Aktualitet

Në shërbimin Infektiv në Tiranë aktualisht janë 66 të shtruar, të konfirmuar me COVID-19, 6 prej të cilëve janë në terapi intensive ndërsa një është i intubuar.

Përfaqësuesja e Institutit të Shëndetit Publik, Marjeta Dervishi, tha në komunikimin për mediet se “pjesa tjetër e të shtruarve në pavijon janë në gjendje të stabilizuar deri në këto momente”.

“Ndërsa në spitalin COVID 2 “Shefqet Ndroqi”, janë 5 pacientë të shtruar, 2 prej të cilëve janë të intubuar”, – shtoi Dervishi.

Sipas saj, në dy spitalet COVID-19, aktualisht po marrin shërbim 71 pacientë.

Deri në këto momente në vendin tonë janë testuar 2247 raste të dyshuara dhe prej tyre janë të konfirmuar pozitivë me COVID-19, 333 raste.

Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social./atsh

Edhe kjo fundjavë, si edhe ato të shkuarat do të jenë fundjavë izolimi, për të pamundësuar përhapjen e koronavirusit. Qytetarë shqiptarë do të mbyllen përsëri në shtëpitë e tyre, siç e tha edhe dje prof. Silva Bino në mbledhjen online të Komitetit Teknik të Ekspertëve pranë Ministrisë së Shëndetësisë dhe Mbrojtjes Sociale, i ngritur për parandalimin e përhapjes të epidemisë së koronavirusit, jo në “distancim social, por fizik”, pasi humanizmi i shqiptarëve nuk mungon as në këtë situatë.

Janë vëllezërit tanë nga Kosova, edhe ata në të njëjtën luftë me koronavirusin, që përmes një videopërshëndetjeje na japin kurajo e besim, se nuk ka virus që na ndan.

“Sot jemi të detyruar të mbyllemi në shtëpitë tona, – shprehet ministrja e Kulturës, Elva Margariti, – jo vetëm për të mbrojtur veten, por dhe për të mirën e shtëpisë sonë të përbashkët, vendit tonë. Nga vëllezërit e Kosovës na vjen kjo përshëndetje, si një himn për jetën, “me dashurinë për njerëzit tanë të mirë”!”/atsh

https://web.facebook.com/MargaritiElva/videos/3097143680337006/?t=0

“Ushtria dhe policitë bashkiake do të krijojnë urgjentisht kordonët sanitarë të tregjeve, ndërsa Policia e Shtetit do të godasë shkelësit me masa të reja”, deklaroi sot Kryeministri Edi Rama, duke ndarë foto të tregjeve të tejmbushura nga njerëzit në Tiranë.

Në kushtet kur nuk respektohet asnjë masë e distancimit social në tregje, Rama tha se “përgjigja e shtetit do të jetë reciproke për këdo që nuk do të hyjë në rresht për të mbajtur radhë”.

“Nëse ky është niveli i kuptimit të detyrës qytetare në frontin e kësaj lufte për jetë a vdekje dhe meqë mesa duket ecurinë pozitive të luftës deri tani, shumëkush po e kupton gabimisht si arsye për t’u lëshuar me idenë se s’na gjen gjë, atëherë përgjigja e shtetit do të jetë reciproke për këdo që nuk do të hyjë në rresht për të mbajtur radhë”, tha Rama.

Sipas tij, “masat e reja ndëshkimore do të jenë ligj ditën e hënë dhe për kokëshkretët do të shkohet deri në heqje lirie”.

Rama tha se “Tirana është vatra më e rrezikshme e luftës”. “Durrësi njësoj si Tirana mund të kthehet në Vaterlonë tonë. Shkodra është tanimë një bombë me sahat. Fieri është një rrezik i madh potencial. Kudo mund të na iki avantazhi që kemi krijuar, nëqoftëse do ta bëjmë si Kombëtarja Kuqezi që pjesën e parë duket sikur do fitojë, pastaj… Harrojeni, këtë luftë nuk kemi për ta humbur për ata që s’kanë mendje dhe këllqe të luftojnë si mbarë populli shqiptar”, tha Kryeministri.//atsh

Kryeministri Edi Rama reagoi sot në lidhje me aktin normativ të hyrë sot në fuqi për shtyrjen e detyrimeve të qirasë për disa kategori, për dy muaj, duke iu përgjigjur opozitës se edhe Gjermania dhe Franca kanë bërë të njëjtën gjë si Shqipëria në kohën e përhapjes së pandemisë.

“Honxhobonxhoja është dikush që jo vetëm nuk ndryshon mendim përballë faktit, po nuk ndryshon as argument”, thotë një fjalë e mençur. Dhe meqë këta honxhobonxhot opopopozitarë vazhdojnë merren me qeverinë, sepse duan të vrasin me një gur dy zogj, duke synuar nga një anë të nxisin mllef e përçarje mes popullit e qeverisë që po luftojnë së bashku, e nga ana tjetër shkatërrimin e arkës së shtetit për të nxitur rrëmuja më pas si në 97-ën, ja se kush tjetër ka bërë fiks të njëjtën gjë për qiratë”, – nënvizoi Rama.

“Gjermania – mospërmbushja e detyrimit kontraktor të pagimit të qirasë që rrjedh nga një kontratë e qirasë, nuk përbën shkak për qiradhënësin të zgjidhë kontratën. Pamundësia e përmbushjes së detyrimit të pagesës së qirasë për periudhën 1 prill 2020 – 30 qershor 2020 lidhet me gjendjen e shkaktuar nga COVID-19. Ky parashikim nuk mund të interpretohet në dëm të pronarit”, citoi Kryeministri.

“Franca – nuk mund të ndëshkohen me penalitete financiare, kamatëvonesa, dëmshpërblime, zbatimin e klauzolës së përfundimit të kontratës, apo zbatimin e çdo klauzole penale apo që aktivizon garancitë, për shkak të mospagimit të qirasë ose të tarifave të qirasë, lidhur me ambientet profesionale dhe tregtare, pavarësisht nga dispozitat kontraktuale dhe atyre të përcaktuara nga kodi tregtar. Kjo dispozitë zbatohet mbi qiratë, pagesa e të cilave duhej bërë nga 12 marsi 2020 deri në një afat prej 2 muajsh nga data e përfundimit të gjendjes së urgjencës shëndetësore”, ishte rasti i Francës.

“E pra balona tabake që ne quajmë gabimisht opozitë, ta harrojë se i bën dot Shqipërisë atë që as armiku i padukshëm nuk ka për t’ia bërë dot, sepse koha kur ky vend u katandis në balonë tauke nga këta honxhobonxho ka vdekur dhe nuk kthehet më”, – shprehet Rama.

Kryeministri Rama bëri të ditur gjithashtu se shumë shpejt do të informojë “për aktet zbatuese të aktit normativ mbi qiratë dhe njerëzit më në hall do të shohin edhe më qartë, se unë dhe kjo qeveri, jemi me ta dhe për ta deri në fund”.//atsh