Kryeministri Edi Rama ka bërë të ditur se edhe 9 persona të tjerë janë shëruar nga COVID-19.
“Lajm i mirë: 9 të shëruar sot”, deklaroi Kryeministri në orët e vona të pas mesnatës.
Deri tani 85 persona kanë fituar betejën me koronavirusin në vendin tonë.
Një ditë më parë u dha lajmi se edhe një çift i moshuar nga Korça që erdhën në spitalin Infektiv në gjendje të rënduar u shëruan nga COVID-19. /atsh
Shërbimi Meteorologjik Ushtarak bën me dije se moti sot parashikohet të jetë me vranësira mesatare deri të dendura si dhe intervale me diell të cilat do të jenë më tepër prezente përgjatë orëve të paradites në zonën e ultësirës perëndimore.
Në zonat kodrinore dhe malore në lindje dhe në zonën e jugut vranësirat do të shoqërohen me reshje shiu të herëpashershme me intensitet të ulët dhe lokalisht deri mesatar në formë shtrëngatash. Në zonën e juglindjes në orët e mesditës do ketë reshje dëbore.
Mjegull/mjegullinë për shkak të reshjeve të shiut. Era do të fryjë me drejtim Verilindje –Juglindje 1-15m/sek duke u shoqëruar me valëzim të forcës 1-2 ballë.
Temperaturat parashikohen:
QYTETET Temperaturat në °C Sigla
Shkodër 1/14 Diell re
Kukës -1/9 Re shi
Lezhë 2/15 Diell re
Dibër -4/8 Re shi
Durrës 3/15 Diell re
Tiranë 3/16 Diell re
Elbasan 1/17 Diell re/shi
Berat -2/17 Diell re
Vlorë 5/16 Diell re
Korcë -2/6 Re shi/bore
Gjirokastër -2/15 Re shi
Sarandë 4/16 Diell re/atsh
Prej ditësh, Bashkia e Vlorës është e përfshirë në një aksion të gjerë humanitar për t’u ardhur në ndihmë familjeve në nevojë.
Në vetëm pak ditë, filloi evidentimi i familjeve në vështirësi brenda territorit të Bashkisë Vlorë dhe më pas puna në terren për shpërndarjen e ndihmave ushqimore, e cila ende vijon të jetë në proces. Ndihmat e miratuara nga fondet e bashkisë janë për 1500 familje , të evidentuara në vështirësi, ndërkohë që, në sajë të bashkëpunimit edhe me donator të ndryshëm, kësaj liste ianë duke iu shtuar edhe qindra të tjera.
Punonjës të administratës nga të gjitha hallkat dhe të tjerë të përfshirë në këtë proces si vullnetarë, janë bërë pjesë e këtij aksioni që po vazhdon me intensitet gjatë gjithë orëve të ditës.
“Jemi në terren dhe pranë të gjithë njerëzve që na kërkojnë mbështetje”, thotë për ATSH-në kryetari i Bashkisë, Dritan Leli. Ai thekson se, në këto ditë të vështira shfaqet edhe solidariteti i shoqërisë, i komunitetit, për të përballuar situata të tilla të jashtëzakonshme.
Pas shpërndarjes së pakove me produktet bazë të ushqimit të përditshëm, si vaj, sheqer, miell, oriz, makarona etj, paralelisht po punohet në bashkëpunim edhe me donatorët.
Java e kaluar ishte mjaft intensive, kjo në vijim është edhe më e gjerë. Numrat e telefonit të vënë në dispozicion në faqen web të Bashkisë, apo edhe në rrjetet sociale, janë mënyra e ndërsjelltë e komunikimit për të realizuar procesin e identifikimit dhe të asistencës, për të gjithë ata që janë të ekspozuar përballë riskut.
Përveç të moshuarve, pensionistë të vetmuar, të sëmurë, familjeve në asistencë, janë përfshirë në targetin e familjeve në nevojë edhe të tjera me probleme që nuk arrijnë të sigurojnë nevojat ushqimore.
“Po bëjmë gjithçka është e mundur që të amortizojmë pasojat dhe njerëzit të mos ndjejnë mungesat”, citon kryebashkiaku Leli, i cili shton se, po zhvillohet edhe një punë intensive sensibilizimi për të përfshirë në këtë aksion, individë dhe subjekte.
Ka mjaft shembuj në këtë drejtim, që përcjellin mbështetje dhe bashkëpunim konkret tek kryebashkiaku Leli, duke marrë prej tij falenderim dhe mirënjohje.
Ai thotë se,” Vlora e këtyre ditëve është Vlora e solidaritetit, e vlerave të mbështetjes dhe të humanizmit”. Prandaj dhe koordinimin dhe rakordimin e punëve për të realizuar gjithçka në formën më të mirë të mundshme, e cilëson edhe si një detyrim ndaj atyre njerëzve që janë ofruar me mundësi konkrete, duke hequr një pjesë të mundit nga përditshmëria e tyre.
“Ata nuk kanë nevojë për falenderim publik, pavarësisht se unë do të doja ta bëja këtë për secilin prej tyre, ashtu siç kam përcjellë këto ditë mbështetje për të gjitha familjet që kanë nevojë për ne”, shprehet Leli.
Ndërkaq ai shprehet se, do të donte që përmasat e këtij solidariteti të shtohen në vijimësi, prandaj dhe përmes ATSH-së bën thirrje që, kushdo që ka mundësi, të marrë në përkujdesje e patronazh një të moshuar të vetmuar, një familje në nevojë, sepse, pavarësisht përkushtimit dhe sakrificës, kapacitetet e bashkisë janë të kushtëzuara.
“Ne operojmë mbi bazën e VKM NR.236 dhe i kemi të specifikuara kategoritë e familjeve që mbështesim me ndihma, prandaj dhe për të zgjeruar këtë proces, na duhet edhe mbështetja e të gjithë atyre që kanë mundësi, për t’ju përgjigjur më mirë nevojave reale në këto moment”, shprehet kryebashkiaku vlonjat, faenderues për të gjithë ata që janë ofruar deri në këto momente dhe me dëshirën dhe besimin se ata do të shtohen në ditët në vijim.
Pas procesit të dezifektimit të qytetit, në pikënisje të të cilit, Bashkia e Vlorës ishte ndër të parat në shkallë vendi, kjo njësi vendore është përfshirë në këtë aksion masiv, që po vlerësohet mjaft nga komuniteti./atsh
Kryeministri Edi Rama zgjodhi sot të tjera fjalë të shenjta për të përcjellë mesazhin e tij, ndërkohë që gjithë bota po përballet me pandeminë e COVID-19.
“Nuk ka gjë që peshon më shumë në peshoren e besimtarit në ditën e Qametit sesa sjellja e mirë”, citoi Rama përmes rubrikës “Fjalë të Shenjta”.
Kryeministri zgjodhi këto fjalë të shenjta nga Isaiah (26:20) për të përcjellë mesazhin e tij, ndërkohë që autoritetet shtetërore kanë marrë masa drastike duke kufizuar lëvizjen, si masë parandaluese për kufizimin e përhapjes së COVID-19.//atsh
Rama: Nuk ka gjë që peshon më shumë në ditën e Qametit sesa sjellja e mirë Read More »
Pesë respiratorët i rinj në spitalin universitare “Shefqet Ndroqi”, financim i qeverisë shqiptare do të forcojnë rezervën e kapaciteteve në përballimin e situatës së COVID-19.
Kështu u shpreh sot Kryeministri Edi Rama, i cili theksoi se “5 respiratorët e tjerë, të mbërritur në spitalin universitar “Shefqet Ndroqi”, pjesë e financimit të qeverisë shqiptare prej 54 respiratorësh të rinj, që do të forcojnë rezervën e kapaciteteve tona për terapinë intensive në përballjen me COVID-19”.
Ndërsa ditën e djeshme ministrja e Shëndetësisë dhe Mbrojtjes Sociale, Ogerta Manastirliu, tha se “në total kemi 54 respiratorë në dërgesën e parë dhe më pas do të kemi edhe 50 të tjerë e kështu me radhë, sipas porosive”./atsh
Drejtori i Përgjithshëm i Policisë së Shtetit, Ardi Veliu iu drejtua sot me një mesazh kolegëve të tij të Policisë së Shtetit për t’i falënderuar për punën e mrekullueshme.
“Në këtë periudhë mjaft të vështirë dhe krejtësisht të pazakontë në kujtesën e brezave tanë, po ju drejtohem me këtë mesazh për t’ju shprehur publikisht falënderimet e mia për punën e mrekullueshme që po bëni, si në përmbushjen e detyrave tuaja funksionale, ashtu edhe në ndihmesën e dhënë ndaj qytetarëve e shtresave në nevojë”, tha Veliu.
“Zgjodha këtë formë mesazhi, pasi nuk kam mënyrë tjetër t’i drejtohem secilit personalisht për t’i shprehur mirënjohjen time dhe të gjithë organizatës së Policisë, për sakrificat dhe përkushtimin e treguar në këto ditë, sa të trazuara, aq edhe të rrezikshme, për të gjithë ju, për të gjithë ne, si qytetarë të këtij vendi”, tha ai.
“Ndihem krenar që ju po tregoni në këto ditë vendimtare, ato vlera që përbëjnë esencën e Policisë së Shtetit, besueshmërinë, përgjegjshmërinë, shpirtin e grupit, kohezionin”, u shpreh ai.
“Më vjen mirë që keni përmbushur e madje tejkaluar jo vetëm pritshmëritë e mia si Drejtor i Përgjithshëm, por ajo që është më e rëndësishme, keni marrë vlerësimin e qytetarëve. Kjo na bën krenar të gjithëve dhe ngre në një vend nderi, emrin dhe uniformën e Policisë së Shtetit”, tha Veliu.
Ne, theksoi ai, “po përballojmë, sot, qoftë si organizatë policie, qoftë si qytetarë, një rrezik të padukshëm, deri edhe fatal, për jetën njerëzore, gjë që tregon shkallën e vështirësisë që duhet të përballoni. Por pavarësisht sfidave dhe rrezikut të përhershëm që keni përballë, ju ia keni dalë të kryeni me përkushtim çdo detyrë të ngarkuar, si për rendin e sigurinë, ashtu edhe në përkrahjen e shtresave apo individëve në nevojë”.
“Si Drejtor i Përgjithshëm, ju kërkoj ta përballoni këtë luftë me atë shpirt grupi që keni treguar, me ndjenjën më të lartë të përgjegjshmërisë dhe me vetëdijen se po i jepni një shërbim tejet të vyer kombit e atdheut. Ndiej detyrimin dhe njëherësh kam nderin t’ju shpreh vlerësimin dhe mirënjohjen për gjithë sa keni bërë dhe për sa do të bëni, deri në mposhtjen e këtij rreziku që i kanoset të gjithë njerëzimit”, shtoi Veliu.
“Në mbyllje, dua të shpreh një urim për të gjithë ju, për gjithë qytetarët, që kjo pandemi të zhduket sa më parë, në mënyrë që të kemi mundësi të shohim e t’i japim dorën njëri-tjetrit dhe të themi faleminderit për gjithë sa keni bërë e vijoni të bëni!”, theksoi Veliu./atsh
Mjeku i njohur pranë shërbimit Infektiv në Qendrën Spitalore Universitare “Nënë Tereza”, Pëllumb Pipero u shpreh sot se në këtë javë do të arrijë piku lidhur me numrin e rasteve të reja me COVID-19, ndërsa në javën e tretë të këtij muaji, do të nisë rënia.
Gjatë një interviste për një nga mediet e vendit, Pipero u shpreh se pritshmëritë janë tejkaluar për shkak të numrit të të shëruarve, ku sipas tij, kjo është meritë e mjekësisë shqiptare, po aq sa edhe e masave të marra nga qeveria dhe respektimi nga ana e qytetarëve.
“Unë besoj që pritshmëritë tona ndoshta janë tejkaluar me rastet e shëruara. Ne tashmë kemi 60-70 të shëruar dhe është një arritje e madhe për mjekësinë tonë, për bluzat e bardha, për spitalin e sëmundjeve infektive gjithashtu. Ndërkohë që falë masave të marra nga qeveria por edhe respektimit në maksimumin e mundshëm të qytetarëve, edhe të këshillave të profesionistëve për të treguar kujdes në jetën e tyre të përditshme, sa i takon masave të higjienës personale. Epidemia tek ne ose pasojat e pandemisë le të themi për fat të mirë nuk e arriti atë kurbën më majë, do të thosha atë kurbën e papërballueshme nga kapacitetet shëndetësore. Kurba ka qenë pak a shumë e zbutur, rritja ka qenë e qëndrueshme, graduale ç’ka tregon një ritëm të përballueshëm nga bluzat e bardha dhe ne e kemi përballuar më së mirë deri tani. Besoj kështu do të shkojë edhe më tej.
Më tej Pipero informoi se “kam thënë që, mbështetur në indikatorë të rëndësishëm të kësaj epidemie, unë besoj se kjo javë do të jetë java ku duhet të arrijë pikun, me numrin e rasteve të reja me COVID-19. Java tjetër do të jetë në këto nivele, por me një sheshpushimi jo në rritje më, dhe mandej do të fillojë rënia e rasteve. Unë besoj se në fillim të javës së tretë të prillit numri i rasteve do të fillojë të bjerë, natyrisht gradualisht, por do të fillojë të bjerë dhe shpresoj shumë që krahas rënies së numrit të fillojnë të zbuten edhe masat e qeverisë në raport me lëvizjen dhe rikthimin e aktivitetit ekonomik, pra të rifillojë gjallëria e saj”.
I pyetur nëse ka një rritje të numrit të të rinjve me COVID-19 së fundmi, Pipero tha se, “unë njësoj si ju, ndjek me shumë vëmendje buletinin e Ministrisë së Shëndetësisë. Në dijeninë time janë 3-4 raste të moshave të reja, por nuk di më shumë sesa kaq”.
Mjeku infeksionit u shpreh po ashtu se mënyra e kontaminimit nga ky virus mbetet kontakti i ngushtë.
“Ju kemi thënë që ky virus ka një periudhë inkubacioni shumë të gjatë. Jo të gjithë rrimë në shtëpi, dikush del nga shtëpia. Mjafton të ketë dalë para dy javësh, tri javësh apo para 10 ditësh dhe t’ia çojë virusin në shtëpi dikush nga familjarët. Pra, dua t’ju them që përmes kontakteve të afërta transmetohet. Nuk ka rrugë tjetër transmetimi përveçse kontakteve të afërta. Ndaj, vazhdojmë të këmbëngulim që qytetarët të qëndrojnë sa më gjatë në shtëpi dhe të dalin vetëm për arsye shumë të mëdha. Ju kemi thënë që ky virus prek të gjithë, nuk bën përjashtime pavarësisht sa e manifestojnë sëmundjen. Këshillat e ekspertëve duhet të jenë të zbatueshme nga të gjithë”, – tha Pipero. /atsh
Pipero: Këtë javë do të arrijë piku i epidemisë, në javën e tretë të prillit nis rënia Read More »
Presidenti Ilir Meta deklaroi mbrëmjen e sotme se “jam duke ndjekur me vëmendje dhe me shumë shqetësim situatën e qytetarëve shqiptarë të cilët ndodhen të bllokuar në pikat e kalimit kufitar me Greqinë dhe Malin e Zi”.
Ai shprehet se “situata e pritjes së tyre në kufirin shqiptar dhe pengesa që po hasin kërkon një zgjidhje të shpejtë”.
“Autoritetet shqiptare përgjegjëse të informojnë pa vonesë qytetarët tanë mbi gjendjen dhe procedurat e reja që duhen respektuar në pikat tona kufitare, të imponuara nga pandemia COVID-19, në mënyrë që të mos krijohen grumbullime të pamenaxhueshme. Në të mirë të të gjithëve, shtetasit tanë duhet të jenë në komunikim të vazhdueshëm me ambasadat dhe konsullatat tona, si dhe të evitojnë maksimalisht lëvizjet jashtë kushteve të urgjencës dhe domosdoshmërisë”, deklaron Meta.
Ai u bën thirrje të gjithëve që “duke forcuar bashkëpunimin midis qytetarëve dhe autoriteteve përgjegjëse në këtë situatë të vështirë, të tregojmë mirëkuptim e bashkëpunim, por veçanërisht solidaritet dhe përgjegjshmëri të lartë për të kapërcyer me sa më pak kosto këtë sfidë të jashtëzakonshme”. /atsh
