Aktualitet

Kadastra Shqiptare/ Nga 1 janari 52 shërbime online në platformën e-Albania

Aktualitet / /

Kadastra Shqiptare nga 1 janari do të ketë 52 shërbime në platformën e-Albania.

“Nisja e këtij viti nga 1 janari do të ketë në platformën e-Albania për 472 shërbime do të aplikohet vetëm online. Prej të cilave 52 shërbime i përkasin Agjencisë Shtetërore të Kadastrës. Ju mund të regjistroheni në platformë nga kompjuteri, tableti ose celulari juaj në shumë pak sekonda”, thuhet në njoftimin e Agjencisë Shtetërore të Kadastrës.

Gjithashtu, ASHK shton se “sportelet e ADISA dhe zyrat e Postës Shqiptare do të jenë në dispozicionin tuaj për t’ju ardhur në ndihmë për çdo sqarim të mundshëm, për t’u regjistruar në platformën e-Albania apo për të aplikuar online”. /atsh

Kadastra Shqiptare/ Nga 1 janari 52 shërbime online në platformën e-Albania Read More »

Rama nderon me “Medalje Ari” zjarrfikësin Luan Kapaj: Simboli i reagimit njerëzor dhe profesional në operacionet e kërkim-shpëtimit

Aktualitet, Lajmi i fundit / /

Zjarrfikësi nga Vlora, Luan Kapaj, i cili nuk reshti një sekondë, duke u përpjekur të nxjerrë gjallë nga rrënojat e tërmetit të 26 nëntorit, dy persona nën gërmadha, u nderua sot nga Kryeministri Edi Rama me ‘Medaljen e Artë’, për vlerësim profesional.

Në ceremoninë e organizuar në Kryeministri, në fjalën e tij Kryeministri Rama theksoi se “dëshiroj që ti jap Luanit “Medaljen e Artë” për vlerësim profesional, një medalje që është krijuar prej disa kohësh dhe është dhënë për herë të parë vetëm për trupat e kërkim-shpëtimit që erdhën dhe na ndihmuan të shpëtojmë jetë shqiptare, por është e para që i jepet një individi”.

“Besoj që duke ia dhënë këtë medalje Luanit, për aktin e tij jo vetëm i japim medaljes një vlerë shumë të madhe, por e vendosim stekën shumë lart për individë të tjerë që meritojnë të vlerësohen”, tha Rama.

Kryeministri Edi Rama theksoi sot se “kjo është një ceremoni e vogël në përmasën e saj , por është një ceremoni shumë e veçantë në përmbajtjen e saj”.

“Ndihem vërtet i nderuar që sot ti kushtojmë këtë vëmendje një njeriu të zakonshëm , i cili u bë simboli i reagimit njerëzor dhe profesional në kushtet e rënda të atyre ditëve dhe netëve kur plot jetë njerëzore ishin në fije të perit. Një ndër presidentët e SHBA-së thotë se heronjtë si njerëz nuk janë më guximtarë se të tjerët, por tregohen më të guximshëm se të tjerët disa minuta më shumë dhe më gjatë. Edhe pse heroizmi i Luanit nuk ishte disa minuta, por ishte shumë e shumë orë pa pushim , në kushte ekstreme stresi dhe me dridhjet e tokës që vazhdonin çka e bën atë një hero të një lloji shumë të veçantë”, – nënvizoi Rama.

Kreu i qeverisë u shpreh se ” më vjen mirë që sot këtu kanë ardhur për ta respektuar Luanin edhe disa prej atyre që kanë një jetë të dytë nga Luani. Unë pata rastin të dëgjoj edhe kolegë të huaj të Luanit të cilët u shprehën me një admirim të jashtëzakonshëm për aktet e tij, për përkushtimin e tij, madje njeri prej tyre më tha akoma nuk a rrij ta kuptoj dot se si mund të ishte një njeri aq i gatshëm të sakrifikonte jetën e tij në kushte që teknikisht dukeshin të pamundura edhe pse kam parë në jetën time episode të jashtëzakonshme që prapë se prapë nuk janë për aq sa kujtoj në të njëjtin nivel guximi dhe sakrifice. Dhe unë i thashë “Nuk ke për ta kuptuar kurrë nëse nuk kupton se çfarë do të thotë të jesh vlonjat””.

Kryeministri Rama u shpreh se “më vjen mirë që e shoh përditë që ajo që njerëzit tanë bënë në momentet e një krize që ishte shumë më e madhe sesa ne, se sa forca jonë, sesa aftësia jonë për të imagjinuar kapërcimin e saj, ka frymëzuar në tërësi të gjithë ata që pa qenë të thirrur për të bërë heroizma, po përkushtohen çdo ditë për rindërtimin”.
Sipas tij, procesi i rindërtimit po ecën jashtëzakonisht mirë nga pikëpamja e respektimit të afateve shumë të shkurtra dhe përpjekjeve për të qenë në lartësinë e ambicies sonë për rindërtimin.

“Ndodh rëndom që kur bëhet mirë një punë , kur dikush bën mirë një punë sidomos kur punon për shtetin cinikët thonë detyrën po bëjnë. Në fakt detyrën janë të thirrur të bëjnë të gjithë ata që ti shërbejnë shtetit dhe dallimin e bën pikërisht përkushtimi dhe cilësia në kryerjen e detyrës.

Sigurisht detyrën bëjmë të gjithë, por në varësi si e bëjmë detyrën, sa mirë e bëjmë detyrën, varet edhe impakti që kryerja e detyrës ka mbi njerëzit dhe shoqërinë.
“Nuk dua të zgjatem më shumë, por dua të kujtoj këtu fjalët e Presidentit De Gol, i cili duke folur për katastrofat ka thënë që ‘Nuk është e tolerueshme dhe nuk është as e mundur që nga vdekjet, sakrificat dhe shkatërrimi që prodhojnë kaq shumë heroizëm të mos zhvillohet një gjendje më e mirë njerëzore’. Kam besim së nga gjithçka pamë, kaluam, promovuam, mësuam dhe gjithçka kemi akumuluar në kujtesën tonë padiskutim kemi mundësinë historike të zhvillojmë një gjendje më të mirë njerëzore këtu në vendin”, tha Rama.

“Me shumë respekt dëshiroj të të dorëzoj këtë medalje e të them që jam shumë i privilegjuar në këtë moment, jam shumë i prekur që jam pranë teje, sinqerisht, se në kushtet e jetës së përditshme, njerëzit si ty, që janë jo një e dy, por janë dhjetëra mijëra në Shqipëri janë thjesht në jetën e tyre dhe ne rrallë ose as fare i shohim në vlerën dhe rëndësinë që kanë për punën që bëjnë. Të jam shumë mirënjohës e të falënderoj edhe për praninë tënde këtu”.

Zjarrfikësi Luan Kapaj, pasi mori medaljen tha se “më shumë sesa krenarë kjo medalje më bën krenarë për dy qytetarët e mi që sot janë bashkë me ne marrin ajrin e kësaj toke dhe shikojnë dritën e këtij dielli. Unë do ti shërbej popullit tim deri në momentin e fundit të jetës time”.

Një nga të mbijetuarit nga tërmeti , që u shpëtua nga Luani, tha se “Luani më shpëtoi jetën kishte zemër të madhe, siç ka emrin është edhe vetë”./atsh

Rama nderon me “Medalje Ari” zjarrfikësin Luan Kapaj: Simboli i reagimit njerëzor dhe profesional në operacionet e kërkim-shpëtimit Read More »

“Certifikatë Mirënjohjeje” për Policinë e Durrësit në ndihmë të banorëve të prekur nga tërmeti

Aktualitet / /

Me vendim të Këshillit Bashkiak të bashkisë Durrës, Drejtoria Vendore e Policisë Durrës është nderuar me “Certifikatë Mirënjohjeje”, me motivacionin “Për përkushtimin maksimal në ndihmë të popullsisë së dëmtuar nga tërmeti i 26 nëntorit dhe mbarëvajtjes së rendit në vazhdim”.

Certifikata i është dorëzuar përfaqësuesve të DVP Durrës, gjatë një aktiviteti “Natën e falënderimeve”, të organizuar me humor dhe këngë, për të përcjellë mesazhin e jetës në të gjithë hapësirën durrsake dhe më gjerë. Të ardhurat e kësaj nate do shkojnë në ndihmë të familjeve të viktimave si pasojë e tërmetit.

Zv/Drejtori për Rendin dhe Sigurinë Gani Zeneli, gjatë marrjes së certifikatës për DVP Durrës, ka falënderuar këshillin bashkiak për këtë vlerësim, duke e parë këtë edhe si një obligim për të punuar akoma më shumë në të mirë të komunitetit, si dhe ka vlerësuar bashkëpunimin me qytetarët, besimin dhe mbështetjen që ata i kanë dhënë dhe i japin strukturave të Policisë, duke i siguruar se Policia është në shërbim të tyre.

Më tej, Zv/Drejtori Zeneli, në emër edhe të Drejtorit të DVP Durrës Lorenc Shehu, ka uruar gjithë qytetarët për një vit të mbarë, me shpresën për më mirë dhe sa më shumë bashkëpunim me njëri-tjetrin për të mirën e përbashkët.

Menjëherë pas rënies së tërmetit, strukturat e Drejtorisë Vendore të Policisë Durrës u angazhuan maksimalisht në ndihmë të popullatës së prekur nga tërmeti, në operacionet e kërkim-shpëtimit, si dhe morën një sërë masash, për të garantuar rendin e sigurinë dhe për të parandaluar vjedhjen e banesave./atsh

“Certifikatë Mirënjohjeje” për Policinë e Durrësit në ndihmë të banorëve të prekur nga tërmeti Read More »

Urimi i Fundvitit, Rama: Detyra jonë ta bëjmë këtë vend më të mirë, më të sigurt e më të begatë për fëmijët tanë

Aktualitet, Politike / /

Kryeministri Edi Rama, në videomesazhin e publikuar prej tij me rastin e ndërrimit të viteve, duke uruar shqiptarët për një vit sa më të mbarë dhe të bekuar nga Zoti, tha se është detyrë e gjithësecilit për ta bërë këtë vend më të mirë, më të sigurt e më të begatë për fëmijët tanë.

“Teksa lëmë pas vitin 2019 dhe me të drejtë duam shumë më tepër, jo vetëm sesa çfarë na dha ky vit i vështirë, po në përgjithësi për vendin, familjen e fëmijët tanë, mendoni sidoqoftë ku ishim dhjetë vjet më parë”, – tha Rama.

“E di, e di, e di që shumëkush nga ju do të më hidhej në fyt tani e do të më thoshte, kushedi sesa shumë gjëra për botën që fluturon e për Shqipërinë që mezi ecën, po në fakt nuk është kështu, nuk është aspak kështu, dhe jam gati të debatoj, me ditë e me netë me ju për këtë”, – shtoi Kryeministri.

“Por ky s’është rasti për t’ju bezdisur me shifra e me fakte, po është rasti për t’ju thënë, se ndërkohë që një vit i ri po vjen me një dekadë të re përpara nesh, mendojeni edhe ju bashkë me mua, se sa dhe si mund të bëjmë ne shqiptarët për Shqipërinë, katër a pesë herë më shumë sesa në dekadën që po lemë pas. Është jo vetëm e mundur, po është ajo që duhet të bëjmë”, – u shpreh Rama.

“Zoti çon dritë e çon tërmete, po nuk çon dhurata mbi këtë tokë. E kemi ne për detyrë ta bëjmë më të mirë, më të sigurt e më të begatë për fëmijët tanë. Është detyra jonë të mos i trembemi të përpjetave sfiduese të së ardhmes dhe të mos biem në tatëpjetat e përbaltura të së shkuarës. Është sfida jonë të mos dorëzohemi përpara vështirësive në arritjen e rezultateve dhe të mos gënjejmë veten me rezultatet sa hap e mbyll sytë në kafene”, – nënvizoi Rama.

“Është e jona dhe vetëm e jona, e njerëzve përtej kufirit të adoleshencës, që të mos e humbasim durimin në përballjen me realitetin dhe të mos e lëshojmë gojën e veten në mexhelisin e komunikimit të ulët, sharjeve e shpifjeve, që rrezikojnë të infektojnë si një sëmundje kronike edhe fëmijët tanë. Ky vend i ka të gjitha që ne t’ia dalim në krye të përpjetës ku po ngjitemi me vështirësi, për ta bërë Shqipërinë një shtet normal, funksional, social. Po ne duhet të kemi vullnetin, vendosmërinë, përkushtimin dhe mbi të gjitha vetëdijen, se kjo kërkon kohë, durim, punë e bashkim”, – bëri thirrje Kryeministri.

“Bashkim në qëllime, jo në bindje politike. Bashkim fuqish pozitive, jo forcash politike. Bashkim për të jetuar në një vend ku askush nuk duhet të jetë kurrë vetëm. Unë ju falenderoj nga zemra të gjithëve, juve që më keni besuar, mbështetur, inkurajuar, po edhe juve që nuk më keni besuar a më keni gjykuar keq, po sidoqoftë më keni ndjekur në punën time.

Në fund të ditës koha ikën, vitet ikin, kryeministrat vijnë e shkojnë, të gjithë jemi kalimtarë në këtë tokë. Çka mbetet është Shqipëria dhe kombi ynë. Le të vazhdojmë të bëjmë së bashku më të mirën për Shqipërinë e për kombin shqiptar dhe më e mira u bëftë për ju e gjithkënd ju do zemra!

Gëzuar Vitin e Ri 2020 dhe ardhtë i lehtë, me shëndet e mbarësi në familjet tuaja. Zoti e bekoftë Shqipërinë!” – përfundoi Rama videomesazhin e tij. /atsh

Urimi i Fundvitit, Rama: Detyra jonë ta bëjmë këtë vend më të mirë, më të sigurt e më të begatë për fëmijët tanë Read More »

Viti 2020, viti i revolucionit digjital/ Kthesë historike në shërbimet për qytetarët

Aktualitet / /

Viti 2020, duhet të jetë viti i kthesës historike në shërbimet për qytetarët, viti i revolucionit digjital. Kështu u shpreh, Kryeministri Edi Rama, të hënën, në urimin e Vitit të Ri përmes një videomesazhi.

“Viti 2020 duhet të shënohet si viti i një kthese historike në shërbimet për qytetarët. Revolucioni digjital në ofrimin e shërbimeve në çdo sportel shtetëror, i cili nis në janar me një bllok të parë shërbimesh, do të jetë një ndihmesë e jashtëzakonshme në këtë drejtim”, deklaroi Rama

“Brenda vitit 2020, duhet të marrë fund historia e aplikimeve me dosjen sa një mal, që sot e tridhjetë vjet i kërkohet qytetarit për një shërbim, duke e detyruar të bredhë në dhjetëra zyra për të siguruar dokumentet e nevojshme për një aplikim.

Dokumentet që jepen nga shteti për një dosje aplikimi, nuk duhet t’i kërkojë më qytetari zyrë më zyrë, po duhet t’i sigurojë vetë shteti.Nga pritës pasivë të qytetarëve nëpër sportelet e shërbimeve, punonjësit e sporteleve duhet të kthehen në shërbëtorë të qytetarit dhe të plotësojnë dosjen për llogari të qytetarit, me të gjithë dokumentet që lëshohen nga institucionet shtetërore”-, theksoi Kryeministri.

“Qytetari duhet të aplikojë online dhe duhet të paraqitet në sportel në afatin ligjor, vetëm për të marrë dokumentin që kërkon. Kështu do të shpëtojnë nga shumë telashe dhe pamundësi objektive edhe të gjithë qytetarët shqiptarë jashtë vendit, të cilët nuk mund të rrinë nëpër radha kur vijnë në Shqipëri për pushime dhe as nuk mund të presin pushimet për të marrë shërbime në sportelet e shtetit shqiptar.

Boll me ecejaket e panumërta, ryshfetet e padurueshme, radhët e pafundme dhe stresin e njeriut të zakonshëm, sa herë që, tash 30 vjet, niset për të nxjerrë një copë letër në zyrat e këtij shteti. Fundi i vitit 2020 duhet të jetë edhe fundi i këtij kapitulli 30-vjeçar vargmalesh të pafundmë me letra nën sqetullën e popullit, që kërkon shërbim në sportelet e shtetit”-, tha Rama.

“Viti 2020, duhet të shënohet si viti i fillimit të një historie të re shqiptare, në administrimin e në zhvillimin e pasurisë së madhe kombëtare të bregdetit të mrekullueshëm të Shqipërisë. Zaptimi i plazheve dhe pamundësia e njerëzve të këtij vendi për të zgjedhur sipas dëshirës e mundësisë së tyre, nëse duan të shkojnë në një plazh publik, apo në një plazh me pagesë, duhet të marrin fund”-, bëri thirrje Kryeministri. /atsh

Viti 2020, viti i revolucionit digjital/ Kthesë historike në shërbimet për qytetarët Read More »

Paketa antishpifje, Rama: Nuk jam armik i fjalës së lirë, por armik i betuar i injorancës dhe i vulgaritetit

Aktualitet, Politike / /

Kryeministri Edi Rama, në videomesazhin e publikuar me rastin e ndërrimit të viteve, nënvizon se nuk është armik i fjalës së lirë, por armik i betuar i injorancës dhe i vulgaritetit.

Duke uruar shqiptarët për një vit sa më të mbarë, Rama theksoi se “asnjë gjemb në këmbë nuk i fut botuesve, gazetarëve e analistëve ligji kundër shpifjeve e fabrikimeve nëpër portale, thjesht u kujton se liria e tyre nuk është armë për të cenuar publikisht dinjitetin njerëzor”.

“Unë armik i fjalës së lirë? Po pse kur ka ndodhur që fjalëtorët e lirë ta kenë mundur dot fjalën time të lirë? Jo, unë nuk jam armik i fjalës së lirë. Jam po, armik i betuar i injorancës dhe i vulgaritetit, që kanë infektuar edhe burimet e lirisë së shprehjes në këtë vend, duke ju helmuar përditë të gjithëve ju, e familjen time po njësoj, me gjithfarësoj ligësish e monstruozitetesh”-, tha Rama.

“E meqë jemi këtu, as nuk kam menduar, as nuk kam kërkuar, as nuk kam mbështetur ndonjë ligj që kufizon lirinë e shprehjes. Kam votuar në parlament, bashkë më forcën time politike, një ligj që u jep mundësi viktimave të shpifjes të mbrohen nga agresioni i portaleve mbi njeriun dhe lexuesve të portaleve të mësojnë të vërtetën e njerëzve të akuzuar padrejtësisht. Asnjë gjemb në këmbë nuk i fut botuesve, gazetarëve e analistëve ligji kundër shpifjeve e fabrikimeve nëpër portale, thjesht u kujton se liria e tyre nuk është armë për të cenuar publikisht dinjitetin njerëzor”-, shtoi kryeministri.

“Shumëkujt ndër ju i dukem arrogant. Mbase sepse besoj tek bindjet jo tek konsensusi dhe jam shumë këmbëngulës në bindjet e mia. Por mbase edhe sepse kokëfortësia për t’i mbrojtur bindjet a për t’u shkuar gjërave deri në fund, më bën të dukem arrogant. Mbase edhe jam xhanëm, nuk e di, po kjo nuk më bën më pak të ndershëm në kryerjen e detyrës”-, theksoi Rama.

Kryeministri Edi Rama, nënvizon se nuk është nga soji i politikanëve që gënjejnë për vota, po thekson se është i racës së atyre që në politikë i ka futur forca e besimit dhe e ëndrrave për ndryshim.

“Dy fjalë për veten time. Unë nuk jam i rënë nga qielli”-, tha Rama

“Nuk kam menduar ndonjëherë se jam pa të meta. Përkundrazi, kam më shumë se ju – ndoshta edhe sepse jam më i gjatë! Nuk më ka thënë kurrë mendja se jam i pagabueshëm. Përkundrazi, jam më i gabueshëm se sa ju – për shkak të detyrës, më duhet të marr shumë më tepër vendime se secili prej jush, pra probabilitetin e gabimit e kam shumë më të madh se çdonjëri nga ju.

Po ama asnjëherë, kurrë, nuk e kam bërë në këtë detyrë një gabim të qëllimshëm, për të përfituar çfarëdo qoftë, në dëmin e popullit apo të këtij vendi që kam nderin e madh të drejtoj. Kush më njeh më nga afër, kush punon me mua, e di se unë nuk këmbëngul asnjëherë në një opinion a drejtim të gabuar”-, vuri në dukje kryeministri.

“I dëgjoj kundërargumentet shumë më tepër se sa duket. Kur janë bindëse tërhiqem. Nuk e kam të vështirë të kërkojë ndjesë, kur kam lënduar dikë apo kam gabuar në vlerësimin e një vendimi – mbase e kujtoni që kam kërkuar edhe ndjesë publike në ndonjë rast të caktuar. Nuk më kujtohet ta ketë bërë këtë ndonjë paraardhësi im, po nuk është ky sidoqoftë metri me të cilin e mas veten dhe as ju kërkoj të më masni me këtë metër.

Jo të gjitha gjërat që kam premtuar i kam mbajtur në kohë. Ka edhe ndonjë premtim që ende nuk kam arritur t’a mbaj dot. Po ama në asnjë rast të vetëm, nuk kam premtuar diçka duke e ditur që nuk bëhet – për të kaluar radhën apo thjesht për vota, siç mendohet rëndom kur flitet për premtimet e politikanëve. Kurrë!”-, theksoi Rama, teksa vijon argumentin e tij.

“E para sepse nuk jam nga soji i politikanëve që gënjejnë për vota, po jam i racës së atyre që në politikë i ka futur forca e besimit dhe e ëndrrave për ndryshim. Dhe e dyta, mendojeni edhe vetë pak, kthehuni një sekondë në kohë, pse do të duhej të gënjeja, të premtoja gjëra që nuk i besoj as vetë, kur me fuqinë që më ka dhënë Zoti e me forcën politike që udhëheq, kundërshtarët me thënë të drejtën, mund t’i mundja edhe me çerekun e premtimeve që kam bërë!”-, u shpreh Rama

“E di që jam i kritikueshëm, duhet ta dini se jam më i pakënaqur se çdokush tjetër me punën time, edhe me qeverinë që drejtoj. Po ama, balta e pafundme për hajdutërira e pisllëqe thjesht nuk përket”-, tha Rama.

“Ej miq, keni parë ndonjëherë hajdut 2 metra?, pyeti Kryeministri. “E përtej shakasë, që është gjysma e të vërtetës, gjysma tjetër e të vërtetës është se unë s’jam i varfër. Por s’kam ëndërruar kurrë të bëhem as i pasur. Nuk jetoj për të fituar, fitoj sa më mjafton për të jetuar. Nuk jetoj për salltanete, po për pasionet e mia. Jeta për mua është mundësia që më është më dhënë, për të lënë gjurmën time përmes dhuntive që më janë falur. Ndërsa këtë detyrë që kam, e jetoj si privilegjin më të madh që mund të ketë njeriu, të udhëheqë popullin e vet në një pjesë të rrugës drejt të ardhmes”-, tha Rama.

“Shumë e shumë prej jush, miq në faqen time sociale, pyesnit gjatë ditëve të emergjencës pas tërmetit, ku e gjen këtë fuqi (?). Po ja pra, tek ndjesia në çdo qelizë e privilegjit që kam për të qenë i zgjedhuri juaj në detyrën më të lartë dhe pasioni për të bërë të pamundurën, që ky vend të bëhet më i mirë për ju, e për fëmijët e mi dhe fëmijët tuaj”-, theksoi Kryeministri. /atsh

Paketa antishpifje, Rama: Nuk jam armik i fjalës së lirë, por armik i betuar i injorancës dhe i vulgaritetit Read More »

Mbështetje familjeve të prekura nga tërmeti/ Yjet e Shqipërisë, Italisë, Greqisë dhe Turqisë më 10 janar në Air Albania Stadium

Aktualitet, Lajmi i fundit, ShowBiz / /

Yjet historikë të kombëtareve të Shqipërisë, Italisë, Greqisë dhe Turqisë do të zbresin në fushën e Air Albania Stadium në datë 10 janar.

Ky festival i futbollit me emrat e njohur të katër kombëtarëve, siç janë Zambrota e Perrota, Kampionë të Botës në 2006, apo Hasan Şaş i cili ishte një nga liderat e Turqisë në Botërorin e vitit 2002 ku u renditën në vendin e tretë si dhe fqinjët grekë të cilin fituan Kampionatin Europian në vitin 2004 nën dirigjimin e Karagunis, synon krijimin e një tradite të tillë në futbollin shqiptar për të afruar sportadëshit me emrat e mëdhenj të futbollit tone dhe atij ndërkombëtar.

Të gjithë të ardhurat e siguruara nga shitja e biletave të ndeshjes do të shkojnë për familjet e prekura nga tërmeti i 26 Nëntorit.

Ky turne organizohet nga Sindikata e Futbollit me mbështetjen e plotë të Federatës Shqiptare të Futbollit.

Federata e Futbollit dhe Sindikata e Futbollistëve, fton të gjithë sportdashësit në këtë festival të paharrueshëm, ku do të performojnë në fushën e blertë emra të dashur, historikë dhe kampionë të futbollit, pa harruar edhe performancën artistike të emrave të mëdhenj të muzikës shqiptare. Le të bashkohemi në këtë turne për të dhënë sadopak ndihmesë për të prekurit. Ky projekt i përgjegjësisë sociale, vjen në vazhdën e aktiviteteve të pandërprera të Federatës së Futbollit, të stafit dhe djemve e vajzave të kombëtareve shqiptare për të ndihmuar dhe lehtësuar familjet e prekura nga tërmeti. Fokusi parësor ka qenë te fëmijët.

Federata e Futbollit është zotuar të ndërtojë të paktën tre shtëpi të rrënuara nga tërmeti, ose më shumë në varësi të fondeve të mbledhura. Ka nisur tashmë evidentimi i shtëpive. /atsh

Mbështetje familjeve të prekura nga tërmeti/ Yjet e Shqipërisë, Italisë, Greqisë dhe Turqisë më 10 janar në Air Albania Stadium Read More »

Ramazan Cani, mjeshtri që ka mbathur për 55 vjet artistët e teatrit dhe Cirkut

Aktualitet / /

Ministrja e Kulturës, Elva Margariti ka publikuar sot historinë e veçantë të mjeshtrit Ramazan Cani.

Ramazan Cani ka kaluar më shumë se gjysmë shekulli mes artistëve. Nuk ka bërë shkollë arti, por asgjëmangut, edhe ai është artist në profesionin e vet. Është ai që ua ka bërë hapin më të rëndë gjeneralëve të skenës së teatrit apo fluturimin më të lehtë artistëve të Cirkut.

Ai është mjeshtri që ka realizuar për vite me radhë këpucët e aktorëve të Teatrit Kombëtar (Teatrit Popullor), artistëve të Cirkut Kombëtar, të Estradës, Teatrit të Kukullave.

Ramazan Canin e gjejmë te vendi i punës, në një kthinë të ngushtë, në Cirk. Do edhe pak muaj të dalë në pension, por punës i rri mbi kokë. “Unë bëj këpucë, papuçe, rripa sigurie.. sidomos te këto të fundit përgjegjësia është shumë e madhe. Varet jeta e njeriut aty, ndaj edhe i punoj me shumë kujdes, shtresë pas shtrese dhe qepjen e bëj me dorë me fije të forta“.

Kur Ramazani filloi të punojë si këpucar, ishte fare i vogël. Ndoqi udhën e të vëllait, i cili po ashtu ka punuar si këpucar, madje edhe ai mes artistësh, në Teatrin e Operës dhe Baletit. “Im vëlla sot është 80 vjeç. Ai punonte tek “Shërbimet”. Fillova duke rregulluar gjëra të vogla, duke qepur dhe kur shkova 16 vjeç hyra në punë, fillimisht te Mjetet Mësimore dhe Artikujt Sportivë, që ka qenë te Rruga e Elbasanit dhe më pas te NISH Këpuca, ku punova nga viti 1970 deri në 1973. U shkëputa tre vjet për të kryer shërbimin ushtarak në Lazarat, Gjirokastër dhe kur u ktheva, qëlloi që një nga këpucarët e vjetër të teatrit dilte në pension, dhe u futa në vendin e tij. Dhe në ’77-ën nisa në Teatrin Popullor”, tregon ai.

“Asokohe prapavija e Teatrit Popullor, e Cirkut, e Teatrit të Kukullave, e Estradës, ka qenë e përbashkët. Piktorë, këpucarë, rrobaqepës, marangozë, të gjithë ishim të pozicionuar pranë Teatrit Popullor. Pas viteve ’90, me ndërrimin e sistemeve unë kalova në Cirk dhe që prej atëherë kam punuar këtu”, thotë ai, teksa numëron artistët ë mëdhenj të Cirkut, si Telat Agolli, Gjystina Petrela, Met Selimi e shumë të tjerë.

Ka mall për vitet kur punonte në Teatrin Popullor. “Ishin shfaqje masive, me shumë aktorë dhe realizoja me dhjetra palë këpucë. Bënim shumë opinga, pasi edhe shfaqjet ishin më shumë me tema kombëtare. Me xhufka për Jugun, prej llastiku për Veriun, Shqipëria e Mesme i kishte më të thjeshta… Kishte një volum të jashtëzakonshëm pune. Ne ishim dy këpucarë dhe nuk i dilnim dot. Ishte shumë e vështirë ta përballoje. Po ne kemi punuar shumë e të them të drejtën, nuk kam ndier lodhje”. Nga duart e tij kanë dalë gjithëfarëlloj këpucësh: çizme, papuçe, këpucë një metër të gjata për klounë… “Edhe kjo punë ka truket e veta, që nuk do t’ua them, sepse është si të tregosh të fshehtat e një magjistari”, thotë ai.

Ai e ndjen veten me fat që ka punuar me artistë të mëdhenj të skenës dhe ekranit shqiptar. Kur ishte i ri, i dukej si ëndërr që rrethohej nga ato figura aq të shquara. “Kur kam parë Marika Kallamatën, Violeta Manushin, Kadri Roshin, Margarita Xhepën, Pjetër Gjokën… më dukej çudi. Ishte një gjë shumë e rrallë, nuk arrija ta besoja. Nuk i kisha parë as në televizor, sepse edhe televizorët ishin shumë të rrallë asokohe”, tregon Ramazani. Dhe, në këtë pikë, nuk ka asnjë peng nga jeta.

Ishin kohë të mëdha, kur artistët punonin me pasion, shkonin edhe fshehur në skenë të bënin prova. “Tani më duket sikur nuk e duan shumë punën. Jo se nuk ka artistë të mirë, por edhe kushtet nuk i kanë aq të mira. Edhe çmimet e biletave janë qesharake. Nuk mund të paguash 50 lekë për të parë një shfaqje cirku, që do shumë mund të realizohet. Puna e artistit duhet vlerësuar”, thotë Ramazani, që nuk ka asnjë ankesë për punën e vet, por ama ajo e artistëve duket se i dhemb shumë./atsh

Ramazan Cani, mjeshtri që ka mbathur për 55 vjet artistët e teatrit dhe Cirkut Read More »