Aktualitet

Kryeministri Edi Rama deklaroi sot se, hapja do të jetë graduale dhe nuk do të ketë një “datë çlirimi” për këtë luftë.

I pyetur sot në një intervistë televizive se kur do të rifillojë puna, Rama tha se, “paralelisht me këto masa do të shkojmë, nëse do të na lejojnë shifrat që vijnë nga vija e zjarrit, që deri sot janë shumë inkurajuese, duke hapur, hapur, hapur për t’i dhënë mundësi punës të rifillojë në pjesën e saj më të madhe. Sigurisht nuk mund të hapim menjëherë restorante dhe bare, por dhe për restorantet dhe baret po punojmë do të kemi një dokument të zgjeruar, të detajuar, një rregullore të bashkëjetesës me armikun në territor se do të jetë bashkëjetesë me armikun, për një periudhë kohe”.

Rama shtoi se, “ajo që ne duhet të bëjmë tani është të lëvrojmë nga arka e përbashkët, e shtëpisë sonë së përbashkët, e buxhetit të shtetit, një masë të konsiderueshme parash që do t’u shkojnë të gjithë atyre që sot janë në këto halle që po flasim për të pasur qetësi deri në periudhën e fundmajit, ku do të shikojmë pastaj përsëri se sa janë ata që kanë rifilluar punë, sa janë ata që nuk e kanë rifilluar dot, dhe me ndihmën e Zotit nuk do të kemi armikun në kundërsulm”.

I pyetur nëse kemi një datë për hapjen, Rama tha se, “hapja nuk do të jetë si një ditë çlirimi. Kjo është një luftë jokonvencionale, kjo nuk është njësoj si luftërat me të cilat ne jemi mësuar nga historia, nga librat, nga filmat apo qoftë dhe nga eksperienca e Kosovës, kur fundi i regjimit në Beograd dhe tërheqja e forcave agresore në Kosovë solli ditën e Çlirimit. Këtu nuk do të ketë ditë Çlirimi, këtu do jetë një periudhë tranzitore mes pushtimit në të cilin ne jetojmë dhe Çlirimit. Pra do të jemi në një hapje graduale pjesë-pjesë dhe do të bashkëjetojmë me armikun. Pra do të bashkëjetojmë me idenë dhe vetëdijen që çdo moment mund të infektohemi dhe çdo moment mund të na ndodhi ajo që nuk duam të na ndodhi. Për këtë arsye duhet të përgatitemi për një jetë, mund të zgjasë 2, 3, 5, 6, 10 muaj. Në shumë vende të botës thonë 3 vjet, nuk e di, larg qoftë, që duhet të mësohemi me një jetë që do jetë me rregulla të tjera. Nuk ka të shkosh në pazar dhe të bësh siç ke bërë më parë, me radha, me hyrje me numra të caktuar në mjedis tregtar, me pritje me të gjitha ato që do na duhen”.

“Do shkojmë në plazh, më pyesin njerëzit. Unë shpresoj që po, por nuk do të shkojmë siç jemi mësuar të shkojmë. Do të shkojmë në plazh, por duke respektuar disa rregulla, për të cilat ne po punojmë, që të mbrojmë veten dhe të tjerët. Pra hapja do të jetë graduale”, – tha Rama.

I pyetur nëse gjendja e turizmit pritet të jetë e mjeruar këtë vit, Rama tha se, “mund ta themi, por mund të ndodhë dhe disi ndryshe, jo shumë ndryshe, sepse fjala e mjeruar është një fjalë shumë e rëndë dhe patjetër që në momentin që flasim nuk duket pa vend”. /atsh

Shërbimi Meteorologjik Ushtarak bën me dije se moti sot parashikohet i kthjellët në të gjithë vendin.

Era do të fryjë me drejtim verilindje-veriperëndim 1 deri 5 m/s. Përgjatë vijës bregdetare hera- herës deri në 10 m/sek.

Valëzimi në dete parashikohet i forcës 2 dhe 3 ballë.

Temperaturat parashikohen:

QYTETET Temperaturat në °C Sigla
Shkodër 11/24 diell
Kukës 7/22 diell
Lezhë 12/25 diell
Dibër 7/19 diell
Durrës 12/25 diell
Tiranë 9/25 diell
Elbasan 11/26 diell
Berat 5/25 diell
Vlorë 12/24 diell
Korçë 4/19 diell
Gjirokastër 5/23 diell
Sarandë 13/24 diell/ atsh

Kryeministri Rama reagoi sot ndaj deklaratave të opozitës për zgjerim të paketës financiare.

Rama shprehet se kreu i PD-së, Basha nuk mendon sesi të ndihmojë, por vazhdon avazin e vjetër 7×7=42.

Kryeministri Rama theksoi se Basha ëndërron protesta të mëdha nesër, duke i thënë popullit sot se Covidi është Sudja me thasë me para.

Por, shtoi Rama, Shqipëria do ta fitojë këtë luftë dhe LBPD do t’i mbetet vetëm turpi e dështimi i radhës

“LBPD nuk mendon si të ndihmojë, se as nuk do as nuk di, po vazhdon avazin e vjetër 7×7=42 dhe ëndërron protesta të mëdha nesër, duke i thënë popullit sot se Covidi është Sudja me thasë me para! Shqipëria do ta fitojë këtë luftë dhe LBPD do t’i mbetet vetëm turpi e dështimi i radhës”, u shpreh Kryeministri Rama në reagimin e tij.

Basha deklaroi sot se qeveria duhet të shpërblejë financiarisht punonjësit e Policisë së Shtetit. “Punonjësit e policisë janë në vijën e parë dhe ndër më të ekspozuarit ndaj rrezikut. Ata janë në shërbim me dhe pa orar në të gjithë vendin”, tha Basha.

Po sot, nënkryetari i PD-së, Spaho i cili tha se “qeveria duhet të rishikojë skemën e garancisë sovrane për të lehtësuar realisht biznesin me kërkesa të thjeshtuara dhe norma interesi që përballohen nga buxheti”./atsh

“Mbi të gjitha sot është mbrojtja e jetës së çdo shqiptari”, deklaroi Kryeministri Edi Rama.

Kryeministri Rama publikoi sot grafikun që tregon përhapjen e COVID-19 në të gjitha vendet.

Rama theksoi se “të gjitha kanë rëndësinë e tyre, po mbi të gjitha sot është mbrojtja e jetës së çdo shqiptari dhe ecja çdo ditë të bashkuar, popull dhe shtet, drejt fitores së kësaj lufte që nuk e zgjodhëm, por kemi detyrën ta fitojmë!”.

Rama u shpreh se, “nëse sot jemi në këtë pikë, e jo mbi ndonjë mal me të vdekur, kjo është falë nesh e mënyrës se si e kemi bërë luftën deri këtu, shtet e popull bashkë si një trup i vetëm dhe vetëm prej nesh varet tanimë ta çojmë deri në fund kështu këtë luftë”.

Ministria e Shëndetësisë njoftoi sot se deri të enjten e 9 prillit, numri i të prekurve me COVID-19 ka shkuar në 409 raste, ku në 24 orët e fundit janë identifikuar 9 raste të reja./atsh

Drejtoresha e Përgjithshme e Tatimeve, Delina Ibrahimaj bëri të ditur se kanë aplikuar për të përfituar pagën e luftës 21 mijë biznese, nga të cilat për 12 mijë e 640 është miratuar kërkesa.

Pjesa tjetër, bëri të ditur Ibrahimaj në një prononcim në media, nuk përfshihet në kategorinë e personave që përfitojnë, ose strukturat e administratës tatimore po verifikojnë në terren situatën.

Ibrahimaj u shpreh se procesi i verifikimit të të gjitha rasteve do të përfundojë më datë 10 maj.

Ibrahimaj apeloi qytetarët dhe përfaqësuesit e biznesit që të dërgojnë në adresat e e-mail të vëna në dispozicion nga DPT-ja çdo ankesë të tyre.

“Ne kemi vendosur enkas adresat e e-mail-it, ku tatimpaguesit të ankohen. Kërkesat e tyre do të rivlerësohen nga DPT”, theksoi Ibrahimaj.

Po ashtu, ajo bëri të ditur se në mjaft raste kanë aplikuar për të përfituar pagën e luftës edhe biznese që nuk janë të mbyllura, por po vijojnë aktivitetin.

Gjithashtu Ibrahimaj tha se as qytetarët dhe as biznesi nuk është penalizuar për shkak se ka vendosur të dhënat gabim.

E pyetur lidhur me deklaratën e ish-deputetes Tabaku se ka seleksionim në përzgjedhjen e bizneseve, Ibrahimaj e mohoi një fakt të tillë duke theksuar se: “Kjo është e pavërtetë. Diskriminim dhe seleksionim nuk mund të ketë. Jemi të hapur që të bëjmë transparente procedurat”./atsh

Flamuri amerikan në fasadën e bashkisë së Tiranës është shprehje e bukur miqësie dhe solidariteti në kohë të vështira për të gjithë.

Ambasadorja e Shteteve të Bashkuara të Amerikës, Yuri Kim falënderoi sot Kryetarin e bashkisë së Tiranës, Erion Veliaj dhe të gjithë miqtë shqiptarë për mbështetjen dhe solidaritetin e treguar ndaj popullit amerikan.

“Flamuri amerikan në fasadën e bashkisë së Tiranës në! Një shprehje kaq e bukur miqësie dhe solidariteti në kohë të vështira për të gjithë ne”, është shprehur Kim.

“Miku i mirë njihet në kohë të vështira! Faleminderit kryetarit të bashkisë Erion Veliaj dhe të gjithë miqve shqiptarë!”, ka theksuar ambasadorja amerikane.

“Së bashku, jo vetëm do ta mundim COVID-19 – ne do të jemi edhe më të fortë”, ka shtuar ambasadorja Yuri Kim./atsh