Aktualitet

Kryetari i grupit parlamentar të Partisë Socialiste, Taulant Balla u shpreh sot se “një kompani private zhvillon aktivitetin e saj në Librazhd, ka filluar prodhimin e maskave mbrojtëse dhe synon të arrijë një kapacitet deri në 500 mijë maska të prodhuara në një kohë të shkurtër”.

“Kompania “SV Mega”, e cila zhvillon aktivitetin e saj në Librazhd, ka filluar prodhimin e maskave mbrojtëse. Falënderime për këtë kompani, e cila deri tani ka bërë të mundur dhurimin e maskave për spitalin e Librazhdit, Komisariatin e Policisë Librazhd, si për punonjësit e shërbimeve të bashkisë Librazhd”, tha Balla.

Ai tha se “synimi i kësaj kompanie është që me eksperiencën e fituar këto ditë emergjence, të arrijë një kapacitet deri në 500 mijë maska të prodhuara në një kohë të shkurtër”.

Balla theksoi se “materialet e përdorura janë tërësisht profesionale dhe të certifikuara”. “Në bashkëpunim me partnerët në Gjermani dhe Itali synohet edhe certifikimi i plotë i gjithë produktit”, shtoi ai. //atsh

Qytetarët me karta ID të skaduara, do ta marrin shërbimin në banka, me certifikatë personale.

Ministri i Brendshem Sandër Lleshaj, njoftoi se, në shërbim të qytetarëve, të cilët nuk kanë mundësi të rinovojnë kartat e identitetit, pasi zyrat e aplikimit janë mbyllur për shkak të pandemisë COVID-19, i ka dërguar një shkresë Bankës së Shqipërisë dhe bankave të nivelit të dytë, për të vijuar shërbimet edhe në rastet kur vlefshmëria e kartës ka përfunduar në 2020.

“Qytetari do të paraqesë në sportelin e bankës për të marrë shërbimin, certifikatën personale të shkarkuar online nga e-Albania”- tha Lleshaj. Sipas tij, e gjithë kjo, deri në fund të emergjencës së pandemisë, kur do të rinisë prodhimi i dokumenteve të identifikimit./atsh

Kryeministri Edi Rama deklaroi sot se “falë masave të shpejta e të forta dhe rezistencës së shkëlqyer të qytetarëve, në 10 ditët e fundit kemi rënie graduale të shtrimeve në mjediset spitalore COVID”.

“Shumë e rëndësishme: falë masave të shpejta e të forta dhe rezistencës suaj të shkëlqyer, 10 ditët e fundit kemi rënie graduale të shtrimeve në mjediset spitalore COVID”, iu drejtua Rama qytetarëve.

Rama tha se “ky tregues që e has shumë pak, për të mos thënë fare në vendet e tjera nën agresion, ku mbingarkesa e spitaleve po vjen si haraç për vonesat në marrjen e masave, na thotë qartë se e para, po bëjmë gjënë e duhur”.

Po ashtu, Kryeministri tha se duhet të vazhdojmë kështu, me durim të madh, sepse armikun e kemi pas çdo porte”.

“Po vazhduam kështu do të dalim më shpejt fitimtarë se shumë të tjerë, më të mirë, më të fortë dhe me kokën lart përpara brezave që vijnë nga kjo sfidë historike”, tha ai./atsh

Kryetari i grupit parlamentar të PS-së Taulant Balla ka shprehur sot mirënjohjen për efektivët e Forcave të Armatosura të cilët janë në terren në patrullimin në komunitet.

Balla tha se Forcat e Armatosura janë në vijën e parë në betejë me COVID-19.

“Mirënjohje vajzave dhe grave efektive të Forcës së Armatosur, të cilat janë në terren si pjesë e patrullimit në komunitet, për sakrificën dhe kontributin e tyre dhe të gjithë efektivëve dhe mjekëve të Forcës së Armatosur, shumë prej të cilëve janë sot në vijën e parë të betejës me COVID-19. Krenar për Forcat e Armatosura”, tha ai. /atsh