Aktualitet

Ministrja e Shtetit për Marrëdhëniet me Parlamentit dhe Zëdhënësja e Qeverisë, Elisa Spiropali, tha se shtyrja e gjendjes së fatkeqësisë natyrore ishte e rëndësishme për garantimin e jetës së qytetarëve, aq sa është e rëndësishme marrja e masave lehtësuese për të patur një dëm sa më të vogël në ekonomi.

Në një komunikim në TV, Spiropali tha se “pikërisht për të ruajtur jetën e qytetarëve dhe për të garantuar që ekonomia të vazhdojë punë të ndizet e funksionojë normalisht, për të patur një dëm ekonomik sa më të vogël, ne duhet patjetër ta votonim shtyrjen e gjendjes së fatkeqësisë natyrore dhe duhet patjetër të respektojmë ligjet sipas Kodit të ri Penal”.

“Shqipëria do jetë në gjendje të fatkeqësisë natyrore, që do të thotë se do të funksionojë me një set rregullash, masash, ligjesh që janë të posaçme për gjendjen e fatkeqësisë natyrore deri më tani. Pra qeveria mund të kufizojë daljen e qytetarëve me fasho siç është bërë më tani, mund të mbyllë biznese të caktuara nëse kanë rrezikshmëri. Pra gjendja që kemi qenë deri më tani, ama nuk do jemi siç kemi qenë në mbyllje totale dhe karantinim, sepse ne kemi një plan të hapjes së mëtejshme me radhë me përshkallëzim të bizneseve të vogla që ndihmojnë ekonominë familjare, të rritjes së fashës së lëvizjes me dy orë e gjysmë e në vazhdim, pra dy javët e ardhshme do jetë një hapje e ngadalësuar e masave dhe lirimit të tyre”, u shpreh Spiropali.

Në lidhje me qëndrimet kundër shtyrjes sot në Kuvend të gjendjes së fatkeqësisë natyrore nga opozita e re, dhe deklarimet e deputetit Murrizi, Spiropali tha se “opozita e re foli shumë për dashurinë mes liderëve, Presidentit dhe Kryeministrit, por harroi se ne nuk jemi në kohë dashurie, por ne jemi në kohë kolere, në kohë flame dhe nuk e kemi mendjen për të tilla histori”.

“Ajo që ata kritikojnë është në fakt një vendim krejt normal i Presidentit të Republikës për të bashkëpunuar për ndryshimet në Kodin e ri Penal, një domosdoshmëri e plotësimit të së drejtës tonë penale që kishte mangësi të theksuara për sa i përket gjendjes së epidemisë apo gjendjes të fatkeqësisë natyrore. Do kemi kohë për t’u kthyer nga lufta te dashuria e te paqja. Kjo nuk është koha. Presidenti ka bërë një akt normal të kreut të shtetit, pra ka dekretuar një ndryshim në Kod Penal që është i domosdoshëm në një kohë të tillë”, tha Spiropali.

Në lidhje me riatdhesimin e shqiptarëve, Spiropali tha se “të gjithë japin mend se si duhet trajtuar virusi. Ca flasin për teste, ca flasin të mbyllen nëpër shtëpi dhe ne nuk kemi ndërmend të dëgjojmë njerëz që nuk marrin vesh për ketë punë sepse ne këshillat i marrim me Komitetin Teknik të Ekspertëve dhe nuk kemi ndërmend të dëgjojmë amatorë, kur kemi shkencëtarë dhe doktorët që marrin këto vendime”.

“Virusi ka një fazë inkubacioni, nuk është e lehtë të përcaktohet, duhet të rrinë 14 ditë të mbyllur. Ne nuk mund të shkojmë shtëpi në shtëpi për të ruajtur qytetarët sepse janë me mijëra që po riatdhesohen, kjo është gjetja më e mirë, por dhe një praktikë që po e bëjnë edhe vendet e tjera”, tha ajo.

Po ashtu, Spiropali tha se “ne i mirëpresim shqiptarët, kushtet janë të mira, hotelet janë negociouar nga qeveria dhe ministri i Turizmit. Duhet të rrinë aty 14 ditë dhe më pas mund të dalin për të takuar familjarët e tyre”. /atsh

Kryetari i PD-së Lulzim Basha tha sot se qeveria është e paaftë për t’u përballur me krizën.

I ftuar në një emision televiziv për situatën e pandemisë, Basha tha se “ka një paradoks të jashtëzakonshëm me atë që ka ndodhur sot. Sot ka zyrtarisht ka 29 të infektuar kaq sa ishin edhe në 4 prill. Pra, ndërkohë që 6 javë i është kërkuar shqiptarëve sakrificë duket se kurba e infeksioneve jo vetëm që është po aq e destabilizuar sa gjuha dhe veprimet e qeverisë dhe kryeministrit, por karantina dhe vetizolimi, distancimi social që qytetarët ç’është e vërteta e kanë respektuar me rigorozitet të lartë nuk po jep frytet. Pse?! Sepse qeveria nuk po bën detyrat”.

“Sepse nga njëra anë lihen bombat me sahat që kemi 1 muaj që i paralajmërojmë, si fasoneritë të cilët shpërthejnë dhe pastaj përhapin infeksione në territore të tëra. Kruja, Kurbini, janë dy territore që janë shtuar në numra të frikshëm të infektuarish, pse? Sepse qeveria nuk e zgjidhi qesen për të paguar një minimum jetik për punonjëset, për nënat, për vajzat e këtyre fasonerive. Sepse e ka mendjen që këto para të vazhdojë të ja japë oligarkëve. Ku janë lekët e shqiptarëve? Se këto nuk janë lekët e Edi Ramës, këto janë lekët e taksave të shqiptarëve. Si asnjë popull tjetër në Ballkan, shqiptarët në 7 vite të qeverisjes së Edi Ramës kanë parë t’u rriten taksat nga viti në vit, kanë parë faturat t’u rriten nga viti në vit. Tani që kanë nevojë për këto para që janë paratë e tyre, tani që kanë nevojë për ndihmën e shtetit, tani shteti zhduket apo bën vetëm propagandë dhe pastaj bëjnë zgjatje të gjendjes së emergjencës”, tha ai.

Basha tha se qeveria nuk bën mjaftueshëm testime dhe s’ka marrë asnjë masë.

“Shqipëria bën 5 herë më pak teste se Maqedonia, pasi nuk u përgatit në kohë për situatën. Pse rekomandimet e OBSH-së në Shqipëri u zbatokan 5 herë më pak se në Maqedoninë e Veriut?! Jo, jo. E para e punës kjo ndodh, sepse këta nuk kanë mjaftueshëm kite testimi dhe kjo është arsyeja përse prej 2-3 javësh unë i kam kërkuar ndërkombëtarëve dhe në veçanti SHBA, BE, por edhe OBSH – që të na ndihmojnë në këto sektorë prioritarë, në veçanti tek testimi. Këta akoma nuk mjaftueshëm kite testime. Shpresoj se me ndihmën e partnereve tanë të arrijmë, por këta s’kanë bërë asgjë në këtë drejtim. Kjo qeveri nuk ka ndërmarrë asnjë masë dhe ka gënjyer se tha ‘i kam ndërmarrë masat’”, tha ai.

Basha shton se “në qoftë se do të bëhej testim i mjaftueshëm, sa më shumë testohet, aq më shumë të infektuar dalin. Aty ku rritet testimi, rritet edhe numri i zbulimeve. Por kjo do të tregonte, do të nxirrte në pah atë që çdo shqiptar Shqipëria është vendi ku qeveria nuk ka ngritur as gishtin më të vogël për të ndihmuar familjet, për të ndihmuar bizneset, por i ushqen me lugë bosh dhe i ushqen me të dhëna të rreme. Pse? Pikërisht për të fshehur dështimin e saj total në përballimin e kësaj krize”, tha ai. /atsh

Kreu i grupit parlamentar të PS-së, Taulant Balla kërkoi sot vendosjen e përdorimit të detyruar në publik të maskave nga qytetarët.

Balla gjithashtu vuri theksin se nuk ka respektim të masave nga ana e deputetëve, duke kërkuar që Kuvendi të mos vazhdojë seancën.

“Maska nuk është kombinim me veshjen, është një detyrim. Kuvendi duhet të ishte model”, tha Balla

“Përsa kohë të gjitha shtetet e Gjermanisë sot kanë miratuar në Kuvend përdorimin e maskës në çdo ambient publik do ta nxisja qeverinë të ndjeki shembujt më të mirë”, theksoi Balla.

“Maska nuk është vetëm për t’u mbrojtur, por edhe ai tjetri që nuk e mban, mund të kthehet në një shpërndarës të armikut”, tha Balla.

Balla gjithashtu sqaroi edhe pse qeveria ka kërkuar zgjatjen e gjendjes së jashtëzakonshme.

“Sot janë 29 raste të reja”, u shpreh Balla, i cili iu drejtua deputetit Gjoni, “Z. Gjoni ju thatë që nuk është ndonjë gjë e madhe se kemi 27 jetë të humbura, për mua edhe një jetë e humbur është fatkeqësi. Kur të keni mundësi bëjini një telefonatë kolegut Adriatik Alimadhi. Pyeteni si është të kalosh COVID-19 dhe pastaj hajde na shisni dëngla këtu”.

Balla u shpreh se kjo është një situatë e vështirë, një gjendje e vështirë. Ne iu shprehim ngushëllimet atyre familjeve që kanë humbur të dashurit. Lutemi për ata që janë në gjendje të vështirë. Në këtë situatë kaq sfiduese, për qeverinë, për sistemin tonë shëndetësor gjej rastin t’i falënderoj mjekët për punën heroike gjatë këtyre javëve”, tha Balla.

Balla shprehu “mirënjohje ndaj shprehjes së ndërgjegjes qytetare në nivelet më të larta që kanë bërë mjekët, infermierët dhe sepse ndonjëri këtu u mundua ta përdorte atë simbolikë që patën misionet e mjekëve dhe infermierëve në Itali ai prej 30 mjekësh dhe infermierësh dhe i dyti me 60 infermierë që do të shërbejnë në Marche. Ai ka qenë modeli sesi duhet të jetë bashkëpunimi në Bashkimin Europian”.

“Kolegë edhe këto masa të sotme që përfshihen në gjendjen e fatkeqësisë natyrore kanë në fakt mesazhin që jemi ende në një situatë delikat. Rreziku jemi më shumë ne njerëzit se sa virusi. Ne sot jemi rrezik potencial i vetvetes. Sulmi i armikut padyshim që nuk na gjeti në befasi. Ne kemi kaluar për mrekulli këtë fazë të parë, nuk numërojmë dhjetëra të vdekur në ditë, por shohim përditë se si kemi arritur të kemi një kurbë që është më në kontroll se në vendet e Europës. Nuk shohim të na mungojnë shtretërit e spitaleve, apo të na vdesin njerëzit nga mungesa e respiratorëve. Nuk kemi të vdekur që s’kemi ku i varrosim siç ka ndodhur në vende më të mëdha se ne. Çdo masë e marrë prej qeverisë deri tani ka dhënë rezultate të mira që deri në mars dukeshin të paimagjinueshme. Pas Italisë ishim të dytët që mbyllëm shkollat. Pa këto masa s’do ishim në këtë situatë”, deklaroi Balla.

Balla shprehu vlerësim për Shërbimin Epidemiologjik Shqiptar, “ata hetues që shkojnë në shtëpi më shtëpi për të identifikuar çdo person të prekur nga virusi”.

“Gjatë këtyre 37 ditëve, përveç luftës me armikun e padukshëm u zhvillua edhe këtu në sallë një betejë me panikun që tentuan që hapnin përfaqësues të opozitës rrugore. Hall më të madh për një vend se të kesh një opozitë që të kundërshtojë thirrjet për higjienën dhe të qëndrojë në shtëpi, s’mund të ketë. Më pas nisi një histeri për testet masive, që e rrëzoi OBSH dhe më pas shkuan deri tek fshehja e vdekjeve, nën udhëheqjen e doktor vdekjeve. Po mirë ju në Shqipëri jetoni? Apo jeni turistë. Unë njoh një turist, por s’ju dija juve. Po ku e fsheh shqiptari njeriun e vdekur? Shqiptari ka disa zakone ku dhe në këto ditë të vështira lufte, janë respektuar një më në rregullat. Si mund të dali një njeri që ka qenë president i këtij vendi , nga mëngjesi deri në darkë e të flasë se po fshihen kufomat. Thirrja ime për kolegët e opozitës parlamentare, me të cilët kemi bashkëpunuar dhe do të bashkojmë, hiqni dorë nga kjo lloj histerie dhe kjo politikë paniku”, tha Balla.

“Nëse nuk do e kishim zgjatur sot gjendjen e situatës së fatkeqësisë ju do vinit të thoshit pse nuk e zgjasni. Po nëse ne nuk e zgjasim gjendjen e fatkeqësisë natyrore, misioni më i rëndësishëm, ai humanitar që qeveria mori që në ditët e para, që në 14 mars nuk mund të vazhdojë”, theksoi Balla.

Balla foli edhe për pagesën prej 400 mijë lekë që parashikohet në paketën e zgjeruar ekonomike. “Cila nga qeveritë e rajonit e ka bërë këtë, ka mundur të dërgojë kesh në shtëpi 400 dollarë mbështetje financiare, e cila për këllqet dhe shpatullat e financave të Shqipërisë është e vështirë, por ishte e domosdoshme”, tha Balla.

Sa i përket marrëdhënieve me Presidentin Meta, Balla tha se, “nuk ka asnjë marrëdhënie të re dhe asnjë marrëdhënie të vjetër me Ilir Metën. Ai është Presidenti i Republikës. Ne jemi shumica qeverisëse dhe kemi komunikuar dhe me Institucionin e Presidencës që të mos zgjaten procedurat. Prej ditës së djeshme, me ndryshimet dhe sanksionet kemi kodin e ri”, tha Balla./atsh