveprojnë për botimin e katalogjeve të referencave arkivore mbi hebrenjtë në Shqipëri.

Drejtori i Përgjithshëm i Arkivave, dr. Ardit Bido vlerësoi marrëveshjen si tentativën e radhës për të bërë publike në të gjithë botën historinë krenare të kombit shqiptar në shpëtim të hebrenjve.

Ai theksoi se “kjo marrëveshje do të mundësojë edhe një platformë elektronike për ta përbotësuar këtë ngjarje të rëndësishme në historinë e dy kombeve”.

Kryerabini Yoel Kaplan vlerësoi rolin e shqiptarëve në shpëtimin e hebrenjve dhe theksoi se marrëveshja me DPA do t’i japë një hov të ri kërkimit shkencor mbi këtë moment të rëndësishëm historik. /atsh

Shkalla e papunësisë për të rinjtë në tremujorin e tretë të vitit 2019 u ul me 1.8%, krahasuar me të njëjtën periudhë të një viti më parë.

Instituti i Statistikave (INSTAT) publikoi anketën tremujore të forcave të punës sipas të cilës shkalla zyrtare e papunësisë për të rinjtë 15-29 vjeç është 21.4%.

“Krahasuar me tremujorin e tretë të vitit 2018, shkalla e papunësisë për të rinjtë në tremujorin e tretë të vitit 2019 është 1.8 pikë përqindje më e ulët”, – thuhet në anketën e INSTAT-t.

Gjatë tremujorit të tretë të vitit 2019, shkalla e pjesëmarrjes në forcat e punës për të rinjtë e moshës 15-29 vjeç është 52.5% me një rritje prej 1.1% krahasuar me një vit më parë./atsh

Lufta kundër gjuhës së urrejtjes dhe sjellja e praktikave më të mira evropiane ka bërë bashkë KMD, Avokatin e Popullit, AMA dhe Këshillin e Mediave.

“Komisioneri për Mbrojtjen nga Diskriminimi, Zyra e Avokatit të Popullit, AMA dhe Këshilli Shqiptar i Medias janë bërë së bashku për themelimin e “Aleancës Pa Urrejtje”, një iniciative për të angazhuar aktorë vendimmarrës, për të bashkuar forcat dhe për të avancuar në luftën kundër gjuhës së urrejtjes dhe promovimin e barazisë”, shprehet KMD.

Thelbi i takimit ishte gjetja e mekanizmave për të luftuar urrejtjen dhe zbatimin e praktikave të mira europiane.

“Aleanca do të synojë të identifikojë mekanizma të mundshëm për të luftuar gjuhën e urrejtjes, bazuar në praktikat më të mira europiane”, shprehet KMD. /atsh

Kryeministri Edi Rama përcolli mëngjesin e sotëm fjalët e Thomas Aquinas në rubrikën “Fjalët e Shenjta” që nisën si apel solidariteti pas tërmetit të 26 nëntorit.

“Ruhu nga njeriu që ka lexuar vetëm një libër”, citoi Rama fjalët e Aquinas.

Kryeministri Rama ka përcjellë këto javë apelin e solidaritetit dhe ndihmës njerëzore ndaj të prekurve nga tërmeti i 26 nëntorit, duke cituar fjalë të shenjta nga librat e shenjtë, por edhe nga personalitetet botërore./atsh

Presidenti Ilir Meta shprehu ngushëllimet për ndarjen nga jeta të artistes së shquar dhe të dashur Marika Kallamata.

Meta tha se “kjo është një humbje e pazëvendësueshme për teatrin dhe kinematografinë shqiptare”.

“Trashëgimia e pasur artistike, galeria e roleve të interpretuara me mjeshtëri të rrallë dhe të gjitha kujtimet që na la pas, nderohen me respekt dhe do të mbahen mend gjithmonë.
Duke ndarë dhimbjen, u përcjell ngushëllimet më të sinqerta të afërmve dhe bashkëpunëtorëve të saj, si edhe të gjithë artdashësve shqiptarë”, tha Meta.

Homazhet për aktoren Marika Kallamata, e cila u nda dje nga jeta, do të mbahen sot në ambientet e “arTurbinës”, nga ora 11:00-13:00. /atsh

Festat e fundvitit kanë ndezur atmosferën dhe në institucionin e vuajtjes së dënimit “Ali Demi”, ku gratë e dënuara takuan të hënën fëmijët e tyre të vegjël.

Ministrja e Drejtësisë, Etilda Gjonaj, në një reagim të saj, theksoi se gratë e dënuara mundën të ndajnë urimet e festave dhe t’i japin pakon e dhuratave vogëlushëve të vegjëlve të tyre, nën një atmosferë festive.

“Teksa dritat e shumta të festave kanë ndezur atmosferën speciale të fundvitit, menduam që ndriçimin e tyre ta përcjellim edhe në institucionin e vuajtjes së dënimit “Ali Demi” ku gratë e dënuara mundën të takojnë vogëlushët e tyre, të ndajnë urimet e festave dhe t’i japin pakon e dhuratave”-, thekson Gjonaj në reagimin e saj.

“Me mbështetjen e organizatës “Save the Children”, të cilën gjej rastin që ta falënderoj, ne mundëm t’i krijojmë disa momente festive të miturve të cilët morën mesazhin e festës nga nënat e tyre të cilat padyshim pavarësisht gabimit që kanë kryer dhe do ta kryejnë dënimin deri ditën e fundit, e meritojnë të ringrihen”-, bënë të ditur ministrja e Drejtësisë.

“Gjithashtu, në takim u prezantuan edhe disa nga detajet e punës që kemi nisur për të ndjekur çdo rast në mënyrë që gratë e dënuara të kenë mundësi që pas rehabilitimit të gjejnë forcën për t’i shërbyer sa më denjësisht vetes, familjes dhe shoqërisë.Puna vazhdon, për “Drejtësinë Që Duam” dhe “Shqipërinë Që Duam”-, garanton Gjonaj, duke mbyllur reagimin e saj.

Gjatë aktiviteit të organizuar në IEPV “Ali Demi” ishte e pranishme dhe zv. ministrja e Drejtësisë, Fjoralba Cakaj./atsh