Aktualitet

“Jeta jonë nuk mund të varet nga një virus, mos humbni shpresën, por ne mund të dënojmë veten tonë me papërgjegjësinë tonë”, deklaroi sot Ipeshkvi i Rrëshenit, Dom Gjergj Meta.

Gjatë një interviste televizive, Dom Gjergj Meta tha se “nuk duhet të biem pre e panikut në asnjë mënyrë, nuk duhet të jemi fatalist. Edhe ata që kanë përgjegjësi, qoftë edhe mjekët, qeveritarët, jo të ushqejnë iluzione, por të përdorin një gjuhë që ngjall shpresë. Sigurisht që situate mund të shkojë më keq, por mund të ketë dhe faktorë të tjerë, që ne s’i dimë, që mund ta çojnë situatën për mirë. Është shumë e rëndësishme që ne të zbatojmë rregullat”..

“Të jemi reflektues, pasi e ardhmja është e paparashikueshme. Fati nuk është i shkruar, fati shkruhet. Ne e shkruajmë jetën tonë për ditë si njerëz dhe Zoti bashkë me ne shkruan jetën tonë. Po të shkruhej fati, kjo do të thotë të jetosh në bazë të asaj që qenka shkruar për ty. Prandaj kur them t’i zbatojmë rregullat sot, ti zbatojmë sot, se kështu ndërtojmë të nesërmen tonë. Të kapërcejmë rregullin e të fortit”,- shton Dom Gjergj Meta.

“Uroj që t’i jetojmë këto ditë me shumë përgjegjësi, dashuri. Të kujdesemi për njëri-tjetrin, pjesën më të brishtë, pleqtë e fëmijët, ata që kanë një sëmundje klinike. Kemi nevojë të shpresojmë. Të dashur miq, mos e humbni shpresën në asnjë moment, jetoni me pozitivitet ditët tuaj, s’mund të varet jeta jonë nga një virus”,- vijon Dom Gjergj Meta.

Ai u këshilloi të gjithë besimtarëve të falen me zemër, nuk ka nevojë për tempuj.

“Tempulli më i rëndësishëm dhe më i bukur që ka ndërtuar Zoti është njeriu. Objekti i kultit është zemra e njeriut. Aty në zemrën e njeriut ndodh e bukura, vijimësia. Edhe kur shkojmë në Kishë, lutemi, por nëse nuk e ndjejmë me zemër nuk vlen. Është zemra e njeriut që e bënë njeriun më pranë Zotit”,- thekson Dom Gjergj Meta./atsh

Kryegjyshi Botëror i Bektashinjve, Haxhi Dede Edmond Brahimaj iu drejtua sot me një mesazh shqiptarëve lidhur me situatën e koronavirusit.

“Këto ditë po përjetojmë një nga sfidat që ka pushtuar gjithë botën, gjithë universin. Shoqëria njerëzore po përjeton një luftë me mikrobin vdekjeprurës COVID-19, luftë me jetën. Çdo ditë jeta po i ndërpritet njerëzve, si dhimbje jo vetëm për familjen e të afërmit e tyre por për të gjithë ne, pasi në Kuran thuhet: Se njeri të vdesë, vdes e gjithë bota. Zoti e krijoi njeriun, si krijesën më të lartë, me të ndërgjegjshme, më të vullnetshme për të menaxhuar Universin, për të begatuar jetën në tokë. Zoti i dha mendje dhe gjykim njeriut, ndërsa vullnetin ja la në vetë dorën e tij”, tha ai.

Në këtë sfidë njerëzore të kësaj kohe, Kryegjyshi Botëror i Bektashinjve bëri thirrje “të gjykojmë me mend, të luftojmë me vullnet e me vetëdije të lartë njerëzore”. “Si gjithnjë, njeriu si krijesa më inteligjente e natyrës do ta përballojë e sfidojë atë, si gjithmonë me ndihmën e Allahut, me vetëmohimin e tij të pandërprerë të kësaj lufte për ta sfiduar atë siç ka krijuar Allahu, për ta nënshtruar Universin, ku ka triumfuar dhe e menaxhon atë duke e kthyer çdo sfidë në shërbim të tij, të jetës”, vijoi ai.

“Duke qenë se në mendimet profetike Allahu thotë ‘Ruaju të të ruaj’ le të luftojmë dhe të zbatojmë çdo ligj, çdo urdhëresë të Kryeministrit, të Qeverisë, e cila është shprehje e vullnetit të Zotit në tokë, që me besim tek Zoti që na udhëheq gjithnjë për të mirë, ta fitojmë, të mos nënshtrohemi dhe ta sfidojmë dhe këtë realitet të krijuar si sfidë për ne. Lusim Zotin që lufta jonë, me besim, shpresë e optimizëm të triumfojmë e t’i kthehemi jetës sonë të dashur të përditshme”, tha Kryegjyshi Botëror i Bektashinjve.

Ai falënderoi po ashtu gjithë mjekët, infermierët, sanitaret, punonjësit e gjithë shërbimeve sociale në farmaci, ushqimore, punonjësit e Policisë, të medieve që janë në ballë e pararojë të kësaj sfide që do t’ia dalim së shpejti mbanë./atsh